Atrunyi Iehova Jë Hnene La Troa Cainöj Ngöne La Nöjei Ijin
1 Kola thele hnene la itre hlue i Iehova la itre hnepe ijin troa atrunyi Nyidrë ngöne la nöjei drai. (Sal. 96:2, 3; Heb. 13:15) Ame la ketre aqan, tre, ene la troa cainöje ngöne la nöjei ijin. Nyimutre la itre hlue i Iehova enehila ka olene laka, hnene la ketre hna hane tro fë koi angatr la maca ne Baselaia ngöne la ketre ijin ka ijij, a hna cainöje koi angatr ngöne la nöjei ijin.
2 Ame la easë a cainöj ngöne la nöjei ijin kowe la ketre atr, easë hi lai a fe gojenyi kowe la itre xaa atr troa hane dreng la maca ne Baselaia. Hanawang la ketre ceitun, hnene la porotrike i Iesu memine la föe ne Samaria ngöne la timi Iakobo, hna hane aijijën la itre xaa atr ka ala nyim troa qatixenyën la maca ka loi. (Ioane 4:6-30, 39-42) Ame ngöne lo kola akalabusi Paulo me Sila e Filipi, hnei nyidroti hna cainöje kowe la ka thup, ene pe hna kapa pëhë la nyipici hnene la lapa ne lai atr cili.—Ite Huliwa 16:25-34.
3 Itre Hnepe Ijin: Nemen la itre hnepe ijin hnei nyipunieti hna thel, matre troa cainöje ngöne la nöjei ijin? Ame itre xan, tre angatr a cainöje ngöne la angatr a itö, me ti kar, maine itreqe pena thei droketre. Ame itre xan, tre, angatr a xome lo itre ijine angatr a mano maine ngöne hna huliwa maine ngöne hna ini. Maine tro hi së a xome amaman la ketre itusi së, haawe, tro hë la itre xan a thele troa atre la hmi së.—1 Pet. 3:15.
4 Aqane Troa Nyiqaan: Hnene la ketre nekö jajiny ka sevene lao macatre hna drenge ngöne la ketre ijine icasikeu, la kola qaja la enyipiewekën tro asë hi la itre trejine a cainöj. Haawe, ame la nyëne a ce tro memine la thine i nyën troa itö ngöne la ketre magazë, hnei nyën hna tro xometrongën hnine la watrenge i nyën la lue boroshür. Ame ngöne la kola nango hmitre hnei thine i nyën ngöne la kees, nyëne a nango hamëne ju kowe la ketre föe la boroshür, nge hnei nyiidro hna kapa madrin. Ame ngöne la kola hnyingëne koi nyën la kepin matre thaa xou i nyëne kö troa ithanata memine lai föe, hna sa hnene la nekö jajiny ka hape: “Hnenge hi hna ketre sipu qaja e kuhu hning ka hape, öi, tro pi hë! Ene pe eni a tro pi troa ithanata me eahlo!”
5 Maine easë a ajan troa cainöj ngöne la nöjei ijin, nyipi ewekë tro asë hi së a ujë tune la jajinyi cili. Nemen la ka troa xatua së? Thithi jë matre troa hetre trenge catr troa ithanata. (1 Thes. 2:2) Loi e troa canga hnëkën me lapa mekun la ketre hnying maine itre aqane troa qejepengöne xötreith la ketre mekun hna ajan troa porotrikën hnene la itre atr; itre nyine tro së lai a hnëkën matre troa nyiqaane ithanata me angatr. Thupene lai, loi e tro sa mejiune laka tro Iehova a amanathithin la itre huliwa hne së hna catre kuca.—Luka 12:11, 12.
6 Tro sa atrunyi Iehova me hetre madrine së, e hne së hna cainöje ngöne la nöjei ijin kowe la itre atr hne së hna iöhnyi memin o drai. Jëne tro lai a xatuan la itre atr troa hane trongën la gojenyi ne tro kowe la mele ka thaa ase palua kö.