Aqane Troa Maca Ngöne La Hna Cainöj—Ketre Jëne Troa Cainöj Koi Angatr

Enyipiewekën: Ame la easa cainöje trootro ngöne la itre hnalapa, tre ala nyim la itre ka patr. Ngo ma tro së lai a iöhnyi me angatr ngöne la easa xomi kar, maine tro koi droketre, maine ngöne la easa pane mano ngöne la hna huliwa, maine hna ini pena. Ame la aja i Iehova, tre ene la tro nöjei atr a hane dreng la maca ne la Baselaia. (1 Tim. 2:3, 4) Ngo, loi e tro sa nyiqaane ithanata, matre ijije jë tro sa cainöj.

Aqane Kuca:

Waipengöi angatre hnyawa ju. Ka lolo kö la thiina ne lai atr, nge tro jë kö edrahe a pi porotrik me easë? Ka loi kö la traeme me hnë porotrik? Ame la itre xa ka cainöj, tre angatr a pane dredrehnyima kowe lai atr. Nge maine kolo fe a hane dredrehnyima lai atr, tre angatr a tupath troa nyiqaane porotrike me angeic.
Maine nango xou i epun troa nyiqaane ithanata, canga thithi ju.—Neh. 2:4; Ite hu. 4:29.
Nyiqaane ju hi hnei ibozu. Tha hnei Iesu kö hna nyiqaane qeje Baselaia kowe lo föe ne Samaria. (Ioane 4:7) Ame itre xa ijin, tre tro sa pane qaja aloine lai atr, ka hape: “Lolo catre la thiina ne la nekö i nyipo (nyipë)!” Maine pena troa hnying ka hape: “Drenge fe nyipëti eidri lo ketre nuvel?”
Ame hë la epuni a porotrike hnyawa memine lai atr, thele jë la aqane troa hane qaja koi angeice la maca ka loi, ngo the canga sesë menu kö. Porotrike hnyawa jë kö. Nge e ijine hë, qaja ju koi angeic la mekune ka troa upi angeice troa hnying. Maine epuni a ithanatane la pengöne la hnepe lapa, qaja jë ka hape: “Hetre mekune hnenge hna öhn, nge ka loi koi itre ka trene kuku.” Maine epuni a porotrikëne la ketre nuvel, qaja jë ka hape, “Eni petre hi a hane drei nuvele ka loi.” Maine epuni ha isa ije memine lai atr, nge pë ju kö traeme ne tro epuni a cainöjëne la maca ka loi, catre pi.
Xome trongëne jë la itre sine tarak, maine itre xa itus pena thatraqane la itre atr ka pi porotrikë Tusi Hmitrötr.

Tupathe Ju Ngöne La Treu Celë:

Tupathe ju ngöne la nöjei wiik, troa nyiqaane ithanata memine la itre atr hnei epuni hna iöhny memin; nge thele jë troa qaja koi angatr la maca ka loi.