Öni Pilato: “Hane Hi La Trahmany!”

Öni Pilato kowe la itre ka thele troa humuthi Iesu ka hape: “Ngo tha öhne kö ni la hnei nyipunieti hna nyizö angeic. Nge tui Herodra fe.” (Luka 23:14, 15) Matre enehila, Pilato a thele jëne troa nue Iesu, öni angeic: “Ngo tune lo hna majemine thei nyipunie, tro ni a nue la ketre atr hna akalabusin ngöne la ijine Paseka. Matre hapeu, aja i nyipunieti kö tro ni a nue la Joxu i angetre Iudra?”—Ioane 18:39.

Atre hi Pilato laka, hetre ketre atr hna akalabusin, Barabasa la ëjen. Atrekënö angeic, nge atre agomegomëne la nöj, me ihumuth. Matre Pilato a hnyinge jë ka hape: “Aja i nyipunieti kö tro ni a nue Barabasa maine Iesu, lo hna hëne ka hape, Keriso?” Itre atr a sue jë ka hape, troa nue Barabasa ngo tha Iesu kö, ke itre hene ne hmi a uku angatr. Matre Pilato a hnyingëne hmaca jë me hape: “Drei la hnei nyipunieti hna ajane tro ni a nu?” Sa jë hi angatre ka hape: “Barabasa”!—Mataio 27:17, 21.

Goe catre ju hi Pilato, ame hnei angeic hna hnyingëne hmaca me hape: “Nge tro pë hë ni a uë Iesu, lo hna hëne ka hape, Keriso?” Itre atr a suene jë ka hape: “Athipi angeice ju hune la sinöe!” (Mataio 27:22) Loi e tro angatr a hmahma, ke angatr a sipone la madra ne la atre ka meköt. Matre öni Pilato hmaca jë: “Ke hnauën? Nemene la ngazo hna kuca hnene la atre ce? Tha öhne kö ni la ketre hnepe ngazo thene la atre ce matre troa humuthi angeic. Ngo tro pe ni a thaucë angeic, me nue angeice hmaca.”—Luka 23:22.

Ngacama kola isin hnei Pilato, ngo itre atr a ce sue ka hape: “Athipi angeice ju hune la sinöe!” (Mataio 27:23) Eje hi, tru pi hë la hna amejën hnei itre hene ne hmi la imethinë koi Iesu, matre itre atr a aja madra! Ngo tha madra ne la atre kuca la ngazo, maine atre ihumuth, ngo madra ne la atre ka pë engazon. Lo hnei angatr hna ikep kösë Joxu e Ierusalema, a traqa koi faifi lao drai. Nge maine jë, kola goeëne lai hnei itretre dreng, nge angatr a lapa thaup me cile hnö.

Öhne hi Pilato laka, angeic a aluzi traem. Xou i angeic tro la ka ala nyimu a icilekeu, matre angeic a xomi time pi, me wasi wanakoim qëmekei angatr asë. Öni angeice jë hi: “Tha zönge fe kö la madra ne la atre ce, ngo nyipunieti pë hë.” Ngo pëkö thangane lai. Önine la ka ala nyim: “The huni kö, me itre nekö huni la madra i angeic.”—Mataio 27:24, 25.

Tru kö la aja ne la Gavena troa amadrinëne la ka ala nyim, hune la troa kuca la meköt. Matre thenge la sipo i angatr, Pilato a nue Barabasa pi. Thupene lai, angeic a upe pi troa una la iheetre i Iesu, me thaucë nyidrë.

Thupene la hna lepi nyidrë, itre sooc a xomi Iesu jë kowe la hnalapa i Gavena. Angatr a hëne hmaca jë la itre xa sooc troa qanangazo nyidrë. Angatr a ele jë la ketre korona ka ithiny, me acatren hune la he i nyidrë. Angatr a upi nyidrëti jë troa cile fë hainy ka tru, me heetrë iheetr ka qea nge ka maea ngön, kösë ketre joxu. Angatr a qenahmo nyidrëti jë me hape: “Bozu së, Joxu i angetre Iudra!” (Mataio 27:28, 29) Ngo hnei angatre hmaca kö hna hnyijuë nyidrë, me xe la ialameke i nyidrë. Angatr a thapa pi la hainy qaathei nyidrë, me lepe la he i nyidrë, matre lö hnyawa la itre ka ithinyi ngöne la he i nyidrë.

Kola hain hnei Pilato la aqane catr me cile meköti Iesu, matre angeice hmaca jë a thele troa nue nyidrë. Öni Pilato: “Hanawang! Eni a traqa sai angeic koi nyipunie, matre tro nyipunie a atre laka, pëkö ngazo hnenge hna öhne thei angeic.” Hapeu, Pilato kö a mekune ka hape, e tro la itre atr a öhne la itre eatr me madra i Iesu, tro hë angatr a hnimi nyidrë? Matre ame la Iesu a cile qëmekene la ka ala nyim, öni Pilato: “Hane hi la trahmany!”—Ioane 19:4, 5.

Ngazo catre ju hë la itre eatre i Iesu, ngo ka cile meköt me tingetinge pala hi nyidrë. Pilato a hai nyidrë, nge kola mama ngöne la itre trengewekë i angeic, itre trengewekë ne metrötr me iutipi.