Meken 123

“Hanawange La Trahmany!”

KOLA haine hnei Pilato la aqane ujë i Iesu, nge angeice a atrehmekune hnyawa laka, pëkö ngazo thei nyidrë, ene pe thele ju hi angeice la ketre aqane troa nue nyidrë. Öni nyidrëti kowe la ka ala nyimu ka hape: “Thina i nyipunie, tro ni a shenge koi nyipunie la kete ate ngöne la paseka.”

Pine laka, hetrenyi fe hnine la itre kalabusi angeic, la ketre atr ka ihumuth, Barabasa la ëjen, haawe, angeice a hnyinge me hape: “Dei la hnei nyipunieti hna ajane tro ni a shenge koi nyipunie? Barabasa, maine Iesu, hna ati ëjene Keriso, hape u?”

Pine laka, hna ukune la nöje hnene la itre tane i angetre huje troa icilekeu me Iesu, haawe, angatre a thele me ajane troa nue Barabasa, ngo troa humuthi Iesu. Thaa hnei Pilato kö hna canga kei kowe la mekune i angatr, matre angeice a sa me tupathe hmaca troa hnyinge ka hape: “Dei la aja i nyipunie e nyido, mate tro ni a shenge koi nyipunie?”

Kola sue hnene la nöje me hape: “Barabasa.”

Ame hna xou hnei Pilato, nge angeice a qaja ka hape: “Nemene la ewekë tro ni a kuca koi Iesu hna ati ëjene Keriso?”

Kola ce sue catre hnene la nöj, me hape: “Athipi nyëne jë hune la sin̈oe.” “Athipi,” nyëne jë! “Athipi nyëne jë hune la sinöe”(MN ).

Atre hë Pilato laka, kola ajane hnene la nöje troa humuthe la ketre atr ka pëkö ngazon, angeice a hnyinge hmaca koi angatre ka hape: “Ke nemene la ngazo hnei angeice hna kuca? Pëkö kepine hnenge hna öhne thei angeic, mate troa mec; qa ngöne lai tro ni a thaucë angeic, me nue angeice pi.”

Ase hë Pilato tupathe la nöjei aqane troa nue Iesu, ngo thaa idrei kö la ka ala nyim, pine laka, atraqatre la elëhni angatr, ke kola uku angatre hnene la itre hene hmi; thaa mano kö angatre sue, kola hape: “Athipi nyëne jë hune la sinöe” (MN ). Kola jele hnene la itretre huje la elëhni thene la nöj, matre angatre a ajane troa neni la madra. Thatreine kö troa trotrohnine la itre xaa atre Iuda, ke, faifi petre hi lao drai qaane lo hmekune angatre a atrunyi Iesu e lö e Ierusalema, ceitune me ketre joxu! Ame ngöne la ijine cili, maine itretre drei nyidrë fe hi e nyipine la ka ala nyim, ngo pëkö meje i angatr nge thaa amamanyi pi kö.

Nge öhnë hë Pilato laka thaa ie hë, nge cia pena ha la gomegom, ame hnei angeice hna xome la trepe tim, me köla ime qëmeke ne la nöj, me hape: “Gufa koi ni ngöne la madra ne la ate celë ka meköt; qâ i nyipunieti pë hë.” Kola sa hnene la nöje ka hape: “Loi la madra i nyëne troa tithi huni me ite nekö hun.”

Qa ngöne lai, ngacama atre hi Pilato laka, ka meköti Iesu, ngo angeice kö a ajane troa aejëne la mekune ne la ka ala nyim, ene pe kapa ju hi angeice la aja ne la nöj, ene la troa nue Barabasa. Angeice a iupi jë troa una la iheetre i Iesu, me thaucë nyidrë. Thaa ka co kö la hna lepi nyidrë. Hanawange la aqane qeje pengöne hnene la Journal de l’Association des médecins américains, la aqane ithaucë thei angetre Roma:

“Ame la jia hna majemine xom, ke ketre wameuc ka xoxopatr (flagrum maine flagellum), hna kuca hnei fini waumene kupeine öni ka isa eqeane kö, hna ielekeun, itre xan thaa hna ele kö; ame ngöne la pune la itre waumene kupeine öni hna elewanaeamon, hna hnöthe iasenyine la itre neköi wene fao ka co, maine itre june mamoe ka xecie nge ka ixöji catr. . . . Kola nue asë hnene la itre sooce ne Roma la trenge catre i angatr, me anyimua hna la jia kowe la ju ne la atr hna lep; ene pe kola lepe apujen hnene la itre wene fao, nge itre waumene beletre qa ngöne kupeine öni, me itre june mamoe a kuie zezene la ikupeine memine la ijöne ne la atr. Qea ha la hna isi, ene pe kola kuie fe la itre none ka fedre kowe la itre jun, matre kola thipi la itre ijöne ngönetrei hna kacatrane hnei madra.”

Thupene la hna lepi Iesu, kola tro sai nyidrë kowe la uma ne la gavena, nge hna hëne mina fe la trongene isi. Itre sooce pala hi a qanangazo Iesu: angatre a ele jë la ketre itrapetr hna kuca hnei ka ithiny, me petrë Iesu. Angatre a amë ju fe la ketre hainge ngöne la wanakoime maca i Iesu, me heetrë nyidrë hnene la ixetre ka maea ngön, tune lo hnaheetr hna xetrëne hnene la itre joxu. Nge angatre a hnyimasai nyidrë me qaja ka hape: “Ekölö hi ni la Joxu i angete Iuda!” Angatre mina fe a hnyijuë nyidrë me xe nyidrë. Angatre a thapa la hainge me lepe la he i nyidrë, ene pe kola thine me lö catre la itre ka ithinyi ne la “korona” i Iesu.

Kola ketri Pilato hnene la metrötre thei Iesu, memine la aqane xomihnine ahoeanyi Iesu la itre akötr hna kuca koi nyidrë, celë hi matre angeice hmaca a tupathe troa nue nyidrë. Öni angeice jë hi kowe la ka ala nyimu ka hape: “Hana wang, ini a lö sai angeice pi koi nyipunie, mate ate nyipunie laka, tha öhne kö ni la kepine thei angeic.” Maine jë Pilato a mekune ka hape, maine troa öhne hnene la ka ala nyimu la aqane akötrë Iesu, haawe, maine jë tro angatre a utipi nyidrë. Kola tro sai Iesu pi hnei Pilato kowe la ka ala nyimu ka icilekeu; hna petrë nyidrëti pala hi lo itrapetre ka ithiny, me heetrëne lo ixetr ka maea ngön, nge xomi akötre me madra asë la iqëmeke i nyidrë. Haawe, Pilato a qaja jë ka hape: “Hana wange la atr!”

Ngacama tru catre la hna thaucëne me akötrëne la atr celë, ngo nyidrëti hi lo atr ka hlemu ne la nöjei ka mele e celë fen, nge nyipici laka, nyidrëti hi la atr ka tru ne la nöjei hneijine asë. Ame la metrötr memine la ipië i Iesu, ke, celë hi itre hatrene la edraië i nyidrë, laka, kola hane wangatrehmekune lai hnei Pilato; kola mama hnyawa lai qa ngöne la itre trenge ewekë hna qaja hnei angeic, laka, hetre hni ne metrötr, me utipin. Ioane 18:39–19:5; Mataio 27:15-17, 20-30; Mareko 15:6-19; Luka 23:18-25.

▪ Nemene la aqane kuca Pilato matre troa tupathe troa nue Iesu?

▪ Tune kaa la aqane thele Pilato troa neëne la zön, e meci ju Iesu?

▪ Nemene la pengöne la ithaucë?

▪ Thupene la hna thaucë Iesu, nemene la aqane hnyimasai nyidrë me qanangazo nyidrë?

▪ Nemene la ketre aqane thele Pilato matre troa nue Iesu?