Troa Easenyi Tune Kaa Koi Akötresie Atre Drenge La Thith
“Ate shamatine [drenge] la thithi fe, tro nöjei ate asëjëihë a traqa koi cilie.”—SALAMO 65:2.
1. Nemene la ka aisapengönëne la itre atr qa ngöne la itre xaa hna xup e celë fen, nge nemene la ewekë hna aijijë së hnene lai?
AME thene la nöjei hna xup asë e celë fen, ke, itre atr hmekuje hi la ka atreine troa thili kowe la Atre Ixup. Itre atr hmekuje hi la itre ka thele la itre aja ngöne la götrane la ua, nge hetrenyi thei angatr la ajan troa eatrëne itre ej. Nyine tro hi lai a amamane ka hape, atreine hi tro së isa alacaas a acatrene la aqane imelekeu së memine la Tretretro së e koho hnengödrai.
2. Nemene la ethane la ngazo kowe la aqane imelekeu ne la atr memine la Atre Xupi angeic?
2 Hnei Akötresieti hna xupe la atr me hamë angeice la atreine troa ithanata me Nyidrë. Hna xupi Adamu me Eva a lue ka pexej, matre pëkö ngazo thei nyidro. Haawe, thaa jole kö koi nyidroti troa easenyi koi Akötresie, tune la ketre nekönatre e easenyi koi keme i nyën. Ngo, hnene laka hna tria hnei Adamu me Eva, haawe, luuzi hë la itre ewekë ka lolo cili. Pine la thaa idrei i nyidro, paatre hë lo aqane imelekeu i nyidro me Nyidrëti ekö. (Genese 3:8-13, 17-24) Hapeu, kolo lai a hape, thaa ijije hmaca kö tro la itre matra i Adamu, itre atr ka ngazo, a hane ithanata me Akötresie? Ohea, thaa hnei Iehova kö hna sewe angatr troa easenyi koi Nyidrë, ngo ame pe, hetrenyi la itre hnei Nyidrëti hna amekötine koi angatr. Nemene la itre hna amekötine cili?
Nemene La Itre Hna Amekötin Matre Troa Easenyi Akötresie
3. Tune kaa la aqane troa easenyi koi Akötresie hnene la itre atr ka ngazo, nge nemene la tulu hna hamën matre troa amamane hnyawane lai?
3 Nemene la hnei Akötresieti hna thele thene la atr ka ngazo, ka pi ajan troa easenyi Nyidrë? Kola troa xatua së troa sa la hnyinge celë, hnene la ewekë ka traqa kowe la lue nekö i Adamu trahmany. Hnei Kaina me Abela hna isa mekune troa easenyi koi Akötresie, ame hnei nyidroti hna isa huuje koi Nyidrë. Hna kapa la ahnahna i Abela, ngo thaa hna kapa fe kö la ahnahna i Kaina. (Genese 4:3-5) Nemene la eisapengönene lue ej? Kola qaja ngöne Heberu 11:4, ka hape: “Hnene la lapaune Abela a hujëne koi Akötesie la huje ka sisitia hune la huje i Kaina, ame hna anyipici angeice hnene lai, laka meköti angeic.” Kola mama e celë laka, lapaun la hna thele the së, matre troa kepe së hnei Akötresie. Ame la ketre hna thele the së, tre, kola mama ngöne la itre trenge ewekë i Iehova koi Kaina, kola hape: “Hapeu, maine eö a kuca la loi, tha tro kö eö a loi?” Eje hi, maine ujë ju Kaina qa ngöne la thiina i angeic matre troa kuca la loi, tre, tro ha kepe angeic hnei Akötresie. Ngo, ame la engazon, hnei Kaina hna thipetrije la eamo qaathei Akötresie me humuthi Abela; ame la pun, tre angeic a mele caasi pë hë tune la ketre atr hna methinën. (Genese 4:7-12) Haawe, mama petre kö qa ngöne la qaane laka, nyipi ewekë troa ce tro la lue ewekë celë, ene la troa lapaun me troa kuca la itre ewekë ka loi, matre troa easenyi koi Akötresie.
4. Nemene la nyine tro sa wangatrehmekune matre atreine së troa hane easenyi koi Akötresie?
4 Nyipi ewekë catre tro sa hetre wangatrehmekune laka itre atr ka ngazo së, maine easa ajane troa hane easenyi koi Akötresie. Itre atr ka ngazo asë hi së, nge kola sewe së hnene la ngazo troa easenyi koi Akötresie. Hnei Ieremia perofeta hna cinyihane me qeje Isaraela ka hape: “Hne huni hna shashaithe me ena . . . Hnei enëtilai hna thingi enëtilai hnei iawe, mate tha xulu kö la thith.” (Ite Teije i Ieremia 3:42, 44) Ngacama itre atr ka ngazo ju hë angatr, ngo kola mama ngöne la mele ne la atr laka, hnei Akötresieti pala hi hna kapa la thithi ne la itre atr ka easenyi koi Nyidrë cememine la lapaun, me pë ethane la hni, nge ka trongëne la itre wathebo i Nyidrë. (Salamo 119:145) Drei la itre atr cili, nge nemene la ini hne së hna kapa qa ngöne la itre thithi angatr?
5, 6. Nemene la ini hne së hna kapa qa ngöne la aqane easenyi Akötresieti hnei Aberahama?
5 Aberahama la ketre atr ka tuun. Hna kapa hnei Iehova la aqane easenyi koi Nyidrëti hnei Aberahama, ke, hnei Nyidrëti hna hë angeic ka hape “hniminang.” (Isaia 41:8) Nemene la ini hne së hna kapa qa ngöne la aqane easenyi koi Akötresieti hnei Aberahama? Hnei nyidrëti hna hnehengazo pine laka, pëkö matra i nyidrë, ene pe nyidrëti a hnyingëne jë koi Akötresieti ka hape: “Nemene la ewekë tro cilieti a [hamë ni], nge haetrati ka pë hupunati ni?” (Genese 15:2, 3; 17:18) Ame ngöne la ketre ijin, hnei nyidrëti hna hnehengazone la itre ka troa mele pe, ngöne lo Akötresieti a troa apaatrenyi Sodoma me Gomora pine la itre huliwa ka sis hna kuca e cili. (Genese 18:23-33) Aberahama fe a thithi sane la itre xaa atr koi Akötresie. (Genesis 20:7, 17) Nge hnei nyidrëti fe hna easenyi koi Akötresie, tui Abela jëne la ketre huuj.—Genese 22:9-14.
6 Ame ngöne la nöjei ijine cili, thaa cile hnö kö Aberahama troa ithanata me Iehova. Ngo ame pe, tre, hetre hni ne ipië thei nyidrë; atre hnyawa hi nyidrëti la göhnë i nyidrë xajawa ne la Atre Xupi nyidrë. Hanawange la aqane metrötre i nyidrë ngöne Genese 18:27: “Xajawatineju laka cate la hnenge hna ula kowai Joxu, nge xaxau me hnatesiji ni.” Drei la thiina ka lolo nyine tro sa xötrethenge!
7. Nemene la itre ewekë hna thithi fë koi Iehova hnene la itre xötrapane i Isaraela?
7 Hnene la itre xaa xötrapane i angetre Isaraela hna hane thith thatraqane la itre xaa ewekë ju kö, nge hna drenge hnyawa me kapa la itre thithi angatr hnei Iehova. Iakobo la ketre atr ka thithi fë la hnei angeic hna sa xepu koi Akötresie. Thupene la hnei angeice hna sipo Akötresieti la ixatua, angeice a sili xepu me hape: “Qa ngöne la nöjei ewekë asë hnei cilieti hna troa hamë ni, tro ni a hamëne hmaca koi cilie la itre hnaaluepin.” (Genese 28:20-22) Ame hë thupen, ngöne la kola troa itronyi hnei Iakobo memine la trejine me angeic, tre, hnei angeic hna xëwe koi Iehova matre troa thupë angeic, kola hape: “Amele ni ene la ime ne la mamange Esau ke ini a qoue angeic.” (Genese 32:9-12) Iobu mina fe la ketre atr ka hane easenyi koi Iehova. Hnei angeic hna thithi sane la itre nekö i angeic, me huuje koi Iehova pine la ngazo ne la itre nekö i angeic. Ame pena ha la kola tria hnene la köni sinee i Iobu ngöne la aqane ithanata i angatr koi angeic, hnei Iobu hna thithi sai angatr, nge “hnei Iehova hna kepe Iobu.” (Iobu 1:5; 42:7-9) Easa atrehmekune jëne la itre hna edromëne celë la itre ewekë nyine tro sa sipone koi Iehova jëne la thith. Ketre, kola mama laka, hetre aja thei Iehova troa kapa la itre thithi ne la itre ka easenyi koi Nyidrë thenge la aja i Nyidrë.
Aqane Easenyi koi Iehova Fene La Isisinyikeu Ne La Trenge Wathebo
8. Fene la isisinyikeu ne la Trenge Wathebo, hna thithi fë tune kaa la itre jole ka tru ka ketr la nöj?
8 Thupene la hnei Iehova hna thepe angetre Isaraela qaa Aigupito, hnei Nyidrëti hna hamë angatre la ketre isisinyikeu ne la Trenge Wathebo. Hna ahnith hnene la Trenge Wathebo la aqane troa easenyi koi Akötresie jëne la itretre huuj hnei Nyidrëti hna acil. Hna iëne la itretre Levi matre troa hane xome la hnëqa ne troa itretre huuj thatraqane la nöj. Maine kola traqa la itre jole ka tru ka ketr la nöj, ke tro la ketre joxu maine ketre perofeta pena a nyitrenge ewekëne la nöj me thithi fë itre ej koi Iehova. (1 Samuela 8:21, 22; 14:36-41; Ieremia 42:1-3) Hana wange la ketre ceitun, ame lo kola sa xepun la ēnē, hnei Solomona Joxu hna easenyi koi Iehova jëne la thith, cememine la hni ka pexej. Nge hnei Iehova hna amamane laka, Nyidrëti a kapa la thithi Solomona, ene la hna nyialiene la ēnē hnene la elolo i Nyidrë, me hape: “[Eni] a denge la thithi ngöne la hnë celë.”—2 Aqane Lapa i Ite Joxu 6:12–7:3, 15.
9. Nemene la hna amekötine hnei Iehova nyine troa metrötrën, matre troa easenyi koi Nyidrë ngöne la ēnē?
9 Ame ngöne la Trenge Wathebo hna hamë Isaraela, hetrenyi la ketre hnei Iehova hna amekötin ka aijijë angatr troa easenyi koi Nyidrëti hnyawa ngöne la ēnē. Nemene la hna amekötine cili? Eje hi laka tro la atre huuj ka sisitria a huujën la itre öni, ngo tro fe angeice a dreuth la itre ka pui loi xajawa i Iehova e nöjei hmakanyi me hej. Thupene lai, hnene fe la itretre huuj hna kuca la huliwa cili, ngo thaa ene fe kö ngöne la Drai Ne Nyi thupene Mel. Maine thaa metrötrëne kö la hna amekötine cili hnene la itretre huuj, eje hi lai laka, thaa tro kö Nyidrëti a kapa la huliwa i angatr.—Esodo 30:7, 8; 2 Aqane lapa ite Joxu 13:11.
10, 11. Nemene la ka anyipicine laka hnei Iehova hna kapa la thithi ne la itre atr, angatr isa ala caas?
10 Hapeue lo Isaraela hnapan, tro hmekuje hi angatr a easenyi koi Akötresie jëne la itre hna acile hnei Nyidrë? Ohea, kola amamane hnene la Itre Hna Cinyihane laka, hnei Iehova fe hna kapa la itre thithi ne la itre atr, angatr isa ala caas. Ame ngöne lo thithi Solomona, lo ijine kola sa xepune la ēnē, hnei angeice hna xëwe koi Iehova ka hape: “Ame la ite thithi asë me hna sipon’ asë hnei kete ate ne la nöje i enëtilai asë angete Isaraela, . . . me xejë la lue ime i angate kowe la ēnēti celë; [drenge ju] e hnengödrai.” (2 Aqane lapa ite Joxu 6:29, 30) Ketre, kola qejepengöne hnei Luka ka hape, ame la Zakaria, lo keme i Ioane Bapataiso, a dreuth la itre ka pui loi ngöne la ēnē, ala nyimu la itre hlue i Iehova, laka thaa itretre huje kö angatr, kola “thithi e kuhu.” Eje hi laka, hna majemine hnene la nöje troa ce traqa itrohnyi e kuhu tröne la ēnē, matre troa thithi ngöne la ijine dreuth la itre ka pui loi xajawai Iehova hune la ita gol.—Luka 1:8-10.
11 Haawe, atraqatre la madrine i Iehova ngöne la kola easenyi koi Nyidrëti hnyawa, nge Nydrëti a kapa la itre thithi ne la itre ka nyi trenge ewekëne la nöj, memine fe la itre thithi ne la itre atr ka ketre sipu thele troa easenyi koi Nyidrë. Eje hi laka, thaa easë hmaca kö enehila a mele fene la isisinyikeu ne la Trenge Wathebo. Ngo, atreine hi tro sa xomi ini qa ngöne la aqane thithi ne la itretre Isaraela ekö.
Aqane Easenyi Koi Iehova Jëne La Ekalesia i Keresiano
12. Nemene la ewekë hna acile thatraqane la itre keresiano matre troa easenyi koi Iehova?
12 Easë hë enehila a mele thenge la hna eköth hnei Keriso. Paatre hë lo ēnē nyine nyi jëne lo itretre huuj troa nyi trenge ewekëne la nöje i Akötresie asë, nge hnë troa xei kow e kola troa thithi koi Akötresie. Loi pe, thaa tro kö sa mekune ka hape, ma pëhë hnei Iehova hna hnëkëne matre tro sa hane easenyi koi Nyidrë. Nemene la ewekë hnei Nyidrëti hna hnëkëne thatraqai së? Ame la kola ië Keriso hnei uati hmitrötr ngöne lo macatre 29 M.K., me acili Nyidrë troa Atre Huuje Ka Sisitria, tre, cile jë fe hi lo ēnē ngöne la ua.a Celë hi ewekë lai hna hnëkën, ene la ēnē ngöne la ua, nyine jëne troa easenyi koi Iehova ngöne la hmi, nge hna nyitrepene ej hnene la mele hna huujëne hnei Iesu Keriso.—Heberu 9:11, 12.
13. Ame göi thith, tre, qaja jë la hna kuca ekö ngöne la ēnē e Ierusalema, ka ihmeku memine la hna kuca ngöne la ēnē ne la ua.
13 Nyimu pengön hne së hna öhne qa ngöne la ene e Ierusalema ekö ka nyi ahnue ne la itre hna troa acile ngöne la ēnēti hmitrötre ne la ua, tune mina fe la götrane la thith. (Heberu 9:1-10) Drei la ketre ceitun: nemene la hna nyi ahnuen hnene la sinöe ka pui loi lo hna dreuth e hmakanyi me hej, hune la ita ne huuj ne dreu sinöe ka pui loi hnine la ga hmitrötre ne la ēnē? Kola qaja la sinöe ka pui loi hnene la tusi Hna Amaman, ka hape, “celë hi ite thithi ne la nöjei ate ka hmitöt”. (Hna Amamane 5:8; 8:3, 4) Qaathene la uati hmitrötre la Davita a cinyihane ka hape: “Loi e cile huti la thithinge xajawa i cilie tune la sinöe ka pui loi.” (Salamo 141:2) Haawe, thenge la hna eköthe hnei Keriso, ame la itre ka pui loi hna dreuth, tre, itre ej a nyi hatrene la itre thith, me itre aqane troa atrunyi Iehova.—1 Thesalonika 3:10; 1 Peteru 2:20, 21.
14, 15. Nemene la hna qaja göne la aqane troa easenyi koi Iehova hnene la (a) itre keresiano hna iën? (b) “ite xaa mamoe”?
14 Drei la ka ijije troa easenyi koi Akötresie ngöne la ēnē ne la ua? Ame ngöne lo ēnēti ne ngönetrei, tre, hna acile la itretre huuj me itre Levi troa huliwa ngöne la hnahag ne la ēnē, e kuhu hnin, ngo itretre huuj hmekuje hi la ka ijije troa lö hnine la Gaa Hmitrötr. Ame la itre hna iën, ene lo itre ka mejiune troa mele e hnengödrai, tre, hna nyihatren la pengöi angatr hnene la hnahag e kuhu hnine la ēnē, memine la Gaa Hmitrötr; celë hi lai ka aijijë angatre troa nue la itre thithi angatr, me atrunyi Akötresie.
15 Nge tune kaa fe lo itre Keresiano ka mejiune troa mele e celë fen, ene lo itre hna hën ka hape “ite xaa mamoe”? (Ioane 10:16) Hna amamane hnei Isaia perofeta laka, tro la itre atr ne la nöjei nöj a traqa itronyi me thili koi Iehova “ngöne la ite drai hnapin.” (Isaia 2:2, 3) Hnei angeice fe hna cinyihane ka hape, tro la itre “tenyiwa” a hane traqa koi Iehova, nge tro Nyidrëti a hane kepe angatr me aijijë angatr troa hane easenyi koi Nyidrë; öni Nyidrë: “Tro ni a . . . amadi angate ngöne la uma ne thithi koi ni.” (Isaia 56:6, 7) Hna Amamane 7:9-15 a hamëne la itre xaa mekun, kola qaja “la ka ala nyimu atraqat” qa ngöne “la ite xöte nöj’ asë” a traqa itronyi troa hmi, me atrunyi Akötresie, ceitun memine la angatr a cile “e lai me jid” ngöne la hnahag e kuhu tröne la ēnē ngöne la ua. Drei la ketre mekune ka akeukawane la itre hni së laka, atreine hi tro la nöjei hlue i Akötresieti enehila a easenyi koi Nyidrë, me lapa atre laka tro Nyidrëti a drei angatr!
Nemene Thithi La Hna Kapa Hnei Iehova?
16. Nemene la ini hne së hna kapa göi thih qaathene la itre pane Keresiano?
16 Ka catre thithi ekö lo itre pane Keresiano. Nemene la itre ewekë hnei angatre hna thithi fë? Itre qatre thup Keresiano a sipo ixatua koi Akötresie matre troa iën la itre trejine trahmanyi thatraqane la itre hnëqa hna troa cilën. (Ite Huliwa 1:24, 25; 6:5, 6) Hnei Epafera hna thithi thatraqane la itre trejine me angeic trahmanyi me föe. (Kolose 4:12) Hna thithi sai Peteru hnene la itre atrene la ekalesia e Ierusalema, ngöne lo angeic a lapa kalabus. (Ite Huliwa 12:5) Hnene la itre pane Keresiano hna sipo Akötresie troa hamë angatr la trenge catr matre troa cile catr kowe la icilekeu, kola hape: “Iehova fe, da xajawatineju la ite iaqounyi angat ; nge hamënejë kowe la ite hlue i cilie, troa qaja la wesi ula i cilie hnene la cate asë.” (Ite Huliwa 4:23-30) Hnei Iakobo, ketre atre dreng, hna ithuecatre kowe la itre Keresiano troa thithi koi Akötresie matre troa sipo inamacan ngöne la kola cile kowe la itre itupath. (Iakobo 1:5) Hapeu, hane fe kö epuni thithi fë la itre ewekë celë koi Iehova?
17. Nemene pengöne thith hnei Iehova hna kapa?
17 Thaa Akötresieti kö a kapa la nöjei thithi asë. Haawe, troa xecie tune kaa koi së ka hape, tro Iehova a hane kapa elanyi la itre thithi së? Hetrenyi la itre atr ekö ka mele nyipici koi Akötresie; hna drenge la itre thithi angatr hnei Nyidrë, pine laka hnei angatr hna easenyi koi Nyidrë cememine la hni ka pexej, me hni ka meköt. Angatr mina fe a thithi cememine la lapaun, nge mama hnyawa hi ngöne la itre huliwa ka loi hnei angatr hna kuca. Thaa luelue kö së, laka, Iehova mina fe a hane drenge enehila la thithi ne la itre atr ka easenyi tune lai koi Nyidrë.
18. Nemene la nyine troa kuca hnene la itre Keresiano maine angatr a ajane tro Akötresieti a kapa la itre thithi angatr?
18 Ame koi itre Keresiano, hetrenyi la ketre ewekë hna thele thei angatr. Hnei Paulo aposetolo hna qejepengöne ka hape: “Hetenyi hë shë . . . [jëne] nyidë la jëne kowe la Tetero hnene la Uati ka cas.” Drei la hnei Paulo hna qaja la angeic a cinyihane ka hape, “jëne nyidë”? Kola qeje Iesu Keriso. (Efeso 2:13, 18) Nyipici, atreine hi tro sa easenyine la Tretretro, ngo jëne Iesu hmekuje hi.—Ioane 14:6; 15:16; 16:23, 24.
19. (a) Eue la kola pui ngazo koi Iehova la itre nyine dreuth hna kuca hnene la itretre Isaraela? (b) Easa atre tune kaa laka, ceitune me itre ka pui loi hna dreuth koi Iehova la itre thithi së?
19 Tune la hna qaja ha e caha hun, kola nyihatrene hnene lo itre ka pui loi hna dreuth, la itre thithi ne la itre hlue i Akötresieti ka mele nyipici. Ngo, ame pe e itre xaa ijin, Iehova fe a hane sisine la itre nyine dreuth hna kuca hnene la itretre Isaraela. Celë hi ewekë ka traqa ngöne la kola dreuthe hnei angetre Isaraela la itre ka pui loi hnine la ēnē, nge ngöne fe kö la ijine cili angatre a thili kowe la itre idrola. (Ezekiela 8:10, 11) Ketre tune mina fe enehila kowe la itre ka uune ka hape, itre ka nyihlue i Iehova angatr ngo kolo pe a kuca la itre huliwa ka isazikeu memine la itre wathebo i Nyidrë; hna aceitunëne la itre thithi angatr me itre ka pui ngazo koi Nyidrë, itre hnei Nyidrëti hna sisin. (Ite Edomë 15:8) Haawe, loi e tro sa catre thupën matre wië huti la mele së, matre troa aceitunëne la thithi së memine la itre ka pui loi hna dreuth koi Akötresie. Atraqatre la madrine i Nyidrë troa drenge la itre thithi ne la itre ka xötrethenge la itre jë i Nyidrë ka meköt. (Ioane 9:31) Ngo, hetrenyi la itre xaa hnying hne së hna isa lapa fë. Tune kaa la aqane tro sa thith? Nemene la itre ewekë nyine tro sa thithi fë? Nge Tune kaa la aqane sa hnei Akötresie la itre thithi së? Tro la hna cinyihane ka troa xulu a sa la itre mekune celë.
[Ithueamacany]
a Wange ju la Tour de Garde ne 15 Mei 2001, götrane 27.
Ijiji Epuni Kö Troa Qeje Pengön?
• Nemene la aqane tro la itre atr ka ngazo a easenyi koi Akötresieti hnyawa?
• Tro sa nyitipune tune kaa la itre thithi ne la itre xötrapane i angetre Isaraela?
• Nemene la ini hne së hna kapa qa ngöne la itre thithi ne la itre pane Keresiano?
• Nemene la itre nyine tro sa kuca matre troa aceitunën la itre thithi së memine lo ka pui loi hna dreuth?