“Trohemi Koi Ni, . . . Nge Tro Ni a Aegöcatrenyi Nyipunie”

1. Thenge la hna qaja ngöne Mataio 11:28-30, nemene la hna thingehnaean hnei Iesu?

HNEI Iesu hna thingehnaeane kowe la itre atr ka drei nyidrë, ka hape: “Trohemi koi ni, . . . nge tro ni a aegöcatrenyi nyipunie.” (E jë la Mataio 11:28-30.) Tha tro kö sa wangacone la itre trengewekë i Iesu. Pane mekune jë lo hnei nyidrëti hna kuca kowe la föe hna tithi hnene la ketre meci ka pë nyin.

2. Nemene la hna kuca hnei Iesu kowe la föe hna tith hnei mec?

² Kola hleuhleu me akötre la föe, matre eahlo a aja ixatua. Nyimutre la itre droketre hnei eahlo hna wang. Ngo 12 lao macatre ne eahlo a lapa fë la meci eahlo, pëkö ka atreine nyinyine la meci eahlo. Ame ngöne la Wathebo hnei Iehova hna hamën koi Mose, kola qaja ka hape, ka pui ngazo eahlo. (Lev. 15:25) Ngo hnei eahlo hna dreng laka, atreine hi Iesu nyinyine la itre mec. E cili, hnei eahlo hna thele nyidrë. Ame hë la kola öhnyi Iesu, hnei eahlo hna ketr la pune iheetre i nyidrë, ene pe, loi pi hi la meci eahlo! Tha hnei Iesu hmekuje kö hna nyinyine la meci eahlo. Hnei nyidrëti fe hna thiina ka menyik me hnimi eahlo me metrötrë eahlo. Hnei nyidrëti hna ithanata koi eahlo cememine la metrötr, me qaja la itre trengewekë ka keukawa, me hë eahlo ka hape, “neköng.” Celë hi ka aegöcatrene la föe!—Luka 8:43-48.

3. Nemene la faifi lao hnying hne së hna troa sa?

³ Hnene la föe hna tro koi Iesu. Hnei eahlo hna nue trengecatr matre troa wai Iesu. Ketre tu së fe enehila, loi e tro sa nue trengecatr matre troa ‘tro’ koi Iesu. Nyipici laka, tha tro kö Iesu a kuca la itre iamamanyikeu, me aloine la mec ne la itre ka ‘tro’ koi nyidrë. Ngo nyidrëti palahi a könë së me hape: “Trohemi koi ni, . . . nge tro ni a aegöcatrenyi nyipunie.” Ame ngöne la tane mekun celë, easa troa sa la faifi lao hnying: Nemene la aqane tro sa ‘tro’ koi Iesu? Nemene la aliene la hna qaja hnei Iesu, ka hape: “Xomejë la nyine isilikeunge hui nyipunie”? Nemene la ini hne së hna xom qa ngöne la tulu i Iesu? Pine nemene matre kola aegöcatrenyi së, hnene la huliwa hna ahnith hnei Iesu? Nge nemene la aqane tro sa kepe thangane qa ngöne la hne së hna kapa la nyine isilekeun i Iesu?

“TROHEMI KOI NI”

4-5. Nemene la aqane tro sa ‘tro’ koi Iesu?

⁴ Ame la ketre aqane tro sa ‘tro’ koi Iesu, tre, troa inine la itre hnei nyidrëti hna qaja me kuca. (Luka 1:1-4) Isa qanyi së kö thele la hna qaja hnei Tusi Hmitrötr göi Iesu. Ketre, easa ‘tro’ koi Iesu, ngöne la easa xomi bapataiso me hane ketre atre drei Keriso.

⁵ Easë fe a ‘tro’ koi Iesu, ngöne la easa thele ixatua thene la itre qatre thup. Angatre hi la itre “ahnahna” hna upe hnei Iesu, matre troa thupëne la itre mamoe i nyidrë. (Efe. 4:7, 8, 11; Ioane 21:16; 1 Pet. 5:1-3) Loi e tro sa tro troa sipo ixatua kowe la itre qatre thup. Tha tro kö sa mekun laka, atre hë angatr la itre mekun me itre aja së. Hanawang la hna qaja hnei Julian: “Hnenge hna nue la huliwang ngöne la Bethela ke, hna tithi ni hnei mec. Hnene la ketre sineeng hna ithuecatr koi ni troa thele ixatua thene la itre qatre thup. Ame ngöne lo xötrei, tha nyipiewekë kö koi ni la ixatua i angatr. Ngo ame e thupen, hnenge hna sipo ixatua kowe la lue qatre thup. Ketre ahnahna ka tru la nyidroti a wai ni.” Tune la lue qatre thup ka wai Julian, itre qatre thup a xatua së troa atre la “aqane waiewekë i Keriso.” Angatr a xatua së troa trotrohnine la tulu i Iesu me nyitipu nyidrë. (1 Kor. 2:16; 1 Pet. 2:21) Eje hi, ketre ahnahna ka tru la kola xatua së hnene la itre qatre thup.

“XOMEJË LA NYINE ISILIKEUNGE HUI NYIPUNIE”

6. Nemene la aliene la Iesu a qaja hape: “Xomejë la nyine isilikeunge hui nyipunie”?

⁶ Ame lo Iesu a qaja ka hape, “Xomejë la nyine isilikeunge hui nyipunie,” tre, kösë nyidrëti a qaja ka hape, “Kapa ju la musing,” maine “Ce thue jë me eni la nyine isilikeung, matre tro sa ce huliwa koi Iehova.” Kolo lai a amamane laka, nyipiewekë tro sa catre huliwa.

7. Thenge la tusi Mataio 28:18-20, nemene la huliwa nyine tro sa kuca, nge nemene la ka xecie koi së?

⁷ Easa kapa la ihë i Iesu ngöne la easa nue la mele së koi Iehova, me xomi bapataiso. Iesu a hëne la nöjei atr troa ‘tro’ koi nyidrë. Tha tro kö nyidrëti a sawa la ketre atr ka ajane troa nyihlue i Akötresie. (Ioane 6:37, 38) Tru la madrinene la itretre drei Keriso troa kuca la huliwa hna ahnithe koi Iesu hnei Iehova. Xecie koi së laka, tro kö Iesu a xatua së troa eatrëne la huliwa cili.—E jë la Mataio 28:18-20.

“ININE THENG”

8-9. Pine nemene matre ka easenyi koi Iesu la itre atr ka hni ka ipië, nge nemene la itre mekun hne së hna troa isa thel?

⁸ Iesu a easenyi kowe la itre atr ka hni ka ipië. (Mat. 19:13, 14; Luka 7:37, 38) Pine nemen? Pane mekune jë la eisapengöi Iesu me angetre Faresaio. Itre hene ne hmi angatr ka pë ihnimin, nge ka pi mama. (Mat. 12:9-14) Ame pe Iesu, ka ihnimi nyidrë me hni ka ipië. Ame la angetre Faresaio, tre, angatr a pi mama me pi draië hune la itre xan. Öni Iesu ka hape, tha aqane ujë kö lai. Hnei nyidrëti hna inine la itretre drei nyidrë, troa hni ka ipië me nyihluene la itre xan. (Mat. 23:2, 6-11) Itre Faresaio a musinëne la itre atr. Kola xou hnene la itre atr ke, maine tha drei angetre Faresaio kö hnei angatr, tro ha traqa koi angatr la ketre ewekë ka ngazo. (Ioane 9:13, 22) Hnei Iesu hna akeukawane la hni ne la itre xan, jëne la itre thiina i nyidrë me itre trengewekë ka ithuecatr.

⁹ Hnei easë kö hna hane xomi ini qa ngöne la tulu i Iesu? Loi e tro sa isa hnying ka hape: ‘Hapeu la aqane goeë ni hnene la itre xan, ka hni ka ipië ni? Hapeu, eni kö a kuca la itre huliwa hna wangacon, matre troa ixatua? Hapeu, ka loi kö la thiinang kowe la itre xan?’

10. Tune kaa la mele ne la itre ka ce huliwa me Iesu?

¹⁰ Hnei Iesu hna thupën, matre tro la itre ka ce huliwa me nyidrë a mele tingeting. Madrine catre nyidrëti troa ini angatr. (Luka 10:1, 19-21) Hnei Iesu hna ithuecatre kowe la itretre drei nyidrë troa hnying, nge aja i nyidrëti troa atre la itre mekuna i angatr. (Mat. 16:13-16) Tune la aqane cia hlöeë la itre feja ngöne la gatran, kola kökötre la lapaunene la itretre drei Iesu. Hnei angatr hna kapa me trongëne la itre ini hna hamën hnei Iesu, ngöne la mele i angatr.

11. Nemene la itre mekun nyine tro sa isa thel?

¹¹ Hapeu, epuni kö a cilëne la ketre hnëqa me musi hune la itre xan? Maine eje hi, pane hnyinge jë ka hape: ‘Nemene la aqane ujëng kowe la itre xan ngöne la hna huliwa maine ngöne la hnalapa? Eni kö a thele tingeting? Eni kö a ithuecatre kowe la itre xan, troa hane hnying? Nge eni kö a dreng la itre mekuna i angatr?’ Tha tro pi kö sa tui angetre Faresaio. Hnei angatr hna wesitr ngöne lo kola thipetrije la itre ini hnei angatr hna hamën. Nge hnei angatr hna qanangazone la itre ka tha hane kö kapa la itre ini angatr.—Mar. 3:1-6; Ioane 9:29-34.

“TRO NYIPUNIETI A ÖHNE LA HNA MANO”

12-14. Pine nemene matre kola aegöcatrenyi së la easa kuca la huliwa hna hamën hnei Iesu?

¹² Pine nemene matre kola aegöcatrenyi së la easa kuca la huliwa hna hamën hnei Iesu? Nyimutre la itre kepin, ngo tro hi sa ce wang la itre xan.

¹³ Easa ce huliwa memine la itretre thup ka lolo. Iehova, la Atre Thup Ka Sisitria, nge tha ka iakötrë kö Nyidrë. Nyidrëti a wangatrune la itre huliwa hne së hna kuca. (Heb. 6:10) Ketre, Iehova a hamë së la trengecatr ka ijij, matre troa eatrëne la huliwa së. (2 Kor. 4:7; Gal. 6:5.) Hnei Iesu Joxu së, hna amamai tulu göne la aqane troa ujë kowe la itre xan. (Ioane 13:15) Itre qatre thup a thele troa nyitipu Iesu, lo “atre thupë mamoe ka sisitria.” (Heb. 13:20; 1 Pet. 5:2) Angatr a loi thiina me ithuecatr, me catre ini së me thupë së.

¹⁴ Easa ce huliwa memine la itre sinee ka loi thiina. Sisitria catre kö la huliwa së me itre sinee së. Pane mekune jë laka, easa ce huliwa memine la itre trejin ka thiina ka menyik me ka hni ka ipië. Hetre hnei angatr hna atreine kuca, ngo tha angatre kö a pi mama fë la inamacane i angatr. Ame koi angatr, sisitria catre kö la itre xan. Tha itre sine huliwa hmekuje kö së. Angatr a goeë së ceitu me itre nyipi sinee. Tru la ihnimi angatr koi së, matre tha xoue angatre kö troa meci pi së!

15. Nemene la aqane tro sa goeëne la huliwa hna ahnithe koi së?

¹⁵ Easa xome la huliwa ka sisitria. Easa inine la itre atr la nyipici göi Iehova, me amamane la itre trengathoi hna sile hnei Satana. (Ioane 8:44) Hnene la itre trengathoi Satana hna akötrëne la itre atr, matre hleuhleu la mele i angatr. Aja i Satana tro sa mekun ka hape, tha tro kö Iehova a seng la itre ngazo së, nge thatreine kö së troa ihnimikeu. Itre trengathoi lai ka ahacenyi së! Easa “tro” koi Keriso, matre troa senge la itre ngazo së. Ketre, tru catre la ihnimi Iehova koi së. (Rom. 8:32, 38, 39) Ketre madrine ka tru la troa xatuane la itre atr troa atrepengöi Iehova hnyawa, me saze la mele i angatr!

CATRE JË LAPA FENE LA NYINE ISILIKEUNE I IESU

16. Pine nemene matre isapengöne kö la ehnefe së qaathei Iesu memine la itre xaa ehnef?

¹⁶ Isapengöne kö la ehnef hnei Iesu hna upi së troa thu, memine la itre xaa ehnef. Thupene la hna huliwa i maseta, itre xan a kucakuca nge tha madrine kö angatr. Ngo ame la easa huliwa koi Iehova me Iesu, easa madrin. Ame itre xaa ijin, easa kucakuca troa sine la icasikeu e hej ke, hne së hna huliwa la drai. Ngo ame la easa bëeke koi hnalapa, kola tingeting me lolo la mele së ke, hna thue trengecatre së ngöne la hna icasikeu. Ketre tune fe la easa cainöj me ini Tusi Hmitrötr. Eje hi, maine tro sa nue trengecatr matre troa kuca la huliwa i Iehova, tro ha aegöcatrenyi së!

17. Nemene la nyine tro palahi sa lapa mekun, nge nemene la nyine tro sa thupën?

¹⁷ Tha tro kö sa thëthëhmin laka, ka hetre ifegone hi la trengecatre së. Loi e tro sa inamacan ngöne la easa kuca la ketre huliwa. Loi e tro sa thupën, wanga tro sa aluzi trengecatr, me huliwa meci göi manie. Hanawang la aqane sa Iesu kowe la atr ka trenamo, lo angeic a hnying ka hape: “Nemene la nyine tro ni a kuca matre hetrenyi ni la mele ka pë pun?” Angeic a trongëne la Wathebo, nge maine jë ketre atr ka thiina ka loi angeic. Kola qaja ngöne la Evangelia i Mareko ka hape, hnei Iesu hna “utipi angeic.” Hnei Iesu hna könë angeic, me hape: “Salemëne pi la itre ewekë i eö, nge xötrethenge ni jë.” Eje hi, hetre aja ne la atr ka trenamo troa xötrethenge Iesu. Ngo ame pe, xele angeic troa nuetrije la itre “mo i angeic.” (Mar. 10:17-22) Ame la pun, hnei angeic hna thipetrije la nyine isilikeune i Iesu me nyihluene “la Mani.” (Mat. 6:24) Maine easë ju, nemene la hne së hna troa kuca?

18. Nemene la nyine tro sa kuca e itre xaa ijin, nge pine nemen?

¹⁸ Ame itre xaa ijin, loi e tro sa isa lapa mekun la itre ewekë hne së hna amë panën ngöne la mele së. Pine nemen? Matre troa thupën laka, easa huliwane hnyawa la trengecatre së. Hanawang la hna qaja hnei Mark, ketre thöth: “Nyimutre la itre macatre ne eni a mekun laka, hnenge hna ahmaloeëne la meleng. Ketre pionie ni, ngo ame koi ni, loi e troa hetre manie matre troa lolo la meleng. Hnenge hna thel la kepin matre kola hace la meleng. E cili, hnenge hna trotrohnin laka, eni a thele catrën la itre sipu ajang, nge co pe hi la hnenge hna hamën koi Iehova.” Hnei Mark hna saze la aqane waiewekë i angeic, me nue la mele i angeic ka pexej koi Iehova. Öni Mark ka hape: “Ame itre xaa ijin, eni a xou göi manie, ngo hnene la ixatua i Iehova me Iesu, matre eni a catre huliwa i Iehova.”

19. Pine nemene matre ka nyipiewekë troa lolo la aqane waiewekë së?

¹⁹ Troa aegöcatrenyi së hnene la nyine isilikeune i Iesu, e hne së hna kuca la köni ewekë celë. Ame la hnapan, loi e troa lolo la aqane waiewekë së. Maine easa kuca la huliwa i Iehova, loi e tro sa kuca thenge la aja i Nyidrë. Easa ce huliwa me Iehova, nge Nyidrëti hi la Maseta. (Luka 17:10) Maine tro sa kuca la huliwa i Iehova thenge la mekuna së, tro ha jole koi së troa eatrën la huliwa. Hanawang la ketre ceitun. Troa canga pë trengecatre ne la kau trahmany, e tro palahi ej a hule la hoke hna iujine hnene la maseta ne ej. Ketre tu së fe, maine tro sa kuca la huliwa i Iehova thenge la aja i Nyidrë, tro hë sa kuca la itre ewekë hne së hna tha mekun troa kuca, me cile kowe la itre jol. Tha tro kö sa thëthëhmin laka, tro kö Iehova a eatrëne la aja i Nyidrë!—Rom. 8:31; 1 Ioane 4:4.

20. Nemene la nyipi kepin matre easa xome la nyine isilikeune i Iesu?

²⁰ Ame la hnaaluen, tre, loi e troa kuca la huliwa nge hetre nyipi kepin. Easa ajane troa atrunyi Iehova, Keme së e koho hnengödrai. Ame ngöne lo hneijine i Iesu, hnene la itre atr ka huliwa thoi me huliwa qene atrekënö hna canga nuetrije la nyine isilikeune i nyidrë. (Ioane 6:25-27, 51, 60, 66; Fil. 3:18, 19) Ngo ame la itre ka hnimi Akötresie memine la itre xaa atr ke, angatr a madrine troa xome la nyine isilikeune i Iesu ngöne la mele i angatr, utihë la tro angatr a kapa la mel e koho hnengödrai. Ijije hi tro sa tui angatr me madrin troa xome la nyine isilikeune i Iesu ke, hetre nyipi kepin.

21. Thenge la hna qaja ngöne Mataio 6:31-33, nemene la nyine tro sa kuca?

²¹ Ame la hnaakönin, tre, loi e tro sa atreine waiewekë hnyawa. Hne së hna iëne la huliwa celë, ngacama jole catr. Ase hë Iesu qaja ka hape, troa qanangazo së. Ngo tha luelu kö së laka, tro Iehova a hamë trengecatre së, matre tro sa atreine cile kowe la itre jol cili. Maine tro sa xomihni, tro hë sa atreine cile catr. (Iako. 1:2-4) Ketre, tro Iehova a xatua së, nge tro Iesu a eatrongë së, nge tro la itre trejin a thue trengecatre së. (E jë la Mataio 6:31-33; Ioane 10:14; 1 Thes. 5:11) Nyipici, ijije hi tro sa kapa la ixatua ka ijij, matre atreine tro sa cile kowe la itre itupath!

22. Pine nemene matre loi e tro sa hetre hni ne ole koi Iehova me Iesu?

²² Ame lo föe hna aloine hnei Iesu, tre, egöcatre hnyawa hi eahlo e thupen. Ngo maine aja i eahlo troa kapa la itre manathith ka epine palua, loi e tro eahlo a xötrethenge Keriso. Nemene la hnei eahlo hna kuca? Pane mekune jë la itre manathith hnei eahlo hna troa kapa, e hnei eahlo hna xome la nyine isilikeune i Iesu. Eahlo a troa ceme Iesu e koho hnengödrai! Tha ka gufa kö la itre trengecatre hnei eahlo hna nue, matre troa xötrethenge Iesu. Maine easa mejiune troa mel e koho hnengödrai maine e celë fen pena, ngo caasi hi la mekuna së. Easa madrine troa drenge la ihë i Iesu, lo nyidrëti a hape: “Trohemi koi ni!”