Ini Ne Ipië Ngöne La Paseka Tixenuë

Peteru hë me Ioane e Ierusalema troa hnëkë Paseka, tune lo aqane upi nyidro hnei Iesu. E thupen, traqa pi hi Iesu memine lo treene lao aposetolo. Hnaipajö heji hë, nge kola ha lö la jö, angatr a uti qa hune la Wetr Elaio. Tha tro hmaca kö Iesu a goeëne la traon e lai, qëmekene troa amele nyidrëti hmaca.

Angatre hë a tro kowe la uma hnei angatr hna troa ce xeni la Paseka. Angatr a elëne jë la escalier kowe la hnahag ka tru e koho. Nge traqa ju hi angatr a öhne laka, ase hë hnëkën asë koi angatr. Hnei Iesu hna lapa treqene la ijine cili, ke öni nyidrë: “Atraqatre la trenge ajange troa ce xeni me nyipunie la Paseka celë, qëmekene tro ni a melëne la akötr.”—Luka 22:15.

Nyimu macatre qëmeken, hna nyiqaane ihamënekeune la itre verë waina kowe la itre ka sine la Paseka. Matre thupene la Iesu a kapa la ketre verë waina, Iesu a thithi jë me hape: “Xome jë la, nge ihamënekeune pi nyipunie. Nge eni a qaja hnyawa koi nyipunie laka, qaane enehila, tha tro hmaca kö ni a iji la waina celë, uti hë la troa traqa la Baselaia i Akötresie.” (Luka 22:17, 18) Mama hnyawa ha ka hape, easenyi hë tro nyidrëti a mec.

Angatr pala hi a xen, nge traqa pi la ketre ewekë. Iesu a mejë jë, me una la iheetre ka qea i nyidrë, me xome la ketre neköi trawel, me nyialiei time ngöne la ketre basin ezin. Ewekë lai hna majemine kuca hnene la atrekë uman, qa i angeic troa upe la hlue troa köle la lue ca ne la itre hna hën. (Luka 7:44) Ngo ngöne la heji cili, patre kö la atrekë hnalapan, matre Iesu pë hë la ka kuca. Ijiji nöjei aposetolo troa kuca, ngo pëkö ala casi ka enij. Hapeu, angatre pala kö a isi pi ka tru? Thatre kö së, ngo angatr a isa hmahma, ke Iesu la ka köle la lue ca i angatr.

Ame la Iesu a traqa koi Peteru, öni angeic: “Pëkö tro nyipëti a hane köle la lue cang.” Sa jë hi Iesu ka hape: “Maine tha tro kö ni a köle la lue ca i eö, tha ijiji eö kö troa ce me eni.” Öni Simona Peteru: “Nga joxu, the köle hmekuje kö la lue cang, ngo memine fe la lue iwanakoimeng, me heng.” Drei la angeic a sesëkötr la Iesu a sa ka hape: “Ame la atre ka ase si, tro hi a köle la lue ca i angeic, ke ka porope hë lai. Nge ame nyipunie, wië fe hë nyipunie, ngo tha nyipunieti asë kö.”—Ioane 13:8-10.

Ase hë Iesu köle la lue ca ne la ala 12, nge goi köle fe la lue ca i Iudra Isakariota. Thupene lai, nyidrëti a heetre hmaca jë me elë troa xen, nge öni nyidrë: “Trotrohnine kö nyipunieti la hnenge hna kuca koi nyipunie? Nyipunie a hë ni ka hape, ‘Atre Ini’ me ‘Joxu,’ nge nyipici nyipunieti hi, ke eni hi lai. Haawe, maine tro la Joxu me Atre Ini a köle la lue ca i nyipunie, nga qa i nyipunieti fe troa hane köle la lue ca i ketre me ketre. Nge eni hi lai a amamai tulu koi nyipunie, matre ame la hnenge hna kuca koi nyipunie, hane jë fe kuca tun. Nyipici, eni a qaja hnyawa koi nyipunie, tha ka tru kö la hlue hune la maseta, nge tune fe kowe la atre hna up, tha ka tru kö angeic hune la atre iup. Matre, maine atre hë nyipunieti lai, tro hë nyipunie a madrin e tro nyipunie a kuca.”—Ioane 13:12-17.

Drei la ketre tulu ne ipië! The tro kö itre ka xötrethenge Iesu a thele troa lapane la itre pane göhnë, maine mekune ka hape, loi e troa nyihlue i angatr ke ka nyipiewekë angatr. Ngo tro pe a nyitipu Iesu, tha göi köle iwaca, ngo göi aqane ipië me tha ië hna hnim.