Loi e Tro Sa Xoue Akötresie!

“Ame la qoue Iehova, te, qane la inamacan.”—ITE EDOMË 9:10.

1. Pine nemen matre nyimutre la itre atr ka jol e troa trotrohnine la mekun, ene la troa xoue Akötresie?

AME ngöne la itre drai ekö, hna qaja aloine la atr ka xoue Akötresie. Nge ame enehila, nyimutre la itre atr ka mekune ka hape, nanyi hë koi së la troa xoue Akötresie, nge ka jole catr e troa trotrohnin la mekune cili. Matre öni angatre jë hi e hnyinge ka hape: “Maine ka ihnimi Akötresie, tre, pine nemen matre tro ni a xoue Nyidrë?” Eje hi lai laka, ame koi angatr, ame la xoue Akötresie, tre, ketre aliene hni lai ka ngazo, nge ka iaxoueny. Ngo ame pe la nyipi xoue Akötresie, tre, kösë ka tru catre kö la aliene ej, nge tune la hne së hna troa ce wang, thaa ketre aliene hni menu kö.

2, 3. Kola hapeue la troa xoue Akötresie cememine la hni ka menyik?

² Lolo la aqane amamane hnei Tusi Hmitrötr la xoue Akötresie. (Isaia 11:3) Ame la troa xoue Akötresie, tre, ene la troa atraqatre la metrötr, nge troa hetre hni ne ajan troa amadrinë Nyidrë. (Salamo 115:11) Kolo mina fe a hape, troa kapa la itre trepene meköt göi thiina me trongëne hnyawa itre ej, nge troa melëne la itre hnei Nyidrëti hna amekötin göi troa atrehmekune la loi qa ngöne la ngazo. Kola amamane hnene la ketre sine tus ka hape ame la xou cili, tre, celë hi “ketre aqane troa mekune göi Akötresie, ketre mekune ka tru ka upi së troa inamacane ngöne la aqane ujë së me thipetrije la nöjei thiina ka ngazo asë.” Wesi Ula i Akötresieti a qaja hnyawa koi së ka hape: “Ame la qoue Iehova, te, qane la inamacan.”—Ite Edomë 9:10.

³ Kola mama mina fe la xoue Akötresieti, ngöne la itre xaa götran ne la mele ne la atr. Thaa eje hmekuje kö a akökötren the së la inamacan, ngo kolo mina fe a acian la madrin, me tingeting, me loinöj, me eqeane la mel, me mejiun, me lapaun. (Salamo 2:11; Ite Edomë 1:7; 10:27; 14:26; 22:4; 23:17, 18; Ite Huliwa 9:31) Ka easenyi catre la xou cili, kowe la lapaun me ihnim. Kola ketr asë la nöjei aqane imelekeu së me Akötresie memine la itre atr. (Deuteronomi 10:12; Iobu 6:14; Heberu 11:7) Ame fe la xoue Akötresie, tre, kolo lai a qaja la mejiune ka catr ka eje e kuhu hni së, laka, tro la Tretretro së e koho hnengödrai, a thupë së isa alacaas, nge tro Nyidrëti a senge trije la itre ngazo së. (Salamo 130:4) Haawe, kolo hmekuje hi lo itre atr ka ngazo nge ka thaa ietra kö, la itre ka troa xouene elanyi la elëhni Akötresie.a—Heberu 10:26-31.

Loi e Tro Sa Inine Troa Xoue Iehova

4. Nemene la ka xatua së troa inine troa xoue Iehova?

⁴ Pine laka ka sisitria catr la xoue Akötesie ngöne la easa axeciëne la itre mekune ka lolo me kapa la itre manathithi qaathei Nyidrë, tune kaa la aqane tro sa “ini troa xoue Iehova” hnyawa? (Deuteronomi 17:19) Nyimutre la itre trahmanyi me föe hna xome hnei Tusi Hmitrötr nyine tulu, matre troa “ini së” la aqane troa xoue Akötresie. (Roma 15:4) Tro sa pane mekune la mele i Davita, joxu ne Isaraela ekö.

5. Nemene la aqane xatua Davita hnene la huliwa ne thupë, troa xoue Iehova?

⁵ Hnei Iehova hna thipetriji Saulo, pane joxu ne Isaraela, pine la hnei angeic hna xouene la itre atr ngo thaa xoue Iehova pe. (1 Samuela 15:24-26) Ame ngöne la ketre götran, tre, kola mama ngöne la aqane mele i Davita memine la elolone la aqane imelekeu i angeic me Iehova, laka, ketre atr ka xoue Akötresieti hnyawa angeic. Ngacama nekönatre petre kö angeic, ngo majemi hë angeic troa thupëne la itre mamoe ne la keme i angeic. (1 Samuela 16:11) Nyimutre la itre jidri ne Davita memine la itre mamoe e kuhu tröne la hna axö mamoe, matre tru catre la itre ijine angeic a goeëne la itre ewekë hna xupe hnei Iehova, tune la itre wëtresij; celë hi ketre ewekë lai ka xatua angeic troa trotrohnine la aliene la hna hape: troa xoue Iehova. Ngacama wamine hi la hnei Davita hna atrehmekune qa ngöne la hna goeëne la hnengödrai memine la fene hnengödrai, ngo ame pe, tre, xecie hnyawa ha ekuhu hni angeic, laka, Akötresieti la nyine tro sa metrötrën me thili kow. Hnei angeic hna cinyihane ka hape: “E ini a goeëne la hnengödrai i cilie, huliwa ne la iwanakothemie i cilie, ene la teu me ite wëtesiji lo hnei cilieti hna isa amë; ka ue la ate, mate tro cilieti a mekune koi angeic? memine la neköi ate, mate tro cilieti a wai angeic?”—Salamo 8:3, 4.

6. Tune kaa la aqane ketri Davita hnene la etrune la lolo i Iehova?

⁶ Hna haine hnei Davita la edraiëne me eisaisane la hnengödrai, nge angeic a atrehmekune laka wanamamike angeic. Thaa hna traqa kö la ketre xou koi angeic, ngo hna upi angeice pe hnene la atrehmekune cili troa atrunyi Iehova me qaja ka hape: “Kola amamane la lolo i Akötesie hnene la hnengödrai; nge ame ngöne la ka ishaisha, te, ate amamane la huliwa ne la lue themie i nyidë.” (Salamo 19:1) Hnene la etrune la metrötre Davita koi Iehova, ene pe kola aiasenyi angeice catre fe koi Nyidrë; kola aciane mina fe thei Davita la ajane troa atre la itre jë i Iehova ka meköt me troa xötrethenge itre ej. Pane mekune ju së la ewekë ka eje ekuhu hni Davita ngöne la angeic a nyima koi Iehova, me hape: “Atraqate cilie, nge ate longëtine la ite nyine hain ; cilieti casi la Akötesie. Iehova fe, ini ni jë la kala i cilie ; tro ni a trongëne la nyipici cilie ; a ca pengönëne ju la hninge mate qouju ni ene la atesiwa i cilie.”—Salamo 86:10, 11.

7. Tune kaa la aqane xatua Davita hnene la xoue Akötresie troa lepi Goliatha?

⁷ Ame ngöne la kola tro hnei angetre Filisiti troa thapa la nöje Isaraela, hnei Goliatha, ketre sooce i angatr ka köni meet la eqean, hna hnyimasai angetre Isaraela me hape: ‘Iëne jë la ketre matre troa isi me eni! Maine tro angeic a hun, tro hë eahuni a nyihlue i epun.’ (1 Samuela 17:4-10) Kola ixouenyi hnei Saulo memine la trongene isi angeic, ngo ame Davita, tre, paatre kö la xou thei angeic. Atre hi angeic laka thaa ka loi kö la troa xoue atr, ngacama tru trengecatre ju hë la ketre. Öni Davita koi Goliatha ka hape: “Ini a traqa koi hmunë ngöne la atesiwa i Iehova ne sabaoth . . .  nge tro ha ate hmekune hnene la icasikeu celë laka tha hnei Iehova hna amelene hnei taua me jo; ke ishi Iehova la hun.” Hnei Davita hna thaa trehlene la he ne la atre Filisiti, caasi hi la wene etë; hatrene hi lai la ixatua i Iehova.—1 Samuela 17:45-47.

8. Nemene la ini hne së hna kapa qa ngöne la itre tulu hna hamën hnei Tusi Hmitrötr göi troa xoue Akötresie?

⁸ Maine jë tro fe sa hane qëmeke kowe la itre itupathi maine itre ithupëjia pena ka iaxoueny, tune lo itre hna isi memine hnei Davita. Nemene la nyine tro sa kuca? Atreine hi tro sa hane tui Davita memine lo itre xaa hlue i Akötresieti ekö, e hne së hna xoue Akötresie. Ijije hi tro la xoue Akötresie a he la xoue atr. Hnei Nehemia ketre hlue ka mele nyipici koi Akötresie hna ithuecatre koi angetre Isaraela, pine laka kola pane tupathi angatr hnene la itre ka icilekeu; öni angeice ka hape: “The tro kö nyipunie a qoue nyuden; mekuneju kowe la Joxu atraqate me hna qouen.” (Nehemia 4:14) Jëne la ixatua i Iehova, kola atreine hnei Davita me Nehemia, me itre xaa hlue i Akötresieti ju kö troa xome la itre huliwa i Nyidrë. Haawe, ijije fe hi koi së, e hetrenyi the së la xoue Akötresie.

Troa Atreine Cile Kowe La Itre Jol e Hna Xoue Akötresie

9. Nemene lo itre götran kola pane mama laka ka xoue Akötresieti Davita?

⁹ Thupene la hnei Davita hna thatrehle Goliatha, hnei Iehova hna aijijë angeic troa hune kowe la itre isi ka nyimutre. Ngo hna pane tupathi angeic hnene la izalukeu i Saulo; hna nyiqaane hnei meciu ewekë, thupene lai hna iaö, nge hna nyipune hnene la hna ce tro hnei Saulo memine la itre sooc troa humuthi Davita. Ngacama hnei Iehova ha hna qaja xeciëne koi Davita laka tro angeic a joxu, ngo hna pane nyimu macatre ne Davita a kötre mel, me isi, me treqene la ijine tro Iehova a acili angeic troa joxu. Ngo e hune la nöjei ewekë asë cili, hnei Davita hna amamane ka hape angeic a xouene la nyipi Akötresie.—1 Samuela 18:9, 11, 17; 24:2.

10. Tune kaa la aqane amamane Davita laka ka xoue Akötresieti angeic, ngöne lo angeic a qëmeke kowe la itre hulö?

¹⁰ Ame ngöne la ketre ijin, hnei Davita hna kötre koi Akisa joxu ne Gatha, ketre traon ne Filisiti, nöje i Goliatha. (1 Samuela 21:10-15) Hnene la itre hlue ne la joxu hna qejeqeje Davita me qaja ka hape angeic la ketre ithupëjia memine la nöje i angatr. Nemene ju hë la hna kuca hnei Davita? Hnei angeic hna thithi cememine la hni ka menyik koi Iehova. (Salamo 56:1-4, 11-13) Ngacama hnei Davita hna nyi ka hmo matre troa kötr qa ngöne la traon, ngo ame pe, atre hnyawa hi angeic laka, Iehova la ka thepe angeic; kola amanathithine la trengecatre thei angeic. Atraqatr nge ka pexeje la mejiune i Davita koi Iehova, nge kola amamane hnene la aqane lapaune i angeic koi Nyidrë, ka hape hetrenyi angeic la xoue Akötresie.—Salamo 34:4-6, 9-11.

11. Tro sa amamane tune kaa laka easë a xoue Akötresie ngöne la itre itupath, tui Davita?

¹¹ Atreine hi tro sa tui Davita, ene la troa amamane ka hape easa xoue Akötresie hnene la aqane mejiune së laka tro Nyidrëti a xatua së troa cile kowe la itre jole së. Hna qaja hnei Davita ka hape: “Nuepi la jë i ‘ö koi Iehova ; nge lapaunejë koi nyidë, nge tro nyidëti a kuca.” (Salamo 37:5) Thaa kolo kö lai a hape, nue pi pe hi së la itre jole së koi Iehova, nge easë pë hë a nango treqene ju la tro Nyidrëti a senge itre ej. Thaa hnei Davita kö hna sipo Akötresie jëne la thithi troa xatua angeic, nge lapa ju hë a pëkö hna kuca. Hnei angeic hna xome la trengecatr memine la atrein hna hamëne koi angeic hnei Iehova, nge angeic a thele jë troa cile kowe la jol ka eje thei angeic. Ngo atre hi Davita laka thatreine kö la atr troa cile caasi kowe la itre jol ka eje thei angeic, maine angeic a ajane troa eje la itre mekune i angeic. Haawe, isa qanyi së hi. Maine tro sa kuca la hne së hna atrein, nge ame la munën, tre, tro pë hë së a nue koi Iehova. Nyipici, ame itre xaa ijin, thatreine kö tro sa kuca la ketre ewekë, Iehova pe hi la hne së hna mejiune kow. Celë hi ijine tro së lai a amamane laka, hetrenyi fe the së la xoue Iehova. Atreine hi troa akeukawane fe la itre hni së hnene la hna qaja hnei Davita, kola hape: “Eje kö la ithanatacone me Iehova thei angete qoue nyidë.”—Salamo 25:14.

12. Pine nemen matre nyipi ewekë tro sa thithi cememine la hni ka menyik, nge nemene la aqane ujë nyine tro sa thipetrij?

¹² Qa ngöne lai, loi e tro sa nyipi ewekëne hnyawa la itre thithi së memine la aqane imelekeu së me Akötresie. Ame ngöne la easa tro koi Iehova, loi e tro sa “kapa, ka hape, eje kö nyidë, nge nyidëti la ate nyi june koi angete thele catë nyidë.” (Heberu 11:6; Iakobo 1:5-8) Nge ame la Nyidrëti a xatua së, loi e tro sa ‘amamane la hni ne ole së’ tune la hna eamo së kow hnei Paulo aposetolo. (Kolose 3:15, 17) Thaa tro pi kö sa tune lo itre atr hna qaja hnene la ketre Keresiano hna iën, öni angeic: “Angatr a xomi Akötresie ceitune me ketre hlue ekoho hnengödrai. Ame la aja i angatr, tre, tro hi angatr a qej nge Akötresieti hi a aejëne ju la itre mekuna i angatr, nge thupene la hnei angatr hna kapa la hnei angatr hna ajan, angatre hi a upi Akötresieti pi.” Ketre aqane ujë lai ka amamane laka pëkö caa hni ne xoue Akötresieti thei angatr.

Ngöne La Kola Thaan La Xoue Akötresie

13. Eu la kola pane mama laka thaa hna metrötrëne kö hnei Davita la Wathebo i Akötresie?

¹³ Ame la Davita a kapa la ixatua i Iehova ngöne la itre ijine kola tupathi angeic, ketre kolo fe hi a akökötrene hnyawa la aqane xoue Akötresieti hnei angeic, me acatrene la lapaune i angeic koi Nyidrë. (Salamo 31:22-24) Ngo akönia pane thaane la xoue Akötresie i Davita, nge tru catr la itre ethane lai koi angeic. Ame la hnapan, tre, ene lo angeic a iupi troa atë la pua ne isisinyikeu hune ikaatr matre troa tro Ierusalemaeë; thaa hna ajöne kö hnene lo itretre Levi, tune la hna amekötine hnene la Wathebo i Akötresie. Ame hi la kola kei ezi la pua ne isisinyikeu, Uza fe hi a ea amekötine ej; ene pe meci ju fe hi angeic e cili, pine la “pë metrötr.” Eje hi laka, ka tru catre la ngazo hna kuca hnei Uza, ketre tui Davita, pine laka hnei angeic hna tria, me thaa metrötrëne lo Watebo i Akötresie, ene pe kola traqa pi lai ewekë ka ngazo cili. Ame la xoue Akötresie, tre kola hape, troa kuca la itre ewekë thenge la hnei Nyidrëti hna amekötin.—2 Samuela 6:2-9; Numera 4:15; 7:9.

14. Pine nemen matre kola mama laka nango nanazije la xoue Akötresie i Davita ngöne lo angeic a e lo angetre Isaraela?

¹⁴ Ame hë thupen, hnei Satana hna iaö Davita, matre tro angeic a e la etrune la itre trahmanyi ne Isaraela ka troa isi. (1 Aqane lapa i ite joxu 21:1) Kola mama e cili laka nango nanazije la xoue Iehova i Davita; ame la pun, 70 000 la etrune la angetre Isaraela ka mec. Ngacama hnei Davita hna ietra xajawa i Iehova, ngo hna xeni pune pë hë hnei angeic me itre sine i angeic, hnene laka tru catre pë hë la itre akötr ka traqa koi angatr.—1 Samuela 24:1-16.

15. Nemene la kepin matre kei pi Davita kowe la kuci ngazo me Batheseba?

¹⁵ Ame hmaca la ketre ijine kola nanazije la xoue Akötresieti Davita, tre, hmekune lo kola nyi xetë hnei angeic me Batheseba, föe i Uria. Atre hi Davita laka, ka ngazo la troa nyixetë maine meciune pena la föe ne la ketre atr. (Esodo 20:14, 17) Hna nyiqaane jol e cili lo Davita a goeëtili Batheseba e si. Maine thaa hna paatre kö la xoue Akötresie thei Davita, tro hi angeic a canga saze hna goe me mekune pena la ketre ewekë. Ngo kola mama hnyawa laka, hnei Davita hna ‘goeëne hutine’ la föe, uti hë la he hnene la aja ka ngazo lo aqane xoue angeic e Akötresie. (Mataio 5:28; 2 Samuela 11:1-4) Thëthëhmine hë Davita laka nyipi ewekë troa ami göhne i Iehova ngöne la nöjei götrane la mele i angeic.—Salamo 139:1-7.

16. Nemene la aqane xeni pune Davita la ngazo i angeic?

¹⁶ Ame la wene ne la kuci ngazo i Davita me Batheseba, tre, hna hnahone la caa nekönatre trahmany. Thaa qea kö nge Iehova a upi Nathana perofeta troa qaja amamane koi Davita la ngazo i angeic. Thupene la hna pane haji Davita, traqa hmaca ha ekuhu hni angeic la xoue Iehova, ene pe angeic a ietra ju. Hnei angeic hna sipone iele Iehova matre thaa tro kö Nyidrëti a nuetriji angeic maine xometrije pena la uati hmitrötre i Nyidrë. (Salamo 51:7, 11) Hnei Iehova hna senge la ngazo i Davita me nango acone la pune koi angeic, ngo thaa hnei Nyidrëti kö hna köle trije lo nöjei ethan asë la itre huliwa i angeic. Hna meci hnene la nekö i Davita trahmany, nge hna kapa pala pë hë la hleuhleu me akötr hnene la hnepe lapa i angeic. Drei la ketre thangane me pune ka tru, pine la hna pane nanazije la aqane xoue Akötresie!—2 Samuela 12:10-14; 13:10-14; 15:14.

17. Amamane jë hnene la ketre ceitun la itre ethane la ketre ewekë ka ngazo hna kuca.

¹⁷ Ame mina fe enehila, tre, e nanazije hë la xoue Akötresieti the së ngöne la aqane ujë së, eje hi lai, laka, tro fe ha atraqatre me cile huti la itre ethan ngöne la mele së. Pane mekune ju së la akötre ne la ketre föe hmae lo eahlo a atre laka, hna nyi xetë triji eahlo hnene la föi eahlo; hnene hi laka nyidrëti a huliwa ngöne la ketre nöj gaa nany. Eahlo a sesëkötr me kei e cahu me qali hnei akötr; eahlo a atuthe la lue meke i eahlo hnene la lue ime me treije latresi. Ijije hmaca kö troa mejiune kowe la trahmany me metrötrë angeic hnene la föe? Nge eu? Atreine hi troa neëne la itre ethane ka tru celë, e hna xoue Akötresieti hnyawa.—1 Korinito 6:18.

Kola Sewe Së Hnene La Xoue Akötresie Troa Kuca La Ngazo

18. Nemene la aja i Satana memine la aqane nyinyithina i angeic?

¹⁸ Thaa jole kö koi Satana troa angazone la itre aqane ujë ne la fen, nge ame la nyipi aja i angeic, tre, ene la troa apuingazone la itre nyipi Keresiano. Celë hi matre, angeic a hule la itre hni së me itre mekuna së, jëne la itre götrane la ngönetrei së, ene la lue meke së me lue hnangenyë së. (Efeso 4:17-19) Nemene la aqane ujë i nyipunie e kola mama la itre iatr ka ngazo, me drenge pena la itre trengewekë ka sis, maine ngöne la epuni memine itre atr ka kuca la itre huliwa ka sis?

19. Tune kaa la aqane tro la xoue Akötresie, a xatua së troa neën troa kuca la ngazo?

¹⁹ Tro sa ce wange la pengöi Adere,b ketre Keresiano ka qatre thup, ketre kem nge ketre droketre nyidrëti ngöne la ketre götran e Erop. Ame la nöjei jidri ne huliwa Adere e pital, hnene la itre föe ka ce huliwa me angeic hna pune athipe ngöne la taane he i angeic la itre pepa hna cinyihane ngön la itre trengewekë nge sija jë pë hë xötreith la itre wenethëhmi; kösë nyine hatren la aja i angatr troa kuci ngazo me ce meköle me Adere. Ngo hnei angeic hna thipëne la pi kuci ngazo ne la itre sine huliwa i angeic. Ketre, hnei angeic hna sipu thele matre troa kötrene la itupath; hna öhnyi huliwa pena ha ngöne la ketre pital. Kola mama hnyawa laka ame la xoue Akötresie, tre, jëne inamacane hi lai, nge hetrenyi la itre manathith hna troa kapa qa ngön; ame enehila Adere a huliwa, sine la drai, hnine la wapicine la sasaiatri ne la Itretre Anyipici Iehova ngöne la nöje i angeic.

20, 21. (a) Tro la xoue Akötresie a xatuane tune kaa la ketre Keresiano troa cile kowe la itupath? (b) Nemene la hna troa ce wang e wiike ka troa xulu?

²⁰ Maine tro la ketre atr a lapa fë la itre mekune ka ngazo, tro hë angeic a nanyi trootro qaathei Iehova, matre, ame koi angeic, thaa sisitria hmaca kö la imelekeu i angeic me Iehova, ngo cili pë hë lo lai ewekë ka thaa meköti kö la hna thel. (Iakobo 1:14, 15) Ame ngöne la ketre götran, maine tro sa xoue Iehova, tro hë së a cile ananyin, me tro ananyine la itre atr, me itre götran, me itre huliwa, me itre nyine madrin ka troa thaipiëne la itre thiina së ka lolo. (Ite edomë 22:3) Hmahma maine hna xomi akötrën la aqane thele troa neën la ngazo, ngo ame pe ka co hi lai hune la troa thipetriji së hnei Iehova. (Mataio 5:29, 30) Ame la troa xoue Akötresie, tre kola hape, thaa tro pi kö a nue troa athixötrë së hnene la kuci ngazo, me nöjei pengöne huliwa ka sis; tro pe a ‘ezine la lue meke së matre tha tro kö sa goeëne la thoi.’ Maine tro sa kuca tun, tro hë së a mejiune koi Iehova laka, tro Nyidrëti a ‘amele së’ me hamëne koi së la ewekë hne së hna nyipi ajan.—Salamo 119:37; 84:11.

²¹ Nyipici laka, ame la troa xoue Iehova cememine la hni ka menyik, tre, celë pala hi la jëne inamacane lai. Ketre, celë fe la jëne la nyipi manathith. (Salamo 34:9) Troa wië lai la mekune celë ngöne la hna cinyihane ka troa xulu.

[Ithueamacany]

Sa Jë La Itre Hnyinge Celë?

• Nemene la itre thiina ne la Keresiano ka amamane la xoue Akötresie the së?

• Nemene la aqane tro la xoue Akötresie a lepe trije la xou atr?

• Tro sa amamane tune kaa ka hape hetre aqane goeëne së la thith?

• Troa sewe së tune kaa hnene la xoue Akötresie troa kuca la ngazo?