Ita Ne Thup göi 01 Maac e Normandie
Nyima 18 me 12 Qene Drehu
Catre Pi Së Troa Anyipicin
“Hnei nyidëti hna ahnithe koi huni troa cainöje kowe la nöj, me anyipicine.”—ITE HU. 10:42.
1. Ame ngöne la kola ithanata koi Konelio hnei Peteru, nemene la hnëqa hnei nyidrëti hna wanga atrun?
HNENE la ketre tane isi angetre Roma hna icasikeune la itre atrene la hnepe lapa i angeic memine la itre sinee i angeic, nge angatr a troa sin la ketre ewekë ka ketre pengön ngöne la aqane ujë i Akötresie kowe la itre atr. Konelio la ëjene la atr cili atre xoue Akötresie. Hnei aposetolo Peteru hna qaja kowe la lapa hna troa cainöje kow hnene la itretre drei nyidrë, ka hape, hnëqa ne la itre aposetolo troa “cainöje kowe la nöj, me anyipicine” göi Iesu. Nyimutre la itre thangane ka loi hna kapa qa ngöne la hnei Peteru hna cainöj. Hnene la itre Atr Hna Thaa Peritomone Kö hna kapa la ua i Akötresie, me hane xome la bapataiso, nge hetrenyi fe hë thei angatre la mejiune troa ce cilëne me Iesu la hna nyi joxu e koho hnengödrai. Drei la ketre manathithi ka tru hna kapa hnei Peteru qa ngöne la hnei angeice hna anyipicin!—Ite hu. 10:22, 34-48.
2. Easa atre tune kaa laka, ame la hnëqa troa anyipicin, tre, thaa thatraqane hmekuje kö lo 12 lao aposetolo?
2 Kolo ewekë lai ka traqa ngöne lo macatre 36 M.K. Ngo ngöne la lue macatre qëmeken, hna ujë la aqane mele ne la ketre atr ka catre icilekeu ekö memine la itre Keresiano. Ngöne la gojenyi ne tro Damaseko, hnei Iesu hna mama pi koi Saulo atre Taraso, me qaja, ka hape: “Cilejë, trojë kowe la lapa, nge tro ha qaja koi’ ö la qâ i’ ö troa kuca.” Hnei Iesu hna akeukawane la hni Anania, ketre hlue i nyidrë, me ahnithe laka, tro Saulo a anyipicine “kowe la nöjei ethen, me nöjei joxu, me ite nekö i Isaraela.” (E jë la Ite Huliwa 9:3-6, 13-20.) Ame la kola traqa thei Saulo, tre, öni Anania jë hi, ka hape: “Hna ië eö hnei Akötesieti ne la ite xötapane shë . . . ke tro eö a anyipici nyidë kowe la nöjei ate asë.” (Ite hu. 22:12-16) Hna hë Saulo pë hë e thupene ka hape, Paulo, ngo tune kaa la aqane nyipi ewekëne angeic la hnëqa ne troa anyipicin?
Hnei Nyidrëti Hna Anyipicin!
3. (a) Nemene la edromë hne së hna troa wange hnyawa? (b) Hnene la itre qatre thup ne Efeso hna kapa tune kaa la maca i Paulo, nge nemene la tulu ka loi hnei angatre hna hamë së?
3 Ka lolo catre troa ce wange me inin’ asë la itre hnei Paulo hna kuca e thupen, ngo ame enehila, tro hi sa pane ce wange la ketre cainöj hnei nyidrëti hna hamëne ngöne lo macatre 56 M.K.; hna cinyihane ej ngöne la tusi Ite Huliwa mekene 20. Hnei Paulo hna cile fë la cainöje cili, hmekune lo kola nyi hnaakönine tro fë hnei nyidrë la huliwa ne mesinare. Hnei nyidrëti hna traqa e Mileto ngöne la hna xepe hnei he ngöne la Hnagejë ne Égée, nge hna upi nyidrë kowe la itre qatre thupe ne la ekalesia ne Efeso. Ngacama fifitre hi lao kilomet matre traqa pi e Efeso, ngo hna nango hmitre la tronge i nyidrë, ke, ngazo catre la itre gojeny. Pane mekune jë së la madrine ka eje thene la itre qatre thup ne Efeso, ngöne la angatr a kapa la maca i Paulo. (Aceitunëne jë me Ite Edomë 10:28.) Ngo eje hi laka, hetre nyine tro angatr a kuca, göi troa hnëkë ne tro Mileto eë. Maine jë hnei itre xane hna xomi ijine mano me thinge pena la itre setroa i angatr? Ala nyimu enehila la itre Keresiano ka hane ujë tune lai, matre thaa tro jë pi kö angatr a triane la ketre götranene la Kovasio ne distrik ngöne la nöjei macatre.
4. Nemene la isasaqe hnei Paulo hna nyenyapën koi itre xaa macatre hi ngöne lo nyidrëti e Efeso?
4 Hapeue la mekuna i nyipunie, nemene la hnei Paulo hna kuca e Mileto ngöne lo lai könitre maine foa lao drai ne treqene nyidrëti la itre qatre thup? Maine nyipunieti ju fe, tre, nemene la hnei nyipunieti hna troa kuca? (Aceitunëne jë me Ite Huliwa 17:16, 17.) Kola xatua së troa sa la hnyinge celë hnene la itre trenge ewekë hnei Paulo hna qaja kowe la itre qatre thupe ne Efeso. Hnei nyidrëti hna qaja la aqane mele i nyidrë ngöne lo itre macatre, ene mina fe ngöne lo nyidrëti ekö e Efeso. (E jë la Ite Huliwa 20:18-21.) Pine laka atre hi nyidrëti laka, pëkö atr ka atreine troa icilekeu me nyidrë, ene pe öni nyidrëti, ka hape: “Ate hë nyipunie la thinange ngöne la nöjei ijine hnenge thei nyipunie, qane ngöne la drai hnapane lo traqa ni e Asia . . . kola anyipicin.” Nyipici, hnei nyidrëti hna catre eatrëne la hnëqa hnei Iesu hna upi nyidrë troa kuca. Hnei nyidrëti hna kuca tune kaa la hnëqa cili ngöne lo nyidrëti e Efeso? Ame la ketre aqane anyipicine nyidrë koi angetre Iudra, tre, ene la troa tro kowe la itre götrane gaa tru atr. Kola qaja hnei Luka ka hape, ame ngöne lo Paulo e Efeso ngöne lo itre macatre 52 koi55 M.K., tre, hnei nyidrëti hna “ikelikelë me iele angate” hnine la sunago. Pine laka kola “xeti . . la hni [ne la angetre Iudra], nge tha hmala kö,” tre, hnei Paulo hna tro pena kowe la ketre götranene la traon, ngo kolo pala hi a cainöj. Celë hi matre hnei nyidrëti hna anyipicine koi angetre Iudra me angetre Heleni ngöne la traone atraqatre cili.—Ite hu. 19:1, 8, 9.
5, 6. Pine nemene matre ka xecie hnyawa e kuhu hni së laka, ame la Paulo a cainöj ngöne itre hnalapa trootro, tre, nyidrëti a ithanata kowe la itre atr ka thaa lapaune kö koi Akötresie?
5 Ame thene lo itre atr hnei Paulo hna ithanata kow e Mileto, tre, hetrenyi la itre xan ka Keresiano hë nge ka ijije hë troa hane xome la hnëqa ne qatre thup. Hnei Paulo hna amekunë angatr la aqane cainöje nyidrë, öni nyidrëti, ka hape: “Tha hnenge hna juetëne la kete ewekë ka nyipi, ngo hna amamane koi nyipunie me ini nyipunie qëmeke ne la nöj, me ngöne la kete uma me kete uma.” Ame ngöne la hneijine së enehila, tre, hnene la itre xaa atr hna qaja, ka hape, Paulo a tro cili göi troa wange hi la itre sine hmi nyidrë. Ngo thaa eje kö. Ame la aliene la hna hape, nyidrëti a ‘ini qëmekene la nöj, me ngöne la ketre uma me ketre uma,’ tre, kolo lai a qaja lo itre atr ka thaa lapaune kö koi Akötresie hnei Paulo hna cainöje kow. Hna amamane hnyawa lai jëne la itre hna qaja hnei nyidrë. Hnei nyidrëti hna anyipicine me ithuecatre “koi angete Iuda, me angete Heleni fe, ka hape, troa ietra koi Akötesie, me lapaune koi Joxu shë Iesu Keriso.” Eje hi laka, hnei Paulo hna anyipicine me cainöje kowe lo itre ka thaa hmi kö, nge ka ajane troa ietra me lapaune koi Iesu.—Ite hu. 20:20, 21.
6 Kola qeje pengöne la tusi Ite Huliwa 20:20 hnene la ketre trahmanyi ka inin me thele troa trotrohnin la Itre Hna Cinyihan qene Heleni, öni nyidrëti ka hape: “Köni macatre ne lapa Paulo e Efeso. Hnei nyidrëti hna tro kowe la itre hnalapa, me cainöje kowe la nöjei atr asë (xötre 26). Celë hi lai trepene la huliwa ne cainöj ngöne itre hnalapa trootro, me ngöne la itre icasikeu.” Maine nyipici la hna qaja hnene lai trahmany, ka hape, hnei Paulo hna tro kowe la nöjei hnalapa, maine thaa nyipici pena kö, ngo loi pe ame la aja i Paulo, tre, ene laka, thaa tro pi kö la itre qatre thup ne Efeso a thëthëhmin la aqane anyipicine i nyidrë memine la itre thangane qa ngöne lai. Hnei Luka hna qaja ka hape: “Denge asë hë la angete lapa e Asia la wesi ula i Joxu Iesu, angete Iuda me angete Heleni fe.” (Ite hu. 19:10) Ngo tune kaa la aqane tro la angetre Asia “asë” a drenge la maca, nge nemene la ewekë hna amamane hnene lai ngöne la aqane tro sa anyipicin?
7. Hna hetre thangane tune kaa, la aqane cainöje i Paulo thene lo itre atr hnei nyidrëti hna cainöje kow?
7 Nyimutre la itre ka drenge la maca i Paulo, pine laka hnei nyidrëti hna catre cainöje ngöne la itre götrane gaa tru atr me ngöne itre hnalapa trootro. Nemene fe la mekuna i nyipunie göne la nöjei atr asë ka drenge la maca, hnei angatr asë hi hna lapa pala hi e Efeso? Pë jë kö ka hane tro e angatr kowe la ketre nöj göi troa thele huliwa, maine troa ce mele memine pena la ketre atrene la hnepe lapa i angatr maine göi tro pena hi a thele loi thatraqane la mele i angatr? Ohea. Ame enehila nyimutre la itre atr ka tro kowe la ketre nöj, pine la itre kepine cili; maine jë ka tui nyipunieti jë fe hi. Ketre, ame ngöne la ketre götran, tre, hna traqa e Efeso la itre atr qa ngöne la itre xaa nöj, göi troa thele loi me mani. Ijine cili hi la angatr a ixelë me Paulo e Efeso, maine drenge pena la nyidrëti a anyipicin. Nemene la ewekë ka traqa ngöne la angatr a bëeke hmaca kowe la itre nöje i angatr? Kolo fe ha hane anyipicine hnene lo lai angetre kapa la nyipici. Ame la itre xan, tre, ngacama thaa itre ka lapaune kö, ngo angatre fe a hane qaja la itre hnei angatre hna drenge e Efeso. Celë hi matre, hnene la itre atrene la lapa i angatr me itre atr ka lapa easenyi angatr memine la itre sine huliwa i angatr hna drenge la maca, ame hnene la itre xaa ka drenge hna kapa ju. (Aceitunëne jë me Mareko 5:14.) Nemene la hna amamane hnene la itre thangane la hne së hna anyipicin?
8. Hnene la itre atr ka lapa e Asia hna atre tune kaa la nyipici?
8 Ame petre kö lo nyidrëti a cainöj e Efeso, hnei Paulo hna cinyihane ka hape, ‘ase hë thawa koi nyidrëti la qëhnelö ka isaisa, me hetre huliwan.’(1 Kor. 16:8, 9) Nemene lai qëhnelö cili, nge hna thawa tune kaa koi nyidrë? Hnei Paulo hna catre cainöj e Efeso, ene pe hna kökötre lolo la maca ka loi. Pane ce wange jë së lo la köni traon ezin e Efeso, ene Kolose me Laodikea, me Hierapoli. Ngacama thaa traqa ju fe kö Paulo e cili, ngo hna traqa fe la maca ka loi ngöne la itre nöje cili. Epafera la ketre atrene la götrane cili. (Kol. 2:1; 4:12, 13) Hapeu, ma hnei Epafera jë hna drenge la cainöje i Paulo e Efeso, matre hane jë fe hi angeice lö hnine la hmi Keresiano. Thaa hna qaja kö hnei Tusi Hmitrötr. Ngo ame ngöne la Epafera a cainöjëne la nyipici ngöne la nöje i angeic, tre, angeice hi lo lai ka nyi trenge ewekë i Paulo. (Kol. 1:7) Maine jë hnene la maca ne Keresiano hna hane ketr mina fe la itre traon, e Filadelefia me Saradi me Thuataira, ngöne lo itre macatre ne Paulo a anyipicine e Efeso.
9. (a) Nemene la aja ka ej e kuhu hni Paulo? (b) Nemene la taan la macatre 2009?
9 Celë hi matre, hna kapa hnene la itre qatre thup ne Efeso la kepin ka sisitria celë hna qaja hnei Paulo, kola hape: “Ngo tha ini kö a nyipi ewekëne la melenge mate nyipi koi ni, mate tro ni a umuthe la hna isasaqeng memine la qânge hnenge hna kapa qa thei Joxu Iesu, troa anyipicine la maca ka loi ne la ihnimi gufa i Akötesie.” E hnine la xötre cili, la kola mama la taan la macatre ne huliwa 2009, ketre mekun ka ithuecatr me ka ixatua, kola hape: “Anyipicine Jë La Maca Ka Loi.”—Ite Hu. 20:24.
Loi e Tro Sa Anyipicine Ngöne La Hneijine Së
10. Easa atre tune kaa, laka, nyipi ewekë mina fe koi së troa anyipicin?
10 Ame la “troa cainöje kowe la nöjei nöj, me anyipicin,” tre, hna amekötine lai kowe la itre aposetolo me itre xane fe. Thupene jë hi la kola amele Iesu hmaca, hnei nyidrëti hna ithanata kowe la ala 500 lao itretre drei nyidrë ngöne lo angatr a icasikeu e Galilaia, nyidrëti a amekötine ju koi angatr, me hape: “Qa ngöne lai, trojë nyipunie a inine la nöjei nöj’ asëjëihë, me bapataiso angate kowe la atesiwa i Tetetro, me Hupuna, me Uati Hmitöt; ini angate jë troa trongëne la nöjei ewekë asëjëihë lo hnenge hna ahnithe koi nyipunie.” Ame la hna amekötine celë, tre, thatraqane fe la nöjei Keresiano asë ngöne la hneijine së, tune la hna amamane hnene la itre trenge ewekë i Iesu, kola hape: “Hana wang, ini a ce me nyipunie ngöne la nöjei drai asëjëihë uti hë la pune la fene hnengödrai.”—Mat. 28:19, 20.
11. Nemene la huliwa ka sisitria ka aijijëne hnyawa la itre atr troa atrehmekune la Itretre Anyipicine i Iehova?
11 Kola catre pala hi hnene la itre Keresiano troa drengethenge la hna amekötine celë, ene la troa catre “anyipicine la maca ka loi.” Ame la aqane troa anyipicin, tre, troa kuca tune lo hnei Paulo hna qaja kowe lo itre qatre thup ne Efeso, ene la troa cainöj ngöne itre hnalapa trootro. Ame hnine la ketre itus ka mama ngöne lo macatre 2007, kola qeje pengöne la aqane troa maca ngöne la huliwa ne mesinare, tre, hnei David G. Stewart, Jr., hna qaja ka hape: “Kola mama hnyawa ngöne la aqane ithawakeun hnene la Itretre Anyipicine i Iehova la mejiune i angatr, la etrune la thangan e troa inine mekötine la itre atr, angatr isa ala caas, hune la troa [hamë ini qa hune ita hmitrötr]. Ketre huliwa ka sisitria catre kowe la Itretre Anyipicine i Iehova la troa ce thawa memine la itre xan la mejiune i angatr.” Nemene hë la thangane lai? “Ame ngöne lo macatre 1999, tre, kolo hi a e la 2/100 uti hë 4/100 la etrune la itre atr hnenge hna öhne ngöne la lue traone ka tru ne la götrane Ahië ne Erop, hna ithanata kow hnene la itre mesinare i Mormo. Nge traqa kö koi 70/100 la etrune la itre atr ka qaja, ka hape, a nyimua traqa hnene la Itretre Anyipicine i Iehova troa ithanata me angatr.”
12. (a) Pine nemene matre loi e troa xome la “nyimu ijin,” matre troa cainöj ngöne itre hnalapa trootro ngöne la teritoare së? (b) Ijije kö tro nyipunieti a qaja la ketre hna melëne hnene la ketre atr, laka, hna saze pë hë e thupen la aqane ujë i angeic kowe la maca së?
12 Maine jë hna traqa tune mina fe lai kowe la itre atr ne la götran hnei nyipunieti hna mele ngön. Thaa ka traqa xane kö la ewekë cili, ngo hnene la hnei nyipunie hna catre huliwa. Pine la hnei nyipunieti hna tro troa ce “ithanata memine” la itre atr ngöne la itre hnalapa i angatr, haawe, kola aijijë nyipunieti troa cainöje kowe la itre trahmanyi me itre föe me itre thöth. Maine jë thaa hnene kö la itre xan hna drei së, ngacama “nyimu ijin” qaa së hna wai angatr. Maine jë pena hnene la itre xan hna nango drei së ngöne la easa amamane koi angatr la ketre xötr, maine ketre mekune qa hnine la Tusi Hmitrötr. Nge ame pena ha la itre xaa hnei nyipunieti hna cainöje kow, hnei angatr hna kapa hnyawa la maca. Ame asë hi ngöne la itre götrane cili, tre, ijije tro sa “anyipicine la maca ka loi.” Atre hnyawa hi së, laka, nyimutre la itre atr hna “anyimua ithanata” ha memin ngo gufa kö la hni ne ajan, ngo e thupenë hë, hna ujë la pengö i angatr. Hetre ewekë jë ka traqa koi angatr, maine kowe la ketre atr hnei angatre hna hnim, ene pe hna ketr la mekun memine la hni angatre hnene la nyipici. Ame enehila, tre, itre trejine me easë fe hë angatr. Qa ngöne lai, the kucakuca kö, ngacama thaa öhne pala kö nyipunie la itre atr ka hetre hni ne ajan. Maine nyipici laka, thaa tro pi kö sa treqene me mekune, ka hape, tro asë hë la itre atr a lö kowe la nyipici, ngo ame la hnei Akötresieti hna thele the së, tre, ene la tro sa catre anyipicin.
Maine Jë Sihngödri Köi Së La Itre Thangan
13. Ngacama thatre kö së, ngo tune kaa la aqane troa hetre thangane la hne së hna anyipicin?
13 Ame la thangane la hnei Paulo hna cainöj, tre, thaa kolo hmekuje kö a mama thene lo itre hnei nyidrëti hna xatuane mekötine troa hane hmi Keresiano; tro fe hi lai a ceitune me easë. Haawe, loi e troa xecie e kuhu hni së laka, tro sa catre kuca la huliwa ne cainöj ngöne itre hnalapa trootro, me anyipicine kowe la ka ala nyim. Loi e tro sa cainöjëne la maca ka loi kowe la itre atr ka lapa ezi së me itre sine huliwa së, me itre sine ini së memine fe la itre sinee së. Hapeu, atre kö së la itre thangane lai? Ame thene la itre xan, tre, ma hna canga hetre thangane ka loi jë. Ame pena thei itre xan, hna pane lapa meek la itine feja ne la nyipici e kuhu hni, ngo e nango qea ha, kolo ha cia waan ngöne la hni ne la atr me kökötr. Ame pena thei itre xan, tre, pë ju kö cia, ngo ame la itre hne së hna ithanatane me angatr, me itre hne së hna mejiun kow memine la aqane ujë së, tre, maine jë tro angatr a amexeje koi itre xan. Nyipici, thatre kö angatr, laka, angatre hi lai a nue jëne la itre itine feja ne la nyipici troa cia e kuhu hni ne la itre atr ka hetre hni ne ajan.
14, 15. Nemene la itre thangane qa ngöne la hna anyipicine hnene la ketre trejine trahmany?
14 Tro sa pane ce wange la ketre ceitun: Kola mele e Florida e Etazini hnei Raian memine la fö i angeic, Mandi la ëjen. Ame ngöne la hna huliwa i angeic, hnei Raian hna cainöje kowe la ketre sine huliwa i angeic. Ketre Hindou la trahmanyi cili, nge hna ketri nyidrë hnene la aqane heetre i Raian memine la aqane ithanata i angeic. Ame ngöne la itre xaa ijine porotrike nyidro, hnei Raian hna qeje pengöne la mele hmaca memine la pengöne la itre ka mec. Ame ngöne la ketre heji ne Januare, hnene lai trahmanyi hna hnyingëne kowe la fö i nyidrëti, Jodi la ëjen, la hnei nyidroti hna atre göne la Itretre Anyipicine i Iehova. Ketre Katolik eahlo nge hnei eahlo hna qaja, ka hape, caasi hi la hnei eahlo hna atre hnyawa göne la itretre Anyipicine i Iehova, laka, angatre pala hi a “cainöje ngöne itre hnalapa trootro.” Celë hi matre hnei Jodi hna thele la pengöne la “Itretre Anyipicine i Iehova” ngöne ëternet, ene pe traqa ju hi eahlo kowe la sipu aderes i angatr, ene www.watchtower.org. Traqa ha koi köni treu ne e Jodi la itre itus ngöne la aderes cili, ene la Tusi Hmitrötr memine fe la itre hna cinyihane hnei eahlo hna ajan.
15 Ame ngöne la ketre ijin, ixelë ju hi Jodi me Mandi, pine laka lue ka huliwa nyidro memine la itre droketre. Atraqatre la madrine i Mandi troa sa la itre hnyinge i Jodi. Thupene la itre hnepe ijin, tru hë la hnei nyidro hna porotrik, kösë porotrikëne ju hi nyidro “qaane Adamu uti hë Amagedo,” tune la aqane qaja i Jodi. Ene pe hnei Jodi hna kapa troa hane inine la Tusi Hmitrötr. Thaa hmitre ju kö nge eahlo fe hë a hane traqa troa sine la itre icasikeu. Ame hë lo treu Okotropa, Jodi hë a hane cainöj, nge thupene lai, hnei eahlo hna xome la bapataiso ngöne lo treu Febuare. Eahlo a cinyany, ka hape: “Pine laka atre hë ni enehila la nyipici, nyipi lolo me tingetinge hë la meleng.”
16. Tune kaa la aqane uku së troa catre anyipicine hnene la hna melëne hnene la ketre trejine trahmanyi e Florida?
16 Thaa mekune pi kö Raian ka hape, troa hetre thangane la hnei angeice hna cainöje kowe lo trahmany, tune mina fe lo itre xaa hnei angeice hna cainöje kow. Ngo angeice pë hë a atre e thupen la thangane la hnei angeice hna catre “anyipicin.” Maine jë hnei nyipunieti hna anyipicine ngöne itre hnalapa trootro me ngöne la hna huliwa i maseta, me ngöne la hna ini maine pena e cahu gojeny; nge maine jë hnene lai aqane anyipicine i nyipunieti cili hna aijijëne la itre xan troa hane drenge la maca ka loi. Ceitui Raian me Paulo ekö laka, thatre kö nyidrëti la itre thangan la hnei nyidrëti hna anyipicin ngöne “la distrik ne Asia,” ketre thatre kö së la nöjei thangane asë ka loi hna troa kapa qa ngöne la hne së hna anyipicin. (E jë la Ite Huliwa 23:11; 28:23.) Ngo catre pi pe së anyipicin, tre, celë jëne mele lai!
17. Nemene la nyine tro sa catre kuca ngöne la macatre 2009?
17 Ame ngöne la macatre 2009, epi tro sa wanga atrune hnyawa la hna amekötine koi së, ene la troa catre anyipicine ngöne itre hnalapa trootro me ngöne la itre xaa aqane cainöje kö. Maine tro sa ujë tune lai, haawe, tro hë së a hane hetrenyi la itre aliene hni ka eje thei Paulo, öni nyidrë: “Tha ini kö a nyipi ewekëne la melenge mate nyipi koi ni, mate tro ni a umuthe la hna isasaqeng memine la qânge hnenge hna kapa qa thei Joxu Iesu, troa anyipicine la maca ka loi ne la ihnimi gufa i Akötesie.”
Tune Kaa La Aqane Tro Nyipunieti a Sa?
• Ame ngöne lo hneijine i Iesu, hnei Peteru me Paulo me itre xan hna anyipicine tune kaa?
• Ame ngöne la itre xaa ijin, thaa mekune kö së la etrune la thangane la hne së hna anyipicin. Nemene la kepine lai?
• Nemene la taan la macatre 2009, nge pine nemene matre, ka loi hi la taan celë?
[Iatr ne la götran 3]
Ame la taane la macatre 2009, tre: “Anyipicine jë la maca ka loi.”—Ite Huliwa 20:24.