Ijiji Nyipunieti Troa Cainöj Ngöne La Nöjei Ijin!
1. (a) Kola hapeue la troa cainöj ngöne la nöjei ijin? (b) Ala ij ngöne la icasikeu celë la itre trejine ka atre la nyipici jëne la hna cainöj ngöne la nöjei ijin?
1 Ala ij ngöne la itre ekalesia i nyipunie la itre trejine ka xötrei atre la nyipici jëne la hna cainöj hnene la ketre trejin ngöne la nöjei ijin? Maine jë tro nyipunieti a sesëkötre la etrun. Ame la easa cainöj ngöne la nöjei ijin, tre, kolo lai a hape, easa ce thawa la maca ka loi memine la atr hne së hna ixelë memin ngöne la nöjei drai ne mele së; tune la easa tro kowe la ketre nöj, me wange la itre sinee së me itre atr ka lapa ezi së, me tro troa itö, maine tro pena kowe la itre sine ce ini me easë me hna huliwa, me itre xane ju kö. Ame ngöne la ketre gurupe ne 200 lao Itretre Anyipicin ka bapataiso hë, traqa kowe la 40 koi 100 la etrune la itre atr hna ketr hnene la hna cainöj ngöne la nöjei ijin! Haawe, celë hi la ketre aqane cainöj ka hetre thangane catr.
2. Nemene la itre tulu qa hnine la Tusi Hmitrötr ka amamane laka, hetrenyi hë la itre atr ka cainöj ngöne la nöjei ijin?
2 Ame lo itre ka cainöj ngöne lo hneijine i Iesu, tre, hnei angatre hna lapaa hane cainöj ngöne la nöjei ijin. Drei la ketre ceitun, ame lo Iesu a trongëne la noje Samaria, hnei nyidrëti hna cainöj kowe la ketre föe ka traqa troa tha tim ngöne la ani Iakobo. (Ioane 4:6-26) Hnei Filipo hna nyiqaane la porotrike i angeic memine la ketre atr ka tru ne Aithiope ka e la tusi Isaia, hnene la hna hnyingë angeic, ka hape: “Trotrohninë hë nyipëti la hnei nyipëti hna e?” (Ite hu. 8:26-38) Ame ngöne lo kola akalabusi Paulo e Filipi, hnei nyidrëti hna cainöje kowe la ketre atre thupë kalabus. (Ite hu. 16:23-34) Ame e thupen, hnei Paulo hna “kapa [hnine la kalabus] la nöjei ate asë hna traqa koi nyidë, me cainöjëne la baselaia i Akötesie, me inine la nöjei ewekë göi Joxu Iesu Keriso.” (Ite hu. 28:30, 31) Ketre, ijiji nyipunieti fe troa cainöj ngöne la nöjei ijin, ngacama ka nango lapa thaupe pe hi nyipunie. Troa tune kaa lai?
3. Nemene la ka troa xatua së troa elë hun la xou e troa ithanata?
3 Aqane Troa Nyiqaan: Ala nyimu the së la itre ka öhnyi ejolene troa cainöje kowe la itre trehnyiwa. Ketre jole ka tru fe koi së la troa tro fë la nyipici kowe la itre atr hne së hna atre nge thaa Itretre Anyipicine i Iehova pe. Ngo tro ha upi së troa cainöj, e hne së hna sine thele la thiina ka loi i Iehova, me itre nyipici ka lolo hnei Nyidrëti hna hamëne kowe la itre hlue i Nyidrë, memine fe la pengöne mele ka ngazo ne la itre atrene la fene celë. (Yona 4:11; Sal. 40:5; Mat. 13:52) Ketre, loi e tro mina fe sa sipo ixatua qaathei Iehova, matre tro sa ‘catr.’ (1 Thes. 2:2) Önine la ketre trejin ka sine lo ini ne Gileada, ka hape: “Ame e itre xaa ijin, eni a wanga atrehmekune laka, ka ixatua catr la thith ngöne la kola jole koi ni troa cainöj kowe la itre atr.” Maine nyipunieti a luelue troa cainöj, haawe, pane thithi jë e kuhu hni nyipunie.—Neh. 2:4.
4. Nemene la aja nyine tro sa thele troa pane eatrën, nge pine nemen?
4 Ame la troa cainöj ngöne la nöjei ijin, tre, thaa nyipi ewekë kö troa nyiqaane la porotrik hnene la hna qaja la ketre aqane nyiqaane ithanata hna hnëkëne hë maine ketre xötr pena. Maine jë tro lai a xatua së troa eatrëne la aja celë, ene la troa nyiqaane porotrik memine la ketre atr, ngacama thaa easë kö a canga cainöje koi angeic. Nyimutre la itretre cainöj ka qaja ka hape, hnene la aqane cainöje cili hna xatua angatr troa qaane troa tro fë la maca ka loi. Maine xele kö la atr troa ithanata me easë, haawe, thaa tro kö sa iele angeic. Ngo loi pe tro sa nyipune la porotrik me nue angeic.
5. Nemene la ka xatuane la ketre trejine föe ka nango lapa pe hi, troa cainöj ngöne la nöjei ijin?
5 Maine kola ixelë hnene la ketre trejine föe ka lapa thaup memine la ketre atr ngöne la hna maketr, ijije tro eahlo a goeë angeic me hnyima. Maine kolo fe a hnyima hnene lai atr, haawe, ijiji eahlo hë troa nango qaja la ketre mekun. Maine kola sa hnyawa hnene lai atr, kolo lai a aijijë eahlo troa sisedrëne la porotrik. Eahlo a drenge hnyawa me thele troa atrehmekune la itre götrane la maca ka loi ka troa ketr lai atr. Hnene la aqane ujë celë, matre nyimutre catre la itre itusi hnei eahlo hna hamën, nge eahlo fe hë a hane nyiqaane inine la Tusi Hmitrötr memine la ketre atr.
6. Tro sa nyiqaane tune kaa la porotrik ngöne la easa cainöj ngöne la nöjei ijin?
6 Aqane Troa Nyiqaane La Itre Porotrik: Nemene la nyine tro sa qaja matre troa nyiqaane la ketre porotrik? Ame lo Iesu a cainöj kowe lo föe ngöne la an, tre, hnei nyidrëti hna pane sipo nyine iji thei eahlo, ene pe nyiqaane jë hi la porotrik. (Ioane 4:7) Maine jë tro sa nyiqaane la ketre porotrike hnene la hna pane ibozu, maine qaja pena la ketre hnying. Ame ngöne la easa ithanata memine la ketre atr, ijije tro sa qaja la ketre mekun qa hnine la Tusi Hmitrötr, me hane traan la ketre itine feja ne nyipici. (Ate cai. 11:6) Hnene la itre xan hna öhne laka, lolo catr e troa qaja la ketre ewekë ka troa ahlëne la aja ne la ketre atr, nge ka troa upi angeice troa hnyingë pengöne la ewekë cili. Drei la ketre ceitun, maine easa treqe droketre, maine jë tro sa nyiqaane la porotrik hnene la hna hape, “Tro ha elitrauje la madrineng ngöne la ijine thaa tro hmaca kö ni a wezipo.”
7. Troa xatua së tune kaa troa cainöj ngöne la nöjei ijin, hnene la hna atreine waiewekë?
7 Tro mina fe a xatua së troa nyiqaane la itre porotrik, hnene la hna atreine waiewekë. Maine easa öhne la ketre atr a ce traqa memine la ketre nekö i angeic nge ka lolo la thiina i nyën, maine jë tro sa qaja aloine la atre cili, me hnying ka hape, “Nemene la ka xatua nyipë troa ketre keme ka lolo?” Hnene la ketre trejine föe hna cinyanyine la itre taan mekun hna ithanatan hnene la itre sine ce huliwa i eahlo, nge thupene lai, eahlo a ce thawa me angatr la itre xaa ithuemacany nyine ixatua. Ame la eahlo a atre laka hetrenyi la ketre föe ka ce huliwa me eahlo ka mekune troa faipoipo, ene pe hnei eahlo hna hamëne koi angeic la ketre Réveillez-vous ! ka amamane la aqane troa hnëkëne la ketre faipoipo. Nge thupene lai, kolo ha porotrikë Tusi Hmitrötr hnei nyidro.
8. Tune kaa la aqane tro sa xome la itre itusi së matre troa nyiqaane la itre porotrik?
8 Ame la ketre aqane troa nyiqaane la itre porotrik, tre, ene la troa e la itre itusi së ngöne la itre götrane gaa mama koi atr. Tro la ketre trejine trahmanyi a xome la ketre hna cinyihan ka sisitria catr e hnine La Tour de Garde maine Réveillez-vous ! me nyiqaane e hnyawa la hna cinyihane cili. Maine angeic a öhne la ketre atr a goeëne la zonal, ijije hi tro la trejin a hnying maine qaja pena la itre hnepe mekune ka tru ne la hna cinyihan. Ame itre xaa ijin, tro lai a aijijë së troa nyiqaane la ketre porotrik me hane cainöje fe. Maine jë troa ahlëne la aja thene la itre sine huliwa së, hnene la hna amë la ketre itusi së ngöne la ketre götran gaa tiqa hnei atr, me hane upi angatre troa hnyingë pengöne ej.
9, 10. (a) Tune kaa la aqane troa thele ijine ka ijij troa cainöj ngöne la nöjei ijin? (b) Nemene la aqane eatrëne lai hnei nyipunie?
9 Thele Jë La Itre Ijine Ka Ijij Troa Cainöj: Pine laka nyipi ewekë catre enehila la huliwa ne cainöj, haawe, thaa tro kö sa goeëne la huliwa ne cainöj ngöne la nöjei ijin ceitu me ketre ewekë hna kuca xanën. Loi pe tro sa thele ijine troa cainöj ngöne la easa kuca la itre huliwa së o drai. Loi e tro sa pane mekune la itre atr hne së hna troa ixelë memin, me wange la aqane tro sa nyiqaane porotrike me angatr. Loi e tro mina fe sa tro xome la Tusi Hmitrötr me itre xaa itusi së, matre troa cainöj kowe la itre atr ka hetre hni ne ajan.—1 Pet. 3:15.
10 Maine tro la itretre cainöj a huliwane la inamacane i angatr, eje hi lai laka, tro ha hetre ijine ka ijije koi angatre troa cainöj ngöne la nöjei ijin. Hetrenyi la ketre trejine föe ka mele ngöne la ketre batima hna thupëne hnyawa, ka xome la itre iuma ne mano matre troa xupe la itre iatr ka amamane la emingömingöne la itre ewekë e celë fen. Ame la kola pane cile la itre atr me haine la elolone la itre ewekë hnei eahlo hna kuca, ene pe eahlo hi a xome ju la ijine cili matre troa nyiqaane porotrik, me qaja koi angatr la hna thingehnaeane hnei Tusi Hmitrötr göne la “hnengödrai ka hnyipixe, me fene hnengödrai ka hnyipixe.” (Hna ama. 21:1-4) Hapeu, ijije kö tro nyipunieti a thele la itre xaa jëne troa cainöj ngöne la nöjei ijin?
11. Tro sa akökötrene tune kaa la aja ne la ketre atr hne së hna cainöje kow ngöne la nöjei ijin?
11 Akökötrene Jë La Aja Ka Eje Thene La Atr: Maine tro sa öhne la ketre atr ka drei së hnyawa, haawe, loi e tro sa thele troa akökötrene la aja ka eje thei angeic. E ijij, maine jë tro sa qaja kowe la atr, ka hape: “Atraqatre la madrineng troa ce porotrike me nyipë. Tro hmaca nyiso a iöhnyi ekaa matre troa sisedrëne la porotrike i nyiso?” Ame la itre xaa ka cainöj, tre, angatr a hamëne la aderesi me numero ne telefone i angatr, me qaja ka hape: “Lolo catre la porotrike i nyiso. Maine nyipëti a ajane troa kapa la itre xaa ithuemacanyi göne la taan porotrike i nyiso, hanawange la aqane tro nyipëti a hë ni.” Maine thatreine kö së troa akökötrene la aja ka eje thene lai atr, loi e tro sa nyi aliene lo sine pena hna hape, Veuillez suivre l’interêt (S-43) me hamëne kowe la seketere ne la ekalesia; nge tro pë hë nyidrëti a hamëne kowe la ekalesia ka ijij troa akökötrene lai aja.
12. (a) Pine nemene matre nyipi ewekë tro pala hi sa cinyanyine la hawa hne së hna xom, ngöne la easa cainöje ngöne la nöjei ijin? (b) Nemene la itre thangane ka loi hne së hna kapa qa ngöne la hna cainöj ngöne la nöjei ijin? (Wange ju la itre mekune hna eköhagen, hna hape “Hetre Thangane Ka Loi Qa Ngöne La Hna Cainöj Ngöne La Nöjei Ijin!”)
12 Loi e troa cinyanyine ngöne la rapore së la hawa hne së hna xom matre troa cainöje ngöne la nöjei ijin. Haawe, loi e tro pala hi sa xome hnyawa la hawa cili, ngacama itre hnepe menetre hi ngöne la drai. Pane mekune jë: Maine faifi hi lao menetr ngöne la drai hna xome hnene la nöjei ka cainöj asë, matre troa cainöje ngöne la nöjei ijin, tre, 17 milio lao hawa hna kuca ngöne la nöjei treu nyine nyixane la hna cainöje hë!
13. Nemene la ka upi së troa cainöj ngöne la nöjei ijin?
13 Ame la lue kepine ka tru ka upi së troa cainöj ngöne la nöjei ijin, tre, ene la ihnimi së koi Akötresie me kowe la atre lapa easenyi së. (Mat. 22:37-39) Hnene laka tiqa la itre hni së hnene la hni ne ole kowe la itre thiina i Iehova me itre aja i Nyidrë, ene pe kola upi së troa qaja “la lolo ne la baselaia i nyidë ka mingeming.” (Sal. 145:7, 10-12) Ketre, pine laka easa hnehengazone la itre aja ne la itre atr ka lapa easenyi së, haawe, kola upi së troa thele la nöjei ijine troa ce thawa me angatr la maca ka loi, ke ijine pala kö. (Rom. 10:13, 14) Maine tro sa canga mekune hnyawa la aqane tro sa cainöje ngöne la nöjei ijin me hane hnëkë hnyawa, eje hi lai laka, tro hë së asë a melëne la manathithi ka tru troa traane la nyipici e kuhu hni ne la ketre atr ka hni ka meköt.
[Hna cinyihan ne la götran 4]
Maine jë loi e tro hi nyipunie a thele troa eatrëne la aja celë, ene la troa ixelë memine la itre atr me nyiqaane porotrike me angatr
[Hna cinyihan ne la götran 5]
Maine tro la itretre cainöj a huliwane la inamacane i angatr, eje hi lai laka, tro ha hetre ijine ka ijije koi angatre troa cainöj ngöne la nöjei ijin
[Hna eköhagen götran 5]
Itre Mekune Nyine Xatua Së Troa Nyiqaane La Itre Porotrik
◼ Sipo ixatua jë jëne la thith, matre troa nyiqaane porotrik
◼ Iëne jë la itre atr ka lolo thiina nge ka ijij troa porotrik
◼ Goeëne hnyawa jë la atr hne së hna ithanata kow me hnyimahnyima, nge ithanatane jë la ketre ewekë ka ketri epon asë
◼ Drenge hnyawa ju
[Hna eköhagen götran 6]
Hetre Thangane Ka Loi Qa Ngöne La Hna Cainöj Ngöne La Nöjei Ijin!
• Ame ngöne la ketre hna nyihnyawa loto, hnene la ketre trejine trahmany hna xome la ijine nyidrëti a treqene la troa kuca la loto i nyidrë, matre troa cainöje kowe la itre atr ka tro xötreithi nyidrë, me hamëne koi angatr la itre pepa ne ihë thatraqane la cainöj koi nöjei atr. Ame lo ijine kovasio ngöne lo macatre thupen, tre, hna traqa ibozu me nyidrë hnene la ketre trejine trahmany, ketre trejin hnei nyidrëti hna thaa wanga atrehmekun. Kolo hi lo ketre atr hnei nyidrëti hna hamëne kow lo ketre pepa ne ihë ngöne lo macatre hnapan! Hnene la trahmanyi cili hna hane drenge lo cainöj koi nöjei atr, me sipone troa ini Tusi Hmitrötr; ame hë enehila, ka bapataiso hë angeic me ifënekö i angeic.
• Hetrenyi la ketre trejine föe ka atre la nyipici jëne la huliwa ne cainöj ngöne la nöjei ijin, kola goeëne ceitu me teritoare i eahlo la itre atr hnei eahlo hna ixelë memin jëne la köni nekö i eahlo. Kola qaja lo itre atr ka lapa easenyi eahlo, memine lo itre keme me thine hna ixelë memin ngöne la hna ini, maine pena ngöne la itre icasikeu thatraqane la itre keme me thin. Ame la eahlo a qaja la ëje i eahlo, tre, eahlo jë fe a hane qaja cememine la hni ka pexej, laka, sisitria catr la aqane xatua eahlo hnene la Tusi Hmitrötr troa hiane la itre nekö i eahlo; thupene lai, eahlo pena ha saze taan porotrik. Ngo pine laka ase hë eahlo fe la porotrik, haawe, thaa jole hë koi eahlo troa qeje Tusi Hmitrötr ngöne la porotrik. Hnene la aqane ujë cili hna aijijë eahlo troa xatuane la itre atr ka ala truelof troa xome la bapataiso.
• Hna traqa troa wange la ketre trejine föe hnene la ketre atr ka huliwa i assurance; eahlo a xome ju la ijine cili troa cainöj koi nyidrë. Hnei eahlo hna hnyingë nyidrë, maine aja i nyidrëti kö troa egöcatre pala hi me hetre mele ka lolo nge ka epine palua. Nyipici laka aja i nyidrë, ngo nyidrëti a pane hnyingë eahlo la pengöne la mele cili hnei eahlo hna qaja. Haawe, eahlo a amamane ju koi nyidrë la itre hna thingehnaeane hnei Tusi Hmitrötr, me hamën la ketre itusi së; caa jidri hi ne e nyidrë la itus. Thupene lai, hnei nyidrëti hna nyiqaane inine la Tusi Hmitrötr me hane sine la itre icasikeu, nge ketre atr ka bapataiso hë nyidrëti enehila.
• Ame e hnine la avio, hnene la ketre trejine föe hna nyiqaane cainöj kowe la ketre föe ka lapa ezi eahlo. Ame la kola kei lai avio, hnene la trejine hna hamëne kowe lai föe la aderes me numero ne telefone i eahlo, me ithuecatre kowe la föe cili troa sipone troa inine la Tusi Hmitrötr memine la Itretre Anyipicine i Iehova ka traqa troa iwai. Ame ngöne la drai thupen, kola fenafena la qëhnelö i eahlo hnene la lue Atre Anyipicine i Iehova. Hnei eahlo hna nyiqaane inine la Tusi Hmitrötr me canga kökötr; thupene lai, hnei eahlo hna xome la bapataiso, nge thaa hmitre kö nge eahlo ha xomiujine la köni ini Tusi Hmitrötr.
• Ame ngöne la ketre uma thatraqane la itre qatr, hetrenyi la ketre trejine trahmany ka timek nge ka 100 lao macatre, ka qaja e itre xaa ijin, ka hape, “Ka nyipi ewekë catre koi së la Baselaia.” Celë hi la ka upe la itre ka huliwa me itre xaa qatre ne lai uma troa hnyinge koi nyidrë, ene pe hna aijijë nyidrë troa qeje pengöne koi angatr la Baselaia. Hetrenyi la ketre föe ka huliwa e cili ka hnyingëne la itre ewekë hnei nyidrëti hna troa kuca elanyi ngöne la Paradraiso. Nyidrëti a sa, ka hape: “Tro hë ni a goe hmaca me hane tro fe, nge ketre, tro hë ni a dreuthe trije la ikatreng.” Pine laka ka timeke nyidrë, hnei nyidrëti hna sipone la föe cili troa e la itre zonal koi nyidrë. Ame la kola traqa troa wai nyidrë hnene la nekö i nyidrë jajiny, tre, hnene lai atr ka huliwa e cili hna sipo angeic, maine ijije kö tro angeic a xome la itre zonal kowe la hnalapa i angeic. Nge hnene la ka inyië hna qaja kowe la nekö jajiny, ka hape: “Ame la taan mekune ka hnyipixe e celë hnine la uma thatraqane la itre qatr, tre: ‘Ka nyipi ewekë catre koi së la Baselaia.’ ”
• Kola cile itreqe hnene la ketre trejine föe hnine la ketre hnë xen, nge eahlo a drenge la kola porotrikë politik hnene la ketre icaa lapa i itre qatre trahmanyi ka lapa easenyi eahlo. Kola qaja hnene la ketre trahmanyi ka hape, thatreine kö troa nyinyine la itre jole së hnene la musi atr. Önine la trejine föe e qaja e kuhu hni eahlo, ka hape, ‘Hane hi la ketre ijine ka sisitria koi ni.’ Ene pe, eahlo ju a pane thith me easenyi angatr. Thupene la eahlo a qaja la ëje i eahlo, ene pe hnei eahlo hna qaja koi angatr la ketre musi ka troa nyinyine la itre jol ka eje thene la nöjei atr asë, ene la Baselaia i Akötresie; thupene lai, hnei eahlo hna hamëne koi angatr la ketre boroshür. Thaa hmitre kö nge kola easenyi eahlo hnene la maseta ne la hnë xen. Kola mekune hnene la trejine föe laka, nyidrëti a troa helë eahlo. Ngo nyidrëti pe a qaja koi eahlo ka hape, hnei nyidrëti hna hane drei eahlo, nge aja i nyidrëti troa hane kapa la ketre boroshür. Ketre, hnene mina fe la ketre föe ka huliwa e cili hna hane drei eahlo; ame hnei angeice hna easenyi eahlo me treije latresi. Eje hi, ketre föe ka ini Tusi Hmitrötre hë ekö, ngo angeice hmaca ha ajane troa xejë la ini tusi angeic.