Amamane Jë La Lapaune i Nyipunie Hnene La Aqane Mele i Nyipunie
“Kete tune lai la lapaun, e tha ce eje kö me ite huliwa, te, meci hë ej, ke eje cas.”—IAKOBO 2:17..’’
1. Hnauën matre kola ce wanga atrune hnene la itre pane keresiano la lue ewekë celë, ene la lapaun me itre huliwan ej?
KOLA amamane hnyawa hnene la aqane mele ne la itre pane Keresiano, laka, itre ka lapaune angatr. Hnei Iakobo ketre atre dreng hna ithuecatre koi angatr asë, me hape: “ Kuca thenge jë la wesi ula hnei nyipunie, nge the denge hi, kola amenu nyipunieti kö.” Öni angeice fe: “Ke meci hë la ngönetrei e pë ua; kete tune fe la lapaun, meci hë e pë huliwa.” (Iakobo 1:22, 2:26) Thötre faifi hë lao macatre thupene la hna cinyihane la itre trenge ewekë celë, nge nyimutre pala hi la itre keresiano ka amamane la lapaune i angatr hnene la itre huliwa. Ngo ngazo pe, thaa celë kö la aqane ujë ne la itre Keresiano asë ekö. Hnei Iesu hna qaja aloine la ekalesia ne Semurina; ngo hnei nyidrëti pe hna qaja kowe la ka ala nyimu ne la ekalesia ne Saradi, ka hape: “Ate hë ni la ite huliwa i ö, la hnei’ö hna hete ëjene laka mele kö eö, ngo meci pe.”—Hna Amamane 2:8-11; 3:1.
2. Nemene la nyine tro la itre Keresiano a isa hnyingëne thel göne la pengöne la lapaune i angatr?
2 Celë hi matre Iesu a ithuecatre koi angetre Saradi, me kowe fe la itre ka troa e thupen la itre hna cinyihane celë, troa hane amamane lo pane ihnimi angatr kowe la nyipici me troa hlëmek ngöne la götrane la ua. (Hna Amamane 3:2, 3) Loi e tro së isa ala caasi a hnyinge ka hape: ‘Tune kaa jë fe la itre huliwang? Itre eje kö a amamane ka hape, eni a kuca asë la hnenge hna atreine matre hane mama fe la lapauneng ngöne la nöjei huliwang, ngacama itre huliwa ju hë e tröne la huliwa ne cainöj maine itre icasikeu ne la ekalesia pena?’ (Luka 16:10) Nyimu götran ne la mel ka aijijë së troa amamane la lapaune së, ngo tro sa pane ce wange la caas; ene la itre caa lapa së, ngöne lo itre ijine faipoipo ne la itre keresiano.
Itre Caa Lapa Ne Ce Madrin
3. Nemene la hna qaja hnei Tusi Hmitrötr göne lo itre caa lapa së?
3 Atraqatre la madrine së ngöne la kola könë së kowe la ketre hnepe ijine ce madrin memine la itre xaa Keresiano. Ame Iehova “Akötesie tene manathith (ka madrin),” nge aja i Nyidrëti troa madrin la itre hlue i Nyidrë. (1 Timoteo 1:11) Hnei Nyidrëti hna upi Solomona troa cinyihane hnine la Tusi Hmitrötr la ewekë celë, kola hape: “Ame hnenge hna qaja aloine la aciacin, ngöne laka pëkö loi kowe la ate fene la jö, loi pe troa xeni me ij, me madin, nge troa ceme nyëne lai ngöne la nöjei huliwa i nyëne ngöne la nöjei drai ne mele nyën.” (Ate Cainöj 3:1, 4, 13; 8:15) Ame la itre hnepe ijine ce madrine cili, tre maine jë ketre ijine ce xeni la fami, maine kolo itre xaa caa lapa ka co hi cememine la itre xaa hlue i Akötresie.—Iobu 1:4, 5, 18; Luka 5:27-32; 10:38-42; 14:12-14.
4. Nemene la hna troa pane mekune hnyawa hnene la atre ithei kowe la ketre ijine ce madrin?
4 Maine nyipunieti la ka ithei, loi e tro nyipunie a mekune hnyawa la nyine tro nyipunieti a kuca, ngacama kolo hi a troa hëne la itre xaa trejin ka ala xalaith matre troa ce xeni maine ce porotrike pena. (Roma 12:13) Loi e tro nyipunieti a thupëne matre troa “kuca alolone . . . me amekötine la nöjei ewekë asë,” nge troa eköthe itre ej hnene “la inamacan qa koho.” (1 Korinito 14:40; Iakobo 3:17) Hna cinyihane hnei Paulo, ka hape: “Qa ngöne lai, e tro nyipunie a xen, me ij, me kuca kete ewekë kö, kuca asë jë nyine atrunyi Akötesie. The nyi nyine athixötë . . . kö.” (1 Korinito 10:31, 32) Nemene la itre ewekë nyine tro sa wanga atrune hnyawa? Maine tro nyipunieti a canga mekune hnyawa la itre ewekë cili, eje hi lai laka, troa hetre thangane ka loi kowe la lapaune i epun memine la itre hnei epuni hna könën, ke tro hë ej a mama ngöne la nöjei hnei nyipunieti hna troa kuca.—Roma 12:2
Nemene La Aqane Trongene La Itre Icasikeu Cili?
5. Pine nemen matre loi e troa pane wai ewekë hnene la atre ithei göi troa nue maine cipane la kahaitr me drei miuzik?
5 Nyimutre la itre ka ithei ka thele ka hape tro jë kö a nue maine troa cipane la kahaitr. E hna cipane la kahaitr, ke tro jë kö a pë madrine së ngöne la itre ijine cili? Ohea! Mekune ju hi së lo Iesu a kuca lo iamamanyikeu me ithuane lo lapa ka ala nyimu hnei ie me falawa. Thaa hna qaja fe kö ka hape, hnei nyidrëti hna nyi waina ne la xen, ngacama atre hi së laka pëkö hnei nyidrëti hna thatreine troa kuca. (Mataio 14:14-21) Maine epuni a axeciën troa nue la kahaitr, tuluthe ju hi la etrun, nge mekune kö troa xomi itre xaa nyine iji koi itre ka thaa iji kahaitre kö. (1 Timoteo 3:2, 3, 8; 5: 23; 1 Peteru 4:3) The tro pi kö sa upe ielene me ukune la ketre troa iji la ketre nyine ij, ka troa heji angeic “kösë un.” (Ite Edomë 23: 29-32) Nge tune kaa fe göi miuzike maine itre uke nyima? E maine epuni a pi drei miuzik ngöne la ijine caa lapa, eje hi laka, nyipi ewekë catre troa iëne hnyawa la itre nyima, thaa göi fia hmekuje kö, ngo göi itre trenge ewekën. (Kolose 3:8; Iakobo 1:21) Öhnë hë hnene la itre xaa keresiano laka keukawahnin la caa lapa i angatr, e kola ce drenge hi la itre nyima ne la Baselaia maine kolo pena a ce nyimane itre ej. (Efeso 5:19, 20) Ketre, nyipici laka nyipi ewekë tro sa hmekëne fe la emexemine la miuzik, wanga tro ej a ithahe së me trutrune pena la itre hnangenyë ne la itre ka lapa ezi së.— Mataio 7:12.
6. Tune ka la aqane troa amamane hnene la ka ihë ka hape ka mele la lapaune i angeic ngöne la kola porotrik maine ngöne la itre xaa götrane pena?
6 Ame ngöne la kola ihë hnene la itre Keresiano, ijine tro hi angatre lai a ifekeune la itre mekune ka isa pengön, me e la itre xaa hna cinyihan maine ce thawa pena la itre hna isa melëne ka lolo. E maine kola fezi jea la porotrik kowe la itre ewekë ka thaa meköti kö, haawe, tro la ka ihë a canga wenë amacane ej. Loi e tro fe angeic a hane hmekëne matre thaa tro kö a ala caasi pala hi la ka ithanata. E öhnë hë angeice laka ala caasi pala hi la ka ithanata, tro angeic a inamacan me thele jëne matre troa hane lö hnine la porotrik hnene la itre xan, maine jë hnene la hna hnyinge kowe la itre thöth, maine pena hnene la hna xejë la ketre taane porotrik matre troa isa qeje mekune ngön. Celë hi la ka troa thue madrine kowe la itre qatre me itre thöth, ngöne la itre ijine caa lapa cili. Maine epuni la ka ihë nge hetrenyi thei epuni la inamacane troa xomiujine hnyawa la itre ewekë celë, haawe, tro ha ‘öhne la menyike i nyipunie’ hnene la itre atrene hna hëne asë. (Filipi 4:5) Tro hë angatr a trotrohnine laka, ka mele la lapaune i epun, nge hetre thangane ej ngöne la nöjei götran ne la mele i nyipunie.
Itre Faipoipo Me Itre Huliwan
7. Pine nemene matre nyipi ewekë troa hnëkëne hnyawane la faipoipo memine la itre huliwane ej?
7 Ketre drai ka ketrepengöne kö la faipoipo ne la Keresiano, easë asë hi a ce madrin. Hna pune sine hnene la itre hlue i Iehova ekö, tui Iesu me itretre drei nyidrë, la itre ijine ce madrine cili me caa lapa matre troa ce xeni imadri. (Gen. 29:21,22; Ioane 2:1, 2) Ngo, ame hë enehila, mama ha laka ame la troa hnëkëne la itre ijine ce madrin tune la faipoipo, tre thaa ketre huliwa ka hmaloi kö maine easa ajane troa tro loi itre ej jëne la aqane waiewekë ka loi, me atreine tulu ewekë hmekune la itre Keresiano. Ngo, itre pengöne hi la mele ne la atr, nge itre ijine lai ka aijijë së troa amamane laka, ka mele la lapaune së itre Keresiano.
8, 9. Kola mama tune kaa ngöne la faipoipo ne la itre atr ka ala nyimu la enyipicine lo hne së hna e ngöne 1 Ioane 2:16, 17?
8 Nyimutre la itre atr ka thatre maine ka thaa hane kö wanga atrune la itre trepene meköti Akötresie göne la faipoipo, matre angatre hi a treqene la itre ijine cili kösë itre ijine troa pane sasaithi tulu ngöne la itre ewekë hna troa kuca, laka, ame itre xan, tre, thaa hna wangangazone kö. Hnene la ketre zonal ne Erop hna qaja la ketre föe ka xötrei faipoipo; öni eahlo e qaja la faipoipo i eahlo ka hape, tune pi lo kola cile hnene la “ketre joxu memine la ketre isola: ‘Hnei nyiho hna tithe lo ikaatre ka mingöming hna hule hnei foa lao hoos nge kola itrongëpi la 12 lao xaa ikaatr hna hule hnei hoos nge hna elemeken hnene la itre ka elo miuzik. Thupene lai, hne huni hna sine la ketre pui ne xeni me dranesi atraqatr. Tha nyine qaja kö! Tune lo hnenge hna ajan: eni la isola ngöne la drai cili!’
9 Ngacama isapengöne kö la itre hna majemine kuca ngöne la itre nöj, ngo ame pe kola aejëne hnyawa hnene la itre mekune cili lo hna cinyihane hnei Ioane aposetolo, kola hape: “Ke ame la nöjei ewekë asëjëihë e celë fen, ene la meciunyi ewekë i ngönetrei, memine la meciune ne la lue mek, memine la nyi döne la mele celë; tha qa thei Tetetroti kö, ngo qa hi la fen.” Nyipici kö laka tro la itre Keresiano ka macaj a hane thele me ajane troa faipoipo tune caha? Tune kaa la mekuna i epun, ka loi kö tro la itre keresiano ka macaj a hane ajan troa faipoipo tune la aqane faipoipo ne la “joxu”, ene laka ketre feet ka sasaithi tulu menu pala ha la aqane atrun? Ohea, ame ngöne la angatr a hnëkë, loi e tro pala hi la lue ka troa ikötresae a mekune hnyawa laka: “Troa cile huti epine palua la ate kuca la aja i Akötesie.”—1 Ioane2:16,17.
10. (a) Pine nemen matre nyipi ewekë troa mekune me hnëkë hnyawa, ngöne la kola ajane troa atrune la faipoipo thenge la tulu? (b) Nemene la aqane troa axecië mekune ngöne la kola troa iëne la itre hna troa könën kowe la faipoipo?
10 Ka loi troa thupëne hnene la itre trefën Keresiano matre thaa tro kö a sasaithi tulu menu pala ha la aqane troa atrune la drai ne faipoipo, nge loi e troa kuca thenge la ka ijij; ijije hi troa xatua angatr hnei Tusi Hmitrötr. Ngacama ka tru aliene koi angatr la drai ne faipoipo, ngo atrehmekune hi angatr laka kolo petre hi lai a nyiqaane la mele ne trefëne i nyidro lue keresiano, nge thaa caasi kö maine lue drai ne ce mel ngo epine palua. Tha nyipi ewekë kö troa atrune pala ha la pui ne xeni ne faipoipo. Ngo maine angatr a ajan troa tro tune lai, haawe, nyipi ewekë troa pane wange la thupen, memine la aqane trongene la ijine cili; ngo thaa göi thupene hmekuje kö ngo göne fe la etrun la itre hna hën me aqane trongen ej. (Luka 14:28) Tusi Hmitrötr a amekötine laka, ame ngöne la mele ne trefën, tre, trahmanyi la he. (1 Korinito 11:3; Efeso 5:22, 23) Haawe, hnëqa ne la trahmanyi ka troa ikötresae, la troa cilëne la faipoipo. Ngo eje hi lai laka, loi e tro angeic a pane ce iatreen memine la ka troa faipoipo me angeic göne la itre pengöne ka nyimutre, tune la itre hnei nyidroti hna mekune troa könën, maine etrune pena la itre hna troa hën kowe la drai cili. Maine jë thaa ijije kö koi nyidro troa hëne asë la nöjei enehmu memine la nöjei sinee asë, ngo tro la qahmihmi a xatua nyidroti ngöne la nyidroti a troa xomi mekun. Hetre mejiune ne la lue ka troa faipoipo laka, ngacama tha ijije kö troa könëne asë la itre Keresiano, ngo ketre trotrohnine hi angatre lai, nge ketre thaa tro jë kö angatr a wesitre pine la hna thaa hane hë angatr.—Ate Cainöj 7:9.
“Tane ne la pui ne xen”
11. Nemene la hnëqa ne la “tane la pui ne xen” ngöne la ijine faipoipo?
11 Maine kola mekune hnene la lue ka troa faipoipo troa ce xeni madrin, troa xecie tune kaa koi nyidro ka hape, hetre emetrötrene la ijine cili? Nyimu macatre hë ne nyipi ewekëne hnene la itretre Anyipici Iehova la ketre tulu ka lolo hna öhne ngöne lo faipoipo e Kana, lo hna hane sine hnei Iesu. Hetrenyi ekö la ca “tane ne la pui ne xen,” maine jë ketre sine hmi ka atreine nge ka maca troa elemekene la itre ijine ce madrin. (Ioane 2:9,10) Ketre tune mina fe, tro la trahmanyi ka troa faipoipo nge ka inamacan a iëne la ketre keresiano ka macaje ngöne la götrane la ua, troa cilëne la hnëqa ka sisitria cili. E ase hë hatrengën hnene la tane la pui ne xen la itre hna axeciën me itre aja ne la ka troa faipoipo, haawe, tro angeic a trongëne me xötrethenge hnyawa itre ej uti hë ngöne la itre pengöne ka co; qëmeken me ngöne la ijine ce madrin.
12. Nemene la nyine tro la ka troa ikötresae a mekune hnyawa göi aqane xome la kahaitr?
12 Tune la hna ce wangë hë ngöne lo paragaraf 5, hna iëne hnene la itre xaa ka troa ikötresae troa wathebone la ka haitr, wanga troa sasaithi tulu me lepe trije la madrin me tingetinge ne la ijine faipoipo. (Roma 13:13; 1 Korinito 5:11) Ngo, e tro angatr a nue la kahaitr, loi e xecie hnyawa kowe la trahmanyi ka troa faipoipo, laka, troa nue itre ej ngöne la tulu. Hetre waina ekö ngöne la hna faipoipo hna sine hnei Iesu e Kana, nge hnei nyidrëti hna hamëne la waina ka lolo catr. Önine la tane la pui ne xen: “Thina ne la nöjei ate troa thawa panëne la waina ka loi, nge e ase hë iji atrun, waina ka ngazo pena ; ngo hnei nyidëti pe hna amë la waina ka loi uti hë enehila.” (Ioane 2:10 ) Eje hi laka, thaa hnei Iesu kö hna uku angatre troa hmo hnei waina, tre, atre hi nyidrëti laka thaa ka loi kö. (Luka 12: 45, 46) Kola mama jëne la aqane sesëkötre me haine hnene la tane la pui ne xeni la elolone la waina, ke, hnei nyidrëti hë hna hane sin la itre xaa faipoipo, nge ame la itre hna hëne ngöne la ijine cili, ke hmo asë hi. (Ite Huliwa 2:15 ; 1 Thesalonika 5:7) Qa ngöne lai, loi e troa xecie hnyawa kowe la ka troa faipoipo me kowe lai trejine Keresiano hnei angeice hna iëne troa tane la pui ne xen, laka, kola troa metrötrën me xötrethenge hnene la itre hna hën asë kowe la ijine cili la hna wathebone celë, hna hape: “The hmo kö nyipunie hnei waina, ate acianyi ngazo.”—Efeso 5:18; Ite Edomë 20:1 ; Hosea 4:11.
13. Nemene la nyine troa mekune hnyawa hnene la lue trefën maine nyidroti a ce axeciëne laka troa elo miuzik ngöne la ijine faipoipo i nyidro, nge pine nemene lai?
13 Tune la itre xaa ijine ce madrin, maine troa hetre miuzik, nyipi ewekë troa hmekëne la emexemin ej matre idrei së la easa porotrik. Hna qaja hnene la ketre qatre thup ka hape: “Kolo ha jidri trootro, nge kolo fe ha draië catre la nine porotrik maine kolo pena nyiqaane fia, nge kolo fe ha elë trootro la nine miuzik. Ame ngöne lo xötrei, tre, hna nango acone la miuzik, ngo kolo ha mexemi catr matre thaa idrei hë nge thatreine hë së porotrik. Ame la itre ijine ce pui ne xeni ne faipoipo, tre, celë mina fe itre ijine troa porotrik memine la itre xaa sine hmi së. Watri pë hë la itre ijine ka mingöminge cili hna angazon hnene la miuzike ka itrutruu hnangenyë!” E celë fe, nyipi ewekë troa maca hnene la ka troa faipoipo me tane la pui ne xen, matre thaa tro kö nyidroti a nue kowe la itre ka elo miuzik troa iëne la pengöne miuzik hna troa elon memine la emexemine ej, ngacama hna nyithupe i angatre ju hë. Hna cinyihane hnei Paulo, ka hape: “Nge ame la nöje i ewekë asë hnei nyipunie hna kuca ngöne la ithanata me huliwa, kuca asë jë ngöne la atesieti ne la Joxu Iesu.” (Kolose 3:17) E isa ije hë la itre hna könën thupene la hna ce xeni imadri maine thupene la faipoipo, nemene jë la aqane mekune i angatr göne la miuzik hna elon, hnene kö la lue trefën hna kuca la nöjei ewekë asë ngöne la ëje i Iesu? Loi e troa eje lai.
14. Nemene la itre elolone la faipoipo hna pune ajan troa mekune hmaca hnene la itre keresiano?
14 Nyipici, ame la ikötresae hna hnëkëne hnyawa, tre tro pala pë hë së a lapa mekune elany. Thötre hë lao macatre ne faipoipo i Adamu me Edita; hnei nyidroti hna mekune hmaca lo kola hane hë nyidroti troa sine la ketre faipoipo; öni nyidro: “Canga drenge hi së laka caa lapa ne la itre Keresiano. Kola thinge me atrunyi Iehova hnene la itre nyima, nge hetrenyi mina fe la itre xaa nyine madrine hna kuca ka lolo. Ame la itre fia me kuci ikaho, tre, hnaaluene pë hë. Mingöminge pi hë me hmitrötr, nge hna eköth asë hi thenge la itre trepene meköti ne la Tusi Hmitrötr.” Kola mama hnyawa laka, ka mel la lapaunene la lue ka faipoipo; kola anyipicine lai hnene la itre aqane ujë me itre huliwa hnei nyidroti hna kuca.
Itre Ahnahna Göi Faipoipo
15. Nemene la trepene meköti ka ijije tro sa xötrethenge qa hnine la Tusi Hmitrötr, e easa hamë ahnahna ngöne la ijine faipoipo?
15 Ame ngöne la itre nöj, hna majemine troa atrenamone me hamë ahnahna kowe la lue ka troa ikötresae hnene la itre lapa me itre sinee i nyidro. Maine epuni a ajane troa hane hamë ahnahna, nemene la ewekë nyine tro epuni a lapa mekun? Pane mekune jë së lo itre ithanata i Ioane aposetolo göne lo “nyi döne ne la mele celë.” Angeic a acaasine la itre nyi dröne cili, memine la fene hnengödrai ka troa paatr, ngo thaa memine kö la itre Keresiano ka amamane la lapaune i angatr hnene la itre huliwa i angatr.’ (1 Ioane 2:16, 17) Matre thenge la hna qaja hnei Ioane, hapeu tro kö la lue ka xötrei faipoipo a cile fë me sueen la itre ëje ne la itre ka hamë ahnahna? Hnene ekö la itre keresiano ne Makedonia me Akaia hna hamë ahnahna kowe la itre trejine ne Ierusalema, ngo thaa hna qaja kö hnei Tusi laka hna amamane fe la itre ëje i angatr. (Roma 15:26 ) Ala nyimu catre la itre keresiano ka ajane troa hamëne mitine la itre ahnahna ne faipoipo, ke, thaa ajane kö angatr troa pi mama fë itre ej. Sisitria e tro sa pane ce wange hmaca göne la götrane cili, lo eamo i Iesu ngöne Mataio 6:1-4.
16. Troa neëne tune kaa hnene la lue ka xötrei ikötresae matre thaa tro kö a hacehnin hnei itre xan ngöne la kola iatrenamo me hamë ahnahna?
16 E tro sa atre ka hape drei la itretre nyi ahnahna, tre, celë hi ka iupi kowe la “hlemu gufa,” ene la troa hamë ahnahna ka sisitria kö hune la itre xan, maine ka tru thupene pena. Haawe, troa hetre inamacan thene la lue trefëne keresiano e hnei nyidroti hna neën troa cile fë me uune la itre ëjene la itretre nyi ahnahna, wanga ahmahmane pi pena la itre xan, ke thaa ijiji angatre jë kö troa hane hamë ahnahna. (Galatia 5:26; 6:10 ) Nyipici laka, thaa ngazo kö kowe la lue trefën troa atre lai itre ka traqa fë ahnahna. Maine jë tro nyidroti a atre la ëjen la itre ka hamë ahnahna, qa ngöne laka, hna hamëne fe la ketre kart nyine ithuecatr, ngo ame pe thaa tro kö a qaja kowe la itre xan la ëje ne la itre ka ham. Ngöne la kola itö ahnahna göi faipoipo me hamën maine atrenamon, uti fe hë ngöne lo itre götran ka sihngödr, ijiji së pala hi troa amamane la lapaune së jëne la itre hne së hna kuca.a
17. Nemene la hna troa aeatrën hnene la itre keresiano, ngöne la lapaune i angatr me itre hnei angatr hna kuca?
17 Ame la troa lapaun, tre, thaa ene hmekuje kö la troa pë ethane la mele së, me sine la itre icasikeu me cainöje trootro. Loi e troa mama pala hi jëne la itre hne së hna kuca, laka, ka mele la lapaune së. Nyipici, ijije tro sa amamane la lapaune së jëne la “ite huliwa . . . ka pexej”, ene fe la itre götran hne së hna ce ithanatane hë.—Hna Amamane 3:2.
18. Hna anyipicine tune kaa la hna cinyihane ngöne Ioane 13:7 göne la itre faipoipo ne la itre keresiano maine göne pena la itre xaa ijine ce madrine angatr?
18 Thupene la hnei Iesu hna amamane la ketre tulu ka lolo ne ipië kowe la itre aposetolo jëne la hna hnea la itre hnatrapaca i angatr, öni nyidrë: “Maine ate nyipunie la ite ewekë cili, manathithi hë nyipunie maine nyipunie a kuca it’ej.” ( Ioane 13:4-17) Ame ngöne la itre götrane easa isa mele ngön, maine jë thaa nyipi ewekë kö maine thaa hna majemine kö troa hnea me köle la lue ca ne la itre xaa atr, maine jë ketre atr hne së hna könën kowe la hnalapa së. Easë pe a wange ngöne la ini celë, laka, hetrenyi mina fe ngöne la mele së la itre ijine easë a amamane la lapaune së, jëne la itre huliwa hna nyitrepene hnei ihnim, me itrotrohni; tune la itre ijine ce madrin memine la itre enehmu së, maine ngöne itre ijine faipoipo pena. Ijije hi tro sa hane ujë tune lai, ngacama easë ju hë la ka troa faipoipo, maine kolo pena a könë së kowe la ijine ikötresae. E cili mina fe, loi e troa mama hnyawa la lapaunene la itre Keresiano, jëne la itre huliwa hnei angatr hna kuca.
[Ithueamacany]
a Tro pë hë a ce wange la itre xaa pengöne la faipoipo me itre icacaxenyi ngöne la ini ka calemi: “Akökötrene jë la madrin me meköti ne la drai ne ikötresae.”
Tro epuni a sa tune kaa?
Tune kaa la aqane tro epuni a amamane la lapaune i epun:
• E kola hnëkëne la ketre traqa itrony?
• E kola hnëkë faipoipo maine ketre caa lapa ne ce madrin?
• E kola hamën maine kapa pena la itre ahnahna göi faipoipo?