“Mele Hmaca Me Mel”

Iesu a traqa qa Perea, me lö kowe la itre neköi traon ezine Bethania. Tha nanyi kö la traone cili qa Ierusalema, 3 km hi la enanyin. Nge Maria me Maretha, lo lue xa i Lazaro a treije pi angeic ke meci hë. Matre ala nyimu la itre ka traqa troa fetra.

Ame hnei ketre hna thuemacanyi Maretha ka hape, mai Iesu hë lai. Matre angeic a canga tro jë troa itronyi me nyidrë. Nge Maretha a qaja ju koi Iesu la hnei angeic me Maria hna lapa fë a foa hë lao drai. Öni angeic: “Joxu, maine nyipëti ju e celë, tha tro kö a meci la neköi jining.” Ngo tha kolo kö hape, ka tha mejiune kö angeic, ke öni angeic: “Atre hi ni laka, ame asë hi la nöjei ewekë hnei nyipëti hna sipone koi Akötresie, tro kö nyidrëti a hamë nyipë.” (Ioane 11:21, 22) Ma angeice jë a mekune ka hape, tro Iesu a kuca la ketre ewekë kowe la xa i angeic.

Sa jë hi Iesu ka hape: “Tro la jini eö a mele hmaca.” Maretha a mekune ka hape, Iesu a qaja la mele hmaca elany e celë fen, lo hna mejiune kow hnei Aberahama me itre xan. Matre angeic a amamane jë la lapaune i angeic me hape: “Atre hi ni laka, tro angeic a mele hmaca ngöne la itre drai tixenuë elany.”—Ioane 11:23, 24.

Ngo hapeu, tro kö Iesu a aupunyi angeic enehila? Iesu a amekunë Maretha jë laka, hnei Akötresie hna aijijë Iesu troa ngaane la mec. Öni nyidrë: “Ame la atre amamane la lapaune i angeic koi ni, ngacama tro ju hë angeic a mec, ngo tro hmaca kö angeic a mel; nge ame la nöjei atr ka mel, nge ka amamane la lapaune i angatre koi ni, tha tro kö angatre lai a hane mec.”—Ioane 11:25, 26.

Tha Iesu kö a qaja ka hape, tha tro kö la itretre drei nyidrë a hane mec, ke tro fe nyidrëti a mec, tune lo aqane qaja i nyidrë koi itre aposetolo. (Mataio 16:21; 17:22, 23) Iesu pe a amamane laka, e tro ketre a lapaune koi nyidrë, mele ka pë pun la edrö i angeic. Ngo ala nyimu la itre ka troa kapa la edrö cili, thupene la hna amele angatre hmaca. Nge ame la itre ka mele nyipici nge ka mele pala kö ngöne la pune la fene celë, tha tro pi kö angatre lai a hane mec. Ngo eje hi, ame la atre lapaune koi nyidrë, tha tro kö angeic a meci palua.

Ngo hapeu, tro kö Iesu, lo atre qaja ka hape, “Eni la mele hmaca me mel,” a xatua Lazaro ka mec a foa hë lao drai? Öni Iesu koi Maretha: “Mejiune fe kö eö?” Sa jë hi angeic ka hape: “Eje hi Joxu, ka mejiune ni laka, nyipëti hi la Keriso, Nekö i Akötresie, nge atre traqa kowe la fen.” Lapaune hi Maretha laka, tro Iesu a kuca la ketre ewekë enehila, matre angeic a canga tro ju troa hëne aconyi Maria me hape: “Joxu hë la, nyidrëti a hë eö.” (Ioane 11:25-28) Ame hnei Maria hna canga mejë jë, nge kola xötrethenge angeic hnei itre xan, ke angatr a mekune laka, angeic a tro kowe la hua i Lazaro.

Ngo Maria pe a itronyi me Iesu, me kei kowe la lue ca nyidrë me treij. Matre angeic a qaja ju lo itre trengewekë i Maretha, öni angeic: “Joxu, maine nyipëti ju e celë, tha tro kö a meci la neköi jining.” Hace pi hi la hni Iesu la Maria treije me itre atr xötreith, matre nyidrëti a treije ju fe. Nge kola ketr la hni ne la itre ka goeën. Matre öni itre xan: ‘Maine atreine hi Iesu fe la luemeke ne la atr hna hnahon a timek, hapeu, tha tro kö nyidrëti lo a kuca la ketre ewekë matre tha meci pi Lazaro?’—Ioane 11:32, 37.