Itretre Anyipicine Së Ngöne La Nöjei Ijin
1. Nemene la ini hne së hna xom qa ngöne lo edromë ka qeje Iesu e cainöje kowe lo föe ngöne la an?
1 Traqa ha koi itre hawa ne trongëne Iesu la itre gojeny. Kolo ha kucakuca me pi xeni hnei nyidrë. Ame ngöne lo kola tro hnene la itretre dreng troa itö xen, hnei nyidrëti pë hë hna mano ezine la ketre an, ka eje e tröne la lapa e Samaria. Eje hi laka, thaa Iesu kö e Samaria matre troa cainöj, ngo gojenyi nyidrëti pe lai a tro Galilaia matre troa sisedrëne la huliwa ne cainöje i nyidrë. Ngo ame pe, tre, hnei nyidrëti hna xome hnyawa la ijine cili, matre troa cainöje kowe la ketre föe ka troa tha tim. (Ioane 4:5-14) Pine nemene lai? Pine laka thaa hmaca kö Iesu troa ketre “ate anyipicine ka nyipici me meköt” i Iehova. (Hna ama. 3:14) Haawe, easa nyitipu Iesu hnene la troa Itretre Anyipicine i Iehova ngöne la nöjei ijin.—1 Pet. 2:21.
2. Tune kaa la aqane tro sa hnëkë hnyawa thatraqane la huliwa ne cainöj ngöne la nöjei ijin?
2 Loi e Troa Hnëkë Hnyawa: Ijije tro sa hnëkë hnyawa thatraqane la huliwa ne cainöj ngöne la nöjei ijin, hnene la troa ce xome me easë la itre itusi së. Nyimutre la itre ka cainöj ka xome trongëne la itre tarak me tro fë itre ej kowe la itre ka cilëne la itre setroa me itre ka cilë saas, me itre xaa atr kö hnei angatr hna troa ixelë memin ngöne la drai ka caas. (Ate cai. 11:6) Kolo pala hi a thupëne hnene la ketre trejine föe ka majemine tro kowe la itre nöj, ka hape, eje pala hi e kuhu hnin la watrenge i eahlo la Tusi Hmitrötr ka co memine lo itus Ini Tusi Hmitrötr, matre tro eahlo a thele troa nyiqaane porotrik memine la itre atr ka lapa ezi eahlo.
3. Tro sa nyiqaane tune kaa la porotrik?
3 Nyiqaane Jë Troa Porotrik: Ame ngöne la easa cainöj ngöne la nöjei ijin, thaa tro pi kö sa nyiqaane la porotrik hnene la hna qaja la ketre mekun qa hnine la Tusi Hmitrötr. Thaa hnei Iesu kö hna nyiqaane la porotrike i nyidrë memine lo föe ngöne la an, hnene la hna qaja koi eahlo, ka hape, nyidrëti hi la Mesia. Hnei nyidrëti hi hna sipo eahlo troa thue ime i nyidrë, ene pe ahlëne jë hi la aja i eahlo troa atre. (Ioane 4:7-9) Hnene la ketre trejine föe hna hane melëne la ewekë cili ngöne la kola hnyingë eahlo, ka hape, hetre madrine i eahlo kö troa atrune la itre feet ka tru; ene pe hnei eahlo hna nyiqaane la ketre porotrik. Thaa hnei eahlo kö hna sa, ka hape, ngazo koi eahlo troa atrune la itre feet cili, ke, ketre Atre Anyipicine i Iehova eahlo, ngo hnei eahlo pe hna qaja, ka hape, “Hnenge kö hna ketre sipu iëne troa thaa atrune la itre feet cili.” Haawe, hnene la atre hnying hna pi atre la kepine lai, ene pe kolo hi lai a aijijëne la trejine föe troa cainoj.
4. Pine nemene matre kola ithuecatre koi së hnene la tusi Mataio 28:18-20?
4 Ngacama ase hë Iesu catre xome lo huliwa ne cainöje i nyidrëti ekö e celë fen, ngo nyidrëti pala hi a wanga atrune la aqane eatrëne la huliwa ne cainöj enehila. (Mat. 28:18-20) Qa ngöne lai, epi tro sa xötrethenge la Tulu i Iesu, ene la troa Itretre Anyipicin ka hnëkë troa amamane pala hi kowe la nöjei atr la lapaune i angatr.—Heb. 10:23.