Ame la aja i epon, keme me thin tre, ene la troa xatuane la itre nekö i epon troa hnimi Iehova, me nue la mele i nyudreni koi Nyidrë. Nemene la nyine tro epon a kuca matre troa hnëkë nyudren kowe la bapataiso? Troa mama tune kaa ka hape, ijiji nyëne hë troa xomi bapataiso? Öni Iesu kowe la itretre drei nyidrë: “Tro jë nyipunie a inine la itre atr asë ne la nöjei nöj’ asëjëihë, me bapataiso angatre.” (Mat. 28:19, MN) Haawe, kola mama e celë laka, ame la pane nyine troa kuca matre troa xomi bapataiso tre, ene la troa ketre atre hna inin, maine atre dreng. Kola qaja la atr ka trotrohnine me lapaune kowe la itre ini qaathei Keriso, nge ka catr trongën. Ewekë fe lai hna atreine kuca hnene la nekönatr.

Amamai tulu ka loi jë kowe la nekö i epon, ini nyëne jë la itre ini qaathei Iehova. (Deu. 6:6-9) Kolo lai a qaja ka hape, troa hamëne la itre ini ka ej e hnine la lue itus, Nemene La Nyipi Ini Hna Hamën Hnei Tusi Hmitrötr? me “Thupë Nyipunieti Ju Kö Ngöne La Ihnimi Akötesie.” Ame la aliene lai tre, ene la troa ini nyudren la itre nyipici e hnine la Tusi Hmitrötr, me ini nyudren troa thele ewekë e hnine la itre trepene meköt ne la Tusi Hmitrötr. Xatuane jë la itre nekö i epon troa atreine qejepengöne la itre ini hnei nyudren hna lapaune kow, ngöne la sipu aqane ithanata i nyudren. (1 Pet. 3:15) Tro la atrehmekun me ithuecatre hnei nyudren hna kapa qaathei epon, memine la sipu ini Tusi nyudren, me itre icasikeu ne la ekalesia, me itre sinee ka lolo a xatua nyudren troa kökötr ngöne la nyipici uti hë la xomi bapataiso me e thupene fe. Nge, xatua nyudreni jë matre tro palahi a hetre nyine troa eatrën ngöne la huliwa i Iehova.

Öni Ite Edomë 20:11: “Mama ha la nekönate hnene la ite thina i nyën, maine loi maine meköti la huliwa i nyën.” Nemene la ka amamane ka hape, ketre atre drei Iesu Keriso hë la nekönatr trahmanyi, maine jajiny, nge ijiji nyëne hë troa xomi bapataiso?

Loi e tro la nekönatr ka kökötr ngöne la nyipici a drengethenge la keme me thine i nyëne ka hmi. (Kol. 3:20) Öni Tusi Hmitrötr göi Iesu lo kola 12 lao macatre i nyidrë ka hape: “Nyidrëti palahi a drenge thenge [la keme me thine i nyidrë].” (Luka 2:51, MN) Tha tro kö epon a mekune ka hape, troa pexej la nekö i epon. Ngo, qëmekene tro nyën a xomi bapataiso, loi e tro nyëne a thele troa xötrethenge la tulu i Iesu. Nge, tro ha mama e cili koi nöjei atr laka, ka drengethenge keme me thin nyën.

Tro ha mama fe thei nyëne laka, hetre aja i nyëne troa atre la itre nyipici ne la Tusi Hmitrötr. (Luka 2:46) Hapeu, hetre ajane kö la nekö i epon troa sine la itre icasikeu, me hane qeje mekun? (Sal. 122:1) Hetre aja i nyëne kö troa e lapane la Tusi Hmitrötr, me ini Tusi cas?—Mat. 4:4.

Ame la nekönatr ka kökötr ngöne la nyipici tre, nyëne a amë panëne la Baselaia ngöne la mele i nyën. (Mat. 6:33) Trotrohnine hnyawa hi nyëne la enyipiewekëne troa cainöj, nge tha hna bapataisone pala kö. Ketre, nyën a ketre sipu tro göi troa cainöje trootro, me ithanata memine la itre atr. Nyën a eatrëne la nöjei götrane la huliwa ne la cainöj, nge tha hmahma kö nyëne troa qaja amamane kowe la itre ka hamë ini, me sine ini i nyëne ka hape, Atre Anyipici Iehova nyën. Nyën a wangatrune la itre qa i nyëne göne la icasikeu Mel Me Huliwa Ne Cainöj Ne La Keresiano.

Ketre, tro nyëne lai a ananyine la itre sinatro ka ngazo matre tro palahi a pë ethan la mele i nyën. (Ite edomë 13:20; 1 Kor. 15:33) Tro lai a mama ngöne la aqane iëne nyën, la itre miuzik, me film, me porogaram ne tele, me itre elo ngöne video, me aqane huliwane nyëne la Ëternet.

Alanyimu e nyudren la itre hna ketr hnene la aqane catr ne la itre keme me thin troa ini nyudren la pengöi Iehova. Ame hnei nyudren hna melëne la nyipici, me eatrëne la itre hna amekötine göi troa xomi bapataiso. Epi tro Iehova a amanathithine la aqane catre epon troa xatuane la itre nekö i epon matre tro nyudren a eatrëne la ewekë ka tru celë, ene la bapataiso.

Ithuemacanyi Kowe La Atre Cainöje Tha Hna Bapataisone Petre Kö:

Ketre manathithi ka tru la troa ce huliwa memine la ekalesia, nge atre cainöje tha hna bapataisone petre kö së. Eahuni a qaja la madrine hun kowe la aqane kökötr eö ngöne la nyipici. Hnei eö hna inine la Tusi Hmitrötr, me lapaune kowe la hnei Akötresie hna thingehnaean, matre atrepengöi Iehova ha hnei eö.—Ioane 17:3; Heb. 11:6.

Qëmekene troa ini Tusi memine la Itretre Anyipici Iehova, ma hetre hmi eö hë ekö, maine pë pena kö. Maine jë, hetre huliwa hnei eö hna kuca ekö ka isazikeu memine la itre trepene meköt i Akötresie. Ngo, ietra ha eö enehila, kola hape, eö a hace fë la itre ngazo i eö ekö. Nge thupene lai, ujë hë eö kola hape, hnei eö hna thipetrij la aqane mele i eö ka ngazo, me mekune troa kuca la meköt xajawa i Akötresie. Celë hi aqane amamane eö la lapaune i eö koi Akötresie.—Ite hu. 3:19.

Maine jë tui Timoteo, “ate hë eö la ite hna cinyihane ka hmitöt e nekönate pete kö,” matre celë hi ka thupë eö qa ngöne la itre thiina me huliwa ka sis. (2 Tim. 3:15) Hnei eö hna thele troa cil kowe la ihuli ne la itre sinee, me itre xa ihuli ju kö troa kuca la ngazo xajawa i Iehova. Kola mama la lapaune i eö ngöne la aqane isigöline eö la hmi ka wië, me ce ithanatane la itre ini hnei eö hna mejiune kow memine la itre xa atr. Hna ini eö me hnëkë eö kowe la huliwa i Akötresie. Matre, hnei eö hna sipu axeciën enehila troa nyihlue i Iehova, ene la troa ketre atre cainöje tha hna bapataisone petre kö.

Maine jë, eö a atre la itre jë i Iehova qaane lo eö a nekönatr, maine pena, lo tru hë eö, ngo ame hë enehila eö a mekun troa eatrëne la lue xa ewekë ngöne la huliwa i Akötresie, ene la troa sa xepu me xomi bapataiso. Eö a sa xepu koi Iehova ngöne la eö a easenyi koi Nyidrë jëne la thith, me qaja amamane la sipu aja i eö troa nyihlue i Nyidrë epine palua. (Mat. 16:24) Ame la hatrene lai tre, kola bapataiso, ene la kola heti eö hnine la tim. (Mat. 28:19, 20) Kola amekötine laka, ketre hlue i Iehova ha eö jëne la hna sa xepu me bapataiso. Drei la ketre manathithi ka tru!

Tune la hnei eö hna inine hë ngöne la ini Tusi eö, tro eö lai a cil kowe la itre jol ka nyimutre. Pane mekune ju, thupene la hna bapataiso Iesu, ‘hna tro sai nyidrë hnene la ua kowe la hnapapa, troa tupathi nyidrë hnei diabolo.’ (Mat. 4:1) Haawe, e bapataiso hë eö, tro lai a traqa koi eö la itre itupath ka nyimu pengön. (Ioane 15:20). Tro eö lai a qëmeke kowe la icilekeu ne la hnepe lapa. (Mat. 10:36) Tro lai a hnyima sai eö hnene la itre sine ini eö, me itre sine huliwa i eö, me sinatro i eö ekö. The thëthëhmine kö la trengewekë i Iesu ngöne Mareko 10:29, 30 kola hape: “Nyipici ini a qaja koi nyipunie, ame la ate nue pe la uma, me ite tejin, me ite xa, me thin, me kem, me ifëkuku, me ite kuku, me ite hlapa, pi ini memine la evangelia, tro ha angeic’ a kapa enehila ngöne la ijine celë ca hadede la o uma, me ite tejin, me ite xa, me ite thin, me ite kuku, me ite hlapa, ce me ite aköt ; nge mele ka tha ase palua kö ngöne la ijine ka tro ha traqa.” Haawe, catre pi troa kuca asë la hnei eö hna atreine matre troa lapa qale koi Iehova, me metrötrëne la itre trepene meköti Nyidrë.

E eö hë a ajan troa xomi bapataiso, qaja jë hë kowe la itre qatre thup ne la ekalesia i eö. Tro la itre qatre thup a ce ithanatane me eö la itre hnying thupene la ithuemacanyi celë matre troa wange ka hape, ijiji eö hë troa xomi bapataiso. Loi e tro eö a pane wange casine la itre hnyinge celë ngöne la eö a ini Tusi cas.

Ame la eö a hnëkë thatraqane la itre ijine troa ce ithanata me itre qatre thup, pane ami ijine ju troa e la itre xötr ka mama, me mekun ajuin itre ej. Tha mama kö la itre mekune ka sa la itre hnying ngöne la itre xötr ka nyimutre. Ngo, tro itre eje lai a aijijë eö troa trotrohnine la mekuna ne la Tusi Hmitrötr ka sa la itre hnying. Maine tha mama kö koi eö la mekune ka sa la ketre hnying, loi e tro eö a ithel e hnine la Tusi Hmitrötr, memine la itre xa itus qaathene la “hlue ka nyipici me ka inamacan.” (Mat. 24:45) E aja i eö, fejane jë la itre xa mekune e hnine la itusi celë, maine ngöne la ketre ipepa pena. Ame hë la eö a ce ithanatane la itre hnyinge celë memine la itre qatre thup, amexeje jë hë la itre ithuemacanyi celë, nge, fe pi kö la itus. E jol koi eö troa trotrohnine la ketre hnying, the xoue kö troa sipo ixatua thene la ka ini Tusi me eö, maine thene la ketre qatre thup.

Ame ngöne la eö a ithanata memine la itre qatre thup, the thele kö troa hamëne la itre mekune ka qeadridri palaha, me jol troa trotrohnin. Loi e tro hi a hamëne la mekune ka sa mekötine la hnying, thenge la aqane ithanata i eö. Loi e tro fe a amexeje la cas, maine lue xötr ne la Tusi Hmitrötr ka anyipicine la mekun hnei eö hna hamën.

Maine thatre hnyawa pala kö eö la itre ini ne la Tusi Hmitrötr, tro la itre qatre thup a thel matre troa xatua eö. Jëne la ixatua cili tro hë eö lai a atreine qejepengöne hnyawa la itre nyipi ini ne la Tusi Hmitrötr thenge la aqane ithanata i eö. Nge, ame hë e thupen, ijiji eö hë troa hane xome la bapataiso.

[Ithuemacanyi kowe la itre qatre thup: Kola mama ngöne la götrane 211-214 la itre hna amekötine göi troa ce ithanatane la itre hnying memine la itre ka troa xomi bapataiso.]