Aqane Nyihnyawane Hun La Itre Uma Ne Baselaia

Hna cinyanyine ngöne asë hi la itre Uma Ne Baselaia ne la Itretre Anyipici Iehova, la atresiwa i Akötresie ka hmitrötr. Hne huni pala hi hna nyihnyawane hnyawa me kuca hnyawa la itre Uma Ne Baselaia, ke celë hi ketre hnëqa ka tru koi hun, nge ketre götrane gaa tru ne la hmi hun. Celë hi matre, qa i eahni asë hi troa ce iwanakoimën.

Isa hne huni hna sipu ajane troa nyihnyawane la uma thupene la itre icasikeu. Thupene la itre icasikeu, tru la madrinene la itre Keresiano trahmanyi me föe tro hi a pane kuca la ka ijije troa nyihnyawane la Uma Ne Baselaia. Ngo ca ijine kö hna amekötine göi troa nyihnyawane asë la Uma Ne Baselaia. Tro la ca qatre thup maine drikona a cilë mekene la huliwa, me wange la itre nyine kuca hnine la uma göi troa thewe huliwa. Thenge la itre nyine kuca, qanyi itre xan burum, itre xan a uku mop maine aspirateur, me lepe so, me amë mekötine la itre icea, me köle imamalama me ithulu, me nyihnyawane la itre gaa co, me triji salite, me nyihnyawane e kuhu trön. Ca drai kö ngöne la macatre hna amekötine ­matre troa nyihnyawane asë hnyawa la Uma Ne Baselaia. Hne huni hna ce huliwa memine la itre nekö hun, matre troa ini nyudreni la enyipiewekëne troa metrötrëne la hnë hmi.​—Ate Cainöje 5:⁠1.

Troa ixomi imë göi troa kuca hnyawa hmaca la itre ewekë ka nango ngazo. Ame ngöne la nöjei macatre, ca ka tro kö a waipengöne asë la Uma Ne Baselaia, e koho hnin me e kuhu trön. Qa ngöne lai, hetre itre huliwa nyine tro pala hi a kuca lapan, matre tha tro kö a canga ngazo la itre ewekë, nge aluzine menune pi la mani. (2 Aqane lapa itre Joxu 24:13; 34:10) E troa nyihnyawane hnyawa me kuca alolone hnyawa la Uma Ne Baselaia tune lai, mama pi hi laka, celë hi göhnë ka ijije troa atrunyi Akötresie. Nge e tro huni a kuca la itre huliwa ne ej, eahuni hi lai a amamane la etrune la ihnimi huni koi Iehova me kowe fe la hnë hmi hun. (Salamo 122:⁠1) Celë hi ka troa ketr la hni ne la itre atr ka lapa ­xötreithi hun.​—2 Korinito 6:⁠3.

• Pine nemene tha tro kö huni a wangahmalohmaloeëne la hnë tro huni a hmi?

• Hna nyihnyawane tune kaa la itre Uma Ne Baselaia hun?