“Tro Ni a Thele La Ka Pat”

HNEI Iehova hna lapa aceitunë Nyidrë memine la atre thupë mamoe celë. Öni Nyidrëti koi së e hnine la Wesi Ula i Nyidrë: “Qânge kö troa thele la hnënge mamoenge me wai nyuden.”—Ezekiela 34:11, 12.

‘Qânge Kö Troa Wange La Itre Mamoeng’

Drei la itre mamoe i Iehova? Kolo itre hlue i Nyidrë, angetre hnimi Nyidrë me atrunyi Nyidrë. Öni Tusi Hmitrötr: “Tro sha wakukupe me thiliju ; tro sha sa watingöneca xajawa i Iehova ate xupi shë. Ke nyidëti la Akötesi shë ; nge nöjei ate ne shë la zi nyidë, me ite mamoe ne la ime i nyidë.” (Salamo 95:6, 7) Tune la itre mamoe ka drengethenge la atre thupë nyudren, hetre aja ne la itre hlue i Iehova troa drengethenge la Atre Thupë Mamoeë angatr. Hapeu, Pë fe kö engazo i angatr? Ohea, ke ame itre xa ijin, ceitu i angatr me itre “mamoe . . hna isa ije[n]” maine “mamoe ka pate” maine pena tune la “mamoe hna menune la gojeny.” Kolo hi lai a amamane ka hape, tha itre ka pexeje kö angatr. (Ezekiela 34:12; Mataio 15:24; 1 Peteru 2:25) Matre ame hë la kola nanyi trootro la ketre atr qaathei Iehova, tha tro jë kö Nyidrëti lai a nuetriji angeic, ke ame koi Nyidrë, tha ka luzi kö la mamoe cili.

Hapeu, ame koi epun, tre Iehova pala hi la atre thupë mamoeë epun? Nemene la aqane amamane Iehova ka hape, Nyidrëti la Atre Thupë Mamoeë së enehila? Tro sa ce wange la köni aqane amamane Nyidrë:

Nyidrëti a ithua së ngöne la götrane u. Öni Iehova: “Tro ni a thu a i nyudeni ngöne la ga loi. . . .  Tro nyudeni a meköl’ e cili ngöne la hnahage ka loi ; me xeni ngöne la hlapa ka keukawa.” (Ezekiela 34:14) Tha hnei Iehova pi kö hna cipa së la nöjei pengöne xeni ne la u ngöne la ijine ka ijij. Mekune pala kö epun la ketre tane mekun, maine ketre cainöj, maine ketre video ka sa la thithi epun? Hnene eje kö hna acatrene la mejiune i epun laka, Iehova a sipu hnehengazo epun?

Nyidrëti a thupë së me sajuë së. Hna thingehnaeane hnei Iehova ka hape: “Tro ni a . . . ahmacane la hna helën, me ote sine thuluhmatine [maine nyi atune] la ka xeci, me aegöcatene la ka kucakuca.” (Ezekiela 34:16) Iehova a aegöcatrene la itre ka kucakuca me akeukawane la itre hni hna akötrën. Nyidrëti a nyi atune la waca ka eatre ne la mamoe i Nyidrë, me axapone la itre eatre i nyën; itre eatre jë qaathene la itre xa trejin, sine hmi nyën. Ketre, Nyidrëti a ahmacane la itre ka ananyi Nyidrë, itre ka isi memine la itre mekune ka iathixötrë.

Nyidrëti a akötrehni së. Öni Iehova: “Qânge kö troa . . . wai nyuden.” Nge öni Nyidrëti hmaca jë: “Tro ni a thei nyudeni qa ngöne la ite hnë asë lo hna isa ije nyudeni,” nge, “tro ni a thele la ka pat.” (Ezekiela 34:11, 12, 16) Tha hnene kö laka patre hë la ketre mamoe, matre ame koi Iehova, tre ka luzi hë. Canga mama hnyawa hi koi Nyidrë la kola patr la ketre mamoe, matre Nyidrëti a canga thele ej, nge e öhne hmaca ha Nyidrë, atraqatre la madrine i Nyidrë. (Mataio 18:12-14) Celë hi matre, hëne jë Nyidrëti la itre hlue i Nyidrë ka hape, “hnënge mamoeng, hnënge mamoe ne la hnehlapang,” ke Nyidrëti la ka thupë angatr. (Ezekiela 34:31) Epuni hi la ketre e nyudren!

‘Ahnyipixene Jë La Itre Drai Huni Tune Ekö Lo’

Pine nemene matre Iehova a thele epun me hëne abëekë epuni koi Nyidrë? Pine laka, tru la aja i Nyidrë tro epuni a mele madrin. Nyidrëti a thingehnaeane ka hape, “Troa trotro la manathithi kösë mani” kowe la itre mamoe i Nyidrë. (Ezekiela 34:26) Tha ka gufa kö la hna thingehnaeane celë, ke, ewekë la hnei epuni hë lo hna melën.

Pane mekune hmaca jë epuni ekö lo epuni a xötrei atre Iehova. Nemene la pengöi epuni lo epuni a xötrei atre la itre nyipici, tune la ëje i Akötresie, me aja i Nyidrë kowe la itre atr? Mekune pala kö epuni lo aqane akeukawane la hni epuni la epuni a traqa itronyi memine la itre Keresiano ngöne la itre hna asabele? Ame lo epuni a cainöje trootro me öhne la ketre atr ka hetre hni ne ajan, tre, mekune pala hi epuni lo trenge madrine i epuni lo epuni a bëeke koi hnalapa?

Thele jë matre troa hetrenyi hmaca la itre madrine celë. Önine la itre hlue i Akötresieti ekö e thith ka hape: “Iehova fe, ahmacanyi huni ju koi enëtilai, mate hmacaju hun ; ahmadradrane [maine ahnyipixene] la ite drai huni tune [ekö] lo.” (Ite Teije i Ieremia 5:21) Hnei Iehova hna sa la thithi celë, ame hna bëeke hmaca hnene la nöje i Nyidrë matre troa nyihlue i Nyidrë cememine la madrin. (Nehemia 8:17) Tro fe Iehova a hane kuca tune lai koi epun.

Ngo eje hi laka, ame la troa bëeke koi Iehova, tre ka nyimenyime hi e troa qaja, ngo ka jole pe e troa kuca. Tro sa ce wange la itre xa jol hna cile kow hnene la itre ka pi bëek, me aqane troa elë hun itre ej.