NHYING 5

E Kola Pi Inyiengë Me Eö?

KEPINE LA HNYING

Pine laka tro la aqane ujë i eö a aloine maine angazone catrëne lai jol.

MAINE EÖ JU

Hanawang: Xele kö Toma ma ini enehila, me elanyi, me euj. Köni treu hë ne ujë tun hnei Toma, hmekune lo itre sine ini angeic a tro fë la itre ithanata ka ngazo göi angeic. Matre hetre ëje i angeice hë hna atë. Ame itre xa ijin, hna thë hi hnei ketre matre troa mala la itre itusi Toma, maine pena kola uku angeic qa hutrö, nge ame la Toma a xei ke, thatre kö Toma lai ka iuku. Ame pena eidr, hnei Toma hna kapa la ketre maca ka iaxouenyi ngöne Ëternet . . .

Maine Toma ju eö, nemene la hnei eö hna troa kuca?

PANE MEKUNE JU!

Hetre nyine tro eö a kuca! Isi jë ngo the hnaiwanakoime kö. Tune kaa?

THE AMAMANE KÖ LA PENGÖNE LA HNI EÖ. Öni Tusi Hmitrötr: “Tro la hmo a nuan’ asë la hni nyën ; ngo tro la ate ka inamacan’ a xome hnöth’ eje uti hë e kete ijin.” (Ite Edomë 29:11) Maine tro eö a isine matre tha tro kö a mama la pengöne la hni eö, haawe, ketre tro fe hë la ka iaxouenyi a nue eö.
THE TË KÖ LA NGAZO. Öni Tusi Hmitrötr: “The të kö la ngazo i kete ate hnei ngazo.” (Roma 12:17) E troa itëkeune la ngazo, tro lai a ngazo catr.
KÖTRENE PI LA ITRE JOL. Öni Tusi Hmitrötr: “Ame la ate maca meke, te, kola goeëne la ngazo, me za.” (Ite Edomë 22:3) Maine ijij, ananyine pi la itre atr ka akötrë eö maine ka iaxoueny, memine la itre götrane hna majemine öhnyi angatr.
THELE JË LA AQANE TROA SA. Öni Tusi Hmitrötr: “E kola sa menyiken, te, kola [apujene la elëhni].” (Ite Edomë 15:1) Pane ihnyima jë. Maine kola jele tru ngönë eö hnene la ka iakötrë, nangenange jë me hape, “Matre, tro na ce thawa me eö la girising?”
TRO PI. Öni Nora ka 19 lao macatre: “E pëkö hnei eö hna sa, nge eö fe a tro, eö hi lai a amamane ka hape, ka macaj eö, nge ka catre kö eö hune la atre iakötrë. Kolo hi lai a mama laka, hetre xomihni thei eö, nge ewekë lai ka patre thene la ka iakötrë.” —2 Timoteo 2:24.
LOI E CATR E KUHU HNI EÖ LA MEKUNA I EÖ. Hna majemine hnene la itre ka iakötrë troa thele la itre ka meije mekun, nge ka thatreine cil kowe la itre ka iakötrë. Ame pena la itre ka iakötrë, angatre ha cile hnö la angatr a öhne laka, tha eö kö a nue angatr troa musinë eö.
ITHANATANE JË. Önine la ketre ka porofesör ekö: “Eni a upe la itre hna akötrën troa ithanata. Pëkö xa nyin ne lai; ketre tro fe lai a xatuane la itre xan matre tha tro kö a hane akötrë angatr.”

Ketre nekö trahmanyi a cile tha xou qëmekene la ka akötrë angeic — E catre hë e kuhu hni eö la mekuna i eö, haawe, hetrenyi hë thei eö la trenge catr, ewekë lai ka patre thene la ka iakötrë

ATRE FE HI EÖ?

Hetre iakötrë ka ketr la ngönetrei, ngo hetrenyi fe la itre xa pengöne iakötrë:

Kola qaqaa eö. “Thatreine kö ni thëthëhmine la trenge ewekë hna qaja koi ni hnene la itre xa jajiny. Matre ame koi ni, ke pëkö eloing, nge pëkö ka hnimi ni. Ketre loi ju kö la tro angatr a lepi ni.”—Celine, ka 20 lao macatre.
Kola xele ma wai eö. “Hnene la itre sine ce ining hna xele ma wai ni. Ame la ijine xen, ke angatr a xome asë la itre göhnë matre tha tro kö ni a ce lapa me angatr. Eni pë hë a treij me xeni cas. Nge aqane ujë i angatr lai koi ni ngöne la macatre ka pexej.”—Haley, ka 18 lao macatre.
Kola qaja angazo eö ngöne Ëternet. “Ijij troa adrone la ëje i ketre, maine akötrëne la mele i ketre hnene hi la itre trenge ewekë hne së hna amë ngöne Ëternet. Eje hi laka, kösë tru menu pala ha la aqane qaja la itre ewekë e cili, ngo itre ewekë lai ka traqa ha!”—Daniel, ka 14 lao macatre.

**ITRE HNYING—IAKÖTRË**
EJE HI MAINE WAEA	AQANE SA
1 Qaane ekö hë la iakötrë.	1 Eje hi. Tusi Hmitrötr a qeje itre ka qea hmae, lo itre hna hëne qene Heberu ka hape Nephilim, nge kola hape, “Itre Ka Akeinyi Itre Xan.”—Genese 6:4.
2 Tha ka ngazo kö la troa iakötrë. Aqane ihnyima hi lai.	2 Waea. Ame itre xa ijin, hna hnöjua hnene la itre xa thöth.
3 E aja së troa cile hnene la ka iakötrë, loi e troa hnaiwanakoime koi angeic.	3 Waea. Ka catre kö la ka iakötrë hune la atr hna akötrën, matre tha loi kö troa isi.
4 E öhne hë eö laka, kola akötrë ketre, loi e troa lapa thaup.	4 Waea. Tha loi kö troa lapa thaup. Maine eö a öhne la kola akötrë ketre, nge pëkö hnei eö hna kuca, eö hi lai a atrune catrëne la jol.
5 Ngacama kola nyi ka catr hnene la ka iakötrë, ngo ame pe ka hleuhleu la hni angeic.	5 Eje hi. Ngacama kola nyi ka catr hnene la ka iakötrë, ngo ka hleuhleu la hni angeic, nge angeic a akötrë ketre matre tingetinge pi la hni angeic.
6 Ijije hi tro la ka iakötrë a saze.	6 Eje hi. Maine hetre ka xatua angeic, ijiji angeice hi troa saze la mekuna i angeic, me aqane ujë i angeic.