Meken 113
Ketre Tulu Ne Ipië Ngöne La Paseka Tixenuë i Iesu
TRAQA ha Peteru me Ioane e Ierusalema matre troa hnëkëne la pui ne xeni ne Paseka, thenge lo itre hna ahnithe hnei Iesu. Iesu pë hë a traqa ngöne la hnaipajö, maine jë cememine pe hi la treene lao aposetolo. Angatre a uti qa hune la wetr Elaio, nge kolo ha lö la jö. Drai ne Iesu pe hi lai a öhne tixenuëne la lapa e Ierusalema qa hune la wetr Elaio, qëmekene tro nyidrëti a mele hmaca.
Iesu hë me itre aposetolo a traqa ngöne la lapa, me tro pi kowe la uma hnei angatre hna troa atrune ngön la pui ne xeni ne paseka. Angatre a elë jë kowe la hnahage ka tru e koho, hna hnëkëne hë thatraqai angatre hmekuj, matre troa atrune la Paseka. Iesu a treqene la ijine cili, pine laka, öni nyidrëti ka hape: “Atraqate la ajange troa ce xeni me nyipunie la paseka celë e tha meci pete kö ni.”
Hna majemine troa iji la foa lao inege ne waina, hnene la itre ka sine la Paseka. Thupene la hna kapa la caas, maine jë lo lai hnaakönin, haawe, Iesu a olene hnene la thith, me qaja ka hape: “Xome jë la, nge ihamënekeune jë; ke ini a qaja koi nyipunie ka hape, tha tro hmaca kö ni a hane iji la wene vine, uti hë e traqa ha la Baselaia i Akötresie.”
Ngöne la ijine pui ne xen, hnei Iesu hna pane cil, me una amë la iheetre i nyidrë, me xome la sine mano, me nyialiene la inege hnei tim. Hna majemine tro la atrekë umane la uma, a hnea la lue ca ne la itre hnei angeice hna könën. Ngo enehila, pine laka, paatre kö la atrekë umane la uma, haawe, Iesu a kuca la ewekë cili. Maine ju ijije hi tro la ketre aposetolo troa kuca la ewekë cili; ngo maine jë hetrenyi pala kö thei angatre la pi draië, ngöne laka, pëkö ala caasi e angatr, ka cile troa kuca lai. Qa ngöne lai, angatre a hmahma, ngöne la Iesu a nyiqaane troa hnea la itre lue ca i angatr.
Ame la Iesu a tro koi Peteru, canga öni angeice koi nyidrëti ka hape: “Tha tro pala kö cilieti a hnea la lue cang.”
Iesu a sa ka hape: “Maine tha tro kö ni a sië eö, pëkö edö i ’ö theng.”
Öni Peteru ka hape: “Joxu, tha lue cange hmekuje hi, ngo loi la lue iwanakoimeng, memine fe la heng.”
“Ame la ate hna siën, te, ijije troa hnea la lue ca hmekuje hi, ame hna cengöne hmadradra ha nyipunie, ngo tha nyipunieti asë kö.” Nyidrëti a qaja lai, pine laka, atre nyidrëti laka, Iuda a troa wanaxoeë nyidrë.
Ase hë nyidrëti hnea la lue ca ne la ala 12, me Iuda fe lo ka troa wanaxoeë nyidrë, haawe, Iesu a xetrëne hmaca la itre iheetre i nyidrë, me lapa qëmekene la laulau. Nyidrëti a hnyingë angatre ka hape: “Hape u, trotrohnine kö nyipunie la hnenge hna kuca koi nyipunie? Nyipunie a hë ni ka hape, Ate ini, me Joxu, nga loi la hnei nyipunie hna qaja, ke, eje hi. Maine Joxu ni me Ate ini, nge ase hë ni hnea la ite lue ca i nyipunie; loi e tro nyipunie a itö ihne lue ca kö nyipunie. Ke ase hë ni hamë nyipunie la tulu, mate tro nyipunie a kuca tune la hnenge hna kuca koi nyipunie. Nyipici, nyipici, ini a qaja koi nyipunie, ka hape, Tha tru kö la hlue hune la ite tixe i angeic; kete tha tru kö la hna upe hune la ate upi angeic. Maine ate nyipunie la ite ewekë cili, manathithi hë nyipunie maine nyipunie a kuca it’ ej.”
Drei la ketre ini ka lolo, ene la troa ipië! Thaa loi kö tro la itre aposetolo a thele troa lapa mekene ta, me mekune ka hape, sisitria angatre hui itre xan, nge tro pala hi a nyihlue i angatr. Loi e tro angatre a xötrethenge la tulu hna amë pe hnei Iesu, a thaa ene kö la troa hnea la lue ca ne la itre atr tune la hna majemin, ngo tro pe a hetrenyi la ajane troa nyihluei Akötresie, nge thaa tro pe a ië hna hnim, loi pe troa atreine ce nyihluëne la nöjei pengöne huliwa ngacama ka jol, maine ka thaa nyine mamane kö. Mataio 26:20, 21; Mareko 14:17, 18; Luka 22:14-18; 7:44; Ioane 13:1-17.
▪ Ame ngöne la Iesu a öhne e Ierusalema, ekaa la hnei nyidrëti hna tro kow matre troa atrune la Paseka, pine nemene matre ketre ijine ka ketre pengöne kö la ijine cili?
▪ Ame ngöne la Paseka, nemene la inege hnei Iesu hna hamëne kowe la 12 lao aposetolo, thupene la hnei nyidrëti hna thith?
▪ Ngöne la hneijine i Iesu, nemene la ewekë hna majemine kuca hnene la trene uma, kowe la itre atr hnei angeice hna könën, nge pine nemene matre thaa hna tune kö ngöne la ijine Iesu a ce atrune la Paseka memine la itre aposetolo i nyidrë?
▪ Nemene kepine matre Iesu a kuca la hnepe huliwa ka co, ene la troa hnea la lue ca ne la itre aposetolo i nyidrë?