Loi e Tro Sa Nyihnyawane Palay Hi La Hnë Hmi Së

1. Nemen la kepin matre kola xupe la itre Uma Ne Baselaia?

¹ Hetrenyi e cailo fene la 94 000 lao ekalesia ne la Itretre Anyipici Iehova. Ala nyimu catr la itre ekalesia ka hnen la itre icasikeu i angatr hnine la Uma Ne Baselaia ka caas, matre troa ce traqa itronyi memine la itre xaa Keresiano troa inin la Tusi Hmitrötr, nge celë hi hnen la hmi ka wië ngöne la nöje së.

2. Pine nemen matre nyipi ewekë troa thupën matre tro pala hi a porop me lolo la Uma Ne Baselaia?

² Loi e Troa Nyihnyawane Hnyawa Pala Hi: Ame la troa nyihnyawan la Uma Ne Baselaia, tre, celë hi ketre götrane lai ka sisitria ngöne la huliwa së ka hmitrötr. Kola qaja hnene la itus Notre ministère ngöne la götrane 60-2, ka hape: “Loi e tro la itre trejine trahmany a wangatrune hnyawa la huliwa, ene la troa nyihnyawan la itre Uma Ne Baselaia, thaa hnei manie hmekuje kö ngo ngöne mina fe la troa hane voloter matre troa ixatua troa nyihnyawan ej. Loi e troa porop la hnine la Uma Ne Baselaia memine fe la trön, ke eje hi lai a nyihatren la organizasio i Iehova.” Pine laka kolo pala hi a icasikeu hnine la Uma Ne Baselaia ngöne la nöjei wiik, haawe, nyipi ewekë pala hi troa nyihnyawane ej. Hna majemin hnene la itre voloter ne la itre ekalesia ka icasikeu hnine la Uma Ne Baselaia, troa nyidrawan ej. Tune ekö lo hneijine i Tusi Hmitrötr, loi e tro së enehila itre hlue i Iehova a catre thele troa “xupe hmaca me nyidrawane” la itre hnë hmi së.​—2 A. l. ite jo. 34:10.

3. Tune kaa la aqane troa kuca matre troa ce nyidrawan la Uma Ne Baselaia, nge drei la ka troa xome la hnëqa cili?

³ Loi e troa athip ngöne la tablo la porogaram ne nyihnyawa Uma Ne Baselaia thatraqane la wiik, cememine lo itre ithuemacanyi hna hnëkëne kowe la ekalesia. Ame itre xaa ekalesia, tre, angatr a ithöeën ngöne la nöjei treu. Loi e tro asë hi la itre gurup ne la itre Ini Tus a ithöeën ngöne la nöjei wiik, göi troa nyihnyawa Uma Ne Baselaia. Ame koi itre ka ijij troa nyidrawan la Uma Ne Baselaia ngöne la nöjei wiik, nyipi ewekë tro angatr a thupën matre troa porop me lolo pala hi la hnë icasikeu së. Atreine troa hane ce huliwa fe hnene la itre keme me thin me itre nekö i angatr, jëne tro hi angatre lai a hane inin la itre nekö i angatr troa hane amaman la madrine i angatr kowe la hnëqa cili, ene la troa nyidrawa uma. Nyipi ewekë catr troa ce huliwa hnyawa hnene la itre trejin maine nyimu ekalesia ka ce thawa la Uma Ne Baselaia, matre thaa tro kö a xome hnene la caa ekalesia pala hi la hnëqa ka sisitria cili.

4. Nemene la nyine troa kuca matre troa atre hnene la ekalesia la nyine troa kuca ngöne la ijine kola nyidrawan la Uma Ne Baselaia?

⁴ Loi e troa cinyihan hnine la ketre ipepa la itre nyine troa kuca nge troa athip ngöne la hnë ami ewekë. Ame ngöne lai lis, tre, loi e troa qejepengöne la itre nyine troa kuca ngöne la wiik, tune la troa nyihnyawan la moquette, me köle la itre mamala me itre hnë amë amaman la itre itus, me trije la itre salite, me köle mop, me köle fe la itre ithulu. Hetrenyi la itre xaa ewekë thaa nyine tro kö a kuca lapaan, tune la troa köle vereni me troa nyihnyawan la itre icea, memine la itre irido, me itre hna athipi laam. Loi e troa thupën matre thaa tro kö a ketr hnene la itre nekönatr la itre produit, nge loi e troa pelehatrene itre ej. Loi e tro mina fe a nango qejepengöne la aqane troa huliwane itre ej.

5. Nemene la nyine kuca matre thaa tro kö a eatre menu, nge nemene la itre ewekë nyine troa thupëne pala hi matre thaa tro kö a traqa la itre eatr? (Wange ju la itre mekune hna eköhagen ngöne götrane 4.)

⁵ Nyipi ewekë catr troa thupën matre thaa tro kö a eatr la itre atr hnine la Uma Ne Baselaia. (Deu. 22:8) Celë hi matre hetrenyi fe la ketre lis ne la itre xaa ewekë hna eköhagen ngöne götrane 4, nyine troa canga wange pala hi matre troa hmekën ke eatre pi la itre atr ka traqa troa icasikeu.

6. Tune kaa la aqane xomiujin la huliwa ne nyihnyawa Uma Ne Baselaia?

⁶ Loi e Troa Nyihnyawan La Uma Ne Baselaia: Qa ne la collège ne la itre qatre thup troa cilëmeken la huliwa, ene la troa nyihnyawan la Uma Ne Baselaia. Hna acile la ketre qatre thup maine ketre drikona pena troa elemeken la huliwa. Tro angeic a eköthe ngöne la nöjei drai la itre nyine troa kuca ngöne la Uma Ne Baselaia, nge loi troa xecie koi angeic laka hna nyidrawane me nyihnyawane pala hi la uma, nge hetrenyi pala hi la itre jiane huliwa. Nyipi ewekë catr troa thupën matre thaa tro kö a eatr la ketre atr hnene la ketre ewekë e hnine la uma maine e kuhu tröne pena hune ihaö. Maine luetre maine nyimu ekalesia ka ce icasikeu ngöne la caa uma, loi e tro la itre collège ne la itre qatre thup a iën la itre trejin matre troa sin la komite ka troa hnëkën la itre nyine troa kuca matre troa nyihnyawan me nyidrawan la iuma. Troa xomiujin hnene la itre collège ne la itre qatre thup la itre huliwa hna kuca hnene lai komite cili.

7. (a) Nemen la hna kuca ngöne la nöjei macatre matre troa xecie hnyawa koi së laka, hna nyihnyawane pala hi la Uma Ne Baselaia? (b) Nemene la itre ewekë nyine troa thupëne hnyawa pala hi? (Wange ju la itre mekune hna eköhagen ngöne la götrane 5.)

⁷ Ame ngöne la nöjei macatre, hna wang asë la nöjei götran ne la Uma Ne Baselaia matre troa canga nyihnyawan itre ej. Hnëqa ne la itre qatre thup troa canga wang me hnëkëne la itre götrane ka nyipi ewekë troa kuca. Maine jë tro ha sipon kowe la itretre cainöj troa ixatua, matre troa nyihnyawan la itre ejolen la Uma Ne Baselaia. Loi e tro asë hi së a canga thele troa nyihnyawan la itre hnepe ejolen la iuma ngacama ka co hi itre ej, nge loi e tro mina fe a canga wange la itre ewekë nyine pane kuca thatraqane la Uma Ne Baselaia.

8. Nemen la itre jole ka mama matre sipo ixatua jë hnene la itre qatre thup kowe la Kometr Ne Xupi Uma Ngöne La Nöj?

⁸ Maine kola aja ixatua hnene la itre qatre thup matre troa kuca la itre ejolene la Uma Ne Baselaia, haawe, loi e tro angatr a thuemacane la Kometr Ne Xupi Uma Ngöne La Nöj. Maine jë troa ixatua troa nyihnyawan la itre moquette, me nyine alepanyi uma, me itre ewekë ka xecie pena, maine itre xaa ejolen qa ngöne laka menyike pala ha.

9. Nemen la hna amekötin maine kola mekun ka hape ma loi e troa iupi troa kuca la ketre huliwa?

⁹ Loi e Troa Inamacan La Aqane Huliwan La Manie Ne La Ekalesia: Ame asë hi la itre ejolene la xupi Uma Ne Basealaia, me haö, tre hna kuca asë hi hnene la itre trejine ka nue xanën la mele i angatr kowe la huliwa cili. Angatr a hujën la mele i angatr, celë hi hatrene la ihnimi angatre lai, nge ketre ixatua ka tru mina fe ngöne laka kola acone catrën la thupene la itre ejolene iuma. Maine kola mama laka loi e troa upe la itre xaa ka huliwa troa kuca la itre xaa hnepe ewekë, tune la troa humu kafar maine itre xaa öni ju kö, haawe tro la itre qatre thup a thele la itre ka co thupen. Tro angatr a pane hnëkën la ketre ipepa hna cinyihane ngön la itre ewekë asë nyine troa kuca, me itre xaa jiane huliwa nyine troa xome thatraqane lai. Loi e troa hamën la isa caas kowe la nyimu ka kuca la huliwa cili, matre troa wange la ka huliwa hnyawa e angatr. Ame hë la kola kapa hnene la itre qatre thup la itre tusi ne la itre ka huliwa cili, haawe, angatre pë hë a iëne jë la ka troa kuca e angatr lai huliwa. Maine ame thene lai itre ka sipo troa kuca lai huliwa hetrenyi fe la ketre trejine me easë, loi e troa xötrethenge hnyawa lo lai hna amekötin, ngacama kola qeje thupene ka loi hnei angeic.

10. Nemene la nyine troa kuca matre troa xecie hnyawa koi së laka hna huliwane hnyawa la manie ne la ekalesia?

¹⁰ Maine ame ngöne la nöje së tre, hna nue la itre hmi matre thaa tro kö angatr a hane hotr göi uma, haawe, loi e troa thele hnene la itre qatre thup matre troa hane kapa la ewekë cili. Maine nyimutre la itre ekalesia ka ce thawa me nyipunie la Uma Ne Baselaia, tro la kometr hna acile thatraqane la itre ekalesia asë cili, a xome fe ngöne baak la ketre manie me iupi fë ngöne la nöjei treu kowe la itre collège ne la itre qatre thup, la ketre tusi nyine troa qejepengöne la aqane trongene la manie me aqane huliwane ej. Hnëqa ne la itre qatre thup troa wang troa huliwane hnyawa la manie ne la ekalesia.

11. Nemene la nyine troa kuca maine kola mama ngöne la Uma Ne Baselaia, laka tru catre la nyine troa kuca maine nyine troa nyihnyawane pena?

¹¹ Maine Tru Catr La Itre Nyine Troa Nyihnyawan: Maine kola öhne hnene la kometr ka hape nyipi ewekë troa kuca la ketre ewekë ngöne la Uma Ne Baselaia, haawe angatre hi a pane thuemacane ju la itre collège ne la itre qatre thup matre troa elemekene lai. Maine kola mama hnyawa laka nyipi ewekë troa nyihnyawan maine troa ahnyipixene hmaca la Uma Ne Baselaia, maine kola troa aja ixatua e tröne la itre ekalesia ka ce icasikeu hnine la uma cili, haawe, loi e troa thuemacan hnene la itre qatre thup la Kometr Ne Xupi Uma Ngöne La Nöj. Hetrenyi hnine la kometre cili la itre trejine ka atrein nge ka majemine hë cil kowe la itre ejolen la xomi uma, tro angatr a hamën la itre mekune nyine ixatua me elemekene hnyawa la huliwa. Maine tru la thupen la itre hna troa kuca, haawe, ma loi e troa wange hnyawa la thupene lai me ce hnëkën la hna troa cile fë qëmekene la ekalesia matre troa ce axeciëne göi thupen.

12. Tune kaa la aqane tro sa amamane la ole së me madrine së troa sin la itre icasikeu hnine la Uma Ne Baselaia?

¹² Drei la etrune la hnëqa së troa ce icasikeu hnine la Uma Ne Baselaia! Thaa tro pi kö së a wangacon la itre icasikeu së maine xanadrone itre ej. Ijiji së asë hi troa kuca matre tro loi hnyawa la itre icasikeu së hnine la Uma Ne Baselaia, ene la troa thupëne hnyawa la iuma ne drai së. Kolo hi lai a atrun la hmi ka wië, me ahmitrötrën la ëje i Iehova. Loi e tro sa catre thupën me nyihnyawane pala hi la hnë hmi së.

Hna eköhagen götran 4]

Itre Nyine Troa Thupëne Pala Hi

◻ Thaa tro kö a jole troa xome la itre nyine tha man, nge troa wange pala hi itre ej ngöne la nöjei macatre.

◻ Loi e troa wange pala hi ka hape thaa enienije kö la itre icea.

◻ Loi e troa makëne hnyawa la itre hna kötre lö qa hnine la uma memine la itre ija, nge ketre loi e troa thinane itre eje hnyawa me thaa jol troa atrehmekune itre ej, nge loi fe troa thupëne fe lo itre hag matre thaa tro kö a hna la itre atr.

◻ Loi e troa nyidrawane hnyawa la itre hnahage ne ami ewekë, me hnë mano, me xeene hnyawa la itre ewekë, nge troa thupën matre thaa tro kö a nue menune lo itre ewekë ka canga mel, me itre salite, wanga manithe jë la iuma.

◻ Loi e troa wange me nyihnyawane pala hi la itre hune uma memine la itre nyine thia.

◻ Troa thupën matre tro pala hi a thinaane hnyawa la itre hnë tro memine la itre hnë acili loto, matre thaa tro kö a ucic maine hna la itre atr.

◻ Loi e troa wange hnyawa me nyihnyawan la tirisite memine la itre ififikë hnine la iuma ne drai.

◻ Loi e troa canga nyihnyawane pala hi la itre jë i tim, wanga troa hetre jol qa ngöne laka menyike hnine menu pala ha.

◻ Loi e troa lokane la iuma ne drai, maine pëkö atr e koho hnine ej.

[Hna eköhagen götran 5]

Troa Nyihnyawan La Iuma Me Nyidrawane Ej

◻ E Kuhu Trön: Tune kaa la hune uma, me ngöne uma, me peidr, me mamala, memine lo itre mataitus nyine nyihatren la uma, hapeu, hna nyihnyawane pala hi itre ej?

◻ Ihaö: Hapeu, hna nyidrawane hnyawa pala hi? Tune kaa la itre hnë tro, me itre hag, me hna acili loto, ka loi hi?

◻ Hnine Uma: Hapeu ka loi kö la itre moquette, me rido, me itre icea, itre laam, me itre ngöne uma hna peidrën, me itre hna ami itus?

◻ Itre Jiane Huliwa: Hapeu la itre laam, me plomberie, me sono, me itre ififikë, me nyine alepanyi uma, ka loi hi itre ej?

◻ Itre Kabine: Hapeu pëkö ejolene itre ej, nge hna nyidrawane hnyawa kö?

◻ Itre Pepa Ne La Ekalesia: Tune kaa la itre pepa qaathei mus, hna ahnyipixene kö itre ej nge meköti me nyipici la itre hna cinyihan?