Itre Hna Amekötine Göi Itre Hnë Hmi

HNA upe la itre hlue i Iehova troa icasikeu matre troa kapa la itre ini me ithuecatrekeu. (Heb. 10:23-25) Ame la pane hnë hmi ne la nöje i Iehova, ene lo angetre Isaraela, tre, ene la “uma mano,” maine “uma ne heta ne icasikeu.” (Eso. 39:32,40) Ame hë thupen, hnei Solomona nekö i Davita, hna xupe la ēnē, ketre uma nyine atrunyi Akötresie. (1 Ite jo. 9:3) Thupene la hna apatrene la ēnē ngöne lo macatre 607 qëmekei Keriso, hnei angetre Iudra pë hë hna traqa itronyi troa hmi koi Iehova ngöne la itre uma hna hëne ka hape, sunago. Ame hë e thupen, hna xupe hmaca la ēnē, nge e cili hi la hnë hmi koi Iehova. Hnei Iesu hna hamë ini hnine la itre sunago me hnine la ēnē. (Luka 4:16; Ioane 18:20) Hnei nyidrëti fe hna kuca la ketre icasikeu hune la wetr.—Mat. 5:1–7:29.

² Thupene la hna meci hnei Iesu, hnene la itre keresiano hna icasikeu ngöne la itre gaa tru atr, me ngöne la itre hnalapa, matre troa inine la Tusi Hmitrötr me cas memine la itre xa trejin. (Ite hu. 19:8, 9; Rom. 16:3, 5; Kol. 4:15; Filem. 2) Ame itre xa ijin, hna icasikeu hnene la itre pane keresiano ngöne la itre götrane gaa sihngödr matre tha tro kö a öhne hnene la itre ka icilekeu me angatr. Eje hi lai laka, hetre hni ne ajan la itre hlue i Akötresieti ekö troa icasikeu ngöne la itre hnë hmi göi troa ‘ini angatre hnei Iehova.’—Is. 54:13.

³ Ame fe enehila, kola icasikeu la itre keresiano hnine la itre hnalapa me ngöne la itre gaa tru atr. Hna majemine icasikeu göi cainöje trootro ngöne la itre hnalapa. Ame koi itre ka hamëne la hnalapa i angatr thatraqane la itre icasikeu cili, tre, kösë ketre manathith ka tru lai koi angatr. Itre xan a qaja ka hape, celë hi ka aeasenyi angatre catr koi Iehova.

UMA NE BASELAIA

⁴ Ame la Uma Ne Baselaia, tre, celë hi sipu hnë icasikeu ne la Itretre Anyipici Iehova. Nyimutre la itre ekalesia ka thele troa itöne la ketre hnepadro matre troa xupe la ketre Uma Ne Baselaia maine pena kola ahnyipixene la ketre uma. Maine ijij, kola ce thawa la Uma Ne Baselaia hnei nyimu ekalesia matre troa huliwane hnyawane la mani memine la itre uma. Ame ngöne la itre xa götran, loi e troa loué la itre uma. Ame lo itre Uma Ne Baselaia hna hnyipi kuca me itre hna ahnyipixen, ngo tru pi hë la huliwa, tre, loi e troa nyihatren itre ej. Maine co hi la huliwa hna kuca göi troa nyihnyawane hmaca la itre götranene la Uma Ne Baselaia, tre tha nyipiewekë kö troa nyihatren ej.

⁵ Tha tro kö a xupe la Uma Ne Baselaia nyine troa mama fë, me kuca pena matre troa haine hnene la itre atr. Maine isapengöne kö la aqane xup la itre uma thenge la götran, ngo eje hi lai laka, casi palahi la huliwane ej. (Ite hu. 17:24) Thenge la itre nöj, loi e troa ketre hnë hmi ka lolo, nge ka ihmeku memine la itre ewekë hna thele thene la itre uma ne icasikeu ne la itre keresiano.

⁶ Itretre Anyipici Iehova asë a ixatua nyithupene la itre enon, me ixatua huliwa, me nyihnyawane la Uma Ne Baselaia hnei angatr hna icasikeu ngön. Tha kolo kö a tro fë itrapetre trootro matre troa kuië manie, nge ketre tha kolo kö a athipi mani. Hna hnëkëne la itre hnë kuië ahnahna matre tro la itre trene mekune ngöne la itre icasikeu a hane ixatua nyithupene la itre enone la Uma ne Baselaia.—2 Kor. 9:7.

⁷ Ka tru kowe la itre atrene la ekalesia troa sajuëne hnei manie la Uma Ne Baselaia me troa hane nyidrawan me nyihnyawane ej palahi. Hna acile la ketre qatre thup maine ketre drikona troa hnëkëne la huliwa cili. Qa ne la itre gurup ne cainöj troa nyidrawa uma, nge tro angatr a ce huliwa memine la atre thupëne la gurupe i angatr, maine memine la trejine ka ixatua. Loi e troa hlemu loi hnei Iehova me organizasio i Nyidrë jëne la ka mama e kuhu hnin, me e kuhu tröne la Uma Ne Baselaia.

⁸ E nyimu ekalesia ka ce thawa la Uma Ne Baselaia, loi e tro la itre qatre thup ne la itre ekalesia cili a acile la ketre Komite Ne Thupë Uma Ne Baselaia. Nge qa ne la komite cili troa hnëkëne amë la itre huliwa göi troa nyihnyawane hnyawa palahi la uma memine la götran hna hnen ej. Tro la itre lapa ne la itre qatre thup a iëne la ketre perezida ne la komite cili. Angatr la ka ameköti ewekë, nge komite ne thupë uma la ka cilëne la huliwa ne nyihnyawa uma me thupën matre pëkö engazone la uma, nge hetrenyi palahi la itre nyine nyihnyawa uma. Matre, nyipiewekë troa ce huliwa hnene la itre ekalesia ka huliwane lai uma.

⁹ E nyimu ekalesia la ka ce thawa la ca Uma Ne Baselaia, loi e troa itriane la itre hawa ne icasikeu. Tro la itre itre qatre thupe a kuca la porogaram, nge troa imeku me ihnimi trejin. (Fil. 2:2-4; 1 Pet. 3:8) Tha qanyine kö la ketre ekalesia troa xomi mekune thatraqane la itre xa ekalesia, ngacama ëjene eje la ka mama ngöne la pepa i mus. E kola wange la ketre ekalesia hnene la atre thupëne la sirkoskripsio, tro la itre xa ekalesia ka icasikeu hnine la Uma Ne Baselaia ka cas a saze la itre hawa ne icasikeu i angatr ngöne la wiike cili.

¹⁰ Hna cile fë fe la itre cainöj göi faipoipo me kele wezipo, nge qanyine la Komite Ne Huliwa Ne Cainöj Ne La Ekalesia troa axeciën. Qëmekene tro la itre qatre thupe cili a axecië mekun, loi e tro angatr a waipengöne hnyawa la itre hna sipon, memine la itre hna amekötine hnene la filial.

¹¹ Ame la itre trejin hna nue kow troa huliwane la Uma Ne Baselaia thatraqane lai, loi e eje thei angatr la aqane ujë ka ihmeku memine la itre nyipi keresiano. Pëkö ketre ewekë hna troa kuca e cili, nge ka troa athixötrëne la itre trejine maine troa adrone la ëje i Iehova memine la hlemu loi ne la ekalesia. (Fil. 2:14,15) Thenge la hna amekötine hnene la filial, tro fe a hane huliwane la Uma Ne Baselaia matre troa kuca la itre xa huliwa ne la hmi, tune la Ini Ne Cainöjëne La Baselaia me Ini Koi Itre Pionie.

¹² Nyipiewekë troa metrötrëne palahi hnene la itre atrene la ekalesia la itre hnë icasikeu i angatr. Loi e troa mama jëne la aqane heetre me isej, me aqane ujë së laka, hetre ehmitrötrene la aqane hmi së koi Iehova. (Ate cai. 5:1; 1 Tim. 2:9, 10) Ame la easa trongëne la itre eamo hna hamën thatraqane lai, easë hi lai a amamane laka, ka tru koi së la itre icasikeu.

¹³ Nyipiewekë catr troa thupëne matre troa tro loi la itre ijine icasikeu. Ka lolo catre kö e tro la itre nekönatr a ce lapa memine la itre keme me thine i nyudren. Loi e troa sipone kowe la keme me thin ka trene nekönatr ka co troa lapa ngöne la ketre götrane laka, tha tro kö a ajolëne la itre trejin troa drenge hnyawa la icasikeu. Ketre, tha jole kö troa lö sai nyudren e kuhu qehnelö matre troa nango ameköti nyudren, nge maine hetre itre xa nyine kuca ju kö koi nyudren.

¹⁴ Troa acile la itre trejine ka maca troa ikep ngöne la itre ijine icasikeu ngöne la Uma Ne Baselaia. Loi e tro angatr a hmek, me lolo thiina, me atreine waimekun. Ame la huliwa i angeic, tre, ene la troa kapa hnyawa la itre ka xötrei traqa, me thele matre tha tro kö angatr a xou. Nge tro fe angeic a xatuane lo itre ka traqa hmitr troa hetre göhne i angatr, me e la etrune la itre ka sine la icasikeu, me thupën matre tro palahi a keukawa maine menyik la hnë icasikeu. E ka nyipiewekë, loi e tro la itre trejine ka ikep a amekunëne hmaca la itre keme me thin, troa thupëne hnyawa la itre nekö i angatr matre tha tro kö angatr a nyinyape e hnine maine e tröne pena la uma, me elo hune la hnë cainöj, qëmekene me e thupene la itre icasikeu. Loi e tro fe angeic a sipone kowe la keme me thin cememine la menyik troa lö fë la nekönatr e kuhu qëhnelö matre, tha tro kö a ajolëne la itre atrene la icasikeu. Ame la huliwa ne la itretre ikep tre, ka nyipiewekë catr matre tro la nöjei atrene la icasikeu a kepe thangane lai. Loi e troa athipe la hnëqa ne ikep kowe la itre drikona, ene lo itre ka melëne hë la itre ewekë cili ke, itre he ne hnepe lapa.—1 Tim. 3:12.

XUPI UMA NE BASELAIA

¹⁵ Ame ngöne lo hneijine lo itre pane keresiano, hetrenyi la itre ka trene mo, nge ame itre xan tre, pëkö. Matre, öni Paulo aposetolo: “Loi la munëne i nyipunie ngöne la ijine celë thatraqane la pë ewekë e angat, mate cei tune hi; nge ame fe la munëne i angate, te, thatraqane la pë ewekë e nyipunie, mate cei tune hi.” (2 Kor. 8:14) Haawe, troa “cei tune” fe hnene la atr ka hetrenyi memine la ka pë mo enehila. Hna xome la itre ahnahna hna ithingë hnene la itre ekalesia e cailo fen matre troa xup me nyihnyawane la itre Uma Ne Baselaia. Madrine catre la organizasio i Iehova, memine fe la itre ekalesia ka kapa la ixatua cili.

¹⁶ Thenge la götrane la teritoar, tro la filial a axeciëne la ekalesia ka troa icasikeu ngöne la Uma ne Baselaia. Qane fe la filial troa amekötine la ijin, memine la hnen hna troa xup la Uma ne Baselaia ka hnyipixe, me nyihnyawane la itre Uma ngöne la teritoar ne la filial. E hetre hulö ka traqa, hetre itre hna amekötin matre troa nyihnyawane la itre Uma ne Baselaia hna angazon, memine fe la uma ne la itre trejin.

¹⁷ Filial la ka amekötine la huliwa ne la itre ka saen matre troa ixatua thele hnepadro, me aqane troa xupe la Uma Ne Baselaia, me troa hetre pepa qaathei mus, me troa xup, me nyihnyawa uma. Pine laka, nyimutre pi hë la itre nöj ka aja Uma Ne Baselaia, haawe, kolo palahi aja ka saen. Kola ithuecatre kowe la itre ka ajan, nge hna bapataisone hë, nge ka eatrëne la itre hna amekötin thatraqane lai, troa nyialiene la pepa ne sipo, me hamën kowe la Komite Göi Huliwa ne la ekalesia i angatr. Ame mina fe la itretre cainöj tha hna bapataisone petre kö, ijiji angatre fe troa hane xupe la Uma Ne Baselaia i angatr, me nyihnyawan ej.

UMA NE ASABELE

¹⁸ Ame lo itre pane keresiano ekö, angatr a isa icasikeu, matre isa ala xalaithe hi. Ngo ame itre xa ijin, kola icasikeu la “nöjei at ka ala nyimu.” (Ite hu. 11:26) Ketre tune mina fe enehila, kola icasikeu hnene la ka alanyim ngöne la itre ijine asabele ne sirkoskripsio memine la itre asabele ka tru. Hna majemine loué la itre iuma thatraqane lai, ngo maine pëkö hna öhn nge ka ijij, kola kuca ngöne la hnë hmi hna itön maine hna xup, nge hna hëne ka hape, Uma Ne Asabele.

¹⁹ Ame itre xa ijin, kola itöne la ketre iuma, nge kola nyihnyawane hmaca ej matre nyine Uma Ne Asabele. Ngo, hna majemine fe troa thele götran hnë troa xupe la ketre Uma Ne Asabele. Isapengöne kö la etrune la itre Uma Ne Asabele; hna kuca lai thenge la isa hna ajan ngöne la nöj. Qëmekene tro filial a axeciën troa itön maine xupe la ketre uma, loi e tro angatr a pane mekune hnyawan la thupen, memine la itre ijine troa huliwan.

²⁰ Qa ngöne la etrune la itre uma cili, haawe, filial a acile la ketre trejine ka huliwa i Iehova o drai matre troa thupëne la Uma Ne Asabele me nyihnyawan ej. Hetre itre hna amekötin matre tro la itre sirkoskripsio a nyidrawane la Uma Ne Asabele e nöjei wiik, memine fe lo hna alua kuca ngöne la macatre. Nge hetrenyi la itre nyine troa kuca matre tha tro kö a hetre engazon ej. Loi e tro la itre trejine a saen matre troa kuca la huliwa cili. Haawe, kola ithuecatre kowe la itre ekalesia troa sajuëne hnyawa la itre hna amekötine cili.—Sal. 110:3; Mal. 1:10.

²¹ Ame itre xa ijin, kola huliwane la Uma Ne Asabele thatraqane la itre xa huliwa i Akötresie; tune la itre Ini me itre icasikeu thatraqane la itretre thupëne la sirkoskripsio. Ame la itre Uma Ne Asabele, memine la itre Uma Ne Baselaia, itre hnë hmi lai hna nue koi Iehova. Ame la easë a icasikeu hnine la Uma Ne Asabele, tro la aqane ujë, me aqane heetr, me aqane iseji së a amamane hnyawa laka, easë a metrötrëne la aqane hmi së koi Iehova.

²² Hna icasinekeune la itre atr ka alanyim ngöne la organizasio i Akötresie enehila, ene la itre drai ne la pun. Hatrene hi lai laka Iehova a amanathithi së. (Is. 60:8, 10, 11, 22) Haawe, aja së troa sajuëne hnyawa la itre hna hnëkëne göi troa itöne me nyihnyawane la itre hnë hmi. Easë e cili a amamane, ka hape, easa wangatrune la itre huliwa hna kuca ngöne la itre uma cili. Itre ej a aijijë së troa ithuecatrekeu, nge kolo palahi a calemi catr la drai Iehova.