Kola Sajuëne La Huliwa Ne Baselaia Ngöne La Nöj Me e Cailo Fen

TUNE la hna perofetane hnei Iesu göne la itre drai ne la pun, kola catre cainöjëne la maca ka loi hnene la Itretre Anyipici Iehova “uti hë la cane la fene hnengödrai.” (Ite hu. 1:8; Mat. 24:14) Matre angatr a nue gufane la traem, me trengecatre i angatr göi troa ce thawa la itre ini ne la Tusi Hmitrötr kowe la itre atr. Angatr a mejiune laka, tro Iehova a hamëne la ka nyipiewekë kowe la mele ne la itre hlue i Nyidrë. Celë hi ka upi angatre troa amë panëne la Baselaia i Akötresie ngöne la mele i angatr. (Mat. 6:25-34; 1 Kor. 3:5-9) Kola amamane hnyawa hnene la itre huliwa hna kuca laka, Iehova a kepe angatr me amanathithi angatr.

KOLA SAJUËNE LA HULIWA NE BASELAIA E CAILO FEN

² Itre atr a goeëne la huliwa së, me öhne laka, easa hamëne gufane la itre Tusi Hmitrötre së, me itre itusi së. Matre, itre xan a isa thele ka hape, “Hna tune kaa laka, atreine jë troa huliwa tune lai?” Nyipici laka, nyipiewekë troa hetre manie matre troa fejane me hamëne la itre Tusi Hmitrötr me itre itus ka nyimutre. Kola aja manie mina fe göi troa xupe me nyihnyawane la itre Bethela hnë troa mele hnene la itre keresiano ka huliwa ngöne la itre hna feja itus. Nge hetrenyi fe e cili la itre keresiano ka thupëne la huliwa ne cainöj, me ka kuca itre xa huliwa ju kö ka sajuëne la maca ka loi. Ketre, hetre ixatua hna kapa hnene la itretre thupëne la sirkoskripsio, me itre mesinare ne la nöj, me itre pionie hut, me itre xa ka huliwa i Akötresie o drai matre troa kuca palahi la huliwa i angatr. Mama hnyawa hi laka, nyipiewekë troa hetre mani matre troa eatrëne la huliwa ne cainöj enehila, ngöne la nöj me e cailo fen. Ka xulu qa kaa la manie cili?

³ Alanyimu la itre atr ka hetre hni ne ole kowe la itre ini hnei angatr hna kapa qaathene la Itretre Anyipici Iehova. Matre tru la madrine i angatr troa hane sajuëne hnei manie la huliwa ne cainöj e cailo fen. Ngo, ame la huliwa së, hna sipu sajuëne hnene kö la Itretre Anyipicin. Hnei itre xan e angatr hna iupi fë ahnahna kowe la filial ne la Itretre Anyipici Iehova ne la nöje i angatr. Hetrenyi thei angatr la hni ne ajan tune lo itre hlue i Akötresieti ekö, itre ka ham me sajuëne la kola xupe la uma ne hmi koi Iehova. (Eso. 35:20-29; 1 A. l. ite jo. 29:9) Ame itre xa ahnahna hna kapa jëne testament, ngo ame la itre ahnahna hna isa hamën hnene la itre atr, me hnene la itre ekalesia, me itre sirkoskripsio tre, tha trenge manie ka tru catre menu kö. Itre manie lai ka aijijëne palahi la huliwa ne cainöj.

⁴ Ame kowe la Itretre Anyipici Iehova, ketre manathithi ka tru koi angatr troa huliwane la manie i angatr memine la itre xa hnei angatr hna hetrenyi thatraqane la huliwa ne cainöj. Hetrenyi Iesu memine la itretre drei nyidrë la trengene manie göi troa itöne la ka nyipiewekë kowe ka mele i angatr. (Ioane 13:29) Tusi Hmitrötr a qaja la itre föe ka xatua Iesu me itretre drei nyidrë jëne la itre ewekë i angatr. (Mar. 15:40, 41; Luka 8:3) Hnei Paulo mina fe hna kapa la ixatua hna hamën hnene la itre trejin ka thele troa akökötrene la maca ka loi, nge ka ajane troa hane sajuëne la huliwa ne cainöj. (Fil. 4:14-16; 1 Thes. 2:9) Kola xötrethenge hnene la Itretre Anyipici Iehova enehila la itre keresiano cili, itre ka catre cainöjëne la maca ka loi me itre ka ham. Haawe, tha jole kö kowe la itre atr ka hni ka menyik, nge ka mele ngöne la nöjei nöj, troa “xome gufane la timi ka mel.”—Hna ama. 22:17.

KOLA SAJUËNE LA EKALESIA

⁵ Ame fe la itre ewekë nyine nyithupen thatraqane la ekalesia, tre, qaathene mina fe la itre ahnahna hna hamën xanëne hnene la itre atr. Tha kolo kö a tro fë itrapetr, maine athipi mani, maine sipo pena. Ngo eje hnine la itre hnë icasikeu la itre hnë kuië ahnahna, matre troa isa hamën “thenge la hna axeciëne e kuhu hni.”—2 Kor. 9:7.

⁶ Ame la ahnahna ene la itre manie, tre, hna pane huliwane göne la itre enone la Uma Ne Baselaia, me göi troa nyihnyawane ej. Qane la lapa ne la itre qatre thup troa axeciëne la etrune manie nyine troa iupi fë kowe la filial ne la Itretre Anyipici Iehova thatraqane la huliwa ne cainöj e cailo fen. Nge, tro pë hë la ekalesia a kapa la mekune cili. Celë hi matre kolo palahi a hamë ahnahna hnene la itre ekalesia ka nyimutre thatraqane la huliwa ne cainöje trootro e cailo fen. Ame ngöne la itre xa ijin, kola mama la itre xa hna ajan ka nyipiewekë, ngo tha hna tro fë kö la ithuemacanyi ke, isa atrehmekune asë hi la itre atrene la ekalesia la troa sajuëne la huliwa hnene la itre ahnahna.

AQANE TROA HULIWANE LA ITRE AHNAHNA

⁷ Thupene la nöjei icasikeu, tro la lue trejin hna iën hnene la lapa ne la itre qatre thup, a hlem la manie ngöne la itre hnë kuië ahnahna. Nge tro nyidroti a sija la ketre pepa nyine anyipicine la manie hna kapa. (2 Ki. 12:9, 10; 2 Kor. 8:20) Tro la lapa ne la itre qatre thup a hnëkëne amë la itre nyine kuca matre troa xeen la manie me iupi fë kowe la filial. Maine pena, troa xome la manie thatraqane la itre enonen la itre huliwa e hnine la ekalesia. Celë hi matre, nyipiewekë troa fe la ca compte ne la ekalesia ngöne la ketre baak. Tro la trejine atrekë hnëqane troa thupëne la manie ne la ekalesia a hnëkëne ngöne la nöjei treu la ketre rapor göi troa ithuemacanyine la ekalesia. Nge, e nöjei köni treu, tro la kordinatör a wange hnyawa laka, hna e hnyawa la mani.

AQANE NYI MANIENE LA ASABELE NE SIRKOSKRIPSIO

⁸ Ame la manie thatraqane la itre enon ne la asabele tre, ahnahna ne la Itretre Anyipici Iehova ne la sirkoskripsio. Hetrenyi la itre hnë kuië ahnahna ngöne la hnë asabele. Matre tha jole kö kowe la itre trejine troa hamëne xanëne la itre ahnahna thatraqane la sirkoskripsio. Tro la trejine hna iën hnene la atre thupëne la sirkoskripsio a cilëne la compte ne ej.

⁹ Loi e troa nyithupene la itre enone la asabele jëne la itre ahnahna hna kuiëne ngöne la ijine cili. Nge, e hetre munën, tro pë hë a kuiën hnine la compte ne la sirkoskripsio. Maine hetre gufa ngöne la pune la asabele, nge ijije hi troa të lai hnene la manie ne la sirkoskripsio, haawe, tha nyipiewekë kö troa cinyianyi kowe la itre ekalesia. Ngo maine tha ijije kö la compte ne la sirkoskripsio troa nyithupene la itre enone la asabele, maine troa nyi maniene pena la asabele ka troa xulu (tune la troa nyithupene amë la ketre hnë troa asabele), haawe, tro la atre thupëne la sirkoskripsio a thuemacane la itre ekalesia göi troa kuië ahnahna. Tro la nöjei lapa ne la itre qatre thup a ithanatane lai jol, me axeciëne la etrune la itre ahnahna hna troa kuiën hnene la ekalesia kowe la compte ne la sirkoskripsio. Thupene lai, troa ce wang me ce axeciën memine la ekalesia.

¹⁰ Hetre icasikeu ne la itre qatre thup ngöne la ijine asabele. Ame e cili, angatr a ce axeciëne la aqane troa huliwane la manie ne la sirkoskripsio. Kola ce axeciëne göne la itre enone la asabele, me göi troa itöne la itre jia ne huliwa thatraqane la sirkoskripsio. Nge, kolo fe a qaja la itre nyine nyithupene thatraqane la atre thupëne la sirkoskripsio, maine atr ka nyitrengewekëne la filial. Tro fe angatr a hane mekune troa iupi fë ahnahna thatraqane la huliwa ne cainöj e cailo fen, me thatraqane la xupi Uma Ne Baselaia ngöne la fen, me thatraqane la Uma Ne Asabele ne la nöj, maine thatraqane la ketre aja ka tru ju kö.

¹¹ Eje hi laka, hetre itre hna majemine nyithupene e hnine la ekalesia, ngo e hetre nyine troa axeciën, loi e troa ce axeciën hnene la itre qatre thup. Nge ame e cili, troa qaja me amaman la etrune la mani hna ce axeciën e nöjei ijine kola huliwane la manie ne la sirkoskripsio. Loi e troa nue kowe la filial troa pane lapafë lai manie utihë la ijine kola ajane hnene la sirkoskripsio. Tro la atre thupëne la sirkoskripsio a wange hnyawa laka, hna e hnyawa la mani ne la sirkoskripsio thupene la nöjei asabele.

TROA THUPËNE LA ITRE KA PË EWEKË

¹² Ame la manie hna amë hnei Iesu memine la itretre drei nyidrë hnine la kees, tre, göi tro mina fe a hane xatuane la itre ka puafala. (Mar. 14:3-5; Ioane 13:29) Eje palahi enehila thene la itre keresiano la hnëqa cili, ke öni Iesu: “Celë pala kö thei nyipunie la ange pë ewekë.” (Mar. 14:7) Tune kaa la aqane eatrën hnene la Itretre Anyipici Iehova la hnëqa cili enehila?

¹³ Ame e itre xa ijin, itre atrene la ekalesia a ajane troa xatua angatr, ke, angatr a uti ipië trootro, maine hetre ketre sine meci pena, maine itre xa hace pena ka traqa xane ngöne la mele i angatr. Tro lai a canga mama kowe la itre atrene la hnepe lapa i angatr, maine itre sinee, me itre xane ju kö, matre kola thele troa canga hamëne la ixatua. Angatre hi lai a ujë thenge la hna qaja hnei Ioane aposetolo, kola hape: “Ame la ate hetenyi la ite ewekë ne fen, me öhne la tejine me angeic’ a pë ewekë, nge thinge pe la hni angeic’ e angeic, kola lapa tune ka e kuhu hni angeice la aja koi Akötesie? Ange nekönate fe, the tro kö sha ihnimi hnei aqane ewekë, me thinem ; loi pe hnene la huliwa me nyipici.” (1 Ioane 3:17,18; 2 Thes. 3:6-12) Ame la nyipi hmi, tre, ene la troa hamën la ka nyipiewekë thatraqane la itre trejine ka mele nyipici, nge ka aja ixatua.—Iako. 1:27; 2:14-17.

¹⁴ Ame ngöne la pane tusi Paulo aposetolo koi Timoteo, hnei angeic hna amamane la aqane troa xatuane la itre ka ijij. Kola mama la itre eamo i angeic ngöne 1 Timoteo 5:3-21. Qane la keresiano troa thupëne la mele ne la itre atrene la hnepe lapa i angeic. Tro la itre nekön, me itre api hmunë, maine itre sipu sinee pena a xatuane la itre keresiano ka qatre hë maine ka sinatr. Ame itre xa ijin, hetre ixatua qaathei mus, me itre hnene ej hna acil göi troa hamëne la ixatua ka ijij koi angatr. Maine pena, itre atrene la hnepe lapa i angatr, maine itre xa atre ju kö a xatua angatr troa kuca la itre pepa matre troa hane kapa la itre ixatua. Ame itre xa ijin, kola ce axeciën hnene la ekalesia matre troa xatuane la ketre trejine ka hekö hë nyihlue i Iehova, nge ka aja ixatua. Maine pëkö sipu sinee ne lai trejin, nge tha ijije pena kö troa hane kepe ixatua qaathei mus, haawe, tro la lapa ne la itre qatre thup a hamën la itre mekune ka ijij matre troa hamëne la ixatua. Ame kowe la itre trejin, ketre manathithi ka tru la troa ce thawa la itre mo i angatr memine la itre ka aja ixatua.

¹⁵ Hnene laka, hetre isi, me sa, me di, me jiin, me itre xa hulö ju kö ka traqa kowe la nöjei atr ngöne la itre ijine akötre enehila, tro lai a tru catre la itre trejine ka hleuhleu me ka aja ixatua. (Mat. 24:7-9) Maine jë, pë jë kö nyine tro la itre ekalesia ne la götrane cili a ithawakeun memine la itre trejin cili. Haawe, tro la Lapa Ne Xomi Meköt a hnëkëne la nyine troa kuca hnene la itre trejin ne la itre xa götran matre troa hamën la ixatua ka ijij. Ceitune hi lai memine lo hna kuca ekö hnene la itre keresiano ne Asia. Hnei angatr hna hamë xeni kowe la itre trejine ne Iudra ngöne la kola lepe la götrane cili hnene la jiin. (1 Kor. 16:1-4; 2 Kor. 9:1-5) E hne së hna nyitipu angatr, easë hi lai a amamane la ihnimi së kowe la itre trejin, nge tro ha mama laka, easë la itretre drei Iesu Keriso.—Ioane 13:35.

TROA TRO FË LA ITRE ITUS

¹⁶ Nyipiewekë catre troa tro fë Tusi Hmitrötr me itus ngöne la kola cainöjëne la maca ne Baselaia. Matre tro la lapa ne la itre qatre thup a iëne la ketre drikona matre troa thupëne la itre itus ne la ekalesia, me ketre drikona göi troa cilëne la itre zonal. Ka tru koi nyidro la hnëqa i nyidro. Nyidroti a wange hnyawa la itre pepa ka qaja la etrune la itre itus hna xeen, matre troa mama la etrune la itre itus nyine troa xom thatraqane la ekalesia.

¹⁷ Ame easë, itre keresiano ka nue mele hë koi Akötresie, trotrohnine hi së laka, ame la traeme së, me trengecatre së, me inamacane së, me itre hne së hna atreine kuca, me itre mo së, memine fe la mele së, tre, itre ahnahna i Akötresieti lai. Nge, nyipiewekë tro sa huliwan itre ej thatraqane la huliwa i Nyidrë. (Luka 17:10; 1 Kor. 4:7) Ame la easa huliwane hnyawa la itre ewekë cili, easë hi lai a amamane la ejuine la ihnimi së koi Iehova. Nge, tha sihngödri kö koi së laka, Nyidrëti a kapa madrine la itre ahnahna asë hne së hna kuca koi Nyidrë. Celë hi matre easa ajan troa atrunyi Iehova hnene la itre ewekë së ka tru aliene koi së. (Ite Edomë 3:9; Mar. 14:3-9; Luka 21:1-4; Kol. 3:23, 24) Öni Iesu: “Hna kapa gufane hnei nyipunie, hamëne gufanepi.” (Mat. 10:8) E hne së hna nue xanë së kö thatraqane la huliwa i Iehova, memine la itre mo së, tro ha hetrenyi the së la ketre madrine ka tru catr.—Ite hu. 20:35.