Ita Ne Thup göi 01 koi 02 Ogas
Pine Nemene Matre Loi e Tro Sa Xötrethenge “La Keriso”?
“Maine kete ate a ajane troa xöte thenge ni, loi tro angeic’ a xele angeice kö. . . me xöte thenge ni.”—LUKA 9:23.
1, 2. Pine nemene matre nyipi ewekë troa pane ce wange la itre kepine ka upi së troa xötrethenge “Keriso”?
Drei la madrine i Iehova troa öhne la itre ka hnyipi atre la nyipici memine la itre thöthi e ce icasikeu memine la itre hlue i Nyidrëti e celë fen! Maine jë epuni a catre inine la Tusi Hmitrötr, me sine pala hi la itre icasikeu, me akökötrene fe la atrehmekune i epun göne la nyipici ka troa thue mel, nge ka eje ngöne la Wesi Ula i Akötresie; qa ngöne lai, loi e tro epuni a hnine catrëne la itre trenge ewekë i Iesu celë, kola hape: “Maine kete ate a ajane troa xöte thenge ni, loi tro angeic’ a xele angeice kö, me xome la satauro i angeice o drai, me xöte thenge ni fë.” (Luka 9:23) Iesu hi lo lai a hape, loi e nyipi aja së la troa xele së kö me xötrethenge nyidrë. Qa ngöne lai, nyipi ewekë tro sa wange la itre kepine matre loi e troa xötrethenge “Keriso.”—Mat. 16:13-16.
2 Nge tune kaa fe së angetre xötrëne hë la itre thupa ca i Iesu Keriso? Kola ithuecatre koi së troa “amamane pala hi lai.” (1 Thes. 4:1, 2) Ngacama itre ka hekö hë së kapa la nyipici, maine itre ka xötrei atre la nyipici pena, ngo e tro sa mekune la itre kepine ka upi së troa xötrethenge Keriso, haawe, tro ha xatua së troa trongëne la ithuemacany i Paulo, me xötrethenge Keriso ngöne la nöjei drai ne mele së. Pane ce wange jë së la faifi lao kepine ka troa upi së troa xötrethenge Keriso.
Nyine Akökötrene La Aqane Imelekeu Së Me Iehova
3. Nemene la lue nyine troa kuca matre tro sa atre pengöi Iehova?
3 Hnei Paulo hna “cilejë ngöne nyipine Areopago” me cainöje kowe la angetre Athenai; öni nyidrëti, ka hape: “Hnei [Akötresieti] hna xupe qa ngöne ka casi la nöjei ate asë troa lapane cailo fene hnengödrai, nge ase hë sa la ite ijine hna acile ekö, me ite ifegone la ite zi angat; mate tro angat’ a thele Akötesie maine ateine angate troa ëthei nyidë, me öhnyi nyidë, loi pe ke tha iananyi kö nyidë me eëshë asëjëihë.” (Ite Hu. 17:22, 26, 27) Ijiji së hi troa thele Akötresie me atre Nyidrëti hnyawa. Ame la ketre aqan, tre, ene la troa goeëne la itre ewekë hnei Akötresieti hna xup matre atrepengöne la itre thiina i Nyidrë. Maine tru la aja së troa sine thele la itre ewekë hna xup, tro hë a nyimu ini hne së hna troa kapa qa ngöne la itre huliwa ne la Atre Xup. (Rom. 1:20) Ketre, hnei Iehova mina fe hna hane qejepengöi Nyidrë jëne la Wesi Ula i Nyidrë, ene la Tusi Hmitrötr. (2 Tim. 3:16, 17) Maine tro pala hi sa ‘mekune la ite huliwa i [Iehova] asë’ me ‘lapa mekune la ite hnei [Nyidrëti] hna longëtin,’ tre, tro hë së lai a atre pengöi Nyidrëti hnyawa.—Sal. 77:12.
4. Troa xatua së tune kaa hnene la hna xötrethenge Keriso, troa atrepengöi Iehova hnyawa?
4 Ame la ketre nyine troa kuca matre tro sa atre pengöi Iehova hnyawa, tre, ene la troa xötrethenge Keriso. Pane mekune jë së la göhnë ka tru hnei Iesu hna cilën ngöne lo nyidrëti petre kö thene la Tretretro i nyidrë, nge “pate pete kö la fene hnengödrai”! (Ioane 17:5) Iesu hi “lo ate nyi qane la nöjei ewekë hna xupe hnei Akötesie.” (Hna ama. 3:14) Pine laka nyidrëti hi la “haetra ne la nöjei hna xup’ asë,” haawe, nyimutre la itre macatre ne ce mele nyidrëti e koho hnengödrai memine la Tretretro i nyidrë, ene Iehova. Ngöne la itre ijine ce mele nyidro, tru catre la itre xaa hna kuca hnei Iesu. Nyidrëti hi lo sine huliwa i Akötresie, nge madrine nyidrëti troa ce huliwa memine la Kasisitria; celë hi lai ka acatrene catrëne la otretre ne ihnim ka iothekeu nyidro. Thaa hnei Iesu hmekuje kö hna goeëne la aqane ujë i Akötresie, me itre aliene hni me itre thiina ka loi i Nyidrë; ngo hnei Iesu mina fe hna kapa me trongëne asë la itre hnei nyidrëti hna inine thei Iehova. Qa ngöne lai, ceitune hnyawa ha la Hupuna atre idrengethenge memine la Tretretro i nyidrë; celë hi kepine matre Tusi Hmitrötr a qaja göi nyidrë, ka hape, “nyidëti la hnaiji Akötesie.” (Kol. 1:15) Maine tro sa thele troa xötrethenge Keriso hnyawa, tre, tro fe hë sa atrepengöi Iehova hnyawa.
Aqane Tro Sa Nyitipu Iehova Hnyawa
5. Nemene la ka troa xatua së troa nyitipu Iehova hnyawa, nge pine nemen?
5 Pine laka hna xupi së ‘hnaiji Akötresie, me tui Nyidrë,’ haawe, ijiji së fe hi troa hane nyitipune la itre thiina ka lolo i Nyidrë. (Gen. 1:26) Hnei Paulo hna ithuecatre kowe la itre Keresiano laka, loi e tro angatr a “nyi tupu Akötesieti . . . tune la ite nekö hnimina.” (Efe. 5:1) Maine tro sa xötrethenge Iesu, tro ha xatua së troa nyitipune la Tretretro së e koho hnengödrai. Haawe, kola mama hnyawa laka, Iesu hmekuje hi la ka atreine troa nyitipu Akötresieti hnyawa ngöne la aqane mekun, me aliene hni, me aqane ujë. Ame lo Iesu e celë fen, thaa hnei nyidrëti hmekuje kö hna ahlemune la ëje i Iehova. Ngo hnei nyidrëti mina fe hna amamane la pengöne lai atrekë ëjen. (E jë la Mataio 11:27.) Hna mama lai ngöne la itre ini hnei Iesu hna hamën, memine la tulu hnei nyidrëti hna amë.
6. Nemene la hna amamane hnene la itre ini hna hamëne hnei Iesu göi Iehova?
6 Kola mama la hnei Akötresieti hna thele the së jëne la itre ini hnei Iesu hna hamën, memine la aqane goeëne Nyidrë la itre hlue i Nyidrë. (Mat. 22:36-40; Luka 12:6, 7; 15:4-7) Hanawange la ketre ceitun, laka hnei nyidrëti hna amexeje la caa wathebo qa ngöne lo treen, me hape, “the tro kö eö a kuci ngazo;” hnei Iesu hna qeje pengöne la mekuna i Akötresie göne la ewekë ka traqa e kuhu hni ne la atr qëmekene tro angeic a kuca la ngazo. Öni nyidrëti, ka hape: “Ame la ate goeëne hutine la fö’ i ket’ ate me meciu nyido, ase hë angeice kuci ngazo me nyido e kuhu hni” (Eso. 20:14; Mat. 5:27, 28) Thupene la hnei nyidrëti hna qaja amamane la aqane qeje pengöne menun hnene la angetre Faresaio la wathebo hna hape, “hnimeju eö la ate lapa eashenyi’ ö, nge xelenejë la ithupëjia me eö, tre, öni Iesu jë hi e qaja la mekuna i Iehova göne lai ewekë cili, ka hape: “Hnimeju la ite ithupëjia me nyipunie; nge thithi ju thatraqai angete qaqa me axösisi nyipunie.” (Mat. 5:43, 44; Eso. 23:4; Lev. 19:18) Maine tro sa atreine wanga atrehmekune la aqane waiewekë i Iehova me itre aliene hni Nyidrë, memine fe la itre hnei Nyidrëti hna thele the së, haawe, tro hë së lai a atreine nyitipu Nyidrëti hnyawa.
7, 8. Nemene la ini hne së xom qa ngöne la tulu hnei Iesu hna hamëne göi Iehova?
7 Hnei Iesu mina fe hna amamane la pengöne la Tretretro i nyidrë jëne la itre ceitune hnei nyidrëti hna xom. Easa e ngöne la itre evangelia laka hnei Iesu hna utipine la itre ka pë ewekë, me hnime la itre atr ka akötr, me elëhni kowe la itretre drei nyidrë pine sawa la itre nekönatr troa tro koi nyidrë; ngo hapeu, thaa kolo kö lai a mama e cili, la itre aliene hni ne la Tretretro së? (Mareko1:40-42; 10:13, 14; Ioane 11:32-35) Pane mekune jë së la aqane amamane Iesu la itre thiina ka lolo i Akötresie, ene lo itre ka sisitria thei Nyidrë. Tune la itre iamamanyikeu hnei Iesu hna kuca, hapeu, thaa kolo kö lai a amamane la mene ka tru i Akötresie? Ngo eje hi laka, thaa hnei Iesu kö hna thele troa eatrëne la itre sipu aja i nyidrë, maine thele tro pena ha akötrëne la itre atr hnene lai mene cili hna hamëne koi nyidrë. (Luka 4:1-4) Kola mama hnyawa ngöne lo ijine Iesu a helëne la itre ka salem qa hnine la ēnē laka, ka hnine nyidrëti la meköt! (Mareko 11:15-17; Ioane 2:13-16) Hna amamane hnene la itre ini hnei Iesu hna hamën, memine la itre trenge ewekë i nyidrëti ka menyike ka ketr la hni ne la itre atr, laka, “sisitia hui Solomona” la inamacane i nyidrë. (Mat. 12:42) Hetrenyi kö la itre xaa aqane troa qeje pengöne la ihnimi Iesu ka mama ngöne lo nyidrëti a nue la mele i nyidrëti kowe la itre atr. Ue kö la troa hape: “Pëkö ihnimi ka sisitia hune lai”?—Ioane 15:13.
8 Pine laka hnene la Hupuna i Iehova hna amamane hnyawa la pengöi Nyidrë ngöne la nöjei götran, haawe, ijiji nyidrëti hi troa qaja, ka hape: “Ame la ate goeë ni, angeice fe a goeëne la Tetetro.” (E jë la Ioane 14:9-11.) Ame la troa xötrethenge la Keriso, tre, kösë easë hi lai a nyitipu Iehova.
Iesu La Atr Hna Iëne Hnei Iehova
9. Eue hë nge tune kaa la aqane ië Iesu hnei Akötresie?
9 Pane mekune jë së lo ewekë ka traqa ngöne lo macatre 29 M.K, ijine Iesu a tro koi Ioane Bapataiso, nge thötre hë lao macatre i nyidrë. “Nge ase hë bapataiso Iesu, ame hna canga nyikëtijë qa ngöne la tim ; nge hanawang, la hnengödrai hna thawapi koi angeic, ame hnei angeice hna goeëne la Uati Akötesie kola sheshëpi kösë piny, me traqa hu i anganyidë.” E cili hi la Iesu a xome la hnëqa ne Keriso, maine Mesia pena. Ame ngöne lai ijine cili, tre, hnei Iehova hna amamane laka, Iesu hi la hna iëne hnei Nyidrë, ke, öni Nyidrëti, ka hape: “Dei la Nekönge hniminang; ini a madi nyidë.” (Mat. 3:13-17) Drei la ketre kepine ka lolo ka upi së troa xötrethenge la Keriso!
10, 11. (a) Nemene la itre aqane troa xome la götrane qa hna hape, Keriso, matre troa qeje Iesu? (b) Pine nemene matre thaa tro kö sa hmaca troa xötrethenge Iesu Keriso?
10 Ame ngöne la Tusi Hmitrötr, tre, nyimutre la itre aqane xome la hna ati ëj, ene “Keriso,” matre troa amamane la götrane qa i Iesu, tune la Iesu Keriso, me Keriso Iesu, me Keriso. Iesu hi lo ka pane qaja lai trenge ewekë hna hape “Iesu Keriso,” laka tro pai ëj, nge pine pë hë lai götrane qa i nyidrë. Ame ngöne la ketre ijine nyidrëti a thith, hnei nyidrëti hna qaja ka hape: “Nge dei lola la mele ka tha ase palua kö, laka tro angat’ a ate hmekua cilie la nyipi Akötesieti ka cas, me Iesu Keriso la hnei cilieti hna upengëtin.” (Ioane 17:3) Kola nyihatrene catrëne ngöne la trenge ewekë celë la pengöne la atr hna upe me iëne hnei Akötresie. Ame la kepine matre kola amë panëne la götrane qa nge pine pë hë la ëj, ene la kola hape, “Keriso Iesu,” tre, nyine amamane la esisitriane la atr hune la hnëqa, maine huliwa hnei angeice hna kuca pena. (2 Kor. 4:5) Ngo e kolo hi a hape, “Keriso,” tre, kolo lai a qaja atrune la hnëqa hna xome hnei Iesu ceitu me Mesia.—Ite Hu. 5:42.
11 Ame la hnëewekë hna hape, “Keriso,” tre, thaa nyine tro kö a amamane laka, Iesu hmekuje hi la atrekë hnëqane lai; ngo kola nyi hatrene fe la ketre trenge nyipici ka sisitria catre kö, ene laka, ngacama hna uti kowe la fene hnene la Hupuna i Akötresie ceitu me ketre atr, me cainöjëne la aja ne la Tretretro i nyidrë, ngo thaa hnei nyidrëti kö hna traqa ceitu me ketre atre hi maine ketre perofeta pena; ngo hnei nyidrëti pe hna traqa ceitu me ketre Atre Hna Iëne hnei Iehova. Epi thaa tro kö sa hmaca troa xötrethenge nyidrë.
Iesu Hmekuje Hi La Jëne Iamele
12. Nemene trenge ewekë la hnei Toma aposetolo hna sipo Iesu troa qeje pengön?
12 Kola mama ngöne la itre trenge ewekë hnei Iesu hna qaja kowe la itre aposetolo qëmekene tro nyidrëti a mec, la ketre kepine ka sisitria catr matre loi e tro sa xötrethenge la Mesia. Hna hnyinge hnei Toma koi Iesu göi troa atre la pengöne lai hnei nyidrë hna qaja, ene la troa hnëkë göhnë, öni Iesu e sa, ka hape: “Ini la gojeny, me nyipici, me mel; pëkö ate a tro koi Tetetro e tha qa kö theng.” (Ioane 14:1-6) Iesu hi lo lai a ithanata kowe la ala 11 lao aposetolo ka mele nyipici pe. Hnei nyidrëti hna thingehnaeane koi angatr, ka hape, nyidrëti a troa hnëkëne koi angatr la ketre göhnë e hnengödrai; ngo hetre ketre aliene kö la itre trenge ewekë cili kowe la itre ka mejiune troa mele epine palua e celë fen. (Hna ama. 7:9, 10; 21:1-4) Nemene la aliene la itre trenge ewekë cili?
13. Nemene la aliene la hna hape, Iesu “la gojeny”?
13 Iesu hi “la gojeny.” Kolo lai a hape, jë së hmekuje hi thei nyidrë, maine easa ajane troa easenyi koi Akötresie. Ka nyipici fe lai ngöne la götrane la thith, laka, tro hmekuje hi la Tretretro a hamë së la nöjei ewekë hne së hna sipon, e hna jëne Iesu, nge ka ihmeku fe memine la aja i Nyidrë. Ngo hetre ketre aliene la kola hape, Iesu “la gojeny.” Hnene la ngazo hna aiananyine la itre atr qaathei Akötresie. (Is. 59:2) Hnei Iesu hna “hamëne la mele i [nyidrë] nyine thupene mele ne la nöjei ate ka kösau.” (Mat. 20:28) Celë hi matre Tusi Hmitrötr a qeje pengöne, ka hape: “Kola hnea tije la nöjei ngazo shë asëjëihë hnene la qazië i Iesu Keriso.” Qa ngöne lai, hnene la Hupuna hna fe gojenyi së matre troa iloi hmaca me Akötresie. (Rom. 5:8-10) Tro ha lolo la aqane imelekeu së me Akötresie, e hne së hna lapaune koi Iesu me drenge thenge nyidrë.—Ioane 3:36.
14. Tune kaa la aqane troa trotrohnine la hna hape, Iesu la “nyipici”?
14 Ame la kola hape, Iesu “la nyipici,” tre, thaa hnene caasi kö laka, hnei nyidrëti hna qaja me melëne la nyipici, ngo hnene mina fe laka, kola eatre koi nyidrëti hna aejëne la itre hna perofetane ka nyimutre, ka qajaqaja la Mesia. Celë hi matre hnei Paulo aposetolo hna cinyihane, ka hape, “ame la nöjei hna thinge hnaeane i Akötesie, te, eje hi thei nyidë.” (2 Kor. 1:20) Ketre, ame la “ahnue ne la nöjei ewekë ka loi [ka] troa traqa” ka eje hnine la Wathebo i Mose, tre, eatr asë hë itre ej hui Keriso Iesu. (Heb. 10:1; Kol. 2:17) Iesu hi la trepene la itre hna perofetan, ene lo itre ka troa xatua së troa trotrohnine la hnëqa ka sisitria i nyidrë ngöne la aqane trongene la aja i Iehova. (Hna ama. 19:10) Ame la aqane troa kepe thangane ka loi qa ngöne la itre aja hnei Akötresie hna hnëkëne koi së, tre, ene la troa xötrethenge la Mesia.
15. Kola hapeu lai hna hape, Iesu “la mel”?
15 Iesu “la mel” ke, hnei nyidrëti hna itö mele ne la itre atr hnene la madra i nyidrë; nge ketre, ame la mele ka thaa ase palua kö, tre, ahnahna lai hna hamëne hnei Akötresie “göi Iesu Keriso Joxu shë.” (Rom. 6:23) Iesu mina fe “la mel” kowe la itre ka meci hë. (Ioane 5:28, 29) Ketre pane mekune jë fe së la hnei nyidrëti hna troa kuca, e Atre Huuj Ka Sisitria jë nyidrë ngöne lo ijine tro nyidrëti a mus a caa thauzane lao macatre. Drei kö elanyi la aqane tro nyidrëti a amelene la itre jini ne la Baselaia i nyidrë qa ngöne la ngazo me mec kowe la mele ka thaa ase palua kö!—Heb. 9:11, 12, 28.
16. Nemene la kepine ka uku së troa xötrethenge Iesu?
16 Hetre nyipi aliene koi së la aqane sa Iesu la hnyinge i Toma. Iesu hi la gojenyi memine la nyipici me mel. Iesu hi la hnei Akötresieti hna up kowe la fen, matre troa amelen jëne nyidrë la itre atren. (Ioane 3:17) Ketre, pëkö atre atreine troa easenyi kowe la Tretretro e thaa jëne Iesu kö. Tusi Hmitrötr a qaja hnyawa, ka hape: “Pëkö iamele thei kete, ke pëkö kete ëjene e celë fene hnengödrai hna hamëne kowe la ate, ka ateine troa amele shë.” (Ite Hu. 4:12) Ngacama isapengöne ju hë la itre aqane mele së, ngo tro hë së a ujë tune la itre ka inamacan e hne së hna lapaune koi Iesu, me xötrethenge nyidrë, matre troa tro xomi së kowe la mel.—Ioane 20:31.
Catre Pi Së Drei
Keriso
17. Pine nemene matre ka nyipi ewekë koi së troa drenge la Hupuna i Akötresie?
17 Hnei Peteru, me Ioane me Iakobo hna öhnyi Iesu ngöne lo ijine nyidrëti a ketrepengön. Ame ngöne la ijine cili, tre, hnei angatr hna drenge la kola ewekë qa koho hnengödrai, ka hape: “Dei lai Nekönge ianang, dei nyidëti ju.” (Luka 9:28, 29, 35) Nyipi ewekë catre troa drengethenge la hna amekötin, ene la troa drenge la Mesia.—E jë la Ite Hu. 3:22, 23.
18. Tro sa drei Iesu Keriso tune kaa?
18 Ame la aqane troa drei Iesu, tre, ene la troa ‘goeë Iesu me meku nyidë.’ (Heb. 12:2, 3) Qa ngöne lai, catre pi së troa “nyipine catëne la nöjei ewekë” ka qeje pengöi Iesu, lo itre hne së hna e ngöne la Tusi Hmitrötr memine la itre itus ne la “hlue ka nyipici me ka inamacan,” memine la hne së fe hna drenge ngöne la itre ijine icasikeu. (Heb. 2:1; Mat. 24:45) Pine laka, itre mamoe së, haawe, catre pi së troa drei Iesu, me xötrethenge nyidrëti fe.—Ioane 10:27.
19. Nemene la ka xatua së troa xötrethenge Keriso pala hi?
19 Hapeu, tro fe kö së elany a hune me catre troa xötrethenge Keriso pala hi, ngacama nyimutre ju hë la itre jol ka troa traqa koi së? Nyipici, ijiji së hi, e hne së hna ‘xölehuje la ite tulu ne tenge ewekë ne mele’ me trongëne itre ej “ngöne la lapaune me ihnim, lo ka eje thei Keriso Iesu.”—2 Tim. 1:13.
Nemene La Itre Ini Hnei Epuni Hna Kapa?Y
• Pine nemene matre ame la troa xötrethenge “Keriso,” tre, celë hi lai ka troa acatrene hnyawa la aqane imelekeu së me Iehova?
• Pine nemene matre kola qaja, ka hape, maine tro sa nyitipu Iesu, tre, easë fe hi lai a nyitipu Iehova?
• Tune kaa la aqane troa trotrohnine la hna hape, Iesu “la gojeny, me nyipici, me mel”?
• Pine nemene matre loi e tro sa drenge la Atr Hna Iëne hnei Iehova?