Catre Pi Së Troa “Anyipicin”
1, 2. Nemen la hne së hna hain ngöne la aqane goeëne Paulo la troa cainöjëne la maca ka loi, nge tune kaa la aqane troa sa xötrethenge la tulu i nyidrë, ene la troa “anyipicin”?
1 Hnei Paulo hna catre troa cainöjën la maca ka loi, me “anyipicin” la Baselaia thenge la hnei angeic hna atreine troa kuca, angeic a xötrethenge la tulu i Iesu memine la itre xaa hlue i Akötresie ekö. Ame mina fe ngöne lo nyidrëti e hnine la kalabus, hnei nyidrë hna “kapa la nöjei ate asë hna traqa koi nyidrë, me cainöjëne la baselaia i Akötesie, me inine la nöjei ewekë göi Joxu Iesu Keriso, hnene la tenge cat.”—Ite Hu. 28:16-31.
2 Easë mina fe, ijije hi tro së a hane catre “anyipicin” ngöne la nöjei ijine asë. Kola qaja la easë a anyipicine kowe la itre atr hne së hna iöhnyi memin ngöne la easë a tro kowe la hnë Kovasio Ne Distrik, me ngöne la kola bëeke hmaca, hna hape, “Atrunyi Akötresieti Jë,” me ngöne la nöje hnë icasikeu.—Ite Hu. 28:23; Sal. 145:10-13.
3. Tune kaa la aqane tro sa kuca matre ame la aqane tro sa anyipicin, tre, ene la troa cainöj ngöne la ijin ka ijij, ngo thaa ene hmekuje kö la troa cainöj ngöne la nöjei ijin?
3 Easë a Cainöj Ngöne La Nöjei Ijin Maine Ngöne La Ijine Ka Ijij? Hetre eisapengönene kö caha lue aqane cainöj? Eje hi. Ame la hna hape ngöne la nöjei ijin, tre ketre ijin ka traqa xane pi hi tune la, thaa hne së kö hna treqen maine thaa hna thë kö, pine laka, thaa hna hnëkëne kö maine thaa ka nyipi ewekë kö. Eje hi laka thaa kolo kö la a qejepengöne la huliwa ne cainöje së. Maine ewekë lai ka eje thei Paulo, eje hi laka ka nyipi ewekë mina fe koi së la troa atrunyi Akötresie hnene la aqane anyipici Nyidrëti hne së, nge loi e troa eje the së la aja troa anyipicin ngöne la itre götrane hne së hna tro kow, ngöne lo hneijin ne hnaön. Ngo ame la aqane tro sa nyiqaane ithanata memine la itre xaa atr, tre hna hëne lai ka hape kola cainöj ngöne la ijine ka ijij—ene laka, thaa xou së kö troa ithanata memine la itre atr, menyik me thaa jole kö troa porotrike me angatr. Nyimutre la itre thangane ka lolo hne së hna kapa qa ngöne la aqane troa cainöje celë.
4. Nemen la ka aijijë Paulo troa anyipicin qa ngöne la götrane hnei nyidrëti hna lapa?
4 Hnëkë Jë Troa Anyipicin: Hnei Paulo hna thele me mekune la itre ijine ka ijij troa anyipicin, ngacama e hnine la kalabusi e Roma. Hnei nyidrëti hna hëne la itre hene la nöj ne Iudra kowe la hnei nyidrëti hna lapa. (Ite Hu. 28:17) Ngacama hetrenyi la ketre ekalesia i keresiano e Roma, ngo atre hi Paulo laka thaa tru kö la itre ithuemacanyi hna kapa hnene la itretre Iudra ne la traon, ngöne la lapaune ne la itre Keresiano. (Ite Hu. 28:22; Rom. 1:7) Thaa hnei nyidrëti kö hna cipan troa “anyipicin” göi Iesu Keriso memine la Baselaia i Akötresie.
5, 6. Nemen la itre ijine ka ijij tro sa cainöj, nge nemene la aqane tro sa hnëkë hnyawa kowe lai?
5 Canga mekune jë la itre atr hnei epuni hna troa iöhnyi memin ngöne la itre hnei epuni hna tro, itre atr ka thatre hnyawa kö la pengö së Itretre Anyipici Iehova. Maine jë thatre fe kö angatr ka hape ketre götrane la huliwa së la troa inine la Tusi Hmitrötr me angatr ngöne la itre hnalapa i angatr. Thele jë la itre ijine ka ijij troa anyipicin e cahu hnei epuni hna tro, maine ngöne la itre hna pane mano qëmekene troa xome hmaca la gojeny, maine ngöne la itre hna xomi saas, maine hna itö, maine ngöne hotel, maine ngöne la kola xeni ngöne restora, maine hnine kar maine itre xaa götrane ju kö. Canga hnëkëne jë la nyine tro epuni a qaja matre troa nyiqaan la porotrik me troa hane pane anyipicin. Maine jë ame ngöne la xötrei, ma ka loi e troa pane anyipicin ngöne la nöjei ijine ka ijij kowe la itre atr ka lapa ezi së, me itre sinee së, me itre sine huliwa së, me itre xaa atr ju kö hne së hna atre.
6 Nyipi ewekë tro sa hetrenyi la itre itus nyine tro sa xome trongën ngöne la easë a cainöje ngöne la nöjei ijine ka ijij. Nemene itus? Maine jë troa xome la tarak Ajane Kö Nyipunie Troa Atre Hnyawa La Tusi Hmitrötr? Amamane hnyawa jë lai faifi lao pane paragaraf, ka hamën la itre kepine ka nyimutre ngöne la enyipiewekën la troa e la Tusi Hmitrötr. Amamane jë la itre mekune ngöne la pune lai tarak, göi troa sipon troa inine la Tusi Hmitrötr. Maine kola drei së hnene la itre atr, hamëne ju la boroshür Thele. Ame ngöne la easë a canga mekun maine troa ithanata memine la itre atr ka qaja la ketre qene hlapa, xome trongëne jë lo sine boroshür hna hape, Une bonne nouvelle pour toutes les nations. Kola qejepengöne ngöne la götrane 2 la aqane troa xome ej matre cainöj. Maine easë a ti kar, atreine hi tro sa hane xome la itre xaa itus, ka ijije troa hane hamën kowe la itre atr ka ce të me easë nge ka hetre hni ne ajan troa dreng la maca ne Baselaia.
7, 8. Nemen la nyine tro sa hmekën ngöne la aqane tro sa heetr me isej me aqane ujë së e cahu hne së hna tro me ngöne la itre xaa ijin?
7 Thupëne Kö Aqane Heetr Me Isej Me Aqane Ujë Së: Loi e troa xecie hnyawa koi së laka, ame la aqane ujë së memine la hnaheetre së me aqane iseji së, tre, thaa tro kö wangangazon maine ‘qaja angazon’ pena la organizasio i Iehova pine la itre ewekë cili. (Ite Hu. 28:22) Thaa eje hmekuje kö ngöne la ijine easë a sine la kovasio, ngo ngöne mina fe e cahu hne së hna tro me thupene la drai ne kovasio. Hna hmekë së hnene la zonal, La Tour de Garde ne 1 Ogas 2002, götrane 18, paragaraf 14, kola hape: “Loi e thaa tro pi kö a sasaithi tulu me ngazo pala ha la aqane heetre së me aqane iseji së, me amaman la itre xaa hnepe götrane la ngönetrei së, ngo thaa he hnyawa pe itre ej. Ketre, loi e troa mama la aqane ‘ahmitrötrë Akötresieti’ hne së, hnene la aqane heetre së. Ewekë lai nyine tro sa mekune hnyawa. Thaa kolo hmekuje kö a troa thupën la aqane heetre së ngöne la itre icasikeu ne la ekalesia [maine ngöne itre ijine kovasio] nge kola wangacone pë hë ngöne la itre xaa ijin. Loi e tro pala hi la aqane heetre së me aqane iseji së a amamane hnyawa ka hape, hetrenyi the së la metrötr, nge lolo la thiina së pine laka, itre keresiano me itre hlue së ngöne la nöjei drai.”—1 Tim. 2:9, 10.
8 Loi e tro sa heetre hnyawa nge troa hetre hni ne metrötr. Maine tro pala hi la aqane heetr me aqane iseji së me aqane ujë së a amaman la lapaune së koi Akötresie, thaa tro jë kö së a cil troa cainöj ngöne la nöjei ijine ka ijij; ngöne hi laka, pëkö ewekë ngöne la aqane heetre së me aqane iseji së ka athixötrën la huliwa ne cainöje së.—1 Pet. 3:15.
9. Nemen la thangane ka lolo qa ngone la hna anyipicin hnei Paulo e Roma?
9 Hetre Thangane Ka Loi La Troa Cainöje Ngöne La Nöjei Ijine Ka Ijij: Hnei Paulo hna öhne la itre thangane ka lolo qa ngöne la hnei nyidrëti hna catre anyipicin, ngöne lo lue macatre ne lapa nyidrë hnine la kalabus e Roma. Hna qaja hnei Luka ka hape, “ite xan’ a kapa la tenge ewekë hna qaja.” (Ite Hu. 28:24) Hnei Paulo hna qaja la elolon la aqane “anyipicine” nyidrë, ene pe hnei nyidrëti hna cinyihan ka hape: “Ame la nöjei ewekë hna traqa koi ni, te, hna ujëne nyine aciane la maca ka loi; celë hi mate mamapi ngöne la hnalapa i joxu asë, me cailo asë, laka hna othi ni pi Keriso. Nge ala nyimu la ite tejine thei Joxu hna thue catene hnene la hna othi ni, me kola cate titije troa qaja la tenge ewekë nge tha qou kö.”—Fil. 1:12-14.
10. Nemen la thangan ka lolo la hna anyipicin hnene la lue trefën ngöne lo macatre hnapan?
10 Thupene la hna sin la drai ne kovasio ne distrik, hnene la ketre trefën hna cainöje ngöne la ketre ijine ka ijij matre hnei nyidro hna ithanata memine la ketre föe ka huliwa ngöne la ketre ume tri; hnei eahlo hna hnyingë nyidro la pengöne la itre baj, hetre thangane catr la hnei nyidro hna cainöj. Hnei nyidro hna porotrikën koi eahlo la kovasio memine la mejiun hna hamën hnene la Tusi Hmitrötr thatraqane la itre atr ngöne la itre drai elany. Hnei nyidro hna hamën koi eahlo la tarak hna hape Ajane Kö Nyipunie Troa Atre Hnyawa La Tusi Hmitrötr? me qejepengöne la hna amekötin göi troa etid memine la itre atr. Ene pe önine jë hi la föe ka hape, eahlo a ajan troa hane wai eahlo, haawe, hnei eahlo hna hane cinyihan la ëje i eahlo me hnalapa ngöne lai pune la tarak, me sipon tro la lue trefën a wange pëhë la itre nyine troa kuca. Nemen fe la itre lolo hne së hna troa kapa qa ngöne la hne së hna catre “anyipicin” ngöne la macatre celë?
11. Nemen la itre thiina ka loi nyine tro sa akökötren matre troa haöth la maca ka loi ngöne la hneijine hnaöne celë, ene la troa “anyipicin”?
11 Loi e Tro Sa Catr Akökötren La Maca Ka Loi: Mekune ju së la madrin ka eje thei Paulo ngöne lo nyidrëti a drenge laka, hna xötrethenge hnene la itre sine huliwa i nyidrë Keresiano la aqane catre cainöje i nyidrë! Epi tro fe së a hane kuca asë la hne së hna atrein matre troa haöthe la maca ka loi, ene la troa cainöjën ngöne la nöjei ijine ka ijij la itre ini qa hnine la Tusi Hmitrötr, nge tro fe hë së a hane kepe manathith qa ngöne la kovasio ne distrik ka troa xulu.
[Hna eköhagen götrane 3]
Itre Itus Göi Troa Cainöje Ngöne La Nöjei Ijine Ka Ijij
■ Ajane Kö Nyipunie Troa Atre Hnyawa La Tusi Hmitrötr? (tarak)
■ Nemene La Hnei Akötresieti Hna Thele The Së? (boroshür)
■ Une bonne nouvelle pour les nations (sine itus)
■ Itre xaa itus
[Hna eköhagen götrane 4]
The Thëthëhmi Nyudrene Kö!
Drei la hna thaa troa thëthëhmin? Ene asë hi lo itre atr ka traqa troa hane sin la Drai Ne Amekunën la meci Keriso maine kolo pena lo itre ka sin la cainöj ka ketrepengöne kö. Hane kö së hë angatr troa hane sin la kovasio ne distrik ne la macatre celë? Maine tro sa hamën la ithuecatr ka lolo, alanyimu thei angatr ka troa hane sin la kovasio. Pine laka angatr a madrin la aqane ce mele ne la itre atr ngöne la ijine kovasio memine la porogaram ka ithuecatr ngöne la götrane la ua, haawe, tro hë angatr a easenyi catr koi Iehova memine la organizasio i Nyidrë. Tune kaa matre hë angatre fe me wang maine jë tro angatr a hane kapa la ihë? Qaja jë koi angatr la nöjei ithuemacany ka nyipi ewekë, tune la drai ne kovasio, me gojenyi ne tro cili hnë icasikeu, me itre hawa ne nyiqaan me nyipun, me itre hnepe mekun hna troa ithanatan jëne la porogaram hna hamën ngöne la pune la zonal Réveillez-vous ! ne 8 Juun 2003.