Ita Ne Thup göi 4 MEI e Normandie
Nyima 12 me 14 Qene Drehu
Loi E Troa Öhnyi Madrine Ngöne La Faipoipo
“Kola xupi uma ngöne la inamacan, nge kola acaten’ eje ngöne la trotrohnin.”—ITE EDOMË 24:3
1. Kola mama tune kaa la inamacane i Akötresie ngöne lo aqane ujë i Nyidrë kowe la pane atr?
PINE laka ka inamacane la Tretretro së, atre hnyawa hi Nyidrëti la ewekë ka loi koi së. Drei la ketre ceitun, hnei Akötresieti hna atrehmekune laka, thaa tro kö a eatrëne elanyi la aja i Nyidrëti kowe la fen, “e troa lapa casi la at” ngöne la hlapa e Edena. Ka nyipi ewekë catre tro la itre atr a faipoipo me hnaho me “atiqane la fene hnengödrai,” pine laka celë hi aja i Nyidrë.—Gen. 1:28; 2:18.
2. Nemene la hnei Iehova hna amekötin nyine loi kowe la itre atr?
2 Öni Iehova, ka hape: “Tro ni a kuca thatraqai angeice la ixatua ka ijiji angeic.” Thupene jë hi lai, hnei Akötesieti hna ameköle angeic, me xome qa ngöne la ngönetrei angeic ka pexej la ketre wengesisila matre troa xupe la föe. Ame la Iehova a xomi Eva, föe ka pexej koi Adamu, öni angeice jë hi : “Dei lola june sine la ite juneng, me ijöne sine la ijöng ; tro ha ati ëje i angeic, Fö, ke ase hë xomi angeice pi qa hnine la trahmany.” Eje hi laka, ame Eva, tre, ketre ixatua ka ijije hnyawa koi Adamu. Ngacama isa pengöne kö la aqane ujë memine la itre thiina i nyidro, ngo lue ka pexej asë hi, nge lue hna xup hnaiji Akötresie. Celë hi la pane faipoipo hna acile hnei Iehova. Thaa ka hace kö koi Adamu me Eva troa kapa la hna icasinekeu nyidro hnei Akötresie, pine laka celë hi la ka troa upi nyidro troa itö ixatua.—Gen. 1:27; 2:21-23.
3. Tune kaa la aqane goeëne la itre atr la faipoipo, nge nemene hë la itre hnyinge hna amejën?
3 Ngazo pe kola jilapane enehila la fene hnengödrai hnene la icilekeu. Ngo thaa zöi Akötresieti kö la itre jol ka fetra qa ngöne lai. Nyimutre la itre atr ka methinëne la ahnahna i Akötresie, ene la faipoipo, pine laka angatr a goeëne lai ceitune me ketre ewekë ka thaa ihmeku hmaca kö memine la itre aqane mel enehila, maine ketre jëne akötr me isi pena. Nge ame koi itre ka faipoipo hë, tre, nyimutre catr la itre ka sei hna cil. Qa ngöne lai pë hë ihnimikeu kowe la itre nekönatr, nge angatre mina fe la itre ka hane sine la itre iwesitrë ne la itre keme me thine i nyudren. Nyimutre la itre keme me thine ka thipëne troa iloi, ngacama troa hetre ethanyine la tingeting memine la caasi ne la hnepe lapa. (2 Tim. 3:3) Ngo tune kaa fe la aqane tro la itre ka faipoipo a mele madrine ngöne la itre hneijine celë ka ngazo? Nemene la enyipiewekëne la troa iloi hnene la lue trefën, matre troa cile huti pala hi la faipoipo i nyidro? Nemene la itre ini hne së hna troa kapa qa thene la itre hna melëne hnene la itre atr ka thele troa madrine ngöne la faipoipo i angatr?
Tro sa nue hnyawa koi Iehova troa xomiujine la mele së
4. (a) Nemene la ketre trepene meköti hna hamëne hnei Paulo göne la faipoipo? (b) Tune kaa la aqane tro la itre keresiano ka idrei a amamane laka angatr a xötrethenge hnyawa la trepene meköti cili hna hamëne hnei Paulo?
4 Hnei Paulo aposetolo hna hamë ithuecatre kowe la itre sine föe ka ajane troa faipoipo hmaca, kola hape loi e tro angatr a ikötresae “ngo göi Joxu hmekuje hi”. (1 Kor. 7:39) Thaa ewekë ka hnyipixe kö lai kowe la angetre Iudra. Eje hi laka, hna ami trepene hnyawa hnene la wathebo i Akötresie kowe la itre nekö i Isaraela ka hape, “tha tro kö a i hamë föeë” memine la itre wanaithihlë. Nge hnei Iehova mina fe hna qaja la engazone la troa sixane la itre trepene meköti Nyidrëti celë. Öni Nyidrëti ka hape: “Ke tro [la trehnyiwa] a aukene la nekö i’ö qa theng, mate nyi hluene la ite haze; ame hna troa palulu la elëhni Iehova koi nyipunie, nge tro nyidrëti a canga apatenyi’ö.” (Deu. 7:3, 4) Qa ngöne lai, nemene la aja i Iehova kowe la itre ka nyi hlue Nyidrëti enehila göne la götrane la faipoipo? Eje hi lai laka, loi e tro la atre nyi hlue Akötresie a iëne la föi angeic “göi Joxu hmekuje hi,“ kola hape, ketre föe maine trahmany ka nue la mele i angeic koi Iehova nge ka bapataiso hë, tui angeice hi. Maine tro sa nue koi Iehova troa amekötine koi së ngöne la götrane troa iëne la hne së hna troa ikötresae memin, tre, celë hi lai aqane xomi mekune ka loi.
5. Tune kaa la aqane goeëne Iehova me itre trefëne keresiano la itre hna isisinyikeu göi faipoipo?
5 Ame itre hna sisiny göi faipoipo, tre, itre ewekë lai ka hmitrötr xajawa i Akötresie. Hnene la Hupuna i Nyidrë, ene Iesu, hna amexej lo pane faipoipo, me qaja, ka hape: “Ame la hnei Akötesie hna isilekeun, the tro kö a shenge hnei ate.” (Mat. 19:6) Kola amekunë së mina fe hnene la ketre atre cinyihane la Salamo la enyipiewekëne la troa sa xepu öni angeic, ka hape: “Hujënejë la ole koi Akötesie, nge hamëne pi kowe la Kasisitia la hna sisinyi hnei’ö”. (Sal. 50:14) Ngacama troa tru la madrine ne la lue ka troa ikötresae elany, ngo eje hi lai laka ame la itre hnei nyidroti hna isisinyikeu ngöne la ijine faipoipo, tre, ka nyipi ewekë catr nge hetrenyi la itre hnëqa thatraqai nyidro.—Deu. 23 :21.
6. Nemene la ini nyine tro sa xom qa ngöne la tulu i Iefetha?
6 Pane mekune jë së la ceitune i Iefetha, ketre atre amekötine ekö e Isaraela, ngöne lo itre macatre 1100 M.P.K. Öni angeic e sa xepu koi Iehova, ka hape: “Maine tro cilieti a nue la ite nekö i Amona kowe la imeng, nge e traqa hmaca ha ni memine la tingetinge qaathei ite nekö i Amona, ame la ka tro ha löpi qa ngöne la qëhnelö ne la umange troa ixelë me ini, celë hi thatraqai Iehova, nge tro ni a hujën’ eje nyine huje ne deuth”. Ngo ame la Iefetha a öhne la jajiny ka lö pi qa ngöne la uma i nyidrë e Mizepa troa itronyi me nyidrë, nyidrëti a atrehmekune laka kolo hi lo sipu nekö i nyidrëti jajiny; tune kaa, hnei nyidrëti kö hna thele troa senge trije hmaca lo hna sa xepu? Ohea. Loi pe, öni nyidrëti, ka hape: “Hnenge hna ewekë koi Iehova, nge tha ’teine kö troa hmaca.” (A. ame 11: 30, 31, 35) Hnei Iefetha hna eatrëne la hnei nyidrëti hna sisiny koi Iehova, ngacama atre hi nyidrëti ka hape, troa pë matra i nyidrë. Nyipici laka, isapengöne kö la aqane isisinyikeu Iefetha memine la troa sisiny ngöne la götrane la faipoipo; ngo ame la aqane nyipici Iefetha kowe la hnei nyidrëti hna sa xepu koi Iehova, tre, celë hi ini ka sisitria kowe la itre keresiano ka faipoipo.
Nemene la nyine troa kuca matre tro loi la faipoipo?
7. Nemene la itre ewekë nyine tro la lue ka nyipi ikötresae a saze ngöne la mele i nyidro?
7 Nyimutre la itre trefëne ka mekune hmaca lo ijine angatr a xötrei iatre. Drei la madrine i angatre ngöne lo angatr a thele troa atrepengöne hnyawa la hnei angatr hna troa faipoipo memin! Ketre, pine laka angatr a iöhnyi lapa, ene pe angatre ha iasenyi catr. Ame la kola ase ikötresae hnei lue trefën, tre, nyidroti hë a öhne la enyipiewekëne la troa saze la itre hnepe aqane mele i nyidro, ngacama lue ka iaja ju hë, maine hna ihujëne pena. Kola wanga atrehmekune hnene la ketre trahmanyi ka faipoipo hë, ka hape: “Ame la jole ka tru koi nyiho thupene la kola ase faipoipo, tre, ene la troa kapa la mekune ka hape, thaa ka mele caas hmaca kö nyiho. Ame lo xötrei, tre, ewekë ka hace koi nyiho la troa tuluthe la aqane iöhnyi lapa memine la itre atrene la hnepe lapa i nyiho memine kö la itre xaa sinee i nyiho.” Ame pena la ketre keresiano, laka 30 hë lao macatre ne faipoipo nyidrë, tre, hnei nyidrëti hna canga wanga atrehmekune ngöne lo nyidrëti a ase faipoipo ka hape, loi e tro nyidrëti a “mekune fe la föe, ngo thaa nyidrëti caasi kö.” Kola hape, maine hna könë nyidrë maine pena nyidrëti a mekune troa kuca la ketre ewekë, tro nyidrëti a pane ce ithanatane me föi nyidrë nge thupene lai nyidroti a ce axecië mekun. Ame ngöne la götrane cili, tre, nyipi ewekë troa atreine ce thë la itre mekun.—Ite edomë 13:10.
8, 9. (a) Pine nemene matre nyipi ewekë tro la lue trefën a ifekeune la itre mekuna i nyidro? (b) Nemene la itre götrane nyine troa atreine waiewekë ngön, nge pine nemen?
8 Ame ngöne la itre xaa ijin, tre, isa aqane melene kö la lue ka ikötresae. Celë hi matre, loi e tro nyidroti a ifekeune hnyawa la itre mekuna i nyidro. Nyipici laka isa hetrenyi kö nyidro la aqane qeje mekune ka isa pengön. Haawe, loi e tro la trahmanyi maine föe pena a wange la aqane qeje mekune hnene la föi angeic ngöne la kola ithanata memine la hnepe lapa i angeic, ke, celë hi lai ka troa xatua nyidro troa itö itrotrohni hnyawa. Ame ngöne la itre xaa ijin, tre, kola mama hnyawa la mekuna ne la ketre atr, thaa hnene hmekuje kö la hnei angeice hna qaja ngo hnene mina fe la aqane qaja. Ketre, maine jë pëkö hnei angeice hna qaja, ngo ame e celë, tre, trotrohnine hnyawa hi së la mekuna i angeic. (Ite edomë 16:24; Kol. 4:6) Nyipi ewekë troa hetre wanga atrehmekun, ke, celë hi ketre jëne madrine lai.—E jë la Ite Edomë 24:3.
9 Ame pena la troa axecië mekun göi itre nyine iamadrinë me ijine mano, tre, hna goeëne hnene la itre xaa trefën, laka ka nyipi ewekë la troa atreine trotrohnine la ketre. Maine jë qëmekene la troa faipoipo, hna majemine hnene la föi nyipunie troa ami ijin ne elo maine sine la itre xaa nyine iamadrinë pena. Ngo hapeue la ikötresae hë nyipunie enehila, tro kö a saze lai hna majemine cili? (1 Tim. 4:8) Ketre tune mina fe kowe la itre ijine epuni a troa wange la itre sinee epun. Kösë kolo hi lai a hape, loi e tro la lue trefëne a tuluthe hnyawa la traeme ne tro nyidroti a ce kuca la itre huliwa ngöne la götrane la ua, me itre xaa huliwa ju kö.—Mat. 6:33.
10. Pine nemene matre ame la troa atreine itrotrohni, tre, celë hi ka troa xatuane la itre keme me thin troa imelekeu hnyawa memine la itre nekö i angatr ka faipoipo hë?
10 Ame la kola faipoipo hnene la trahmany, tre, angeice hi lai a nue la keme me thine i angeic, ketre tune mina fe göi fö. (troa wange la Genese 2:24.) Ngo ame la faipoipo, tre, thaa kolo kö lai a sewe së troa xötrethenge la trepene meköti Akötresie, ene la troa metrötrëne la keme me thine së. Celë hi matre ngacama ka faipoipo hë la lue trefën, ngo loi e tro pala hi nyidroti a xomi ijine matre troa hane wange la itre keme me thine i nyidro. Kola wanga atrehmekune hnene la ketre keresiano, laka 25 hë lao macatre ne faipoipo nyidrë, ka hape: “Ewekë ka hace koi ni ekö la troa ce wang asë la itre aja ka eje thene la föeng, me keme me thineng, memine la itre aja ne la hnepe lapa ne la föeng fe. Ame la ka xatua ni troa atreine waiewekë hnyawa, tre, ene la trepene meköt ka eje ngöne Genese 2:24. Nyipici laka, hetre hnëqa së kowe la itre xaa atrene la hnepe lapa së, ngo hna xatua ni hnene la xötre celë troa pane kuca la hnëqang kowe la föeng.” Ame la itre keme me thine keresiano ka atreine itrotrohni, tre, tro angatr a metrötrëne la pengöne la itre nekö i angatre ka faipoipo hë, pine laka ketre hnepe lapa hë nyidro nge hnëqa ne la trahmany troa elemekene la hnepe lapa i angeic.
11, 12. Pine nemene matre nyipi ewekë catre kowe lue trefëne troa ce inine la Tusi Hmitöt me ce thith?
11 Ketre, nyipi ewekë tro pala hi a hetre ijine troa inine la Tusi Hmitrötr e hnine la hnepe lapa. Celë hi hna melëne me hna jele nyipicine hnene la ketre fami Keresiano. Eje hi laka maine jë thaa hmaloi kö koi së troa acile la ketre porogaram ne ini Tusi Hmitötr, maine tro pena ha trongëne eje pala hi ngöne la nöjei wiik. Hna qaja hnene la ketre hene ne fami, ka hape: “Maine ijiji huni ju troa bëeke hmaca kowe la itre drai ka ase hë me saze la ketre ewekë, tre, tro huni a thele troa metrötrëne hnyawa la ketre porogaram ne ini tusi e hnine la hnepe lapa, a tro hi a nyiqaane ngöne lo nyiho a xötrei faipoipo.” Öni nyidrëti mina fe, ka hape: “Eni a aciaci ngöne la eni a öhne la madrine thene la föeng, ngöne la kola ketri nyiidro hnene la ketre mekune ka tru alameken, ngöne lo nyiho a ce inine la Tusi Hmitötr.”
12 Ame la troa ce thith, tre, cele hi ketre ewekë ka troa xatuane la itre trefëne troa tro loi la faipoipo i angatr. (Rom. 12: 12) Maine ka nyi hlue i Iehova asë hi la lue trefën, tre, tro ha catr la otrene la faipoipo i nyidro hnene laka nyidroti asë hi a thele troa imelekeu hnyawa me Iehova. (Iako. 4:8) Kola qaja hnene la ketre keresiano trahmany, ka hape: “Ame la troa canga iqejemenukeu me qaja mina fe la itre menu hna kuca ngöne la kola ce thith, tre, celë hi aqane troa amamane ka hape, easa nyipi hace pine la menu hne së hna kuca, ngacama ka co hi.”—Efe. 6:18.
Loi e troa atreine kapa la mekuna i ketre e hnine la faipoipo
13. Nemene la eamo hna hamëne hnei Paulo ngöne la götran, ene la troa ce meköle trefën e hnine la faipoipo?
13 Nyipi ewekë tro la itre trefën keresiano a thupëne matre thaa tro kö a kuca la itre ewekë ka sisi ngöne la götrane la ce meköle trefën, tune la hna majemine kuca ngöne la fene celë ka kuci ngazo catr. Celë hi matre Paulo a ithuecatre koi së ngöne la götrane cili, kola hape: “Qâne la trahmanyi troa hamëne la ka ijije kowe la föi angeic ; nge tune la föe kowe la trahmany. Tha qâne kö la föe troa musinëne la ngönetei nyidro, ngo qâ i trahmany; nge kete tha qâ i trahmany kö troa musinëne la ngönetei angeic, ngo qâ i fö.” Nge thupene jë hi lai, Paulo a qaja amamane la eamo celë, ka hape: “The cipa kete hnei kete, ngo loi pe e ce hni nyipo ngöne la kete ijin.” Pine nemen? “Matre nue nyipoti pi kowe la tha xeni me thith, ame hna lue ce lapa hmaca, wanga tupathi nyipo hnei Satana ngöne la tha’teine kö nyipoti xomi hni.” (1 Kor. 7:3-5) Hnei Paulo hna amexej e celë la thith nyine amamane laka hetre ewekë hnene la Keresiano hna troa pane kuca. Ngo hnei nyidrëti mina fe hna amamane hnyawa ka hape, loi e tro la lue trefëne a hane wanga atrune la itre aja i ketre ngöne la götrane la ngönetrei memine fe la itre aliene hni nyiidro.
14. Kola xatuane tune kaa la itre trefën hnene la Tusi Hmitrötr ngöne la götrane la troa ce meköle trefën?
14 Nyipi ewekë tro la föe me trahmanyi a ifekeune hnyawa la itre mekuna i nyidro me atrehmekune laka, e cipa ketre hë hnei ketre ngöne la götrane la troa ce meköle trefën, tre, celë hi ka troa fe jëne kowe la itre jol e hnine la mele i nyidro lue trefën. (E jë la Filipi 2:3, 4; nge wange ju fe la Mat. 7:12.) Hna jele nyipicine lai hnene la itre atr ne la hnepe lapa ka isa hmi kö. Ngacama isazikeu la itre mekun e itre xaa ijin, ngo ijije hi tro la nyipi keresiano a kuca la itre ewekë matre lolo la mele i nyidro, jëne la aqane ujë i angeice ka loi me ka menyik, me jëne fe la ixatua i angeic. (E jë la 1 Peteru 3:1, 2.) Maine atraqatr la ihnimi ne la ketre e nyidro lue trefën koi Iehova, nge angeic a hnime fe la föi angeic, me atreine imeku, haawe, tro ha hmaloi troa mele e hnine la faipoipo.
15. Nemene la enyipiewekëne la metrötr matre hetre madrine i lue trefën ngöne la faipoipo?
15 Ame mina fe ngöne la itre xaa götran, ka lolo catre la trahmanyi ka thele troa metrötrëne la föi angeic. Drei la ketre ceitun, tro angeic a thele troa atre la mekuna i föi angeic ngöne la itre ewekë, maine itre ka co ju hë. Önine la ketre trahmany ka 47 lao macatre, ka hape: “Ini pala hi a inine la aqane troa kuca ngöne la götrane cili.” Ketre, kola eamone la itre föe ka faipoipo troa metrötrëne la itre föi angatr. (Efe. 5:33) Ame la troa xöjetrij me qaja amamane la itre menu hna kuca hnei trahmany qëmeke i nöjei atr, tre, thaa aqane tro kö la föe lai a amaman, laka eahlo a metrötrëne la föi eahlo. Kolo pe a amekunë së hnei Ite Edomë 14:1, ka hape: “Ite föe ka inamacan’ a isa nyihnyawane la ite lapa i angat; ngo ame la föe ka hmo a sikujëne la lapa hnene la thina i nyën.”
The nue jë i Diabolo kö
16. Tro la itre trefën a melëne tune kaa la trepene meköt ka ej ngöne Efeso 4:26, 27?
16 “Elëhnijë, ngo the ngazo kö; nge the lö kö la jö hune la wesite i nyipunie; kete the nue hne i diabolo kö.” (Efe. 4:26, 27) Ame la troa xötrethenge la itre trenge ewekë celë, tre, celë hi ka troa xatua së troa nyi nyin, maine tro pena neëne la itre jol ngöne la faipoipo. Kola qaja hnene la ketre trejine föe, ka hape: “Ame ngöne la nöjei kola isazikeu la itre mekuneng me föeng, tre, hna senge pala hi thupene la hnei nyio hna pane ithanata me ifemekunekeu, ngacama itre hawa ju hë hna xome matre troa thele la aqane troa nyi nyine la jole cili.” Hnene la trejine celë hna ce axeciëne memine la föi eahlo qaane ekö lo nyidroti a ase faipoipo, ka hape, thaa tro kö nyidroti a nue troa umuthe la drai, nge thaa hna pane senge kö la jol ka eje thei nyidro. Öni eahlo ka hape: “Hnei nyiho hna ce axecië mekune ka hape, ketri nyiho ju hë hnene la nöjei pengöne jol, ngo loi e troa iqejemenukeu me thëthëhmine la itre hna kuca matre iloi hmaca nyiho ngöne la drai ka troa xulu.” Qa ngöne lai, celë hi aqane amamane nyidro, ka hape, thaa nyidroti kö a nue jë i Diabolo.
17. Maine thaa ka ihmeku hnyawa kö la aqane mele ne la lue trefën, nemene la ka troa xatua nyidro troa mele madrin e hnine la faipoipo?
17 Ngo hapeu e hna canga faipoipo nge thaa pane mekune kö troa atrepengöne hnyawa la atr hna troa ikötresae memin? Maine jë epuni a goeëne la elolone la itre xaa trefën, nge epuni a öhne laka thaa nyipi lolo fe kö la mele i epone lue trefën. Qa ngöne lai, loi e troa mekune hnyawa pala hi la aqane waiewekë ne la Atre Xupi së göne la faipoipo. Hnei Paulo hna cinyihane kowe la itre Keresiano, ka hape: “Loi e tro nöjei ate asë a nyipine la troa luetefën, memine la göhnë ka pë ethan; ke tro Akötesie a ahnëjinë angete nyi xetë me angete kuci ngazo.” (Heb. 13:4) Ketre thaa tro kö sa wanga acone la itre trenge ewekë celë, hna hape: “Nge tha canga xecie kö la eno ka köni wana eamo.” (Ate cai. 4:12) Maine tro la föe me trahmanyi a isa akötrehnine troa ahmitrötrëne la ëje i Akötesie, tro hë nyidroti lue trefën a caas nge tro fe nyidroti a easenyi catr koi Akötesie. Nyipi ewekë catre tro nyidroti a huliwa matre troa xatua nyidro troa hetre mele ka loi ngöne la faipoipo, ke, troa hetre thangane lai ngöne ëje i Iehova, lo Atre acile la faipoipo.—1 Pet. 3:11.
18. Nemene laka troa xecie hnyawa koi së göne la faipoipo?
18 Ijije hi tro la itre trefën keresiano a mele madrine e hnine la faipoipo. Ngo loi e troa catre me eënyine la itre thiina ka lolo, tune la troa thel troa atreine mekune la ketre, inuejë ngöne la kola isi mekun. Ame e hnine la itre ekalesia ne la Itretre Anyipici Iehova hetrenyi enehila la itre trefën ka amamane ka hape ijije hi troa ujë tune lai.
Tro Epuni a Sa Tune Kaa?
• Pine nemene matre thaa mekune ka menu kö la troa qaja ka hape, ijije troa mele madrine e hnine la faipoipo?
• Nemene la ka troa xatua së troa mele ka loi e hnine la faipoipo?
• Nemene la itre thiina ka loi nyine tro la itre trefëne a eënyin?