Pune Kowe La Xötre Ka Tha Idrei

Ka tru Ioane koi Iesu, ngo nemene la aqane goëe angeic hnei itre atr? Öni Iesu, ame la “xötr atr celë,” “ceitu i angatr me itre nekönatr ka lapa ngöne la hna maketr, angatr a sue kowe la itre sine ce elo me hape: ‘Hne huni hna elo miuzik koi epun, ngo tha fia kö; hne huni hna treij ngo tha hace kö epun.’ ”—Mataio 11:16, 17.

Nemene la alien? Nyidrëti a qejepengöne me hape: “Tha hnei Ioane kö hna xeni me ij, ngo önine la itre atr ka hape: ‘Ka trene dremoni angeic.’ Nge traqa pi hi la Nekö i atr a xeni me ij, ngo önine la itre atr: ‘Hanawang! Kolo tru hna xen, me tru hna iji waina, me sinee ne la itre ka hle mani me itre ka kuca la ngazo.’ ” (Mataio 11:18, 19) Hnei Ioane hna mel tune la Nazeri, ketre aqane mel hna tha nyi pengön, nge goi tha iji waina fe angeic, ngo önine la xötr atre celë, hna löthi angeic hnei dremoni. (Numera 6:2, 3; Luka 1:15) Nge ame pena Iesu, hnei nyidrëti hna mel tui nöjei atr. Nyidrëti a xeni me ij ngöne la tulu, ngo hna qeje nyidrë ka hape, atre sasaithi tulu. Eje hi, thatreine kö troa amadrinë nöjei atr.

Iesu a aceitunë angatr me itre nekönatr ngöne hna maketr ka xele ma fia la kola elo miuzik koi angatr, me xele ma treij la itre xan a treij. “Haawe,” öni Iesu, “kola mama la inamacan hnei huliwa.” (Mataio 11:16, 19) Eje hi, itre “huliwa”—ene la hna kuca hnei Ioane me Iesu—a anyipicine laka, trengathoi la hna qaja hnei itre atr.

Thupene la Iesu a ase qaja ka hape, xötre atr lai ka tha idrei, nyidrëti a qaja amamane jë la engazone la itre traon e Korazin, me Bethesaida, me Kaperenauma, traon hnei nyidrëti hna kuca la iamamanyikeu. Öni Iesu jë hi ka hape, maine kuca ju nyidrë la itre huliwa cili ngöne la itre traone ne Kanana e Turo me Sidona, tro hë la itre traone cili a ietra. Thupene lai, nyidrëti pena a qeje Kaperenauma, traon hnei nyidrëti hna pane lapa aqeany. Ngo ame fe cili, ala nyimu la itre ka tha idrei. Öni Iesu kowe la traon: “Loi ju kö la nöje Sodroma hui nyipunie elany ngöne la Drai Ne Iameköti.”—Mataio 11:24.

Thupene lai, Iesu a atrune jë la Keme i nyidrë, ke hnei Akötresie hna juetrëne la itre ini ka tru koi “itre ka inamacan,” me qejepengön koi itre ka ipië tune la itre nekönatr. (Mataio 11:25) Matre Iesu a hëne jë la itre ka ipië me hape: “Trohemi koi ni ange ka kucakuca me hace, nge tro ni a aegöcatrenyi nyipunie. Ce huliwa jë me eni, nge inine jë theng, ke meköti ni me ipië. Nge e tro nyipunieti a tun, tro hë nyipunie a catr, ke tha hace kö troa ce huliwa me eni, nge tro hë nyipunie a eatrëne lo hnenge hna ahnithe koi nyipunie. Ke eje hi, tha hace kö la hnenge hna ahnith, nge hmaloi e troa thu.”—Mataio 11:28-30.

Iesu a aegöcatrene tune kaa la itre atr? Itre hene ne hmi a xomacone la mele ne la itre atr jëne la itre hna majemin, tune la nöjei wathebo göi Sabath. Ngo Iesu pe a aegöcatrenyi angatr jëne la itre nyipici göi Akötresie, itre nyipici hna tha apoizinën hnei qenenöj. Hnei nyidrëti fe hna akeukawane la itre hna akötrën hnei politik, me itre ka hace fë la itre ngazo hna kuca. Eje hi, hnei Iesu hna qaja la aqane troa nue la itre ngazo i angatr, me aqane tro angatr a iloi me Akötresie.

Ame la nöjei atr ka kapa la itre huliwa i Iesu, ijije tro angatr a nue la mele i angatr koi Akötresie, me nyihluene la Keme së e hnengödrai, ka menyik nge ka iutipi. Tha hace kö troa kuca lai, ke tha hace kö la itre wathebo i Akötresie.—1 Ioane 5:3.