Ketre Huliwa Ka Iakeukawany
1 Kola akeukawan la itre atr asë ka kapa la maca ne la Tusi Hmitrötr, me trongëne ej ngöne la mele i angatr. (Sal. 19:7, 8) Ej a xatua angatr troa thipetrije la itre ini ka thoi me itre hna majemine ka ngazo, nge kola hamë angatr la ketre mejiune ka lolo thatraqane la itre drai elany. Ngo eje hi lai laka, ame la itre ka kapa la maca ka loi tre thaa angatre hmekuje kö la ka troa öhnyi thangane lai. Angatre mina fe angetre tro fë kowe la itre xan la itre ini ka lolo, kolo fe a hane akeukawanyi angatr.—Ite edomë 11:25.
2 Hna Aegöcatren Hnene La Huliwa Ne Cainöj: Hna qaja hnei Iesu ka hape, ame la atre kapa la nyine isilikeun matre troa hane atre drei Iesu, ene la troa cainöj me inine la itre atr, tro hë angeic a “öhne la hna mano thatraqane la ite u i [angatr].” (Mat. 11:29) Kola aegöcatrene fe la mele i angeic, ngöne la angeic a hane cainöje kowe la itre xaa atr. Kösë göxeni lai koi nyidrë. (Ioane 4:34) Ame ngöne lo Iesu a upe la itretre drei nyidrë ka ala 70 troa cainöj, atraqatre catr la madrine i angatr ngöne laka hnei angatr hna öhne la aqane amanathithi angatr hnei Iehova.—Luka 10:17.
3 Ame mina fe enehila, nyimutre la itre Keresiano hna aegöcatren hnene la aqane catre cainöjëne angatr la maca ka loi. Hna qaja hnene la ketre trejine föe ka hape: “Kola akeukawan la meleng hnene la huliwa ne cainöj, ke eje a eatrongë ni nge eje a amamane koi ni la sipu alien la mel. Ame ngöne la eni a cainöje trootro, tre kösë ame la itre sipu ehacen la meleng memine la itre jole hnenge hna cile kow ngöne la nöjei drai, tre hna amë pinën pë hë itre ej.” Hna qaja fe hnene la ketre trejine föe ka catre cainöj ka hape: “Ame la huliwa ne cainöj . . . eje a amamane hnyawa ka hape ce ini me Iehova ngöne la nöjei drai, nge eni a kapa jëne eje la tingeting memine la ketre madrin e kuhu hning, madrin hna thatreine troa kapa jëne la ketre ewekë.” Drei la ketre madrine ka tru e tro sa “ce huliwa tro kö me Akötresie”!—1 Kor. 3:9.
4 Ka Menyik La Nyine Isilekeune i Keriso: Ngacama hnei Iesu hna ithuecatr kowe la itre Keresiano tro ‘angatr a isa catr,’ ngo thaa hnei nyidrëti kö hna thele the së la ewekë hne së hna thatreine troa kuca. (Luka 13:24) Eje hi laka, nyidrëti a könë së cememine la ihnim, troa ‘xome la hna isilekeune i Nyidrë.’ (Mat. 11:29, ith. e cahu fen, MN ) Thaa tro kö a hnehengazo menu hnene la itre trejine ka cile kowe la itre ejolen la mel nge maine hnei angatr hna kuca la huliwa ne cainöje hnene la hni ka pexej ngacama co hi, ngo loi e tro angatre a mejiune laka ka madrine catre Akötresieti koi angatr.—Mareko 14:6-8; Kol. 3:23.
5 Drei la aqane akeukawan la mele së e tro sa nyihluene la Akötresie ka madrine hnyawa la hne së hna kuca thatraqane la ëje i Nyidrë! (Heb. 6:10) Epi tro pala hi së a kuca asë la hne së hna atrein ngöne la huliwa i Nyidrë.