Meken 56

Nemene La Ka Angazone La Atr?

CATRE la icilekeu ka traqa koi Iesu. Thaa kolo hmekuje kö a nue triji nyidrë hnene la itretre drenge ka ala nyim, ngo, kolo mina fe a thele troa humuthi nyidrë hnene la itretre Iudra, tune lo paseka e Ierusalema 31 M.K.

Ame hë enehila, kolo ha troa atrune la paseka ne la macatre 32. Celë hi matre Iesu a tro pi Ierusalema eë, thenge lo hna amekötine hnei Akötresie, laka, troa atrune la drai cili. Ngo nyidrëti a hmek, pine laka, kola thele troa humuthi nyidrë. Thupene lai, nyidrëti a bëeke hmaca jë Galilaia eë.

Maine jë e Kaperenauma la kola tro koi nyidrë hnene la itre faresaio me itretre cinyihane ne Ierusalema. Angatre a thele la itre kepine matre troa upe zö Iesu pine triane la wathebo i hmi. “Ue laka shashaithe hnei angete dei cilie la hna ini hnei ite qat?” Ke tha pane köla ime kö angate e troa xen.” Thaa wathebo i Akötresieti kö lai, ngo ame koi itre faresaio, ke, ketre ngazo ka tru la troa thaa hane trongëne lo hna majemine göi troa kölaim, uti fe hë ngöne la watingene im.

Thaa hnei Iesu kö hna sa la hnyinge i angatr, ngo nyidrëti pe a qaja ka hape, itre atr ka ngazo catre angatr, pine laka, atre hi angatre la wathebo i Akötresie, ngo angatre kö a ena ej. Öni nyidrëti ka hape: “Ue lae nyipunie a kete shashaithe la wathebo i Akötesie hnene la hna ini hnei nyipunie? Ke hnei Akötesieti hna ulatin, ka hape, ‘Metötëne ju la keme me thin’; nge, ‘Ame angeic’ ate qaja angazone la keme me thin, tro ha humuthi angeic.’ Ngo öni epuni pe, ‘Ame la ate qaja kowe la keme me thin, ka hape, Hmitötë hë la ite ewekënge nyine xomexatua nyipo, mate tha metötëne hmaca kö la keme me thine i angeic.’ ”

Eje hi laka, kola inine la itre atr hnene la itre faresaio, ka hape, ame la mani, me itre mo, maine itre xaa ewekë hna nyi ahnahnane koi Akötresie, ke, thatraqane hmekuje hi la ēnē, nge thaa ijije kö troa xome itre eje troa kuci itre xaa mekunëne pena ha. Ngo, eje hi laka, thene kö la atr ham, la ewekë hnei angeice hna nyi ahnahnan. Celë hi matre, ijije hi tro la neköne a kötrene la hnëqa i angeic, ene la troa xatuane la keme me thine i angeice ka qatre hë; maine troa qaja ka hape, ame la manie me itre mo i angeice ke, “korabana,” kola hape, ahnahna hna hamëne koi Akötresie, maine thatraqane pena la ēnē.

Pine la aqane thaa ahmitrötrëne la itre faresaio la trenge wathebo i Akötresie, öni Iesu koi angatre ka hape: “Tune lai nyipunieti a atiane la wesi ula i Akötesie hnene la ite hna ini hnei nyipunie. Itete thoi, loi la hnei Isaia hna perofetane göi nyipunie ka hape, ‘Ame la nöje celë, te, kola easenyi ni hnene la ite qe i angat, me atrunyi ni hnene la ite ukeineqë; ngo ame la ite hni angat, te, iananyi me ini. Huliwapi hë angat’ a atrunyi ni, ngo inine pe la nöjei wathebo i at.’ ”

Maine jë hnene la ka ala nyimu hna pane thue gojenyi ne la itre faresaio, matre tro angatre a pane ithahnata me Iesu. Ngo pëkö meje i angatr, pine laka, thatreine kö angatre sa thenge la kola pane thaucë angatre hnei Iesu; haawe, nyidrëti a hëne jë koi nyidrë la ka ala nyim. Öni nyidrëti ka hape: “Dengeju nyipunie me trotrohnineju. Tha celë kö ewekë hna lö kowe la ukeineqë la ka angazone la at, ngo loi la ewekë hna lö pi qa ngöne la ukeineqë, celë pe nyine angazone la at.”

Thupene lai, kola hnyinge hnene la itretre drei nyidrë, ngöne la angatre a lö hnine la ketre uma, öni angatre ka hape: “Atengëtine hi enëtilai laka nöjei faresaio a elëhnine la hna shamatine la ulati cili?”

Kola sa hnei Iesu ka hape: “Ame la nöjei sinöe tha hna trane kö hnei kakati e koho hnengödrai, te, tro ha feje më iwane jë.” “Loiju kö angat. Ite timeke angate kola ie ite timek. Nge maine ea la timeke hnei kete timek, tro asë hë nyidoti a ce kei e kuhu hnaop.”

Kösë lo kola sesëkötre hnei Iesu, ngöne la kola nyi qene qaja ne la itretre drenge hnei Peteru, me sipo nyidrë troa qeje pengöne la mekune i nyidrë, ngöne la ewekë ka adrone la atr. Iesu a sa ka hape: “Hape u tha trotrohnine kö nyipunie? Tha wangate hmekune kö nyipunie laka, ame la nöjei ewekë ka löjë kowe la ukeineqë a tro kowe la xel, ame hna helëne hnite eë? Ngo ame la nöjei ewekë ka löpi qa ngöne la ukeineqë, te, kola tropi qa kuhu hni, celë hi ate asisine la at. Ke kola löpi qa kuhu hni la meku ngazo, me humu at, me nyi xetë, me kuci ngazo, me ënö, me atë la thoi, me jele ngazon. Celë hi ite nyine angazone la at; ngo ame la troa xeni nge tha hna köla ime kö, te, tha nyine angazone kö la at.”

Thaa Iesu kö la a wangacone la aqane troa nyihnyawane me thupëne la mele së. Thaa nyidrëti kö a qaja ka hape, thaa ka nyipi ewekë kö la troa waasi wanakoim, qëmekene troa hnëkëne maine troa xeni pena. Ohe, nyidrëti pe a xele ma wange la aqane huliwa thoi ne la itre hene hmi, laka, angatre a thele troa saze la itre wathebo ka meköti Akötresie, hnene la itre aqane huliwa ka iaö, ene la troa qaja asisitriane menune la itre hna majemine kuca ka paatre kö e hnine la Tusi Hmitrötr. Nyipici, ame la ka adrone me angazone la atr, ke, ene lo itre huliwa ka ngazo; nge Iesu a qaja ka hape, ka xulu itre eje qa kuhu hni. Ioane 7:1; Deuteronomi 16:16; Mataio 15:1-20; Mareko 7:1-23; Esodo 20:12; 21:17; Isaia 29:13.

▪ Nemene la itupathi hna cile kow hnei Iesu enehila?

▪ Nemene la ngazo hnene la itre faresaio hna upe zö Iesu pin, ngo, tune la hnei nyidrëti hna qaja, tune kaa la aqane ketre sipu sasaithe angatre la wathebo i Akötresie?

▪ Tune la hnei Iesu hna qaja, nemene la itre ewekë ka angazone la atr?