Ita Ne Thup göi 15 Febuare e Normandie

Nyima 11 me 07 Qene Drehu

Tro Kö Nyipunieti A Thele Troa Pë Ethan La Mele I Nyipunie?

“Tha tro kö ni a tije qaja la thinange ka pë ethan, uti hë meci hë ni!”—IOBU 27:5.

1, 2. Nemene la huliwa nyine tro sa thele troa kuca, nge nemene la itre hnyinge hne së hna troa ce wang?

PANE mekune ju nyipunie laka, nyipunieti a goeëne hnyawa la itre tulu ne la ketre uma. Nyipunieti a haine la ixatua hna hamëne hnene la tulu cili. Epuni a madrin, ke, epuni a mekune la itre thangane hna troa kapa hnene la hnepe lapa i epuni me epuni mina fe qa ngöne lai uma. Ngo eje hi laka, tro ha xatua nyipunie hnene lai itre tulu ne uma cili memine la itre hna mekun, e hnei nyipunieti hna xupe la uma me lapa huti ngön, me nyihnyawane ej.

² Ketre tune mina fe, maine jë easa mekun ka hape ame la troa pë ethan la mele së, tre, ketre thiina ka sisitria lai ka troa xatua së memine la itre hne së hna hnim. Ngo tro hë sa kepe thangane qa ngöne la troa pë ethan la mel, e hne së hna catre huliwa me thele troa nyihnyawane pala hi la mele së matre troa pë ethan. Ame ngöne la fene celë enehila, tre, ka tru thupene catre la troa kuca la itre tulu ne uma. (Luka 14:28, 29) Ketre tune mina fe, tru catre la traeme me trengecatr hna nue matre troa pë ethan la mele së, ngo loi pe thaa tro kö a gufa. Celë hi matre, loi e tro sa ce ithanatane la köni hnyinge celë: Tune kaa la aqane troa pë ethan la mele së? Tune kaa la aqane tro së itre Keresiano a nyihnyawane pala hi la mele së matre troa pë ethan? Nemene la nyine troa kuca maine kola mama ngöne la ketre ijine laka, ka hetre ethane la mele ne la ketre atr?

Tune Kaa La Aqane Troa Pë Ethan La Mele Së?

3, 4. (a) Tune kaa la aqane tro Iehova a xatua së matre troa pë ethan la mele së? (b) Tune la hna amamane hnei Iesu, tune kaa la aqane tro sa thele troa pë ethane la mele së?

³ Hne së hna wange ngöne lo hna cinyihane hnapan, laka, Iehova a wanga atrunyi së hnene la hna nue së troa isa axeciën ka hape, easë jë kö a hane thele troa pë ethan la mele së. Ngo loi pe, thaa Nyidrëti kö a nue së troa ketre sipu cile kowe la jole cili. Nyidrëti a ini së la aqane troa eëne la thiina ka sisitria cili, me hamëne gufane koi së la uati hmitrötre i Nyidrë, matre troa xatua së troa trongëne la itre ini i Nyidrë. (Luka 11:13) Ketre, Nyidrëti mina fe a thupëne ngöne la götrane la ua la itre atr ka catre thele troa pë ethan la mele i angatr.—Ite edomë 2:7.

⁴ Tune kaa la aqane ini së hnei Iehova troa pë ethan la mele së? Ame la hnapan, tre, ene la hna upi Iesu, Hupuna i Nyidrë, troa tro kowe la fen. Pexeje la aqane idrengethenge i Iesu. Hnei nyidrëti hna “denge thenge uti hë la mec.” (Fil. 2:8) Ngacama akötre koi Iesu, ngo hnei nyidrëti pala hi hna drengethenge la Tretretro i nyidrë e koho hnengödrai ngöne la nöjei ewekë hnei nyidrëti hna kuca. Öni nyidrëti koi Iehova, ka hape: “Tha eje kö troa longëtine la hanengëngö, ngo jiniati pe la hanengë i cilie.” (Luka 22:42) Loi e tro së, isa ala caas, a hnyingëne thel, ka hape, ‘Hapeu, eni kö a hane drengethenge tune lai?’ Maine tro sa catre drengethenge cememine la itre aliene hni ka loi, haawe, tro pala pë hë a pë ethan la mele së. Tro sa pane wange la itre xaa götrane la mel, laka, ka nyipi ewekë catre la troa drengethenge.

5, 6. (a) Hnei Davita hna amamane tune kaa la enyipiewekëne la troa thele troa pë ethan la mele së, ngacama thaa öhnyi së kö hnene la itre xaa atr? (b) Ame ngöne la angatre caas, nemene la itre jole hna qëmeke kow enehila hnene la itre Keresiano, göne la troa pë ethan la mele i angatr?

⁵ Nyipi ewekë tro sa drengethenge Iehova ngöne la easë caas. Hnei Davita hna amamane la enyipiewekëne la troa pë ethan la mel, ngöne lo itre ijine nyidrëti caas. (E jë la Salamo 101:2.) Ngöne laka ketre joxu nyidrë, haawe, hna xötreithi nyidrëti pala hi hnene la itre atr. Thaa sihngödri kö koi së laka, hnei Davita pala hi hna thele troa pë ethan la mele i nyidrë ngöne la gaa tru atr. (Aceitunëne jë me Salamo 26:12.) Maine kola ajane hnene la joxu troa hamëne la ketre tulu ka loi kowe la nöje i nyidrë, haawe, nyipi ewekë tro nyidrëti a thele troa pë ethan la mele i nyidrë ngöne la itre ijine cili. (Deu. 17:18, 19) Ngo hnei Davita hna atrehmekune laka, ame ngöne la nyidrëti caas e ‘hnine la uma i nyidrë,’ tre, nyipi ewekë pala hi troa pë ethan la mele i nyidrë. Nemene la ini koi së?

⁶ Ame ngöne la Salamo 101:3, öni Davita ka hape: “Tha tro kö ni a amë qëmekenge la kete ewekë ka ngazo.” Ame enehila, nyimutre la itre ijine kola amë qëmeke së la itre ewekë ka gufa, nge kola mama hnyawa lai ngöne lo easë caas. Celë hi matre ame la troa kuci ëternet, tre, ketre itupathe ka tru kowe la ka ala nyim. Canga hmaloi hi troa iaö së hnene la itre iatre ne kuci ngazo ka mama jëne ej. Ngo maine tro sa goeëne la itre ewekë cili, hapeu, easë kö a drengethenge la itre trenge ewekë hna cinyihane hnei Davita qaathei Akötresie? Maine tro sa goeëne la itre iatre ne kuci ngazo, tre, canga tro hi a hetre ethan itre ej kowe la mele së; itre ej a ahlëne me akökötrene la itre aja ka ngazo, me adrone la mekuthethewe me angazone trootro la aqane imelekeu ne la lue trefën, me thaipiëne la itre xan.—Ite edomë 4:23; 2 Kor. 7:1; 1 Thes. 4:3-5.

7. Ame ngöne la easë caas, nemene la trepene meköti ka troa xatua së troa pë ethan la mele së?

⁷ Eje hi laka, pëkö hlue i Iehova ka lapa caas. Kolo pala hi a wanga atrunyi së hnene la Tretretro së ka ihnim. (E jë la Salamo 11:4.) Drei la kola madrine hnei Iehova ngöne la Nyidrëti a öhnyi nyipunieti e thipetrije la iaö! Maine tro pala hi nyipunieti a ujë tune lai, haawe, tro hë nyipunieti a wanga atrune la eamo hna hamëne hnei Iesu ngöne Mataio 5:28. Qa ngöne lai, catre pi së troa thipetrije la itre iatr ka troa iaö së troa kuca la ngazo. Thaa tro pi kö sa nue la aqane ujë nyine hmahman, ene la troa goeëne maine e pena la itre ewekë ka amamai kuci ngazo, troa athixötrëne la mele së ka pë ethan!

8, 9. (a) Nemene la jole hnei Daniela memine la itre sine trongei angeic hna qëmeke kow, göne la troa pë ethane pala hi la mele i angatr? (b) Tune kaa la aqane tro la itre thöthi Keresiano a amadrinë Iehova memine la itre trejine Keresiano?

⁸ Ketre, ijije mina fe troa pë ethan la mele së hnene la hna drengethenge Iehova ngöne la easë memine la itre atr ka thaa lapaune kö koi Nyidrë. Pane mekune jë së lo tulu i Daniela memine lo köni sine tronge i nyidrë. Pine laka itre thöthi angatr, hna akalabusi angatr e Babulona. Ame e cili, tre, hna ukune lai angetre Heberu ka ala foa, troa xeni la itre hnei Iehova hna wathebon, qëmekene la itre atr ka thatre Iehova kö. Maine jë tro la itre thupëtresiji cili a mekune ka hape, thaa ka ngazo kö troa ujë tune lai. Eje hi lai laka, thaa öhne fe kö hnene la itre keme me thin memine la angetre Iudra ka macaj, memine fe la itretre huj, la hnei angatr isa ala caas hna kuca. Ngo drei la ka troa atre? Iehova hmekuje hi. Celë hi matre hnei angatre hna cile catr me drengethenge Nyidrë, ngacama catrehnine la itupath nge meci la pune koi angatr.—Dan. 1:3-9.

⁹ Ame e cailo fen, tre, kolo mina fe a hane cile catre hnene la itre thöth ka anyipici Iehova, ke, angatr a cilëgöline la itre trepene meköt i Akötresie, me neëne troa kei kowe la itupath ka catrehnin. Maine nyipunieti, itre thöth, a thipetrije troa xomi dorog me isi me qeje ka sis me kuca fe la itre xaa huliwa ka ngazo, haawe, nyipunieti hi lai a drengethenge Iehova. Maine tro nyipunieti a ujë tun, tre, nyipunieti hi lai a thele troa pë ethan la mele i nyipunie. Tro hë nyipunieti a kapa la itre manathithi ka loi koi nyipunie, me amadrinë Iehova cememine la itre Keresiano!—Sal. 110:3.

10. (a) Nemene la itre mekune ka ngazo göne la kuci ngazo, ka ukune la itre xaa thöth troa angazone la mele i angatr? (b) Nemene la aqane troa aijijë së hnene la mele ka pë ethan troa hmekëne la kuci ngazo?

¹⁰ Nyipi ewekë mina fe tro sa hetrenyi la hni ne drengethenge ngöne la easa ce mel, easë itre trahmanyi me fö. Atre hi së laka, Tusi Hmitrötr a wathebone la kuci ngazo. Ngo canga tro hi sa wanga hmalohmaloeëne la aqane tro sa drengethenge. Drei la ketre ceitun, hnene la itre xaa thöthi hna qene sodoma, maine amë pena la kahmitrötre i angatr ngöne la që i fö, maine kolo pena a huliwane menune la götrane gaa hmitrötre i angatr; angatr a mekune laka, thaa itre huliwa ka ngazo kö lai, ke, thaa kolo kö a “ce meköle trefën.” Ngo ame la itre thöthi cili, tre, angatr a thëthëhmin, maine iëne pena troa thaa drengethenge la hna qaja hnei Tusi Hmitrötr, ka hape ame la troa kuci ngazo, tre, kolo mina fe a qaja la itre huliwa cili, ketre aqane ujë ka ngazo, laka, maine tro angatr a kuca pala hi lai, tre, ijije troa upetröne eë angatr qa hnine la ekalesia.a Pëkö ewekë ka ngazo catre hune la troa wanga acone la troa pë ethan la mel. Maine easa ajane troa pë ethan la mele së, haawe, thaa tro pi kö sa thele kepine matre troa kuca la itre huliwa ka ngazo. Ketre, thaa tro pi kö sa mekun ka hape, ka pë pune la ewekë ka ngazo hne së hna kuca. Thaa tro kö sa goeëne hmekuje hi la itre thangane la hna iameköti hnene la ekalesia. Loi pe tro sa wanga atrune la nyine tro sa kuca matre troa amadrinë Iehova me thipetrije la itre ewekë ka troa akötrëne la itre aliene hni Nyidrë. Loi e tro sa iananyi catr memine la ngazo me “kötene pi la kuci ngazo,” ngo thaa tro pe sa thele troa easenyin. (1 Kor. 6:18) Qa ngöne lai easa amamane hnyawa laka, easë la itre atr ka thele troa pë ethan la mele së.

Tune Kaa La Aqane Troa Thele Pala Hi Troa Pë Ethan La Mele Së?

11. Pine nemene matre ka nyipi ewekë catre la itre huliwa hne së hna kuca matre troa drengethenge? Qeje pengöne jë.

¹¹ Easa eatrëne la aja së troa pë ethan la mele së hnene la hna drengethenge; haawe, easa thele pala hi troa pë ethan la mele së hnene la hna xomihni ahoeanyi ngöne la easa drengethenge. Maine jë tro sa xanadrone la aqane tro sa drengethenge, hnene laka ketre hnepe jole ka co hi. Ngo ame la aqane drengethenge cili, tre, ej a anyipicine laka easa thele troa pë ethan la mele së. Drei la ketre ceitun: Maine jë thaa tro kö sa nyipi ewekëne la caa etë, ngo e tro pe sa hleme la nyimu etë me iatëkeune itre ej, haawe, ijije hi tro sa xupe la ketre uma ka mingöming. Qa ngöne lai, maine tro pala hi sa catre drengethenge, haawe, easë hi lai a thele troa pë ethan la mele së.—Luka 16:10.

12. Hnei Davita hna hamë tulu tune kaa, göne la troa thele pala hi troa pë ethan la mele së qëmeken la iakötrë memine la itre ewekë ka thaa meköti kö?

¹² Kola mama laka easa catre pala hi troa pë ethan la mele së, ngöne la easa xomihni ahoeanyi ngöne la itre itupath, me iakötrë, maine ngöne pena la itre ewekë pena ka thaa meköti kö. Pane ce wange jë së la tulu i Davita ngöne la Tusi Hmitrötr. Ngöne lo thöthi pala kö Davita, hnei angeice hna xomihni ahoeanyi ngöne lo kola icilekeu me angeic hnene la ketre joxu ka mekune menune ka hape, nyidrëti hi la ka cilëne la musi Iehova. Ngo thaa hnei Iehova kö hna kepe Saulo Joxu, ene pe hnei angeic hna zalu catre koi Davita, lo atr hnei Iehova hna kapa. Ngo hnei Saulo hna musi pala hi, celë hi matre hnei angeice hna elemekene la trongene isi Isaraela me tro troa weji Davita. Xalaithe hi la itre macatre ne nue Iehova la ewekë ka thaa meköti cili. Hapeu, hnei Davita kö hna elëhni koi Akötresie? Hapeu, hnei angeice kö hna axeciën ka hape, pëkö kepine troa xomihni ahoeany? Ohea. Hnei Davita pe hna thele troa metrötrëne hnyawa la göhnë thei Saulo, ene lo siana i Akötresie, me neëne troa akötrë angeic ngacama hetre ijine tro Davita a lepi Saulo.—1 Sam. 24:2-7.

13. Tune kaa la aqane tro sa thele pala hi troa pë ethan la mele së, e hna akötrë së?

¹³ Drei la ketre tulu ka sisitria catre hna hamë së enehila hnei Davita! Easa ce huliwa memine la itre atr ka ngazo ka sine la itre ekalesia e cailo fen, celë hi matre ijije tro la ketre atr a akötrë së maine thaa mele nyipici pena. Eje hi laka, easa madrine troa mele ngöne la ketre ijine kola caasi hnene la nöje i Iehova e cailo fen, nge thaa tro kö a hane angazone ej. (Is. 54:17) Ngo tune kaa la aqane tro sa ujë ngöne la kola akötrë së hnene la ketre atr? Maine tro sa elëhni kowe la ketre trejine me easë, haawe, tro hë sa angazone la mele së ka pë ethan koi Akötresie. Thaa tro pi kö sa elëhni menu koi Iehova pine la aqane ujë ne la itre xan, maine troa hmahmaca pena troa mele nyipici koi Nyidrë. (Sal. 119:165) Maine tro sa xomihni ahoeanyi ngöne la itre itupath, haawe, tro hë lai a xatua së troa pë ethan pala hi la mele së.

14. Tro la itre atr ka pë ethan la mel a ujë tune kaa, ngöne la kola saze la itre aqane eköthe la huliwa, memine la itre ini hna hamëne hnene la organizasio?

¹⁴ Ketre, ijije mina fe troa pë ethane pala hi la mele së hnene la hna neëne la aja troa ixöjetrij maine troa qeje gelen pena la itre xan. Celë hi aliene la troa mele nyipici koi Iehova. Atraqatre la aqane amanathithine hnei Iehova enehila, la nöje i Nyidrë. Ketre pengöne kö la aqane atrune la hmi ka wië enehila e celë fen. (Is. 2:2-4) Ame ngöne la kola saze la aqane troa qeje pengöne la itre xötr ne la Tusi Hmitrötr maine itre xaa ewekë pena, tre, loi e tro sa kapa itre ej. Atraqatre la madrine së troa öhne la itre hatrene ka anyipicine laka, kolo pala hi a kökötre la lai ngöne la götrane la ua. (Ite edomë 4:18) Maine jole koi së troa trotrohnine la ketre ewekë hna saze, haawe, loi e tro sa sipo ixatua qaathei Iehova matre troa trotrohnine hnyawa la ewekë cili. Ketre, maine tro sa xomihni ahoeanyi ngöne la aqane drengethenge së, haawe, tro ha pë ethane pala hi la mele së.

Tune Kaa Kö E Thaa Hna Thele Kö Hnene La Ketre Atr Troa Pë Ethan La Mele i Angeic?

15. Drei hmekuje hi la ka ijije troa thapa la mele i nyipunieti ka pë ethan?

¹⁵ Hapeu, thaa ketre hnyinge kö la ka sisitria koi së? Tune lo hne së hna ce wange hë ngöne lo hna cinyihan hnapan, ka hape nyipi ewekë catre la troa pë ethan la mele së. Maine paatre kö the së la mele cili, haawe, thatreine kö tro sa imelekeu hnyawa me Iehova, me hetre nyipi mejiun. Loi e troa hnehene hnyawa laka, caasi hmekuje hi la atr e celë fen me e koho hnengödrai ka troa thapa la mele i nyipunie ka pë ethan. Ame la atr cili, tre, nyipunieti hi. Hnei Iobu hna öhne la enyipicine lai. Öni angeice ka hape: “Tha tro kö ni a tije qaja la thinange ka pë ethan, uti hë meci hë ni!” (Iobu 27:5) Maine tro sa catre me easenyi pala hi koi Iehova, haawe, tro hë lai a xatua së troa pë ethan la mele së.—Iako. 4:8.

16, 17. (a) Maine hnene la ketre atr hna kuca la ketre ngazo ka tru, nemene la ewekë nyine thaa tro kö a kuca? (b) Nemene la ewekë nyine troa kuca?

¹⁶ Ngo thaa hna thele kö hnene la itre xan troa pë ethan pala hi la mele i angatr. Tune lo ewekë ka traqa ngöne lo mele petre kö lo itre aposetolo, laka hna kei hnene la itre xaa Keresiano kowe la kuci ngazo. Maine kola traqa la ewekë cili koi nyipunie, hapeu, pë hë ixatua ka ijij? Ohea. Nemene la nyine troa kuca? Hetrenyi la itre ewekë thaa nyine tro kö a kuca; celë hi nyine tro së a pane ce wang. Ame la pengöne la atr, tre, ene la troa juetrëne la ngazo hna kuca kowe la itre keme me thin, me itre Keresiano maine itre qatre thupe pena. Ngo kola amekunë së hnei Tusi Hmitrötr ka hape: “Ame la ate juetëne la ite hnei nyëne hna shashaith, te, tha tro kö a manathith; ngo troa hnime la ate amamane me tij’ it’ ej.” (Ite edomë 28:13) Ame la itre ka thele troa juetrëne la itre ngazo i angatr, tre, aqane ujë lai ka ngazo catr, ke, pëkö ewekë ka ijij troa juetrëne koi Akötresie. (E jë la Heberu 4:13.) Hnene la itre xan hna thele troa lue qëmek, ngöne la angatr a uune fë ka hape angatr a nyihlue i Iehova, ngo ame ngöne la ketre götran, tre, angatr a catre kuca la ngazo. Maine tro sa mele tune lai, tre, thaa easë kö lai a thele troa pë ethan la mele së. Thaa madrine kö Iehova la aqane hmi koi Nyidrë hnene la itre atr ka juetrëne la itre ngazo ka tru hna kuca hnei angatr. Kolo jë pe lai a aelëhni Nyidrë pine la itre aqane huliwa thoi cili.—Ite edomë 21:27; Is. 1:11-16.

¹⁷ Ame ngöne la kola kuca la ketre ngazo ka tru hnene la ketre Keresiano, tre, hetrenyi la itre hna amekötine ka nualai hna hamën hnei Tusi Hmitrötr, nge ka amamane la nyine tro angeic a kuca. Ijine hi la troa sipo ixatua thene la itre qatre thup. Hnei Iehova hna acile la itre qatre thup matre tro angatr a xatuane la itre atr ka trene mec ngöne la götrane la ua. (E jë la Iakobo 5:14.) Thaa tro pi kö sa nue la xoue ihaji maine iameköti pena troa sewe së troa thele egöcatrene la mele së. Hapeu, ka inamacane kö la atr ka pane nue troa akötrë angeice hnene la hna xöji angeic, göi troa neëne matre thaa tro kö angeic a mec?—Heb. 12:11.

18, 19. (a) Kola amamane tune kaa jëne la tulu i Davita, laka, ijije hmaca troa pë ethan la mele së? (b) Nemene la ewekë hne së hna thele troa kuca, göne la troa pë ethan la mele së?

¹⁸ Hapeu, nyipici kö laka, ijije tro sa aloine la meci së ngöne la ua? Maine hetre ewekë hë ka nyi ethanyine la mele së, hapeu, ijije hmaca kö troa pë ethan ej? Pane ce wange hmaca jë së la tulu i Davita. Hnei angeice hna kuca la ketre ngazo ka tru. Hnei angeice hna meciune la föe ne la ketre trahmany, me nyi xetë me thele troa humuthe la föi eahlo ka pë gelen. Eje hi laka, jole catre koi së troa mekun laka, ame ngöne la ijine cili, tre, thaa hnei Davita kö hna thele troa pë ethan la mele i angeic. Ngo hapeu, ka pë nyine kö la jole celë? Hnei Davita hna kapa la ketre ihaji ka catr, ketre ihaji ka nyipi ewekë catre koi angeic. Nge hnene laka, ka nyipici hnyawa la aqane ietra i angeic, ene pe hnei Iehova hna utipi angeic. Hnei Davita hna xomi ini qa ngöne la ihaji me thele hmaca troa pë ethan la mele i angeic, hnene la hna drengethenge Akötresie me xomihni ahoeanyi ngöne la aqane mele i angeic. Ame la hna melëne hnei Davita, tre, ej a amamane hnyawa la enyipicine la itre trenge ewekë celë ngöne Ite Edomë 24:16, kola hape: “Ke troa a luengemene la o kei la ate ka meköt, me mejë hmaca.” Nemene la thangane lai? Pane ce wange ju së la aqane qeje Davita hnei Iehova koi Solomona, thupene la angeic a mec. (E jë la 1 Ite Joxu 9:4.) Hnei Akötresieti hna qeje Davita, ceitu memine la ketre atr ka pë ethan la mel. Qa ngöne lai, ijiji Iehova hi troa köle trije la itre ngazo ne la itre atr ka ietra ngacama ka tru ju hë la itre ngazo cili.—Is 1:18.

¹⁹ Nyipici, maine tro pala hi nyipunieti a drengethenge Akötresie cememine la ihnim, haawe, tro hë nyipunieti a ketre atr ka pë ethan la mel. Thele jë troa xomihni ahoeanyi cememine la nyipici, nge maine hnei nyipunieti hna kuca la ketre ngazo ka tru, amamane jë laka ka nyipici la aqane ietra i nyipunie. Drei la enyipiewekëne la tro sa thele pala hi troa pë ethan la mele së! Epi tro së, isa ala caasi a catre tui Davita, me ce qaja ka hape: “Ngo ame ni, te, tro ni a trongëne la meköting.”—Sal. 26:11.

[Ithueamacany]

Tune Kaa La Aqane Tro Nyipunieti a Sa?

• Tune kaa la aqane tro nyipunieti a ketre atr ka pë ethan la mel?

• Nemene la itre aqane tro nyipunieti a thele pala hi troa pë ethan la mel?

• Maine hetre ethanyine hë la mele së, tune kaa ijije hmaca kö troa pë ethan ej elany?