Nemene La Ka Adronyi Atr?

Easenyi hë la Paseka 32 M.K. nge tha mano kö Iesu cainöj e Galilaia. Enehila, nyidrëti a tro Ierusalema troa feetëne la Paseka, tune lo hna amekötin hnei Akötresie. Ngo Iesu a nango tro juetrë, ke angetre Iudra a thele troa humuthi nyidrë. (Ioane 7:1) Thupene lai, nyidrëti a bëeke hmaca jë e Galilaia.

Ma Iesu jë e Kaperenauma la kola traqa koi nyidrë hnei itre Faresaio me itretre cinyihan qa Ierusalema. Nemene la tronge i angatr? Angatr a thele kepin troa upezö Iesu göi hmi. Öni angatr: “A hnauëne laka, tha metrötrëne kö la itretre drei nyipë la qenenöj hna acile hnene la itre qaaqaa së? Ke goeën, tha hane fe kö angatr wasi wanakoim qëmekene troa xen.” (Mataio 15:2) Ngo eje hi laka, tha hane fe kö Akötresie amekötin koi itre atr troa wasi wanakoim ‘uti hë la iwatingöne im.’ (Mareko 7:3) Ngo ame koi itre Faresaio, ngazo ka tru la troa tha metrötrëne la hna majemine cili.

Tha sa mekötine kö Iesu, ngo hnei nyidrëti pe hna amamane la aqane eni Wathebo i angatr. Öni nyidrë: “Hnauëne kö laka, ka tru koi nyipunie la qenenöj hune la wathebo i Akötresie? Ke hanawang, öni Akötresie: ‘Metrötrëne ju la itre keme me thine i eö,’ nge ‘Ame la atre ewekë akökötrenyi koi nyidro, tre tro ha humuthi angeic.’ Ngo öni nyipunieti pe, ‘Maine tro la ketre atr a qaja kowe la keme me thine i angeic ka hape: “Ame asë hi la hnenge hna hetrenyi nge nyine loi thatraqai epon, tre, ahnahna koi Akötresieti pë hë,” matre öni nyipunieti jë, tha nyipiewekë hë koi angeic troa metrötrë kem.’ ”—Mataio 15:3-6; Esodo 20:12; 21:17.

Itre Faresaio a catre fë ka hape, ame la mani, me hnepadro, maine nöjei ewekë hna sisinyi koi Akötresie, tre thatraqane la uma ne hmi, matre thatreine hmaca kö troa huliwan. Ngo eje hi laka, thene la atre sisinyi pala kö la itre ewekë cili. Matre e tro la ketre nekö trahmany a qaja ka hape, ame la manieng me itre hnepadrong tre nyine “Koreba,” (ahnahna koi Akötresie maine kowe la uma ne hmi) kösë ewekë hë ne la uma ne hmi la itre ewekë cili. Nge ngacama ijije pala kö kowe la nekö trahmany troa huliwane la mani cili maine hnepadro, ngo e catre fë kö angeic ka hape, tha ijiji angeice kö troa xatua keme me thin ka ut ipië, angeice hi lai a kötre hnëqa.—Mareko 7:11.

Tha fene hleuhleu kö Iesu pine angatr saze la Wathebo i Akötresie, matre öni nyidrë: “Nyipunieti lai a apatrene la trengewekë i Akötresie hnene la qenenöje i nyipunie. Itretre thoi! Nyipici hi lo hnei Isaia hna perofetane göi nyipunie ka hape: ‘Göi qaja hi la kola atrunyi ni hnene la nöje celë, ngo ame la hni angatr, tre ka iananyi pe me eni. Matre ka gufa la angatr a hmi koi ni, ke angatr a inine la itre wathebo i atr.’ ” Ame hna lapa thaup la itre Faresaio, ke catre la itre trengewekë i Iesu. Nge nyidrëti a hëne jë la ka ala nyimu koi nyidrë me hape: “Drenge ju, nge trotrohnine jë la aliene la: Tha ene kö la ewekë ka lö hnine la që ne la atr la ka adronyi angeic, ngo ene pe la ewekë ka tro qa lai.”—Mataio 15:6-11; Isaia 29:13.

Ame hë e thupen, la Iesu me itretre dreng e hnine la uma, öni angatr koi Iesu: “Atre fe hi nyipë laka, hna dreng akötrëne hnene la itre Faresaio lo trengewekë i nyipë?” Sa jë hi nyidrë ka hape: “Ame la nöjei feja hna tha traane hnei Kemeng e hnengödrai, tre tro ha feje trij. Nue angatre pi, ke itre tane ka timeke lai! Nge maine tro la timek a amamai gojenyi kowe la ketre timek, tro hë nyidroti lai a ce kei kowe la hnaop.”—Mataio 15:12-14.

Iesu a sesëkötr la Peteru a nyi qeneqaja ne la itretre dreng me hnyinge ka hape, nemene la ka adrone la atr. Matre öni Iesu: “Thatre kö nyipunie laka, ame la nöjei ewekë ka lö koi që, tre tro lai a uti kowe la trenge xel, ame hna trongëne hmaca pi? Ngo ame pe la ewekë ka tro qa ngöne la që, tre ka qaa kuhu hni lai, nge ewekë hi lai ka adrone la atr. Ke kola tro qa kuhu hni la itre mekune ka ngazo, me ihumuth, me nyixetë, me kuci ngazo, me atrekënö, me thoi, me silitrengathoi ketre. Celë hi itre ewekë lai ka adrone la atr; ngo ame la troa xeni nge tha pane wasi wanakoim, tre, tha ewekë kö lai ka troa adrone la atr.”—Mataio 15:17-20.

Tha Iesu kö a wathebone troa porop, maine tha wasi wanakoim qëmekene troa kuci xen, maine xen. Ngo nyidrë pe a jelengazone la aqane thoi ne la itre hene ne hmi, itre ka apatrene la Wathebo i Akötresie hnei itre qenenöj. Ngo eje hi, ame la ewekë ka adrone la atr, tre itre aqane ujë ka ngazo nge ka xulu qa kuhu hni.