Mekene 18
Ajane Jë Epuni Troa Nyihlue i Iehova Epine Palua Ngöne La Mele i Epun
1, 2. E hetrenyi the së la atrehmekune i Akötresie, nemene fe la ketre nyine tro së a kuca?
PANE mekune ju, epuni a cile qëmekene la ketre uma a hna lokaane la qëhnelö, hnine la uma cili, ke, hetrenyi la itre trengamo ka tru alameken. Fetra pi hi la ketre atr ka trene musi ngöne la hnalapa cili me hamë epuni la key, nge angeice a upi epuni troa hane xome la nöjei ewekë ka tru alamekene hnei epuni hna ajane hnine lai itre trengamo. Ngo ame pe, troa pë enyipi ewekëne lai kii, e thaa hna huliwaane kö eje hnei epun. Ceitune hi memine la atrehmekun, nyipi ewekë troa huliwaane eje matre tro epuni a kepe thangane ka loi qa ngön.
2 Tro kö a mama hnyawa lai ngöne la atrehmekune i Akötresie. Eje hi laka, jëne troa mele palua la troa atrehmekua Akötresieti hnyawa me Iesu. (Ioane 17:3) Ngo, thatreine kö troa aeatrëne lai hnene hmekuje hi la atrehmekun. Sisitria la tro epuni a trongëne la atrehmekune i Akötresie ngöne la mele i epun, tune la epuni a xome la kii troa fe la qëhnelö. Hnei Iesu hna qaja ka hape, “troa lö kowe la Baselaia i Akötresie” la itre atr ka kuca la aja i Nyidrë. Hna aijijë së isa alacasi troa nyihlue i Akötresie epine palua—Mataio 7:21; 1 Ioane 2:17.
3. Nemene la aja i Akötresie koi së?
3 Maine atre hë së la aja i Akötresie, ke, hna melene la troa kuca ej. Hapeue epun, nemene la hnei Akötresieti hna thele thei epun? Atreine tro hi së a qaja ka hape, ame la troa kuca la aja i Akötresie, ke, ene la troa xötrethenge la tulu i Iesu. Kola qaja ngöne la pane tusi Peteru 2:21 ka hape: “Ke hna hë nyipunie kowe lai; ke hnei keriso hna xomi akötre thatraqai nyipunie, kola hamë tulu thatraqai nyipunie, matre tro nyipunie a xöte thenge la ite thupa ca i nyidrë.” Qa ngöne lai, nyipi ewekë tro së a xötrethenge hnyawa la tulu hna hamëne hnei Iesu, maine easë a thele troa kuca la aja i Nyidrë. Celë hi aqane tro epuni a trongëne la ini hnei epuni hna kapa, qa hnine la atrehmekune i Akötresie.
TUNEKA LA AQANE HULIWANE I IESU LA ATREHMEKUNE I AKÖTRESIE
4. Pine nemene matre atre Iehova hnyawa hnei Iesu, nge nemene la aqane huliwane i nyidrë la atrehmekune i Akötresie?
4 Pë kö atr maine angela, ka atre Akötresieti hnyawa tui Iesu Keriso. Hnei nyidrëti hna mel, me ce huliwa me Iehova Akötresie e koho hnengödrai a nyimutre la itre macatre, qëmekene tro nyidrë a uti a tro celë fen. (Kolose 1:15, 16) Nge hnei Iesu hna uëne lai atrehmekun? Thaa hnei nyidrëti caasi kö hna kapa madrine me lapa fë thaupune ej. Ohe, hnei Iesu hna melëne ej. Celë hi kepine matre nyidrëti a hni ka loi, me atreine treqen, me hnime la nöjei atr. Qa ngöne lai, Iesu a nyitipune la tulu ne la Tretretro i nyidrë e hnengödrai, me huliwa thenge la hnei nyidrë hna atre ngöne la itre jë i Iehova memine la thiina i nyidrë.—Ioane 8:23, 28, 29, 38; 1 Ioane 4:8.
5. Pine nemene matre hnei Iesu hna xome la bapataiso, nge nemene la aqane mele thenge nyidrë la aliene la bapataiso i nyidrë?
5 Jëne la atrehmekun, hnei Iesu fe hna kuca la ketre ewekë ka sisitria. Hnei nyidrëti hna tro qa Galilaia kowe la hneopegejë e Ioridrano, nge hna bapataiso nyidrë e cili hnei Ioane. (Mataio 3:13-15) Nemene la aliene la bapataiso i Iesu? Ngöne laka, atre Iudra nyidrë, hna hnaho nyidrëti hë hnine la ketre nöje ka nyihlue i Akötresie. Celë hi matre, atre i Akötresieti kö nyidrë, qaane lo kola hnaho nyidrë. (Esodo 19:5, 6) Iesu a amamane ngöne la nyidrë a hane bapataiso laka, nyidrëti a fetra fë koi Iehova, la aja i nyidrë troa kuca la mekuana ne la Tretretro ngöne la nyidrë a mele ngöne la fen. (Heberu 10:5, 7) Qa ngöne lai, Iesu a aeatrëne jë la kepine la nyidrë a bapataiso. Hnei nyidrëti hna huliwa i Iehova ngöne la troa hamëne la atrehmekune i Akötresie kowe la itre atr, ngöne la nöjei ijine ka ijij. Eje hi laka, hnyapa koi Iesu troa kuca la aja i Akötresie, nge nyidrëti fe a qaja ka hape, kösë xeni koi nyidrë.—Ioane 4:34.
6. Ngöne nemene götrane la mele i Iesu, nyidrëti a xele nyidrëti kö?
6 Atre hi Iesu ka hape, ame la troa kuca la aja i Iehova, ke, ka troa hetre pune ka hace—goi tro fe la thupene cili a ketr la mele i nyidrë. Hnei Iesu hna xele nyidrëti kö, matre nyidrëti a amë pinëne la itre aja i nyidrë. Loi e tro pala hi së a amë panëne la aja i Akötresie. Qa ngöne lai, nemene la aqane tro së a xötrethenge la tulu ka pexej, hna amë pe hnei Iesu?
ITRE JËNE TROA MELE EPINE PALUA
7. Nemene la itre hna ca nyine troa xötrën, matre ijije troa hane bapataiso?
7 Tha ceitu së kö me Iesu, itre atr ka ngazo së, celë hi matre maine easë a ajane troa hane xomi bapataiso, ke, loi e tro së a xötrëne la itre hna ca, lo itre hna amekötine jëne mele së. Troa nyiqaane lai hnene la troa kapa ngöne la itre hni së, la nyipi atrehmekune i Iehova Akötresie me Iesu Keriso. Celë hi ka troa upi së lai, troa lapaune me catre hnimi Akötresie. (Mataio 22:37-40; Roma 10:17; Heberu 11:6) Tro la aqane idrei së kowe la itre wathebo i Akötresie memine la itre trepene meköt i Nyidrë, memine la itre tulu i Nyidrë ka draië, a upi së troa ietra me amamane laka, easë a qeje menune la itre ngazo së ekö. Celë hi ka thuejë së troa ujë, ene la easë a nue trije me kötrene la itre thiina ka ngazo, hne së hna xötrethenge ekö qëmekene tro së a kapa la atrehmekune i Akötresie. (Ite Huliwa 3:19) Eje hi laka, maine tro së a kuca juetrëne la ketre ngazo, nge thaa kuca pe la meköt, easë pala kö lai a amamane laka thaa ujë petre kö së qa ngöne la itre ngazo së, ngo ame pe, ketre thaa ijiji së kö troa huliwa thoi koi Akötresie. Öhne hnyawa hi Iehova la nöjei huliwa thoi.—Luka 12:2, 3.
8. Nemene la nyine tro epuni a kuca maine epuni a ajane troa hane cainöje trootro?
8 Ame hë enehila, qa ngöne laka atre hë epuni la atrehmekune i Akötresie, pine nemene matre thaa ketre wange pe epuni la itre hnyinge ne la ua? Ma aja i epuni troa canga qaja la hnei epuni hna inine kowe la itre sinee maine keme me thine i epun, itre sine ce elo i epuni me itre xaa atr ju kö. Maine, ase pena ha epuni nyiqaane cainöje tui Iesu ngöne laka, hnei nyidrëti hna cainöjëne la maca ka loi ngöne la nöjei ijine ka ijij. (Luka 10:38, 39; Ioane 4:6-15) Tune ka enehila, ma epuni jë a ajane troa catre ngöne la huliwa cili. Troa madrine hnene la itre qatre thupe troa ce ithahnata me epun, matre troa wange ka hape, atreine hë epuni nge ijiji epuni fe hë troa hane kuca la hnëqa hna athipe kowe la itre Temoë i Iehova, ene la troa cainöjëne pala hi la Baselaia. Maine ijiji epuni fe hë, ke, tro angatre a ce ami epuni memine la ketre Temoë matre troa ce cainöje me angeic. Hnene la itretre drei i Iesu hna caasi me xötrethenge la itre ini hna hamëne hnei Iesu, thatraqane la huliwa ne cainöj. (Mareko 6:7, 30; Luka 10:1) Tro fe epuni a hane kepe thangane qa ngöne la ketre ixatua ka tune lai, ngöne la epuni a cainöjëne trongëne la maca ne Baselaia ngöne itre hnalapa trootro, me itre xaa götrane la huliwa celë.—Ite Huliwa 20:20, 21.
9. Nemene la aqane tro la ketre atr a nue la mele i angeice koi Akötresie, nge nemene la aqane tro lai a ketr la mele i angeice hnene laka ase hë angeice nue la mele i angeic?
9 Ame la troa cainöjëne la maca ka loi kowe la nöjei atr ka isa pengöne kö ngöne la itre götrane la ekalesia, ke, celë hi ketre jëne troa öhne la itre atr ka ajane la meköt, nge ketre huliwa lai ka loi nge ka anyipicine la lapaune i epun. (Ite Huliwa 10:34, 35; Iakobo 2:17, 18, 26) E hnei epuni hna hane sine pala hi la itre icasikeu ne la itre keresiano me catre cainöje trootro, ke, epuni lai a amamane laka, ka ietra epun, nge ujë fe hë epuni qa ngöne la thiina ka ngazo; epuni hë enehila a catre troa mele thenge hnyawa la atrehmekune i Akötresie. Matre nemene hë la hna troa kuca thupen? Troa nue la mele së koi Iehova Akötresie. Kola hape, epuni a qaja koi Akötresie ngöne la thithi ka hape, epuni a troa ketre sipu nue la mele i epuni koi Nyidrë ngöne la hni ka ajan, me ka pexej, matre troa kuca la aja i Nyidrë. Celë hi aqane tro epuni lai a nue la mele i epuni koi Iehova, me kapa ngöne la itre hni i epuni la hoke i Iesu Keriso.—Mataio 11:29, 30.
BAPATAISO —NEMENE LA ALIENE EJE KOI NYIPUNIE
10. Pine nemene matre thupene la hna nue la mele i epuni koi Iehova, ke, ijije fe hë tro epuni a xome la bapataiso?
10 Tune lo hna qaja hnei Iesu, ame asë hi la itre atr ka ajane troa xötrethenge nyidrë, ke, nyipi ewekë tro asë hi angatre a xome la bapataiso. (Mataio 28:19, 20) Pine nemene matre, nyipi ewekë tro epuni a bapataiso e thupene la hnei epuni hna nue la mele i epuni koi Akötresie? Atre hi Iehova laka, epuni a hnimi Nyidrë, pine laka, ase hë epuni nue la mele i epuni koi Nyidrë. Ngo tro epuni a ajane troa kuca la ketre ewekë, matre troa amamane kowe la nöjei atr asë la ihnim i epuni koi Akötresie. Celë hi matre, ame la epuni a xome la bapataiso, epuni hi lai a amamane kowe la nöjei atr ka hape, ase hë epuni hane nue la mele i epuni koi Iehova Akötresie.—Roma 10:9, 10.
11. Nemene la aliene la bapataiso?
11 Nyimutre la itre hatrene ka qeje pengöne la aliene la bapataiso. Ngöne la epuni a lö maine “paatre” hnine la tim, ke, kösë lo epuni a meci fë la itre ngazo i epuni hnapan. Nge ame la epuni a fetra hmaca ke, kösë lo hnyipixe hë la mele i epun, thaa epuni hmaca kö a ketre mus, ngo aja i Akötresieti pë hë la enge ne la mele i epun. Thaa tro kö a mekune ka hape, pë hmaca kö ngazo hnei epuni hna troa kuca, itre atr ka ngazo asë hi së nge hetrenyi pala hi la itre ewekë ka thaa meköti kö hne së hna kuca ngöne la nöjei drai. Ngo, pine laka ase hë epuni nue la mele i epun, nge atre nyihlue i Iehova hë epuni hna bapataison, tro ha ketre pengöne me loi la aqane mele i epuni koi Nyidrë. Pine laka, epuni a amamane la ietra memine la ipië i epuni hnene la hna bapataiso epun, tro hë Iehova a köletrije la itre ngazo i epuni jëne la thupene mele i Iesu, ene la mele hna hujëne hnei nyidrë. Ketre, jëne la bapataiso, wië hë la mekuthethewe i epuni qëmeke i Akötresie.—1 Peteru 3:21.
12. Kola hapeu la kola qaja ka hape, hna bapataisone (a) “kowe la atresiwa i Tretretro”? (b) ‘kowe la hupuna’? (c) ‘kowe la uati hmitrötr’?
12 Hnei Iesu hna upe la itre itretre drei i nyidrë ka xötrethenge nyidrëti hë, troa bapataisone “kowe la atresiwa i Tretretro me hupuna me uati hmitrötr” la nöjei atr ka ajane troa ce tro me nyidrë. (Mataio 28:19) Nemene la aliene la trenge ewekë i Iesu? Ame la troa bapataiso “kowe la atresiwa i Tretretro” ke, kola amamane hnene lai atr ka hape, angeice a kepe Iehova Akötresie cememine la hni ka menyik, pine laka, Atre Ixupi Nyidrë nge Nyidrëti hi la Joxu ka tru ne la hnengödrai memine la fene hnengödrai. (Salamo 36:9; 83:18; Ate Cainöj 12:1) Ame göi troa bapataiso ‘kowe la hupuna’ ke, kolo lai a hape troa kepe Iesu Keriso—memine fe lo thupene mele qa thei nyidrë, ene la mele i nyidrë hna hujëne kösë sipu jëne mele hna hnëkëne hnei Akötresie. (Ite Huliwa 4:12) Ketre, ame fe la bapataiso ‘kowe la uati hmitrötr’ ke kola hape tro la ka xome la bapataiso a wangatrune la uati hmitrötre i Iehova, ene la trenge catre i Nyidrë, kösë ketre ewekë hnei Akötresie hna huliwane matre troa aeatrëne la itre mekune i Nyidrë, nge tro fe a hamë trenge catre kowe la itre hlue i Nyidrë, matre atreine angatre ce kuca la aja i Nyidrë, memine la organizasio hnei Nyidrë hna eatrongëne jëne la ua i Nyidrë.—Genese 1:2; Salamo 104:30; Ioane 14:26; 2 Peteru 1:21.
IJIJI EPUNI HË TROA HANE BAPATAISO?
13, 14. Pine nemene matre thaa tro kö së a xouene troa nyihlue i Iehova Akötresie?
13 Pine laka, nyipi ewekë catre la bapataiso, nge celë fe ketre ijine lai ka sisitria ngöne la mele ne la atr, hapeu tro kö epuni a xouene la ijine cili? Ohe! Eje hi laka thaa tro kö a wangahmaloeëne la troa bapataiso, celë hi ketre götrane lai ka nyipi ewekë ngöne la mele i epun, götrane nyine troa wangatrune hnyawa thenge la inamacane qa thei Akötresie.
14 Bapataiso a amamane hnyawa laka, epuni a iëne troa nyihlue i Iehova Akötresie. Mekune ju la itre atr hnei epuni hna atre. Hapeu, ma angatre a isa nyihluene la itre xaa joxu? Nyimutre la itre ka nyihluene la mamona. (Mataio 6:24) Itre xane a mele thenge la itre aja i angatr, maine angatre a sipu nyihlue i angatre kö ngöne laka, angatre a aeatrëne la itre sipu aja i angatre ka tru, me isa xötrethenge kö la itre hnei angatre hna mekune kow ngöne la mele i angatr. Itre xane a nyihluene la itre xaa haze ka thoi. Ngo hnei epuni hna iëne troa nyihluene la nyipi Akötresie, ene Iehova. Pëkö ka atreine hni ka menyik, me utipine me ihnimi tui Nyidrë. Akötresie a atrune la itre atr me hamëne koi angatre la ketre huliwa ka loi, jëne mele i angatr. Nyidrëti a amanathithine la itretre nyihlue i Nyidrë, ene la troa mele ka thaa ase palua kö. Qa ngöne lai thaa tro kö epuni a xou troa xötrethenge la tulu i Iesu, me nue la mele i epuni koi Iehova. Eje hi laka, celë hi la aqane mele hna ajane hnei Akötresie nge ka nyipi loi.—1 Ite Joxu 18:21.
15. Nemene la itre ewekë hna cile kow hnene nöjei atr ka ajane troa xome la bapataiso?
15 Ngo eje hi laka, thaa tro kö ketre atr a upi epuni troa xomi bapataiso. Isa qanyi epuni kö, epuni hi me Iehova. (Galatia 6:4) Qa ngöne laka, kökötre hë epuni ngöne la ua, haawe epuni hë a ketre thele ka hape: “Hape u, ngazo troa bapataiso ni?” (Itre Huliwa 8:35, 36) Nge epuni a ketre sipu hnyinge ju ka hape, ‘Hapeu hnene kö la faminge hna thungi jëng? Hapeu, eni kö a ixelë memine la ketre ewekë ka thaa ihmeku kö me Tusi Hmitrötr, maine eni pala kö a kuca la itre hna majemine ka ngazo? Qa ngöne pena laka, eni a xouene wanga xele pi ma wai ni, hnene la itre atrene la hunahming?’ Eje hi laka, nyipi ewekë tro epuni a mekune hnyawa la itre götrane cili, pine laka thaa tro kö itre eje a thungi jë i epun, cele hi matre, loi e tro epuni a waitulune hnyawa itre ej, cememine la hni ka ajan.
16. Nemene la manathithi hnei epuni hna troa kapa e hnei epuni hna nyihlue i Iehova?
16 Thaa loi kö e troa goeëne hmekuje ju hi la itre ewekë hna troa cile kow, matre thaa wangatrune pë hë la itre thangane ka loi hna troa kapa qa ngöne la hna nyihlue i Iehova. Hanawange la ketre ceitun, ene la pengöne la icilekeu hnine la fami. Hnei Iesu hna thingehnaeane ka hape, maine tro la itretre drei i nyidrë a ithatre memine la itre keme me thine i angatr, hnene laka angatre a xötrethenge nyidrë, eje hi laka, tro ha kepe angatre hnene la ketre fami ka tru ngöne la ua. (Mareko 10:29, 30) Tro la itre trejine cili ngöne la lapaun, a hnimi epun, troa xatua epuni troa xomihnine la iakötrë, me xatua epuni troa trongëne la jëne tro kowe la mel. (1 Peteru 5:9) Ketre, atreine tro la itre qatre thupe ne la ekalesia a xatua epuni troa cile kowe la itre jole i epun, me itre xaa itupathi ju kö ka tru. (Iakobo 5:14-16) Ngo ngöne laka, troa xele epuni hnene la fen, ewekë ka loi la tro epuni a hnyinge ka hape ‘Hetrenyi kö la ketre ewekë ka sisitria e hune la troa kepe ni hnene la Atre xupe la ihnadro memine la hnengödrai, aqane ujë ka troa amadrinë Nyidrë, pine laka hnenge hna iëne la aqane mele hna ajane hnei Nyidrë?’—Ite Edomë 27:11.
MELE THENGE JË EPUNI LA HNA NUE MELE ME HNA BAPATAISO
17. Pine nemene matre thaa tro kö a trotrohnine la bapataiso kösë pune huliwa, ngo qaane pe?
17 Nyipi ewekë troa atre laka, thaa bapataiso kö la pune la itre hnei epuni hna kuca, troa kökötre ngöne la ua. Eje pe a amamane laka, kolo ha nyiqaane troa nyihlue i Akötresie uti hë epine palua ngöne la mele ka pexej, tune la ketre hlue hna acile hë, nge Temoë i Iehova fe hë. Ngacama nyipi ewekë la bapataiso, ngo thaa jëne iamele hmekuje kö. Thaa hnei Iesu fe kö hna qaja ka hape: ‘Ame la itre atr hna bapataisone hë ke, ka tro asë hë angatre lai a mel.’ Hnei nyidrëti pe hna qaja ka hape: “Ame la ate cile huti uti hë la pune, te, tro ha mel.” (Mataio 24:13) Celë hi matre, jëne iamele la troa pane thele la Baselaia i Akötresie ngöne la mele i epun.—Mataio 6:25-34.
18. Thupene la bapataiso, nemene la itre xaa hna mekune kow ka sisitria nyine troa kuca trongën?
18 Maine epuni a ajane troa catre ngöne la huliwa i Akötresie, ke, loi e tro epuni a ketre xome la itre mekune ngöne la ua hnei epuni hna ajane troa traqa kow. Ame la ketre mekune ka ijije nyine troa traqa kow, ke, ene la troa akökötrene la atrehmekune i Akötresie thei epun, jëne tro lai a isa inine pala hi la Wesiula i Nyidrë. Hnëkëne jë me thele la aqane tro epuni a e ngöne la drai la Tusi Hmitrötr. (Salamo 1:1, 2) Loi e tro pala hi epuni a hane sine la itre icasikeu i keresiano, e cili tro la itre trejine a xatua epuni hnene la aqane catre i angatre ngöne la ua. Hane fe kö epuni qeje mekune ngöne la itre ijine icasikeu ne la ekalesia, matre troa atrunyi Iehova me thele troa hane ithuecatre kowe la itre xan? (Roma 1:11, 12) Ame la ketre ewekë hne së hna troa kuca, ke, ene la troa nyihnyawane la aliene la itre thithi së.—Luka 11:2-4.
19. Nemene la itre thiina ka loi hna xatua epuni troa melëne hnei uati hmitrötr?
19 Maine epuni a ajane troa mele tune la atr hna bapataisone hë, ke, nyipi ewekë tro pala hi epuni a thupëne hnyawa la itre hnei epuni hna kuca, celë hi aqane tro lai a thujëne la uati hmitrötre i Akötresie troa akökötrene thei epuni la itre thiina ka loi, maine ihnim, madrin, tingeting, xomihni ahoeany, metrötr, thiina ka loi, me nyipici, me thiina ka menyik, me xomehnöth. (Galatia 5:22, 23; 2 Peteru 3:11) Mekune hnyawa ju laka, Iehova a hamëne la uati hmitrötre i Nyidrë kowe la nöjei atr ka sipone eje jëne la thith, nge ka drenge thenge Nyidrë tune la itretre nyihlue i Nyidrë ka nyipici. (Luka 11:13; Ite Huliwa 5:32) Haawe, sipone jë koi Akötresieti la uati hmitrötre i Nyidrë, me thele ixatua thei Nyidrë, matre troa atreine melëne la itre thiina ka amadrinë Nyidrë. Maine tro epuni a kapa la uati hmitrötre i Akötresie, ke, tro ha mama hnayawa la itre thiina cili ngöne la epuni a cainöj, me ngöne fe la aqane ujë i epun. Eje hi laka, kola catre melëne la “atr ka hnyipixe” hnene la nöjei atrene la ekalesia, matre troa nyitipu Keriso. (Kolose 3:9-14) Pine laka isa pengöne la aqane kökötre së ngöne la ua, troa hmitre catre koi itre xan, maine nyimenyime pena troa xetrëne la ixetre ne la atr ka hnyipixe. Nge ngöne laka, itre atr ka ngazo së, nyipi ewekë tro së a catre huliwa, matre hetrenyi së la thiina ne keresiano. Ngo thaa tro kö së a nanazij, pine laka, ijije hi tro Akötresieti a xatua së ngöne la götrane cili.
20. Nemene la itre götrane ngöne la huliwa ne cainöje trootro nyine tro së a kuca matre nyitupu Iesu?
20 E hune la itre hna mekune kow cili, nyipi ewekë troa xötrethenge la tulu hna amë pe hnei Iesu, ngöne laka, pexeje la madrine i nyidrë. (Heberu 12:1-3) Hna ajane hnei nyidrë la huliwa ne cainöj. Maine epuni a hane kuca la hnëqa ne troa cainöjëne la Baselaia, ke, thaa tro kö a aceitunëne lai memine la huliwa i maseta, ngöne laka caasi pala hi la hna kuca. Thele jë troa öhnyi madrine ngöne kola inine kowe la itre xaa atr la Baselaia i Akötresie, tune lo aqane kuca hnei Iesu. Xötrethenge jë la itre ini hna hamëne hnine la ekalesia, matre tro epuni a ketre atr ka atreine troa inine la itre xan. Nge loi e troa xecie koi epuni laka, tro Iehova a hamëne la trengecatre ka ijije matre atreine tro epuni a kuca la hnëqa i epun, ene la troa cainöje trootro.—1 Korinito 9:19-23.
21. (a) Hne së hna atre tuneka laka, Iehova a wangatrune la itre atr hna bapataisone nge ka isa nyihlue i Nyidrëti hnyawa? (b) Nemene la ewekë ka amamane laka nyipi ewekë la bapataiso nge jëne mele së hi lai, ngöne la ijine Iehova a troa apatrene la fene ka ngazo celë?
21 Sine i Akötresie nge enehmu i Nyidrë la atr nue la mele i angeic me bapataiso, nge ka thele troa xötrethenge la tulu i Iesu. Iehova a goeëne la itre hni ne la itre milio lao atr, nge atre hnyawa kö Nyidrë la itre ka ijij. Ame koi Nyidrë, ke, itre ewekë ka tru alamekene angatr, celë hi “nöjei ewekë hna ajan.” (Hagai 2:7) Kola amamane hnene la itre hna perofetane hnei Tusi Hmitrötre la hna mekune hnei Akötresieti, göi ange ka troa kapa la hatrene mele ngöne la ijine ihnyingë i Nyidrë ka calemi catre hë, nge kolo fe lo ijine lai tro la fene ka ngazo celë a paatr. (Ezekiela 9:1-6; Malaki 3:16, 18) Epuni kö a “lapaune lo hna hnëkëne kowe la mele ka thaa ase paluakö”? (Ite Huliwa 13:48) Hapeu, aja i epuni fe troa nyihatrenyi epuni kösë ketre atre nyihlue i Akötresie? Eje hi laka, ketre götrane lai, hatrene la troa nue mel, me bapataiso, nge itre jëne iamele lai ka sisitria.
22. Nemene la itre ewekë ka troa traqa, hna treqene hnene la “ka alanyimu atraqatr?”
22 Thupene lo iwë atraqatr, hna löpi qa hnine la aka hnei Noa me fami i angeic, kowe la ketre ihnadro hna awiëne hnei tim, kola hape, hna köletrije la itre ethanyine hnapane hnei tim. Ketre tune fe enehila, kola melëne hnene la “ka ala nyimu atraqatr” la atrehmekune i Akötresie, nge kola kepe angatre hnei Iehova; ketre, ijiji angatre fe troa hane mele ngöne la kola troa apaatrene la fene ka ngazo celë, me troa tro me lö kowe la ketre fene hnengödrai ka troa pë ethane epine palua. (Hna Amamane 7:9, 14) Nemene pengöne la mele ngöne la Paradaiso cili?
HAPEUE LA HNEI EPUNI HNA ININ
Nemene la aja i Iehova göne la aqane tro epuni a huliwane la hnei epuni hna inine ngöne la atrehmekune i Nyidrë?
Nemene la itre hna ca, nyine troa trongëne matre aijiji së jë kowe la bapataiso?
Pine nemene matre thaa pune huliwa kö la bapataiso, ngo nyiqaane pe?
Nemene la aqane tro së a melëne thenge la hne së hna nue mel, me bapataiso?
[Iatr ne la götran 172]
Hapeu hane fe kö epuni thithi koi Akötresie ngöne la epuni a mekune troa nue la mele i epuni koi Nyidrë?
[Iatr ne la götran 174]
Nemene la itre ewekë ka thungi epuni troa xome la bapataiso?