Ita Ne Thup göi 15 Maac e Normandie
Nyima 15 me 18 Qene Drehu
Madrine Jë Ngöne La Huliwa Ne Troa Inine La Nöjei Atr
“Trojë nyipunie a inine la nöjei nöj’ asëjëihë.”—MAT. 28:19.
1-3. (a) Nemene la hna mekune hnene la itre ka kapa la manathithi troa xomiujine la itre ini Tusi Hmitrötr? (b) Nemene la itre hnyinge nyine tro sa ce wang?
HNENE la ketre trejine föe ka ce huliwa memine la ketre gurup ka qene Hindi e Etazini, hna cinyihane ka hape: “Hnenge hna ini tusi memine la ketre fami qaa Pakista, ngöne lo levine lao wiik ka ase hë. Celë hi matre, itre sineenge fe hë angatr. Kola xölaxöla la itre trenge timidrang troa mekune laka, easenyi hë tro la fami cili a bëeke hmaca a tro Pakista. Eni a treij, thaa hnene hmekuje kö laka, thaa tro hmaca kö eahuni a iöhny, ngo hnene mina fe la madrine hnenge hna melëne ngöne la eni a ini angatr troa atrepengö Iehova.”
2 Tune lai trejine föe cili, hane kö epuni melëne la madrine ka xulu qa ngöne la hna inine la Tusi Hmitrötr memine la ketre atr? Atraqatre la madrine i Iesu memine la itretre drei nyidrë ngöne la huliwa ne troa inine la nöjei atr. Ame ngöne la kola bëeke koi Iesu hnene la itretre dreng ka ala 70 hnei nyidrëti hna inin, me qaja koi nyidrë la elolone la huliwa i angatr, tre, hnei Iesu hna “madine ngöne la Uati Hmitöt.” (Luka 10:17-21) Ketre tune mina fe enehila, laka, nyimutre la itre atr ka madrin troa inine la itre xan. Nyipici laka ame ngöne lo macatre 2007, traqa koi sikisi milio nge sin lao ini tusi hna xomiujine ngöne la treu, hnene la itre atr ka catre me madrin troa cainöj!
3 Hetrenyi la itre xaa atr ka cainöj ka thaa hane xomiujine pala kö la ketre ini tusi hmitrötr. Maine pena thaa hnene kö la itre xan hna xomiujine la ketre ini tus ngöne lo itre macatre ka ase hë. Nemene jë la itre jol hne së hna troa cile kow ngöne la easa catre troa xomiujine la ketre ini Tusi Hmitrötr? Tune kaa jë la aqane tro sa elë hune la itre jole cili? Nge nemene la itre manathithi hne së hna troa kapa, ngöne la easa kuca la hne së hna atrein matre troa drengethenge la hna amekötine hnei Iesu, kola hape: “Trojë nyipunie a inine la nöjei nöj’ asëjëihë”?—Mat. 28:19.
Itre Jole Ka Troa Xometrije La Madrine Së
4, 5. (a) Ame ngöne la itre xaa götrane la fen, tre, tune kaa la aqane ujë ne la itre atr? (b) Nemene la itre jole hna cile kow hnene la itre ka cainöj ngöne la itre xaa nöj?
4 Ame ngöne la itre xaa götrane la fen, tre, canga kapa hi la itre itusi së hnene la itre atr, nge angatr a madrine troa ce ini Tusi Hmitrötr me easë. Hnene la lue trefëne qaa Osetralia ka nyihlu e Zaabi hna cinyihane, ka hape: “Ka nyipici lo itre ewekë hna qaja göi Zaabi, laka, ketre teritoare ka lolo catre troa cainöje ngön. Nyine haine catrën la easa cainöj e cahu gojeny! Kola ithanata me easë hnene la itre atr, nge ame la itre xan, tre, angatr a sipone la itre zonal ka ketri angatr.” Ame ngöne la ketre macatre, hnene la itre trejine trahmanyi me föe ne Zaabi hna xomiujine la 200 000 lao ini Tusi Hmitrötr, matre kösë lo caa ini tus e caa trejin.
5 Ngo ame ngöne la itre xaa götran, maine jë thaa hmaloi kö kowe la itre ka cainöj troa tro fë la itre itus me xomiujine pala hi la itre ini Tusi Hmitrötr. Pine nemen? Ame itre xaa ijin, paatre kö la itre atr ngöne la kola fenafena la itre qëhnelö i angatr hnene la itre ka cainöj, nge ketre, ame la itre atr ka lapa ngöne la itre hnalapa i angatr, tre, maine jë kolo hi lo itre ka xele ma wange la hmi. Maine jë ame mina fe angatre, tre, itre hna hian ngöne la ketre hnalapa ka thaa hmi kö, maine jë angatre a xele ma dreng la itre cainöj pine laka angatr a methinëne la aqane huliwa thoi ka mama hnyawa ngöne la hmi ka thoi. Nyimutre la itre atr hna athixötrëne ngöne la götrane la ua me isa ije, hnene la itre atre thupë mamoe ka thoi. (Mat. 9:36) Trotrohnine hi së laka, angatr a luelue troa porotrikëne la Tusi Hmitrötr.
6. Nemene la itre ewekë ka sawa la itre xaa ka cainöj troa hane hamë ini kowe la itre atr?
6 Ame la itre xaa atr ka cainöj ka mele nyipici, tre, angatr a cile kowe la ketre jol ka troa xometrije la madrine i angatr. Ngacama hnei angatr ekö hna catre ngöne la huliwa ne troa inine la itre atr, ngo ame enehila, tre, kolo ha sewe angatre hnene la itre mec maine hnene laka qatre hë angatr. Tro sa pane ce wange fe la itre xaa ewekë ka troa sewe së fe. Drei la ketre ceitun, hapeu hane kö epuni mekune laka, thaa ka maca kö epuni troa hane xomiujine la ketre ini Tusi Hmitrötr? Maine jë hnei epuni hna mekun tui Mose, ngöne lo Iehova a upi angeice troa ithanata koi Farao. Öni Mose, ka hape: “Ekölö hi ni [Iehova], tha ate ne cainöje kö ni ekö, me enehila.” (Eso. 4:10) Ka ce tro la lue mekun, ene laka thaa ijiji së kö troa hamë ini, memine la xou troa tria ngöne la aqane hamë ini së. Maine jë tro sa hnehengazone laka thaa tro kö la ketre atr a hane nyihlue i Iesu pine laka, thatreine hnyawa kö së hamë ini. Pine laka xele së ma melëne lai, maine jë tro sa cile hnö troa hane xomiujine la ketre ini tus. Tune kaa la aqane tro sa cile kowe la itre jole cili hna amexeje hë?
Hnëkëne Jë La Hni Nyipunie
7. Nemene la ka uku Iesu ngöne la huliwa ne cainöje i nyidrë?
7 Ame la pane ewekë nyine troa kuca, tre, ene la troa hnëkëne la hni së. Öni Iesu, ka hape: “Kola ewekë la që qa kuhu hni ka tiqa.” (Luka 6:45) Ame la Iesu a catre ngöne la huliwa ne cainöj, tre, hnene laka hnei nyidrëti hna kukehnine la mele ne la itre xan. Drei la ketre ceitun, ame ngöne la Iesu a öhne laka ka pë ewekë ngöne la götrane la ua la angetre Iudra, tre, “[hnei] nyidëti [hna] utipi angat.” Öni nyidrëti kowe la itretre dreng, ka hape: “Atraqate la meledrai . . . Xëwejë nyipunie kowe la Joxu ne la meledrai, mate upepi la angete troa menue kowe la meledrai i anganyidë.”—Mat. 9:36-38.
8. (a) Nemene la nyine tro sa mekun? (b) Nemene la ini hne së hna xom qa ngöne la itre mekune hna hamëne hnene la ketre hnainin?
8 Ame ngöne la easa troa inine la itre atr, tre, nyipi ewekë koi së troa mekune hnyawa la itre thangane hne së hna kapa, qa ngöne la hnene la ketre atr ekö hna xomi ijine troa inine la Tusi Hmitrötr me easë. Ketre, mekune jë fe së la itre atr hne së hna troa ithanata memin ngöne la hna cainöj, memine la aqane tro angatr a kepe thangane qa ngöne la hna drenge la maca hne së hna tro fë. Hnene la ketre föe hna cinyany kowe la Bethela ne la nöj hnei eahlo hna mele ngön, ka hape: “Eni a ajane troa amamane la hni ne oleng kowe la Itretre Anyipicine ka ini tus me eni. Eni a atrehmekune laka ame itre xaa ijin, tre, nango hace koi angatr, ke, nyimutre catre la itre hnyinge i eni nge ketre eahuni pala hi a sasaithe la hawa hna sa. Ngo hnei angatre hna drei ni hnyawa me qaja koi ni la hnei angatre hna inin, cememine la hni ka madrin. Celë hi matre, eni a olene koi Iehova me Iesu hnene laka, hna traqa troa wai ni hnene la itre atr cili.”
9. Nemene la ewekë hnei Iesu hna wanga atrune pala hi, nge tune kaa la aqane tro sa nyitipu nyidrë?
9 Eje hi laka, thaa hnen’ asë kö la itre atr hna kapa la itre ini hna hamëne hnei Iesu, me xötrethenge nyidrë. (Mat. 23:37) Ame la itre xan, tre, hnei angatre hna xötrethenge nyidrë, ngo thaa qea ju kö, ke, ame pë hë e thupen, tre, hnei angatr hna icilekeu memine la itre ini hnei nyidrëti hna hamën me “tha cetro hmaca kö me nyidë.” (Ioane 6:66) Ngo thaa hnei Iesu kö hna nue tro la aqane ujë i angatr a uku nyidrë troa wanga acone la maca i nyidrë. Ngacama thaa hna wa wene kö la itre itine feja hnei nyidrëti hna jumejum, ngo hnei nyidrëti pala hi hna goeëne aloine la itre ewekë hnei nyidrëti hna kuca. Hnei nyidrëti hna öhne laka, elehmedrë hë la itre hna eënyi göi troa menu, nge atraqatre la madrine i nyidrë troa ixatua ngöne la menu cili. (E jë la Ioane 4:35, 36.) Thaa tro kö sa goeëne hmekuje hi la pengöne la dro laka thaa ka nyipi loi kö, memine la itre dröne feja, ngo loi e tro pe sa wanga atrune la itre ewekë hne së hna troa kuca ngöne la easa menu ngöne la teritoare së. Celë hi matre, loi e tro sa pane ce wange la aqane tro sa goeëne aloine pala hi la itre ewekë.
Loi e Tro Sa Cainöj Cememine La Aja Troa Nyiqaane La Ketre Ini Tusi Hmitrötr
10, 11. Tune kaa la aqane tro sa kuca matre tro pala hi sa madrin?
10 Kola traane la itine feja hnene la atre eënyi cememine la aja troa menuëne ej. Ketre ceitune mina fe, nyipi ewekë tro sa cainöj cememine la mekun troa nyiqaane la itre ini Tusi Hmitrötr. Ngo nemene la nyine troa kuca, e easë pala hi a tro troa cainöj, nge xalaithe hi la itre atr hne së hna öhne ngöne la itre hnalapa i angatr maine pena thatreine hë së troa ketri angatr, ngöne la kola iwai hmaca? Ketre ewekë lai ka ahleuhleunyi së. Hapeu, tro kö sa nuetrije la huliwa ne cainöj ngöne itre hnalapa trootro? Ohea! Nyimutre la itre atr hna ketr hnene la hna kuca pala hi la huliwa cili ngöne la nöjei drai.
11 Ngo hapeu, ijije kö tro nyipunieti a akökötrene la itre aqane cainöje i nyipunie, tune lo itre xaa aqane troa öhne la itre atr, matre troa eje pala hi thei nyipunie la madrin? Drei la ketre ceitun, hnei nyipunieti kö hna thele troa cainöj kowe la itre atr e cahu gojenyi maine ngöne la itre hna huliwa i maseta? Hapeu, ijiji nyipunieti kö troa hëne hmaca la itre atr jëne telefon maine pena troa xome la itre numero ne telefon ne la itre hnei nyipunieti hë hna cainöje kow, matre tro pala hi a sisedrëne me angatr la porotrik? Maine nyipunieti a catre me thele troa itrotrohni ngöne la huliwa ne cainöj, haawe, tro ha eje thei nyipunie la madrin troa öhne la itre atr ka troa hmala troa drenge la maca ne Baselaia.
Ngöne La Kola Thaa Semesine Së
12. Nemene jë la nyine tro sa kuca, e kola xele ma drei së hnene la itre atr?
12 Nemene la nyine tro nyipunieti a kuca, e nyimutre la itre atr ngöne la götran hnei epuni hna mele ngön, ka thaa hane kö semesinene la hmi? Hapeu, ijiji nyipunieti kö troa nyiqaane la ketre porotrik hnene la hna qaja la ketre ewekë hnei angatr hna hnehengazon? Hnei Paulo aposetolo hna cinyihane kowe la itre sine hmi nyidrë e Korinito, ka hape: “Hnenge hna tune la ate Iuda koi angete Iuda . . . Nge tune la ka pë wathebo, koi ange ka pë wathebo göi Akötesie.” Nemene la ewekë ka uku Paulo troa ujë tune lai? Öni nyidrëti, ka hape: “Hnenge hna hane xome la nöjei pengön’ asë thatraqane la nöjei ate asë, mate catejë ni troa amele ite xan.” (1 Kor. 9:20-22) Ketre tune mina fe, ijije kö tro sa ithanatane la itre mekune ka ihmeku memine la itre aja ne la itre atrene la teritoare së? Nyimutre la itre atr ka thaa hmi kö ka ajane troa kökötre lolo la aqane imelekeu i angatr e hnine la hnepe lapa. Maine jë angatre mina fe a thele troa hetre aliene la mele i angatr. Ijije kö tro sa ketr la itre hni angatr hnene la aqane tro fë së la maca ne Baselaia?
13, 14. Tune kaa la aqane tro sa akökötrene la madrine ka eje the së, hnene la hna kuca la huliwa ne inine la itre atr?
13 Hnene la itre ka cainöj hna akökötrene la madrine ka eje thei angatr, hnene la hna kuca la huliwa ne inine la itre atr, ene mina fe ngöne la kola thaa semesine angatr hnene la itre atr. Hna tune kaa? Hnene la hna inine la ketre qene hlapa, lo thaa hna ithanatane kö ngöne la teritoar. Hnene la lue trefëne ka 60 lao macatre hna öhne laka, kola mele ngöne la teritore ne la ekalesia hna upi nyidroti kow hnene la itre thauzan lao hnainin qaa Caina memine la itre hnepe lapa i angatr. Önine la trahmanyi, ka hape: “Hnene la ewekë celë hna uku nyiho troa inine la qene Sinoa. Ngacama nyimutre la itre hawa hnei nyiho hna xom matre troa inine lai qene hlapa cili, ngo atraqatre la madrine i nyiho, ke, ala nyimu catre la itre Sinoa ka ini Tusi Hmitrötr me nyiho.”
14 Ngacama thaa ijiji nyipunieti kö troa inine la ketre qene hlapa, ngo ijije tro nyipunieti a huliwane hnyawa la neköi itusi celë, hna hape Une bonne nouvelle pour des gens d’entre toutes les nations, ngöne la easa cainöje kowe la ketre atr ka ithanatane la ketre qene hlapa kö. Ijije tro nyipunieti fe a kapa la itre itus ngöne la itre qene hlapa hna ithanatane hnene la itre atr hnei nyipunieti hna cainöje kow. Nyipici laka itre hawa me itre trengecatr la hnei nyipunieti hna nue matre troa ithanata memine la itre atr ka isa qene hlapa kö, me isa qene nöje kö. Ngo thaa tro pi kö nyipunieti a thëthëhmine la trepene meköti celë qa hnine la Wesi Ula i Akötresie, kola hape: “Ame la ate tran’ atrun, tru fe la hnei angeice hna menue.”—2 Kor. 9:6.
Hnëqa i Ekalesia Asë
15, 16. (a) Pine nemene matre kolo mina fe a ketr la ekalesia asë hnene la huliwa ne inine la itre atr? (b) Nemene la hnëqa hna xom hnene la itre trejine ka qatre hë?
15 Ngo ame la troa inine la itre atr, tre, thaa hnëqa së caasi kö. Ngo loi pe, hnëqa ne la ekalesia asë hi troa catre ixatua me inine la itre atr. Pine nemene lai? Hnei Iesu hna qaja, ka hape: “Celë hi mate tro nöjei ate asëjëihë a wangate hmekune laka itete dei ni nyipunie, e tro nyipunie a ihnimikeu.” (Ioane 13:35) Nge eje hi laka, ame la kola sine la itre icasikeu hnene la itre hnainin, tre, canga ketri angatre hi hnene la ihnimi ne la itre atrene la ekalesia. Hnene la ketre hnainin hna cinyihane, ka hape: “Atraqatre la madrineng troa sine la itre icasikeu. Kola kepe ni hnyawa hnene la itre atr!” Hnei Iesu hna qaja ka hape, ame la itre ka nyihlue i nyidrë, tre, troa icilekeu me angatre hnene la sipu hnepe lapa i angatr. (E jë la Mataio 10:35-37.) Ngo hnei nyidrëti hna thingehnaean laka, tro angatre a hetrenyi ngöne la ekalesia “la ite tejin, me ite xa, me ite thin, me ite kuku” ngöne la götrane la ua.—Mar. 10:30.
16 Ketre hnëqa ka tru catr hna xom hnene la itre trejin, trahmanyi me föe, ka qatre hë, ngöne la kola xatuane la itre hnainin troa kökötr. Hna tune kaa? Ngacama thaa ijije kö tro la itre xan e angatr a xomiujine la ketre ini Tusi Hmitrötr, ngo kola acatrene la lapaune ne la nöjei atr ka dreng hnene la itre mekun ka ithuecatr hnei angatr hna hane qaja ngöne la itre icasikeu ne la ekalesia. Ame la hnei angatre hna melëne ekö “ngöne la jëne meköt,” tre, kola amingömingöne la ekalesia me ukune la itre atr ka hni ka meköt troa lö kowe la organizasio i Akötresie.—Ite edomë 16:31.
Elë Hune Jë La Itre Xou!
17. Tune kaa la aqane tro sa elë hun la itre mekune së laka, thaa ijiji së kö troa xomiujine la ketre ini Tusi Hmitrötr?
17 Nemene la nyine tro nyipunieti a kuca, e traqa ju nyipunieti mekune laka, thaa ijiji nyipunieti kö troa xomiujine la ketre ini Tusi Hmitrötr? The thëthëhmine kö nyipunie laka, hnei Iehova hna xatua Mose jëne la hna hamë angeic la uati hmitrötr memine la ketre sine huliwa i angeic, ene Arona, mama i angeic. (Eso. 4:10-17) Hnei Iesu hna thingehnaeane fe laka, troa xatua së hnene la ua i Akötresie ngöne la huliwa ne cainöje së. (Ite Hu. 1:8) Ketre, hnei Iesu hna ce up la ala lue troa cainöj. (Luka 10:1) Qa ngöne lai, maine jole koi nyipunie troa xomiujine la ketre ini Tusi Hmitrötr, haawe, loi e tro nyipunieti a sipone la ua i Akötresie, matre troa ainamacanë nyipunie nge thupene lai, cainöje jë memine la ketre trejine ka maca hnei nyipunie hna atre hnyawa nge ka ijij troa xatua nyipunie. Kolo lai a acatrene la lapaune së troa atre laka, Iehova a iëne la itre atr ka pëkö hna atrein, ene “la ite ewekë ne la fene hnengödrai ka kucakuca” matre troa kuca la huliwa celë ka sisitria catr.—1 Kor. 1:26-29.
18. Tune kaa la aqane tro sa elë hune la xou së ene laka, thaa ijiji së kö troa xatuane la ketre hnainin?
18 Maine jë tro sa xou troa xatuane la ketre hnainin pine laka, easa mekune, ka hape, thaa ijiji së kö. Tune kaa la aqane tro sa elë hune la xou cili? Loi e tro pala hi sa mekune laka, ame la troa inin la ketre atr, tre, thaa ka ceitu kö memine la kola kuci xen, laka tro ej a lolo maine ngazo hnene hmekuje hi la hna kuca hnene la atre kuci xen. Ngo ame la troa inine la ketre atr, tre, thaa ijije kö troa kuca caasin. Iehova la ka kuca la götrane ka tru, ene la troa ea la itre atr, angatr isa ala caas, koi Nyidrë. (Ioane 6:44) Easa ce huliwa memine la itre atrene la ekalesia hnene la hna xome hnyawa la ini, matre troa xatuane la hnainin troa kökötr. (E jë la 2 Timoteo 2:15.) Nge nyipi ewekë tro la hnainin a ujë thenge la hnei angeice hna inin. (Mat. 7:24-27) Maine jë tro sa nango kucakuca hnene laka, thaa sisedrëne hmaca kö la ini Tusi Hmitrötr hnene la ketre atr. Easa mejiune laka, tro la itre hnainin a axeciëne hnyawa la mekune ka loi, ngo eje hi laka, tro angatr isa ala caasi a “isa qeje thinane koi Akötesie.”—Rom. 14:12.
Nemene La Itre Manathithi Hna Troa Kapa?
19-21. (a) Nemene la itre manathithi hne së hna troa kapa, qa ngöne la hna xomiujine la itre ini Tusi Hmitrötr? (b) Tune kaa la aqane goeëne Iehova la nöjei atr ka kuca la huliwa ne cainöj?
19 Ame la easa xomiujine la itre ini Tusi Hmitrötr, tre, easë hi lai a thele troa amë panëne la Baselaia. Ketre, easa acatrene la itre nyipici ne la Wesi Ula i Akötresie ngöne la itre mekuna së me itre hni së. Pine nemene lai? Kola qaja hnene la ketre pionie, Barak la ëjen, ka hape: “Kola uku nyipunie troa ketre atr ka inine hnyawa la Wesi Ula i Akötresie hnene la hna xomiujine la itre ini Tusi Hmitrötr. Eni a öhne laka, nyipi ewekë tro ni a pane acatrene la lapauneng kowe la itre hnenge hna mejiune kow, qëmekene troa inine hnyawa la ketre atr.”
20 Maine thaa nyipunieti kö a xomiujine la ketre ini Tusi Hmitrötr, tre, hapeu kolo kö lai a hape, ka gufa la huliwa i nyipunie xajawa i Akötresie? Ohea! Iehova a wanga atrune catrëne la itre trengecatre hne së hna kuca matre troa atrunyi Nyidrë. Ame asë hi la itre ka kuca la huliwa ne cainöj, tre, angatre hi lai a “ce huliwa tro kö me Akötesie.” Ngo easa madrine hnene la hna xomiujine la ketre ini tus, ke, easa öhne la aqane aciane Iehova la itine feja hne së hna tran. (1 Kor. 3:6, 9) Kola qaja hnene la ketre pionie, Amy la ëjen, ka hape: “Ame la nyipunieti a goeëne la aqane kökötre la hnainin, tre, kola atraqatre la hni ne ole i nyipunie koi Iehova hnene la hna ië nyipunie troa hamëne kowe la atr cili, la ketre ahnahna, ene la manathithi ka tru troa atrepengöi Iehova me hane kapa la mele ka thaa ase palua kö.”
21 Maine tro sa catre troa nyiqaan me xomiujine la itre ini Tusi Hmitrötr, haawe, tro hë sa wanga atrune la aqane tro sa nyihlue i Akötresieti enehila, me acatrene fe la mejiune së, ene la troa mele elany ngöne la fene ka hnyipixe. Tro la ixatua qaathei Iehova a aijijë së troa eatrongëne la itre atr kowe la gojenyi ne mel. (E jë la 1 Timoteo 4:16.) Drei la ketre manathithi ka tru!
The Thëthëhmine Kö Nyipunie
• Nemene la itre jol ka troa sawa la itre xan troa xomiujine la itre ini Tusi Hmitrötr?
• Nemene jë la nyine tro sa kuca, e nyimutre la itre atr ka xele ma drei së ngöne la teritoar?
• Nemene la itre manathithi hne së hna troa kapa qa ngöne la hna xomiujine la ketre ini Tusi Hmitrötr?