Iesu a Mama Ngöne La Lolo

Iesu e Kaisaria Filipi, 25 km la enanyine qaa ngöne la Wetre Heremona. Nyidrëti pala kö a inine la itre atr, me hamëne la ini ka tru koi itre aposetolo, öni nyidrë: “Eni a qaja hnyawa koi nyipunie laka, tha tro kö la itre xa ka cil e celë a hane mec, e tha hna pane öhne kö la Nekö i atr a kola traqa ngöne la Baselaia i angeic.”—Mataio 16:28.

Ma itretre dreng a isa thele la aliene la trengewekë i Iesu. Ngo ca wiike thupen, nyidrëti a hëne jë la köni aposetolo—Peteru, Iakobo, me Ioane—troa ce elë me nyidrë hune la wetr. Nge ma heji lapa ha, ke pi meköl hë lo ala kön. Matre ame ju hi la Iesu a thith, ketre pengöne pi hi nyidrë qëmeke i angatr. Angatr a öhne la ialameke i nyidrë a kola hudrume tune la jö, nge iheetre i nyidrë a wië kaca me mel tune la lai.

Thupene lai, mama pi hi la lue atr kösë “Mose me Elia.” Nyidroti a ithanata me Iesu göne la tronge i nyidrë ka ‘troa eatr e Ierusalema.’ (Luka 9:30, 31) Ame la tro cili, tre kola qaja la mec me mele hmaca i Iesu, lo hnei nyidrë hna ce ithanatane me itre aposetolo eue hi lo. (Mataio 16:21) Kola mama jëne la porotrike celë ka hape, tria kö lo hna mekun hnei Peteru, ke ame la troa ahmahmanyi Iesu me humuthi nyidrë, tre tha tro kö a trian.

Hlë hë lo köni aposetolo, matre angatr a nyiqaane drenge me hain. Nge maine nyipici laka, ketre iamamanyikeu lai, ngo Peteru a lö hnine la porotrik, ke kösë ewekë ka eje hnyawa. Matre öni angeic: “Rabi, ka loi ke eahuni hi la, nue huni pi troa acil la köni itat, casi koi nyipë, casi koi Mose, nge casi fe koi Elia.” (Mareko 9:5) Hapeu, Peteru kö a pi acili tat matre tha tro kö a canga patre la iamamany?

Peteru pala kö a ithanata, nge hakuthi angatr ju hi hnene la ketre iaw ka mel, nge kola ewekë qa hnine la iaw me hape: “Hane hi la Nekönge hniminang, eni a madri nyën. Drei nyëne ju.” Ame ju hi la angatr a drenge la aqane ewekë i Akötresie, hnene la köni aposetolo hna xou me thil, ngo canga öni Iesu jë hi: “Cile jë, the xou kö.” (Mataio 17:5-7) Matre ame ju hi la angatr a cil, Iesu casi pe hi. Patre hë lo ka iamamany. Nge e lai hë, angatr a uti pi qa hune la wetr, matre Iesu a wathebo angatre ka hape: “The qaja pi kö koi ketre la hnei nyipunie hna öhn, uti hë la troa amelene hmaca la Nekö i atr.”—Mataio 17:9.

Itre aposetolo a hnying ju koi Iesu, ke hnei angatr hna öhnyi Elia. Matre öni angatr: “Nga hnauëne laka, itretre cinyihan a inine ka hape, tro Elia a traqa pa?” Öni Iesu: “Qa i Elia ha la, ngo tha hna wangatrehmekunyi angeice kö.” (Mataio 17:10-12) Iesu a qeje Ioane Bapataiso, ke ceitu hi la hnëqa i angeic me Elia. Hnei Elia lo hna hnëkë gojenyi koi Elisaia, nge tui Ioane hi me Keriso.

Drei la kola thuecatre i Iesu me itre aposetolo hnene la iamamany cili! Öhne hë angatr la lolo ne la Baselaia i Keriso. Kolo hi lai a eatrën lo hnei Iesu hna thingehnaean ka hape, tro la itretre dreng a öhne la “Nekö i atr a kola traqa ngöne la Baselaia i angeic”. (Mataio 16:28) Ame lo angatr hune wetr, hnei angatr hna “sipu öhne la lolo i nyidrë.” Ngo ame itre Faresaio, hnei Iesu lo hna xele ma kuci iamamanyikeu nyine anyipicine laka, nyidrë la Joxu hna iën hnei Akötresie. Itretre drei Iesu ka ce mel me nyidrë la itre hna aijijën troa öhnyi nyidrë a ketre pengön, nge kolo hi lai a anyipicine la itre hna perofetan göne la Baselaia. Nge celë fe hi ka aijijë Peteru troa cinyihan e thupen ka hape: “Xecie hnyawa ha koi së la itre hna perofetan.”—2 Peteru 1:16-19.