Ka Hnëkë Kö Epuni Troa Cainöj Ngöne La Nöjei Ijin?
1. Nemene la ceitun ka amaman, laka, hetre thangane ka loi hna troa kapa qa ngöne la hna cainöje ngöne la nöjei ijin?
1 Ka hetre thangane catre la troa cainöj ngöne la nöjei ijin. Nyimutre la itre ceitun qa hnine la Tusi Hmitrötr ka amamane la itre thangane ka loi cili. (Ioane 4:7-15) Tro sa hnëkë tune kaa matre troa xome la aqane cainöje cili?
2. Tro la aqane heetr me iseji së a xatua së tune kaa troa cainöj?
2 Aqane Heetr Me Isej: Maine ka lolo pala hi la aqane heetr me iseji së, thaa tro kö a jole koi së troa ce thawa la lapaune së memine la itre xan. (1 Tim. 2:9, 10) Maine drenge hi së laka, thaa nyipi loi kö la hna heetre së me aqane iseji së, tre, tro hë sa nango cile hnö troa nyi trenge ewekë i Iehova ngöne la hna cainöj. Ngo maine ka lolo la hna heetre së, tro hë la itre atr a pi atre la kepin matre easa heetre hnyawa. Drei la ketre ceitun, ame ngöne la kola ngenu hnene la lue trefëne Temoë ka heetre hnyawa, hnei nyidro hna lapa ezine la ketre Mizilima. Ame ngöne la angeic a öhne la aqane heetre i nyidro, ene pe angeic a pi atre, ka hape, lue Keresiano kö nyidro. Ame la thangane lai, tre, köni hawa ne ce porotrikëne angatr la Tusi Hmitrötr.
3. Tune kaa la aqane tro sa nyitipu Iesu ngöne la easa nyiqaane la ketre porotrik?
3 Aqane Troa Nyiqaane Porotrik: Ame ngöne lo Iesu a iöhnyi memine la föe ne Samaria ngöne lo tim i Iakobo, hnei nyidrë hna nyiqaane la porotrik hnene la hna sipo eahlo troa thue ime i nyidrë. Ketre tune mina fe, ijije tro sa nyiqaane la porotrike hnene la hna qaja la ketre hnepe mekun, maine hnene pena la hna hnying. Ngacama easa luelu e itre xaa ijin, ngo maine tro sa nue Iehova troa xatua së, tro hë sa ‘catre’ troa nyiqaane la ketre porotrik.—1 Thes. 2:2.
4. Tune kaa la aqane tro epuni a hnëkë troa cainöj ngöne la nöjei ijin?
4 Thele Jë La Itre Ijine Ka Ijij Troa Cainöj: Nyimutre la itre trejine ka thele troa cainöj ngöne la nöjei ijin. Wange hmaca jë la aqane mele i epun, nge mekune jë la itre atr hnei epun hna ixelë memin ngöne la nöjei drai. Xome trongëne jë la itre itus ka ihmeku memine la itre aja i angatr, memine fe la ketre Tusi Hmitrötr ka co. Loi e tro epuni a atreine waiewekë me wanga atrune la itre atr ka lapa xötreithi epun. Maine tro epuni a canga mekun la itre ijine ka sisitria ngöne la drai, tre, tro ha xatua epuni troa hnëkë hnyawa matre troa cainöj.—Fil. 1:12-14; 1 Pet. 3:15.
5. Pine nemen matre thaa tro pi kö sa wange sixane la huliwa ne cainöj ngöne la nöjei ijin?
5 Hetrenyi la lue kepin matre tro sa xome hnyawa la itre ijin ka sisitria matre troa cainöj, ene la ihnimi së koi Akötresie memine la ihnimi së kowe la atre lapa easenyi së. (Mat. 22:37-39) Hnene laka nyipi ewekë catre hë enehila la huliwa ne cainöj, haawe, thaa tro pi kö sa wange sixane la huliwa ne troa cainöj ngöne la nöjei ijin. Epi tro sa hnëkë troa xome hnyawa la itre ijine ka sisitria, matre troa cainöjëne la maca ka loi ne la Baselaia kowe la itre xan, e ijine petre kö.—Rom. 10:13, 14; 2 Tim. 4:2.