Kola Sa La Itre Hnyinge i Nyipunie

◼ Maine kola ajane hnene la lue trefëne troa faipoipo e hnine la Uma ne Baselaia, tre, nemene la itre ewekë nyine tro nyidroti a ce ithanatane memine la itre qatre thup?

Ame la itre faipoipo hna elemekene hnyawa thenge la itre trepene meköti ne la Tusi Hmitrötr, tre, itre ej a atrunyi Iehova. Kola mama hnyawa lai ngöne la kola faipoipo e hnine la Uma Ne Baselaia, ke, kola goeëne hnene la nöjei atr jëne la itre porogarame hna cile fë, la pengöne la organizasio së. Celë hi matre, maine easa ajane troa “kuca alolone . . . me amekötine la nöjei ewekë asëjëihë,” haawe, nyipi ewekë tro la itre qatre thup a ce ithanata memine la lue trefën, ngöne la nyidroti a sipone la Uma Ne Baselaia göi faipoipo.—1 Kor. 14:40.

Maine kola ajane hnene la lue trefën troa xome la Uma Ne Baselaia göi faipoipo, haawe, loi e tro nyidroti a cinyany kowe la kometr ne huliwa ne la ekalesia ka icasikeu ngöne la uma cili. Loi e tro nyidroti a canga cinyany me qaja fe la drai me hawa hnei nyidroti hna ajan troa huliwan la Uma. Loi e tro mina fe nyidroti a atrehmekune hnyawa laka, thaa tro jë kö la itre qatre thupe a saze la porogarame ne icasikeu, matre troa kuca la ketre faipoipo. Ketre, nyipi ewekë tro la föe memine la trahmanyi ka troa faipoipo a mele thenge la itre trepene meköti Iehova.

Maine kola ajane troa atrunyi Akötresie hnene la faipoipo, haawe, loi e tro la lue trefën a ithanatan la itre hna hnëkëne hë göi faipoipo, memine la kometr ne huliwa qëmekene troa axeciëne itre ej. Ngo thaa tro jë kö la itre qatre thup a amekötine kowe la lue trefën la itre hnei angatre hna ajane troa kuca; maine hna öhnyi engazone la ketre ewekë hna eköthe amë hë, haawe, loi e tro la lue trefëne a drengethenge la itre hna amekötine hnene la itre qatre thup. Tro hmekuje hi a thinge la itre nyima hna iëne qa hnine la Mélodies du Royaume maine hna xome pena qa hnine lo itusi ne nyima së. Ketre, ijije mina fe troa thaipine la Uma Ne Baselaia maine tro pena a saze la itre göhnene la itre cea. Maine kola xomi foto maine video pena, tre, loi e thaa tro kö lai a wanga acone la ijine cili. Ijije tro la itre qatre thup a nue la lue trefëne troa kuca la ketre iamacanyi me canga amacane la itre nyine troa kuca e hnine la Uma Ne Baselaia, e thaa kolo kö a ajolëne la itre xaa huliwa ne la ketre ekalesia. Loi e thaa tro kö a athipe la itre pepa ne ikönë ngöne la tablo ne la ekalesia. Ngo ijije pe tro la itre qatre thupe a nango ithuemacanyine la ekalesia ngöne la ijine Icasikeu Ne La Huliwa, ka hape, kola troa faipoipo hnene la lue trefëne ngöne la Uma Ne Baselaia.

Ngacama thaa hna thele kö tro asë hi la itre temoë ne la lue trefën a itre atr ka xome la bapataiso, ngo thaa loi kö e troa temoë hnene la lue atr ka thiina ka sis, nge ka ifekethe memine la itre trepene meköti ne la Tusi Hmitrötr, maine itre ka troa athixötrëne pena la itre ka sine la cainöj, jëne la aqane ujë i angatr. Maine ijij, loi e troa acile la ketre qatre thup matre troa elemekene la faipoipo. Ame la itre qatre thup, tre, itre ka maca angatr troa hamë ini qa hnine la Wesi Ula i Akötresie; haawe, angatre hi la itre ka ijije troa wanga atrune la itre trepene meköt ne la Tusi Hmitrötr ka ihmeku memine la ijine celë ka sisitria.—1 Tim. 3:2.

Ngöne laka tro mina fe a hetre thangane la faipoipo thene la qatre thup ka elemekene ej, haawe, nyipi ewekë troa thuemacanyi nyidrë göne la itre hna amekötine thatraqane la faipoipo. Tro pala hi nyidrëti a thele troa atre la pengöne la lue ka iatre, maine loi kö la aqane ujë i nyidro ngöne la ijine cili, nge loi e tro nyidroti a fe amamane la aliene hni nyidro me qaja la nyipici kowe lai qatre thup. Maine ase hë faipoipo ekö hnene la föe maine trahmany, tre, nyipi ewekë tro angeic a anyipicine laka, qëmekene la Tusi Hmitrötr memine fe la mus, tre, ijije hi tro hmaca angeice a faipoipo. (Mat. 19:9) Haawe, loi e tro angeic a amamane kowe la qatre thup la pepa ka anyipicine hnyawa laka, ase hë angeice sei hna cil.

Maine tro la lue trefëne a fe amamane me ce huliwa memine la itre qatre thup, haawe, tro ha mama laka, ketre ijine madrine kowe la nöjei atr asë, la faipoipo.—Ite edomë 15:22; Heb. 13:17.