Ita Ne Thup göi 8 Febuare e Normandie
Nyima 09 me 21 Qene Drehu
Pine Nemene Matre Loi E Tro Pala Hi A Pë Ethan La Mele Së?
“Iehova fe, ameköti nieti jë thenge la thinange . . . ka pë ethang.”—SAL. 7:8.
1, 2. Nemene la itre xaa ewekë hna melëne hnene la itre Keresiano, nge ka ajolë angatr göne la troa pë ethan la mele i angatr?
PANE mekune jë së la köni götrane celë ka isapengön: Kola hnyima fë la ketre nekö trahmanyi hnene la itre xaa sine ini angeic. Angatre a jele la trenge elëhni i angeic matre tro angeic a iqaqa maine isi pena. Hapeu, tro jë kö angeic a itëkeun, maine tro pena angeic a xomihni me trotriji angatr? Kola thele mekune hnene la ketre thupëtresij ngöne ëternet, nge nyidrëti caasi hi ngöne la hnalapa. Ene pe mama pi hi la ketre iatr ka ngazo ngöne la ordinatöre i nyidrë. Hapeu, tro jë kö nyidrëti a tupathe troa wange la itre xaa iatr ka tune lai hnine ëternet, maine tro pena nyidrëti a neëne itre ej? Kola porotrike hnyawa hnene la ketre föe Keresiano memine la itre xaa trejin; ene pe saze pi hi la porotrik, nge kolo pena ha nyiqaane xöjetrije la ketre trejine föe e hnine la ekalesia. Hapeu, tro jë kö eahlo a hane sine lai porotrike cili, maine tro pena eahlo a thele troa saze la taan porotrik?
2 Ngacama isapengöne la köni götrane celë, ngo hetrenyi la ketre ewekë ka ceitun thene itre ej: Itre ej a amamane laka, loi e tro la Keresiano a catre isine matre troa pë ethan la mele i angeic. Hapeu, epuni kö a mekune troa pë ethan la mele i epun ngöne la epuni a cile kowe la itre hnei epuni hna melëne me itre hna ajan, me itre xaa mekune ju kö hna thele troa eatrëne ngöne la mel? Ame ngöne la nöjei drai, tre, kolo pala hi a hnehengazone hnene la itre atr la aqane troa nyihnyawane la ngönetrei memine la egöcatre ne la mele i angatr, me itre ejolene la mel, me itre ijine loi maine ngazo pena memine la itre enehmu i angatr, memine fe la itre hnimina i angatr. Maine jë tro epuni a wanga atrune catrëne la itre ewekë celë. Ngo pine laka öhne hi Nyidrëti la itre ewekë ka eje e kuhu hni së, nemene la hnei Iehova hna thele the së? (Sal. 139:23, 24) Nyidrëti a ajane troa pë ethane la mele së.
3. Nemene la manathithi hnei Iehova hna hamë së, nge nemene la nyine tro sa ce wange ngöne la hna cinyihane celë?
3 Nyimutre la itre ahnahna hna hamëne koi së isa ala caas hnei Iehova, Nyidrë Atre Hamëne “la nöjei ahnahna ka loi asë, memine la ite hna hamëne gufane ka lolo asë”. (Iako. 1:17) Nyidrëti la ka hamë së la itre ahnahna cili, tune la ngönetrei me mekun, me egöcatr memine la atrein. (1 Kor. 4:7) Ngo thaa Iehova kö a iele së troa pë ethan la mele së. Loi pe, Nyidrëti a nue së troa isa iën troa akökötrene la thiina cili. (Deu. 30:19) Celë hi matre, nyipi ewekë tro sa ce wange la aliene la hna hape, troa pë ethan la mel. Ketre, tro mina fe sa ce ithanatane la köni kepin matre ka sisitria catre troa eëne la thiina cili.
Nemene La Alien La Hna Hape, Troa Pë Ethan La Mele Së?
4. Nemene la aliene la hna hape, troa pë ethan la mel, nge nemene la ini hne së hna xome qa ngöne la wathebo i Iehova, göne la itre huuj ne öni?
4 Nyimutre la itre atr ka thatre hnyawa kö la aliene la hna hape, troa pë ethane la mel. Drei la ketre ceitun, ame ngöne la kola selëne hnene la itre ka kuci politik laka, ka pë ethan la mele i angatr, tre, kösë angatr a qaja ka hape ka nyipici angatr. Ka sisitria catre la troa nyipici, nge ka ce tro la thiina cili memine la troa pë ethane la mele së. Tune la hna qaja hnene la Tusi Hmitrötr, ame la troa pë ethan la mele së, tre, kolo lai a hape troa pexej, me thiina ka meköt. Ame la itre hnaewekë qene Heberu ka ihmeku memine lai hna hape “pë ethan,” tre, itre ej a qaja la thiina ka meköt me ka pexej, maine ka pë engazon. Hna xome lai ketre hnaewekë matre troa qaja lo itre huuj ne öni hna kuca thatraqai Iehova. Maine ka pë ethan maine pexeje la öni nyine hujën, haawe, tro hë Iehova a kapa la huje cili. (E jë la Levitiko 22:19, 20.) Iehova a jelengazone la itre ka thaa drengethenge la hna amekötine celë, nge ka huujëne la itre öni ka peje ca, me wezipo, maine ka timeke pena.—Mal. 1:6-8.
5, 6. (a) Nemene la itre ceitun ka amamane laka, majemine së wanga atrune la itre ewekë ka pexej, nge ka pë engazon? (b) Hapeu, ame la aliene la hna hape troa pë ethan la mele ne la itre atr ka ngazo, tre, kolo lai a qaja ka hape, tro angatr a pexej? Qeje pengöne jë.
5 Ame la troa thele me wanga atrune la ewekë ka pexej, tre, thaa ewekë ka jole kö lai tro sa trotrohnin. Drei la ketre ceitun, pane mekune jë së la ketre atr ka xeen la itre itus; thupene la hnei nyidrëti hna ithel, ene pe öhne ju hi nyidrëti la ketre itus ka tru alameken, ngo ngazo pe, nyimu götrane ka nyipi ewekë ka paatr. Hace ju hi la mekuna i nyidrë, ene pe nyidrëti a amë hmaca ju lai itus ngöne la göhnene ej. Maine mekune jë pena së la ketre föe e hle coquillages. Pine laka eahlo a haine la eisapengönen me emingömingöne la itre ewekë cili hna xup, ene pe thili ju hi eahlo troa goeëne hnyawa la ketre. Nemene jë la itre hnei eahlo hna troa hlem? Kolo itre ka thaa kaqa kö me ka pë ethan. Ketre ceitune mina fe lai koi Akötresie, laka, Nyidrëti a thele la itre atr ka eëne la thiina celë, ene la troa pexej maine troa hni ka meköt.—2 A.l.ite jo. 16:9.
6 Ngo maine jë tro nyipunieti a isa hnying ka hape, hapeu, ame la troa pë ethan la mel, tre, kolo kö lai a hape troa pexej? Pine laka itre atr ka ngazo së, haawe, maine jë tro sa mekune laka, ceitu së memine lo lai itus ka thaa pexeje kö, maine kolo zetresie ka kaqa nge ka hetre ethan. Hapeu, nyipunieti kö a mekune tune lai enehila? The luelue kö së, ke, thaa Iehova kö a thele tro sa pexej ngöne la nöjei götrane asë. Nyidrëti pe a thele tro sa kuca la hne së hna atrein.a (Sal. 103:14; Iako. 3:2) Ngo Nyidrëti a ajane tro sa catre matre troa pë ethane pala hi la mele së. Hapeu, hetre eisapengönene kö la troa pexej me pë ethan? Eje hi. Drei la ketre ceitun: Kola hnime la ketre föe hnene la ketre thupëtresij, nge aja i angeice troa faipoipo me nyiidro. Eje hi laka, aqane mekune ne hmo la troa thele troa pexeje lai föe. Ngo aqane mekune i ka inamacane pe la troa treqene tro eahlo a hnimi angeic cememine la hni ka pexej; kolo lai a hape tro eahlo a hnimi angeice caasi hi. Ketre tune mina fe, Iehova la “Akötesie ka isaxolo.” (Eso. 20:5) Thaa Nyidrëti kö a thele tro sa pexej, ngo tro pe a hnimi Nyidrë cememine la hni ka pexej, kola hape troa hmi ngo koi Nyidrëti caasi hi.
7, 8. (a) Nemene la tulu hnei Iesu hna amë pe göne la troa pë ethan la mel? (b) Thenge la hna qaja hnene la Tusi Hmitrötr, nemene la nyipi aliene la troa pë ethan la mel?
7 Maine jë easa mekune hmaca lo aqane sa i Iesu, ngöne lo kola hnyingëne koi nyidrë la wathebo ka sisitria catr hune lo itre xan. (E jë la Mareko 12:28-30.) Thaa hnei Iesu hmekuje kö hna hamëne la mekune ka sa lai hnying, ngo hnei nyidrëti mina fe hna trongëne lai. Hnei nyidrëti hna amamane la tulu ka sisitria, göne la troa hnimi Iehova cememine la mekune ka pexej me hni ka pexej, me ua ka pexej me trengecatre ka pexej. Hnei nyidrëti fe hna amamane laka, ame la troa pë ethan la mel, tre, thaa ene hmekuje kö la troa qaja la itre trenge ewekë ka lolo, ngo loi fe troa mama ngöne la itre huliwa hna kuca cememine la hni ka wië. Maine easa ajane troa pë ethan la mele së, haawe, nyipi ewekë tro sa xötrethengene la itre thupaca i Iesu.—1 Pet. 2:21.
8 Kola qaja hnyawa hnene la Tusi Hmitrötr la nyipi aliene la troa pë ethan la mele së: Ene la troa thili hmekuje hi cememine la hni ka pexej, kowe la Atre mele e koho hnengödrai, ene Iehova Akötresie, nge tro fe a catre trongëne la aja me mekuana i Nyidrë. Ame la troa catre pë ethane la mel, tre, kolo lai a hape tro sa thele troa kuca ngöne la nöjei ijine mele së, la itre ewekë ka troa amadrinë Iehova Akötresie. Loi e troa mama ngöne la mele së laka ame la itre hne së hna amë panën, tre, kolo hi lo itre ewekë ka sisitria catre koi Nyidrë. Tro sa pane wange la köni kepin matre kola qaja ka hape ka nyipi ewekë catre troa ujë tune lai.
9. Hna iothekeune tune kaa la aqane mele së ka pë ethan memine la troa sajuëne la musi cile ne la Akötresie?
9 Thaa hnene kö laka ka pë ethane la mele së, tre, thaa ijiji Iehova ha troa mus. Ame la musi cile i Nyidrë, tre, ka meköt me epine palua nge ka draië e koho hnengödrai me e celë fen. Ka cile huti ej, ngacama ngazo ju hë la aqane ewekë maine aqane ujë ne la itre xaa xupuana i Akötresie. Ngazo pe, hna jele ngazone la musi cile i Akötresie e koho hnengödrai me e celë fen. Haawe, nyipi ewekë troa sajuëne la musi cile i Iehova qëmekene la nöjei hna xup ka inamacan, ke, lolo nge meköti tro Nyidrë a mus, nge ketre ka ihnimi Nyidrë. Ngöne laka Itretre Anyipicine i Iehova së, haawe, easa thele la nöjei ijine matre troa ithanatane memine la itre atr ka hetre hni ne ajan, la emekötine la tro Akötresieti a musinëne la nöjei ewekë hnei Nyidrëti hna xup. Ngo tune kaa la aqane tro sa amamane hnene la aqane ië ewekë së me itre huliwa së laka, easa wanga atrune me sajuëne la musi cile i Iehova? Tune kaa la aqane tro sa amamane laka, easa ië Iehova troa Musinë së? Hnene hi la easa catre thele troa pë ethan la mele së.
10. Nemene la trengathoi hnei Satana hna qaja göne la aqane tro la itre atr a thele troa pë ethan la mel, nge nemene la aqane tro nyipunieti a sa?
10 Pane ce wange jë së la aqane troa ketr la mele së ka pë ethan. Hnei Satana pala hi hna pi hune fë ka hape, pëkö caa atr ka troa sajuëne la musi cile i Akötresie, me nyihlue i Iehova cememine la ihnimi ka pë thoi ngön. Ngöne laka nyimutre la itre angela ka dreng, öni Diabolo koi Iehova ka hape: “Kupeine hnane la kupein, nge ite ewekë asë hna hetenyi hnene la ate tro angeic’ a hamëne hnane la mele i angeic.” (Iobu 2:4) Kola mama laka, thaa hnei Satana hmekuje kö hna jele ngazo Iobu, ketre atr ka meköt, ngo ene mina fe la nöjei atr asë. Celë hi kepin matre kola hë Satana hnene la Tusi Hmitrötr ka hape, “ate nyi ewekëne la ite tejine me eëshë.” (Hna ama. 12:10) Angeic a ihnyimasai me akötrë Iehova hnene la hna qaja ka hape, ame la itre Keresiano asë, laka epuni mina fe, tre, pëkö ala caas a troa mele nyipici koi Akötresie. Satana a catre fë ka hape, tro nyipunieti a wanaxoeë Iehova göne matre troa mel. Tune kaa la mekuna i nyipunie göne la itre trengathoi celë? Tro kö nyipunieti a kapa la ewekë ceitune me ketre jëne troa jelethoi Satana? Ijiji nyipunie troa jele thoi Satana, e maine tro nyipunie a catre thele troa pë ethan la mele i nyipunie.
11, 12. (a) Nemene la itre ceitun ka amamane la aqane ce tro la itre mekun hne së hna axeciëne ngöne la nöjei drai, memine la ejolene la troa pë ethan la mel? (b) Pine nemene matre ketre manathithi ka tru la troa thele troa pë ethan la mele së?
11 Pine laka hna jele ngazone la aqane troa pë ethan la mele së, haawe, nyipi ewekë catre tro sa thupëne o drai la aqane ujë së me aqane axeciëne së la itre mekun. Pane ce wange hmaca jë së lo köni pane ceitun hne së hna qaja ha. Tune kaa la aqane tro lo nekö trahmanyi memine lo thupëtresij, memine fe lo föe Keresiano, a thele troa pë ethan la mele i angatr? Ame lo lai nekö trahmanyi hna akötrëne hnene la itre sine ini angeic, tre, kola troa elë la trenge hni angeic, ngo mekune ju hi angeice lo eamo hna hamëne hnei Tusi Hmitrötr, kola hape: ‘Ange hna hnime fe, the të kö la ngazo hnei nyipunie, ngo nuepi kö kowe la tene elëhni, qa ngöne la ase hë cinyihan, ka hape, “Öni [Iehova] kola ulatin, qânge troa të ite ngazo, tro ni a nyi thupen. ”’ (Rom. 12:19) Ene pe hnei angeic hna canga trotriji angatr. Maine jë tro lai thupëtresiji a goeëne la itre iatr ka ngazo ka mama ngöne ëternet, ngo mekune ju hi angeic lo trepene meköt hna qaja hnei Iobu, kola hape: “Hnenge hna isisinyikeu me lue mekeng, nge tro ni a mekune tune ka kowe la jajiny?” (Iobu 31:1) Ketre tune mina fe, kola thipetrije hnene lai thupëtresij troa goeëne la itre iatr cili ka ngazo, nge angeic a neëne lai ceitune me poizin. Kola drenge hnene lo lai föe laka, kola ixöjetrije hnene la itre atr hnei eahlo hna ce porotrik memin, haawe, mekune jë hi eahlo lo hna amekötin, ka hape: “Tro asë sha isa amadinëne la ate easheny, mate loi angeic, me keukawa.” (Rom. 15:2) Maine hnei eahlo ju hna kötre fë ithanata, haawe, thaa tro kö lai a akeukawane la hni ne la itre xan. Thaa tro kö lai a hetre thangane ka loi kowe la trejine me eahlo Keresiano, nge ketre thaa tro kö lai a amadrinëne la Tretretro i eahlo e koho hnengödrai. Thaa hnei eahlo kö hna lö hnine la ixöjetrij, ngo eahlo pe a saze porotrik.
12 Ame ngöne la itre götrane cili, tre, kola mama jëne la aqane axecië mekune hnene la Keresiano ka hape: ‘Iehova la Atre Musinë ni. Ame ngöne la götrane celë, tro ni a kuca la itre ewekë ka amadrinë Nyidrë.’ Hapeu, ame ngöne la nyipunieti a axecië mekun, tre, nyipunieti kö a thele troa amadrinë Iehova? Maine tro nyipunieti a ujë tune lai, haawe, nyipunieti hi lai a trongëne la itre trenge ewekë ka akeukawane la hni së, nge ka eje ngöne Ite Edomë 27:11: “Neköng, inamacanepi, mate madinejë la hning; mate hete nyine sa koi angeic’ ate qaja angazo ni.” Drei la ketre manathithi ka tru troa amadrinëne la hni Akötresie! Hapeu, thaa kolo kö lai a uku së troa catre thele troa pë ethan la mele së?
13. Kola amamane tune kaa hnene la itre trenge ewekë i Iobu me Davita, laka, Iehova a ameköti së thenge la aqane pë ethan la mele së?
13 Easa goeëne laka, ame la troa pë ethan la mele së, tre, eje hi lai ka aijijë së troa sajuëne la musi cile i Iehova. Celë hi trepene la aqane ameköti së hnei Akötresie. Hnei Iobu hna trotrohnine hnyawa la nyipici celë. (E jë la Iobu 31:6.) Hnei Iobu hna atrehmekune laka, Akötresieti a tuluthe la itre atr asë ngöne “la tulu ka meköt,” me xome la itre trepene meköti Nyidrë matre troa wange ka hape, maine easë kö a thele troa pë ethan la mele së. Hnei Davita mina fe hna qaja ka hape: “Tro Iehova a amekötine la nöjei nöj. Iehova fe, ameköti nieti jë thenge la thinange ka meköt, me ka pë ethang. . . . Ke Akötesie ka meköti la ate thele la ite hni me ite mekun.” (Sal. 7:8, 9) Atre hi së laka, ijiji Akötresieti troa öhne la ejuine la itre aliene hni ne la ketre atr, kola qaja la “hni me ite mekun.” Ngo nyipi ewekë tro sa mekune hmaca la hnei Nyidrëti hna thele the së. Tune lo hna qaja hnei Davita, Iehova a ameköti së thenge la aqane pë ethan la mele së.
14. Pine nemene matre thaa tro pi kö sa mekun, ka hape, thaa ijiji së kö troa pë ethan la mele së hnene laka itre atr ka ngazo së?
14 Pane mekune jë së laka, Iehova Akötresie a thele la itre hni ne la itre atr enehila, laka, traqa koi itre miliar la etrun. (1 A.l.ite.jo. 28:9) Ijetre la hnei Nyidrëti hna öhne ka thele troa pë ethan la mele i angatr? Eje hi laka, xalaithe hi la itre atr ka ujë tune lai! Ngo thaa tro pi kö sa mekun ka hape, thaa ijije kö troa pë ethan la mele së, ke, itre atr ka ngazo së. Loi pe, tune lo aqane mekune i Davita me Iobu, hetre nyipi kepine matre tro sa lapaune laka, tro Iehova a öhne la aqane mele së ka pë ethan, ngacama itre atr ka ngazo së. The thëthëhmine kö së ka hape, thaa hnene kö laka ka pexeje la atr, tre, tro ha pë ethan la mele së. Könitre hi lao atr ka pexeje ka mele ekö e celë fen, ngo thaa hna thele pë hë hnene la ala lu troa pë ethan la mele i nyidro, kola qeje Adamu me Eva. Ketre hetrenyi la itre milio lao atr ka thaa pexeje kö, ka thele troa pë ethan la mele i angatr. Haawe, ijije nyipunieti mina fe troa ujë tune lai.
15. Nemene la aqane amamane Davita ka hape, ka nyipi ewekë la troa pë ethan la mele së e easa ajane troa eatre la hne së hna mejiune kow?
15 Pine laka Iehova a troa ameköti së thenge la aqane thele së troa pë ethan la mele së, haawe, ka nyipi ewekë catre lai kowe la mejiune së elany. Hnei Davita hna jele nyipicine lai. (E jë la Salamo 41:12.) Hnei angeice hna hnine catrëne la mejiune celë, ene la troa kepe angeice hnei Iehova uti hë epine palua. Ketre tune la itre nyipi Keresiano enehila, hnei Davita hna mejiune troa mele palua, ene pe hnei angeice hna acatrene hnyawa pala hi la aqane imelekeu i angeic me Iehova Akötresie, me nyihlue i Nyidrë. Atrehmekune hi Davita laka, maine angeic a ajane troa eatre la hnei angeice hna mejiune kow, ene la troa mele epine palua, haawe, nyipi ewekë tro angeice a thele troa pë ethan la mele i angeic. Ketre tune mina fe, Iehova a cilëgöli së me ini së, me eatrongë së me amanathithi së, e tro sa thele troa pë ethan la mele së.
16, 17. (a) Pine nemene matre easa catre thele troa pë ethan la mele së? (b) Nemene la itre hnyinge hne së hna troa ce ithanatane ngöne la hna cinyihane ka troa xulu?
16 Maine easa ajane troa mele madrine enehila, haawe, ka nyipi ewekë catre la mejiun. Ej a thue madrine së ngöne la easa cile kowe la itre jol. Kolo mina fe a thupëne la mekune së hnene la mejiun. The thëthëhmine kö së laka, Tusi Hmitrötr a aceitunëne la mejiune memine la itrapetre ne isi. (1 Thes. 5:8) Tune la ketre itrapetre ne isi, laka, ej a thupëne la he ne la sooc ngöne la isi, kolo mina fe a thupëne la mekuna së hnene la mejiun, qa ngöne la itre mekune ka thaa loi kö nge ka iwangangazonyi hna akökötrene hnei Satana ngöne la fene celë ka ngazo. Maine pëkö the së la mejiun, haawe, ka gufa la mele së. Nyipi ewekë tro sa waipengö së hnyawa, me wange la pengöne la mele së ka pë ethan, memine la pengöne la mejiune së. The thëthëhmine kö së laka, maine tro sa thele troa pë ethan la mele së, haawe, easë hi lai a cilëgöline la musi cile i Iehova me thupëne hnyawa la mejiune së ka sisitria. Epi tro pala hi sa catre thele troa pë ethan la mele së!
17 Pine laka ka sisitria catre la troa pë ethan la mele së, nyipi ewekë tro sa ce ithanatane la itre xaa hnyinge celë. Nemene la nyine tro sa kuca matre troa pë ethan la mele së? Tune kaa la aqane tro sa catre xome pala hi la aqane mele cili? Nemene la nyine troa kuca maine thaa hna thele kö hnene la ketre atr troa pë ethan la mele i angeic ngöne la ketre hnepe ijin? Tro pë hë sa ce ithanatane la itre hnyinge celë ngöne la hna cinyihane ka troa xulu.
[Ithueamacany]
a Hnei Iesu hna qaja ka hape: “Qa ngöne lai, meköti pi nyipunie, mate tune me Tetetro i nyipunie ka meköti e hnengödrai.” (Mat. 5:48) Eje hi laka, trotrohnine hnyawa hi nyidrëti ka hape, ngacama itre atr ka ngazo së, ngo ijiji së hi troa pexej me pë ethan ngöne la ka ijij. Ijije tro pe sa trongëne la hna amekötine celë, la troa nyipi hnime la itre xan, ke, aqane ujë lai ka amadrinë Akötresie. Ngo Iehova hmekuje hi la ka pexej ngöne la nöjei götrane asë. Haawe, ame la easa xome la hnaewekë hna hape “ka pë ethan” matre troa qeje Nyidrë, tre, kolo mina fe lai a qaja ka hape, ka pexeje Nyidrë.—Sal. 18:30.
Tune Kaa La Aqane Tro Nyipunieti a Sa?
• Nemene la aliene la hna hape, troa pë ethan la mel?
• Nemene la ka amamane ka hape ka ce tro la aqane mele së ka pë ethan memine la troa sajuëne la musi cile ne la Akötresie?
• Tune kaa la aqane nyitrepene la mejiune së hnene la troa pë ethan la mele së?