Ita Ne Thup göi 08 Maac e Normandie
Nyima 15 me 28 Qene Drehu
“Trohemi Nge Xötrethenge Ni Jë”
“Maine kete ate a ajane troa xöte thenge ni, loi tro angeic’ a xele angeice kö, me xome la satauro i angeice o drai, me xöte thenge ni fë.”—LUKA 9:23.
1, 2. (a) Nemene la pengöne aqane ihë i Iesu? (b) Hnei nyipunieti hna kapa tune kaa la ihë cili?
TRAQA ha Iesu kowe la pune la huliwa ne cainöje i nyidrë, nge hnei nyidrëti hna cainöj e Pere, ketre götran ngöne la hneopegejë e Ioridrano ngöne la götrane ahuë ne la lapa e Iudra. Hna hnyinge koi nyidrë hnene la ketre thupëtresij ka pi atre la aqane troa hetrenyi la mele ka thaa ase palua kö. Thupene la Iesu a atrehmekune laka, ame la thupëtresiji cili, tre, ka xötrethenge hnyawa la Wathebo i Mose, ene pe hnei Iesu hna könë angeic. Öni nyidrëti, ka hape: “Troja itöne la ite ewekë i ’ö, me hamëne kowe la ite ka pë ewekë, nge tro eö a hete tenga mo e hnengödrai; nge trojë fe, xomejë la satauro me xöte thenge ni fë.” (Mar. 10:21) Pane mekune jë nyipunie, kola ihë troa xötrethenge Iesu, lo sipu Nekö ne la Akötresieti Ka Sisitria!
2 Hna thipëne hnene la thupëtresij la ihë i Iesu, ngo hna kapa ha la ihë i nyidrë hnei itre xan. Hnei Iesu hë hna pane ithanata me Filipo, me hape: “Xöte thenge ni jë.” (Ioane 1:43) Filipo a kapa ju, nge thupene lai ketre aposetolo fe hë angeic. Mataio mina fe la ketre ka kapa la ihë i Iesu. (Mat. 9:9; 10:2-4) Eje hi laka, hnei Iesu hna hëne la nöjei atr asë ka ajane la thiina ka meköt, ke, öni nyidrëti ka hape: “Maine kete ate a ajane troa xöte thenge ni, loi tro angeic’ a xele angeice kö, me xome la satauro i angeice o drai, me xöte thenge ni fë.” (Luka 9:23) Haawe, ijije fe tro la ketre atr a xötrethenge Iesu, e hetrenyi thei angeice la hni ne ajan. Hapeu, hetrenyi kö thei nyipunieti la aja cili? Nyimutre hë the së la itre ka kapa la pengöne aqane ihë i Iesu, nge ame ngöne la huliwa ne cainöj, tre, easë mina fe a tro fë lai ihë cili kowe la itre xan.
3. Tune kaa la aqane tro sa neëne troa hmacahmaca troa xötrethenge Iesu?
3 Ngo ngazo pe, thaa hna catre kö inine la nyipici ka ej e hnine la Tusi Hmitrötr hnene la itre xaa atr ekö ka hetre hni ne ajan. Angatr a ‘uth’, kola hape angatr a hunyinyi me hmacahmaca troa xötrethenge Iesu. (Heb. 2:1) Tune kaa la aqane tro sa neëne troa kei ngöne la hnö cili? Nyipi ewekë tro sa isa hnyingëne thel, ka hape: ‘Pine nemene matre hnenge hna iën troa pane xötrethenge Iesu? Nemene la aliene la kola hape troa xötrethenge nyidrë?’ Maine tro sa hnehene la itre mekune ka sa la lue hnyinge celë, haawe, tro hë lai a xatua së troa acatrene la aja së troa xölehuje la mele ka lolo celë hne së hna iën. Tro mina fe lai a xatua së troa ithuecatre kowe la itre xan troa xötrethenge Iesu.
Pine Nemene Matre Troa Xötrethenge Iesu?
4, 5. Pine nemene matre Iesu hnyawa hi la ka ijij troa eatrongë së?
4 Hnei Ieremia perofeta hna qaja, ka hape: “Iehova fe, ate hë ni laka tha qâ i ate kö la jë i angeic. Tha qâ i ate troa amekötine la ite hna feke ca hnei angeic.” (Iere. 10:23) Kola mama hnyawa la enyipicine la itre trenge ewekë i Ieremia ngöne la aqane trongene la mele ne la atr. Kola mama pala hi laka, thatreine kö tro la itre atr ka thaa pexeje kö a ketre sipu musinë angatre kö. Hne së hna kapa la ihë i Iesu troa xötrethenge nyidrë, ke, atrehmekune hi së laka nyidrëti hmekuje hi la ka ijij troa Joxu së, nge pëkö atr ka atreine troa nyitipu nyidrë. Pane ce wange jë së la itre xaa ewekë hnei Iesu hna atreine troa kuca.
5 Ame la ewekë hnapan, tre, hnei Iehova hna sipu ië Iesu matre troa Mesia Joxu. Drei la ka atre hnyawa la pengöne la Joxu ka ijij troa musinë së? Nga, Nyidrëti hmekuje hi lo Atre Xupi së. Ame la hnaaluen, tre, hetrenyi Iesu la itre thiina nyine hain me nyine tro sa eënyin. (E jë la Isaia 11:2, 3.) Nyidrëti hi la tulu ka sisitria. (1 Pet. 2:21) Ame la hnaakönin, tre, Iesu a hnehengazone la itre ka xötrethenge nyidrë, tune lo hnei nyidrëti hna amamane ngöne lo nyidrëti a nue la mele i nyidrë koi angatr. (E jë la Ioane 10:14, 15.) Nge ketre, nyidrëti mina fe a amamane laka, ketre atre thupë mamoe nyidrë ka lolo thiina, ke, nyidrëti a eatrongë së kowe la ketre mele ka tingetinge enehila, nge ka troa epine palua elany. (Ioane 10:10, 11; Hna ama. 7:16, 17) Celë hi la itre xaa kepin matre easa axeciëne cememine la inamacan troa catre xötrethenge nyidrë. Ngo nemene la aliene la kola hape troa xötrethenge Iesu?
6. Nemene la aliene la kola hape troa xötrethenge Iesu?
6 Ame la aliene la kola hape troa xötrethenge Iesu, tre, thaa ene hmekuje kö la troa hë së, ka hape, itre Keresiano. Traqa koi lue milio lao atr enehila ka uune fë ka hape, itre Keresiano angatr, ngo hna mama pe jëne la itre aqane ujë i angatr, laka itre ka “kuca la ngazo.” (E jë la Mataio 7:21-23.) Ame la kola ajane hnene la ketre atr troa xötrethenge Iesu, tre, (easa pane qaja la pengöne la itre nyipi Keresiano) angatr a thele troa ihmeku la aqane mele i angatr, memine la itre ini me tulu hna hamëne hnei nyidrë nge nyine amekötine la aqane ujë i angatr ngöne la nöjei drai. Tro sa pane wange la itre xaa ewekë hne së hna atre göi Iesu, matre troa qeje pengöne lai mekun, hna hape troa xötrethenge nyidrë.
Nyitipune Jë La Tulu Ne Inamacane i Iesu
7, 8. (a) Nemene la inamacan, nge pine nemene matre atraqatre la inamacane i Iesu? (b) Tune kaa la aqane amamane Iesu la inamacane i nyidrë, nge tro sa nyitipu nyidrëti tune kaa?
7 Nyimutre la itre thiina nyine hain ka mama ngöne la mele i Iesu, ngo tro hi sa wanga atrune la foa lao thiina: ene la inamacan me hni ka ipië, me aqane catre huliwa i nyidrë, me aqane ihnimi nyidrë. Tro sa pane ce wange la inamacane i nyidrë, ene la aqane atreine i nyidrë troa huliwane hnyawa la atrehmekun memine la trotrohnin. Hna cinyihane hnei Paulo ka hape: “Nge hna juetëne thei [Iesu] la nöjei tenga mo asë ne la inamacan, me wangate hmekun.” (Kol. 2:3) Qaathei drei la inamacane i Iesu? Öni nyidrëti kö e sa, ka hape: “Ame lo hnei Tetetroti hna ini ni, te, celë hi hnenge hna qaja.” (Ioane 8:28) Iehova hi la ka hamëne la inamacan koi nyidrë, celë hi matre thaa sesëkötre kö së la elolone la aqane xomi mekune i Iesu.
8 Drei la ketre ceitune laka, kola mama la elolone la aqane xomi mekune i Iesu ngöne la nyidrëti a iëne la nyine tro nyidrëti a kuca ngöne la mele i nyidrë. Hnei nyidrëti hna mekune troa ahmaloeëne la aqane mele i nyidrë, me thele troa pane kuca la ketre ewekë, ene la troa eatrëne la aja i Akötresie. Kola mama la aqane huliwa inamacane i nyidrë, ngöne la nyidrëti a nue asë la traeme me trenge catre i nyidrë, matre troa pane thele la Baselaia. Maine easa ajane troa xötrethenge la tulu i Iesu, haawe, loi e tro sa catre troa ‘maca la alameke së,’ me thipetrije la itre ewekë ka thaa nyipi kö kowe la mele së nge ka troa ananazijë së. (Mat. 6:22) Nyimutre hë la itre Keresiano ka thele troa ahmaloeëne la aqane mele i angatr, matre troa tru hnei traeme i angatr troa hane cainöj. Hna xome hnene la itre xan la huliwa ne pionie. Maine hna e nyipunieti fe thene la itre atr cili, haawe, ka lolo catre lai. Ame la troa “pane thele . . la baselaia,” tre, jëne manathithi lai me mele ka lolo.—Mat. 6:33.
Tui Iesu, Loi e Tro Sa Hni Ka Ipië
9, 10. Hnei Iesu hna amamane tune kaa la hni ka ipië i nyidrë?
9 Ame la hnaaluene thiina i Iesu nyine tro sa ce wang, tre, ene la hni ka ipië. Ame ngöne la kola mus hnene la itre atr ka thaa pexeje kö, tre, angatr e itre xaa ijin a pi mama fë la edraië i angatr. Drei la eisapengönene me Iesu! Ngacama ka sisitria catre kö la göhnë i Iesu ngöne la aja i Akötresie, thaa hnei nyidrëti fe kö hna pi mama fë lai. Celë hi matre, kola ithuecatre koi së troa nyitipu nyidrë. Hnei Paulo aposetolo hna cinyihan, ka hape: “Loi e ej’ e kuhu ite hni nyipunie la mekune celë, lo ka eje thei Keriso Iesu; ca pengö i nyidëti me Akötesie, ngo tha mekune kö nyidëti laka kola ënö la kola cei tune me Akötesie; ngo hnei nyidëti hna aipië nyidëti kö, me xome la pengö i hlu, nge hna longëtine mate ate.” (Fil. 2:5-7) Nemene la aliene lai?
10 Ketre manathithi ka tru ekö koi Iesu troa ce mele memine la Tretretro i nyidrë e koho hnengödrai, ngo hnei nyidrëti hna “aipië nyidëti kö.” Hna xome la mele i nyidrë me amë hnine la trengene hnaho ne la ketre nyipi jajinyi ne Iudra koi naene lao treu, uti hë la kola hnaho nyidrë ceitu me medrenge ngöne la hnalapa ne la ketre atre tratrau ka pë mo. Hnei Iesu hna tru trootro ngöne la hnalapa i Iosefa qa ngöne lo nyidrëti a medreng, me nekönatre trahmanyi nge uti hë la thöthi nyidrë. Ka pexeje nyidrë. Ngo hnei nyidrëti pala hi hna drengethenge la keme me thine i nyidrë ka thaa pexeje kö, ngöne lo thöthi petre kö nyidrë. (Luka 2:51, 52) Drei la elolone la hni ka ipië celë!
11. Tune kaa la aqane tro sa nyitipune la hni ka ipië i Iesu?
11 Easa hni ka ipië tui Iesu ngöne la easa kapa la itre hnëqa hna thaa wanga atrune kö, tune la hnëqa ne troa cainöjëne la maca ka loi. Ketre huliwa lai hna thaa wanga atrune kö, nge ka mama hnyawa hi lai ngöne la kola thaa drei së, me hnyimasai së, maine icilekeu pena me easë hnene la itre atr. Ngo maine tro sa catre cainöj, haawe, tro hë sa xatuane la itre xan troa kapa la ihë i Iesu, ene la troa xötrethenge nyidrë. Qa ngöne lai, easa xatua angatr troa hetrenyi la mel. (E jë la 2 Timoteo 4:1-5.) Ame la ketre huliwa, tre, ene la troa nyidrawane la Uma ne Baselaia së. Kolo lai a qaja la troa kuca la itre xaa ewekë, tune la troa triji salite me köle uma, me nyihnyawane la kabine; itre huliwa lai hna thaa wanga atrune kö! Ngo easa atrehmekune laka, ame la troa nyidrawane la Uma ne Baselaia së, lo hnë tro sa hmi koi Akötresie, tre, celë hi ketre igötranene la huliwa së ka hmitrötr. Haawe, maine hetre hni ne ajane së troa kuca la itre huliwa hna thaa wanga atrune kö hnei atr, easë hi lai a amamane la hni ka ipië me xötrethenge la itre thupa ca i Keriso.
Tui Iesu, Loi e Tro Sa Catre Huliwa
12, 13. (a) Hnei Iesu hna amamane tune kaa laka, ka catre huliwa nyidrë, nge nemene la ka uku nyidrë? (b) Nemene la ka troa uku së troa hane catr ngöne la huliwa ne cainöj?
12 Pane ce wange jë së la aqane catre Iesu ngöne la huliwa ne cainöj. Nyimutre la itre ewekë hnei Iesu hna kuca ngöne lo nyidrëti e celë fen. Ame ngöne lo co petre kö nyidrë, hnei nyidrëti hna catre ce huliwa memine la keme i nyidrë, ene Iosefa, ketre atre tratrau sinöe. Ame ngöne la huliwa ne cainöje i nyidrë, hnei Iesu hna kuca la itre iamamanyikeu, tune la troa aloine la itre meci ne la atr me amelene hmaca la itre ka mec. Ngo ame kö la huliwa ka sisitria hnei nyidrëti hna kuca, tre, ene la troa cainöjëne la maca ka loi me inine la itre atr ka hetre hni ne ajan. (Mat. 4:23) Pine laka itre ka xötrethenge nyidrëti së, haawe, nyipi ewekë tro sa kuca la huliwa cili. Tune kaa la aqane tro sa xötrethenge la tulu i Iesu? Loi e tro sa hane eëne mina fe la itre thiina ka upi Iesu ekö troa kuca la huliwa i nyidrë.
13 Ame la thiina ka sisitria ka eje thei Iesu, tre, ene la ihnimi nyidrëti koi Akötresie, lo Atre upi nyidrë troa cainöje kowe la itre atr, me ini angatr. Ngo ka tru mina fe e kuhu hni Iesu la itre nyipici hnei nyidrëti hna inin. Ame la itre trenge nyipici cili, tre, itre trengamo ka tru alamekene catre koi nyidrë, nge aja i nyidrë troa ce thawa lai memine la itre xan. Pine laka itre ka hamë ini së, maine itre ka ‘cinyihanyi’ pena, haawe, loi e tro mina fe sa nyitipune la aqane ujë cili. Pane mekune ju hi së la itre xaa trenge nyipici ka sisitria catre hne së hna inine e hnine la Wesi Ula i Akötresie! Atre hi së la aqane isenyine ekö la musi cile i Iehova, memine la aqane troa nyinyine la jole cili. Atrehmekune hnyawa hi së laka, Tusi Hmitrötr a qaja la pengöne la itre ka mec, memine la itre manathithi hna troa kapa ngöne la fene ka hnyipixe i Akötresie. Ngacama ka hekö ju hë së ngöne la nyipici, maine ka xötrei pena, ngo thaa saze kö la itre trenge nyipici hne së hna inin; ka tru alamekene pala hi itre ej. (E jë la Mataio 13:52.) Maine tro sa catre cainöjëne itre ej cememine la hni ka madrin, haawe, tro ha hane ketr la itre xaa atr hnene la aqane hnine së la itre ini hne së hna kapa qaathei Iehova.
14. Tune kaa la aqane tro sa nyitipune la aqane hamë ini Iesu?
14 Hanawange mina fe la aqane hamë ini i Iesu. Hnei nyidrëti pala hi hna eatrongëne me thele matre tro la itre atr ka drei nyidrë a goeëne la Itre Hna Cinyihan. Hnei nyidrëti pala hi hna nyiqaane ithanatane la ketre mekune ka tru, hnene la hna qaja la hnëewekë hna hape: “Ase hë cinyihan.” (Mat. 4:4; 21:13) Ame ngöne la itre trenge ewekë hnei nyidrëti hna qaja, tre, hnei nyidrëti pala hi hna xome mekötin, maine amexeje pena la itre xötr qa hnine la Itre Hna Cinyihane Qene Heberu. Loi e tro pala hi sa tui Iesu, laka, troa hamë ini qa hnine la Tusi Hmitrötr ngöne la easa cainöj, nge maine ijij, troa fe amamane hnyawa la itre xötr. Maine tro sa ujë tune lai, haawe, tro hë sa xatuane la itre atr ka hni ka meköt troa sipu atrehmekune laka, easa ini angatr la itre mekuna i Akötresie, ngo thaa itre sipu mekuna së kö. Drei la madrine së ngöne la kola kapa hnene la ketre atr troa hane e la Tusi Hmitrötr me ce ithanatan la enyipiewekëne ej, me trotrohnine la aliene la Wesi Ula i Akötresie! Nge ame la angatr a kapa la hna ihë hnei Iesu troa xötrethenge nyidrë, tre, atraqatre catr la madrine së.
Ame La Troa Xötrethenge Iesu, Tre, Kolo Lai a Hape, Troa Hnime La Itre Xan
15. Nemene la thiina i Iesu nyine hain, nge kola ketri së tune kaa e hne së hna mekune hnyawa lai?
15 Ame la ketre thiina ka eje thei Iesu hne së hna troa ce wang, nge ka troa akeukawane la itre hni së, tre, ene la ihnim i nyidrë kowe la nöjei atr asë. Hnei Paulo aposetolo hna cinyihan, ka hape: “Kola musinë huni hnene la ihnimi Keriso.” (2 Kor. 5:14) Ame la easa mekune la ihnim i Iesu kowe la nöjei atr asë me koi së isa ala caas, tre, kola ketr la itre hni së nge kolo mina fe a uku së troa xome la tulu i nyidrë.
16, 17. Tune kaa la aqane amamane Iesu la ihnim i nyidrë kowe la itre xan?
16 Hnei Iesu hna amamane tune kaa la ihnim i nyidrë kowe la itre xan? Ame la mekune tixenuë ka amamane hnyawa la ihnimi nyidrë, tre, ene la aja i nyidrë troa hamëne la mele i nyidrë kowe la fene hnengödrai asë. (Ioane 15:13) Ngo ame ngöne la huliwa ne cainöje i nyidrë, tre, hetrenyi fe la itre xaa aqane amamane Iesu la ihnim i nyidrë. Drei la ketre ceitun, ene la hnei nyidrëti hna utipine la itre atr ka akötr. Ame ngöne la nyidrëti a goeë Maria memine la itre atr ka treije pi Lazaro, ene pe hna ketri nyidrëti hnyawa hnene la hace ka eje thei angatr. Ngacama kola troa amele Lazaro hmaca hnei Iesu, ngo hna ketri nyidrë, ene pe hnei nyidrëti hna “sheitë.”—Ioane 11:32-35.
17 Ame ngöne lo Iesu a xötrei cainöj, tre, hnene la ketre lepera hna easenyi nyidrë me qaja, ka hape: “Maine enëtilai a hanengëtine, te, pucatine enëtilai troa ajinia nie.” Hnei Iesu hna sa tune kaa? Kola qaja hnene la edromë, ka hape: “Iesu a utipi nyën.” Nge thupene lai, hnei nyidrëti hna kuca la ketre iamamanyikeu. “[Hnei nyidrëti hna] li im, me kete nyën, me hape koi nyën, ‘Ini ajan. Loi hë eö.’ Nge nyidëti pete hi a ulatin, ame hna canga patepi la lepera thei nyën, nge loi hë nyën.” Ame fene la Trenge Wathebo i Mose, tre, ka pui ngazo la itre lepera; nge thaa nyipi ewekë kö koi Iesu troa ketri angeic matre troa aloine la meci angeic. Ngo ame ngöne la Iesu a aloine lai ka lepera, tre, hnei nyidrëti hna aijijë angeice troa drenge la kola ketri angeic hnene la ketre atr, nge maine jë angeice petre hi a hane drenge lai. Drei la ketre aqane utipine ka lolo catr!—Mar. 1:40-42.
18. Tune kaa la aqane tro sa amamane la aqane “ihnimikeu” së?
18 Pine laka itre hlue i Keriso së, hna amekötine koi së troa amamane la ihnimi së jëne la hna “ihnimikeu.” (1 Pet. 3:8) Maine thaa hne së kö hna melëne la itre ewekë celë, eje hi laka, thaa ka hmaloi kö koi së troa hane trotrohnine la itre aliene hni ne la ketre sine hmi së ka akötr, pine la ketre mec ka pë nyin, maine ka kucakuca pena. Ngacama thaa hna hane kö tithi Iesu hnei mec, ngo hnei nyidrëti pe hna thele troa trotrohnine la akötre ne lai atr ka wezipo. Tro sa eënyine tune kaa lai aqane itrotrohni cili? Hnene la hna drenge cememine la hni ka menyik, la itre atr ka akötr ngöne la angatr a fe koi së la itre aliene hni angatr. Ijije mina fe tro sa isa hnyingëne thele, ka hape, ‘Maine eni ju pe a hane akötre tune lai, nemene jë la mekune ka troa eje e kuhu hning?’ Maine easa thele troa trotrohnine la itre aliene hni ne la itre xan, haawe, ijije hë tro sa hane “xatuane la ite ka kucakuca.” (1 Thes. 5:14) Aqane tro hi së lai a xötrethenge Iesu.
19. Tune kaa la aqane troa ketri së hnene la tulu i Iesu?
19 Drei la elolone la itre ini hne së hna kapa qa ngöne la itre trenge ewekë memine la itre aqane ujë i Iesu Keriso! Maine tro pala hi sa inine la pengö i nyidrë, haawe, tro ha kökötre la aja së troa nyitipu nyidrë, nge tro fe hë sa hane xatuane la itre xan troa hane ujë tui nyidrë. Celë hi matre, loi e tro pala hi sa madrine troa xötrethenge la Mesia Joxu, enehila nge uti hë epine palua!
Ijije Kö Tro Nyipunieti a Qeje Pengön?
• Tune la hnei Iesu hna amaman, tune kaa la aqane tro sa inamacan?
• Tune kaa la aqane tro sa amamane la hni ka ipië?
• Tune kaa la aqane tro sa catre ngöne la hna cainöj?
• Tro sa nyitipu Iesu tune kaa, göne la troa hnim la itre xan?