Koi 2 Nofeba Me Wiike Cili
Loi e Tro Sa Xötrethenge Keriso, Ene La Troa Drengethenge Me Catr
“Catejë nyipunie, ke ase hë ni apone la fen.”—IOANE 16:33.
1. Hna pexeje tune kaa la aqane idrengethenge Iesu koi Akötresie?
HNEI Iesu Keriso hna kuca pala hi la aja i Akötresie. Paatre fe kö thei nyidrë la mekune troa xele ma drenge la Tretretro i nyidrëti e koho hnengödrai. (Ioane 4:34; Heb. 7:26) Ngo nyipici laka, hetrenyi la itre xaa ewekë e celë fen ka ajolë nyidrë troa drengethenge la Tretretro i nyidrë. Qaane lo nyidrëti a cainöj, hnei Satana memine la itre xaa ithupëjia me nyidrë, hna thele troa iele Iesu, maine iaö nyidrëti pena troa nuetrije la lapaune i nyidrë. (Mat. 4:1-11; Luka 20:20-25) Hna akötrë nyidrë hnene la itre ithupëjia cili ngöne la götrane la itre mekun, me itre aliene hni nyidrë, me ngöne la ngönetrei. Ame la pune lai, hnei angatre hna humuthi nyidrë me athipi nyidrë hune la sinöe ne iaxösisi. (Mat. 26:37, 38; Luka 22:44; Ioane 19:1, 17, 18) Ngacama atraqatre catre la akötre hnei Iesu hna melën, ngo ame pe hnei nyidrëti pala hi hna “denge thenge uti hë la mec.”—E jë la Filipi 2:8.
2, 3. Nemene la ini hne së hna xom qa ngöne la hnei Iesu hna drengethenge ngöne la itre akötr?
2 Hnene la hnei Iesu hna mele e celë fen ceitu me ketre atr, ene pe hnei nyidrëti hna inine troa drengethenge ngöne la itre xaa götran. (Heb. 5:8) Maine jë pë hë ewekë nyine tro Iesu a inine göi troa nyihlue i Iehova. Nyimutre la itre hneijine ekö la nyidrëti a imelekeu hnyawa me Iehova, nge ‘atre huliwa ka sisitria’ i Akötresieti fe nyidrë ngöne lo kola xupe la fene hnengödrai. (Ite edomë 8:30) Ngo hnei nyidrëti hna amamane hnyawa laka, ka pë ethan la mele i nyidrë ngöne la hna akötr me xomihni ahoeanyi ngöne la lapaun. Nyipici, hnei Iesu lo Hupuna i Akötresie hna easenyi catre pala hi kowe la Tretretro i nyidrë. Haawe, tro sa xomi ini tune kaa qa ngöne la itre ewekë hnei nyidrëti hna melën?
3 Ngacama ketre atr ka pexeje Iesu, ngo thaa hnei nyidrëti kö hna ketre sipu thele jëne troa idrengethenge uti hë la pun. Hnei nyidrëti pe hna thith, me sipone la ixatua qaathei Akötresie matre troa drengethenge pala hi. (E jë la Heberu 5:7.) Ketre tune mina fe, maine easa ajane troa drengethenge uti hë la pun, nyipi ewekë tro sa hetre hni ka ipië me sipo ixatua koi Akötresie jëne la thith. Celë hi lai kepine matre Paulo a hamëne la eamo celë kowe la itre Keresiano, kola hape: “Loi e ej’ e kuhu ite hni nyipunie la mekune celë, lo ka eje thei Keriso Iesu,” ene lo atre “aipië nyidëti kö, me denge thenge uti hë la mec.” (Fil. 2:5-8) Hna anyipicine hnene la aqane mele i Iesu, laka, ijije tro la itre atr a drengethenge ngöne la fene celë ka ngazo. Eje hi laka, ka pexeje Iesu, ngo tune kaa fe së, itre atr ka thaa pexeje kö?
Ijije Tro Sa Drengethenge Ngacama Thaa Itre Atr Ka Pexeje Kö Së
4. Nemene la aliene koi së la hna xupi së cememine la ewekë, ene la troa ketre isa ië hna ajan?
4 Hnei Akötresieti hna xupi Adamu me Eva cememine la inamacan, me troa ketre ië hna ajan. Nge eje fe the së itre matra i nyidro, la ewekë cili, ene la troa ketre isa ië hna ajan. Nemene la aliene la ewekë cili? Kolo lai a hape, ijije hi tro sa sipu axeciën troa kuca la loi maine pena la ngazo. Ketre, kolo mina fe lai a qaja, ka hape, Akötresieti a nue së troa ketre sipu iëne troa drengethenge Nyidrë maine pena troa thaa drengethenge Nyidrë. Ngacama hna nue së troa isa ië hna ajan, ngo tro kö sa isa kepe thangane la itre huliwa së. Eje hi laka, nyipi ewekë catr la itre mekune hne së hna axeciën, ke, nyine mele lai maine meci pena koi së. Ketre, hetre thangane itre eje thene la itre atr ka lapa xötreithi së.
5. Nemene la hne së asë hna troa isi memin, nge tro sa hune tune kaa ngöne la isi cili?
5 Pine laka thaa itre atr ka pexeje kö së, haawe, nango jole koi së troa drengethenge. Thaa ewekë ka hmaloi kö la troa drengethenge la itre wathebo i Akötresie. Paulo la ketre atr ka hane melëne la götrane cili. Hnei nyidrëti hna cinyihan, ka hape: “Öhnë hë ni la kete wathebo ngöne la ite hnepe ngöneteing, kola ishi memine la wathebo e kuhu hning, me aponyi ni kowe la wathebo ne la ngazo ate lapane la ite hnepe ngöneteing.” (Rom. 7:23) Nyipici laka hmaloi hi tro sa drengethenge, e pëkö ewekë ka ajolë së maine ka akötrë së pena, maine itre xaa ewekë ju kö. Ngo tune kaa la aqane tro sa ujë, e kola icilekeu hnene la aja së troa drengethenge memine “la meciunyi ewekë i ngönetei, memine la meciune ne la lue mek”? Kola xulu la lue aja cili ka ngazo qa ngöne laka, itre atr ka thaa pexeje kö së, ketre, kola lapa xötreithi së hnene la iajojezi ne la “[“ua,” MN] ne la fen”; nge tru catre la emenene itre ej. (1 Ioane 2:16; 1 Kor. 2:12) Maine easa ajane troa thipetrije la itre aja cili, nyipi ewekë tro sa ‘hnëkëne la itre hni së’ qëmekene tro sa cile kowe la ketre jol maine ketre itupath pena, me axeciëne laka tro sa drengethenge Iehova ngacama akötre ju hë koi së. (Sal. 78:8) Hetrenyi e hnine la Tusi Hmitrötr la itre tulu ne la itre atr ka kepe thangane ka loi qa ngöne la hnei angatre hna hnëkëne la itre hni angatr.—Ezera 7:10; Dan. 1:8.
6, 7. Qaja jë la ketre ceitun ka amamane laka, e tro sa sipu ini Tusi Hmitrötr, tro ha inamacane la aqane tro sa axecië mekun.
6 Ame la ketre aqane tro sa hnëkëne la hni së, tre, ene la troa inine hnyawa la itre Hna Cinyihan memine la itre itusi së hna nyitrepene hnei Tusi Hmitrötr. Pane mekune jë epuni la ceitune celë. Jidri hë nge ijine tro epuni a ketre sipu inine la Tusi Hmitrötr. Epuni hi a ase thithi koi Iehova matre troa sipone la ua i Nyidrë, göi troa xatua epuni troa trongëne la hnei epuni hna inine ngöne la Wesi Ula i Nyidrë. Epuni a mekune troa goeëne la ketre film ngöne la heji ka troa xulu. Hnei epuni hna drenge, ka hape, ka lolo catre la film cili, ngo ame pe, tre, atre hi epuni laka hetrenyi la itre xaa götranene la film cili ka sis nge ka hetre isi ngön.
7 Loi e tro epuni a mekune hnyawa la eamo hna hamëne hnei Paulo ngöne Efeso 5:3, kola hape: “Ngo ame la kuci ngazo, me ite thina ka sisi asë, me meciun, te, the qaja hmaca thei nyipunie, ke tha ijije kowe la ange ka hmitöt.” Ketre, loi e tro mina fe epuni a mekune hmaca lo ketre eamo hnei Paulo hna hamëne ngöne Filipi 4:8. (E jë.) Maine epuni a sine thele la eamo celë, isa hnyinge jë, ka hape, ‘Maine tro ni a nue hnyawa la hning memine la mekunang troa goeëne la itre porogarame cili, hapeu eni kö lai a xötrethenge la tulu hna amë hnei Iesu, ene la troa drengethenge Akötresie hmekuje hi?’ Nemene la hnei epuni hna troa kuca? Tro pala kö epuni a goeëne la film cili?
8. Pine nemene matre nyipi ewekë tro pala hi sa trongëne la itre trepene meköti ka draië ngöne la thiina me ngöne la ua?
8 Thaa loi kö e troa wange sixane la itre trepene meköti Akötresie, me mekun, laka, ijije hi tro sa triane la itre ethanyine la hna caas memine la itre atr ka troa ajojezi së, tune la itre atrene la ketre film ka hetre isi ngön me kuci ngazo. Nyipi ewekë pe tro sa thupë së hnyawa memine la itre nekö së qa ngöne la itre iajojezi ne la mekuna i Satana. Nyimutre la itre ka kuci ordinatör ka nue asë la trenge catre i angatr, matre thaa tro kö la itre neköi virus ka ngazo a apaatrene la itre ithuemacanyi ka eje e hnine la itre ordinatöre i angatr, me nyijëne fe la ketre ordinatör matre troa angazone la itre xan. Tune kaa së, thaa tro fe kö sa hane hmek me thupë së qa ngöne la itre “nyinyithina” i Satana?—Efe. 6:11.
9. Pine nemene matre nyipi ewekë troa xecie koi së laka troa drengethenge Iehova ngöne la nöjei drai?
9 Ame ngöne la nöjei drai, nyipi ewekë tro sa ië ewekë hnyawa, ene la troa kuca maine thaa troa kuca pena la itre ewekë thenge la mekuna i Iehova. Eje hi laka, maine easa ajane troa hetrenyi la mel, nyipi ewekë tro sa drengethenge Akötresie me mele thenge la itre trepene meköti Nyidrë. Maine easa xötrethenge la tulu hna amë hnei Keriso, ene la troa drengethenge “uti hë la mec,” easë hi lai a amamane hnyawa, laka, ka nyipici la lapaune së. Tro hë Iehova a amanathithine la aqane mele nyipici së. Hnei Iesu hna thingehnaean, ka hape: “Ame la ate cile huti uti hë la pune, te, tro ha mel.” (Mat. 24:13) Nyipici laka, maine easa ajane troa nyitipu Iesu, haawe, nyipi ewekë tro sa catr.—Sal. 31:24.
Iesu La Tulu Ka Sisitria Ne Aqane Catr
10. Nemene la itre itupath ka traqa koi së, nge tune kaa la aqane tro sa cile kow?
10 Pine laka kola lapa xötreithi së hnene la itre thiina me itre aqane ujë ka nagzo ne la fene celë, haawe, nyipi ewekë tro sa catr matre thaa tro kö a ajojezi së hnene itre ej. Kola cile hnene la itre Keresiano kowe la itre ejolene göi mani, maine itre hna majemine kuca hnei hmi ka thoi; nge itre ewekë lai ka ijije troa ananyi angatr qaathei Iehova. Ketre, nyimutre la itre atr ka melëne la icilekeu e hnine la fami. Nge ame ngöne la itre xaa nöj, kola sajuëne hnene la itre uma ne ini la ini, ene laka ka xulu xan la itre ewekë asë, nge kolo mina fe a elë la etrune la itre atr ka qaja, ka hape, pëkö Akötresie. Nyipici laka, thatreine kö tro sa apaatrene la itre itupathi celë. Ngo nyipi ewekë pe tro sa catre troa cile kowe la itre itupathi cili, me thele troa thupë së qa ngöne itre ej. Tro la tulu hna amë hnei Iesu a amamai së la aqane tro sa eatrëne lai.
11. Tune kaa la aqane troa hamë trenge catre së hnene la hne së hna mekune hnyawa la tulu i Iesu?
11 Hnei Iesu hna qaja kowe la itretre drei nyidrë, ka hape: “Tro ha axösisi nyipunie e celë fen, ngo catejë nyipunie! ke ase hë ni apone la fen.” (Ioane 16:33) Hnei Iesu pala hi hna catre troa cile kowe la iajojezi ne la fen. Thaa hnei nyidrëti pi kö hna nue la fen troa sewe nyidrë troa xome la hnëqa i nyidrë ene la troa cainöj, maine pena troa uku nyidrë troa wange sixane la itre trepene meköti nyidrë nyine thatraqane la hmi ka wië, me aqane ujë ka loi; haawe, loi e tro sa nyitipu nyidrë. Ame ngöne la thith, hnei Iesu hna qaja göne la itretre drei nyidrë, ka hape: “Tha itete fene kö angat, nge tunge tha ate fene kö.” (Ioane 17:16) Maine tro sa inine hnyawa la tulu i Iesu ngöne la aqane catr me lapa mekune nyidrëti lai, haawe, tro hë lai a hamë së la trenge catre ka ijij troa iananyi pala hi memine la fen.
Loi e Tro Sa Xomi Ini Qa Ngöne La Aqane Catre i Iesu
12-14. Hamëne jë la itre ceitun ka amamane la aqane catre i Iesu.
12 Hnei Iesu hna catr ngöne la huliwa ne cainöj. Pine laka Hupuna i Akötresieti nyidrë, ene pe thaa hnei nyidrëti kö hna xou troa “thithatijë hnine la ēnē i Akötesie me helën’ asë la angete itö hnine la ēnē, me qene ipiëne la ite laulau i angete itö mani, me ite ita ne lapa i angete itö piny.” (Mat. 21:12) Ame ngöne lo kola traqa troa xölehuji Iesu hnene la itre sooc ngöne lo jidri tixenuë i nyidrëti e celë fen, tre, hnei nyidrëti hna catr troa canga iamamanyi koi angatr, matre troa thupëne la itretre drei nyidrë; thupene lai, öni nyidrëti, ka hape: “Maine nyipunie a thele ni, nue angate la, mate tropi.” (Ioane 18:8) Thaa qea ju kö, nge Iesu a upi Peteru troa liine hmaca la taua i angeic; qa ngöne lai kola mama laka, thaa Iesu kö a mejiune kowe la itre jia ne isi ne la fen, ngo koi Iehova pe.—Ioane 18:11.
13 Thaa hnei Iesu kö hna xou troa qaja amamane laka ka pë ihnimi ne la itretre hamë ini ka thoi, memine la itre ini ka thoi hnei angatre hna hamën. Öni nyidrëti koi angatr, ka hape: “Ekölö hi ni nyipunie, angete cinyihanyi me angete faresaio, itete thoi! ke nyipunie a thinge la baselaia ne hnengödrai koi ate. [Hnei nyipunie] hna nue pë hë la ite ewekë ka hace ne la wathebo, ene la meköt, me ihnim, me lapaun. . . . [Hnei nyipunie hna] nea la hutröne la inege memine la cei, ngo ame la hnin, te, tiqa ha hnei ënö me pi xen.” (Mat. 23:13, 23, 25) Ketre, nyipi ewekë mina fe troa eje thene la itretre drei Iesu la aqane catre cili, ke, tro fe la itre hen ne la itre hmi ka thoi a axösisi angatr me humuthe la itre xan e angatr.—Mat. 23:34; 24:9.
14 Hnei Iesu mina fe hna catr troa cile kowe la itre dremoni. Ame ngöne la ketre ijin, hnei nyidrëti hna ixelë memine la ketre atr ka catre hna löthe hnei dremoni, nge pëkö atre atreine troa othi angeic hnei cein. Thaa xou i Iesu kö, nyidrëti pe a helëne asë la itre dremoni ka löthe lai atr. (Mar. 5:1-13) Ame enehila, thaa Akötresieti kö a hamëne kowe la itre Keresiano la mene troa hane kuca la itre iamamanyikeu ka tun. Ngo ame ngöne la easa cainöj me hamë ini, nyipi ewekë fe tro sa isi me Satana, ene lo ate “atimekëne la ite hni angete tha lapaun.” (2 Kor. 4:4) Ceitune hi la pengö i Iesu me easë, laka, ame la itre jia ne isi së, tre, “tha qene ngönetei kö, ngo hna amenene hnei Akötesie nyine auligötrane la ite hunapo ka cat,” ene lo itre ini ka thoi hna akökötrene hnene la itre hmi. (2 Kor. 10:4) Nyimutre catr la itre ini hne së hna troa kapa qa ngöne la tulu i Iesu, ene la aqane troa huliwane la itre jia ne isi cili ngöne la ua.
15. Nemene la ka nyitrepene la aqane catre i Iesu?
15 Thaa hna nyitrepene kö la aqane catre i Iesu hnene la aja troa hun, ngo hnene pe la lapaune i nyidrë. Nyipi ewekë tro mina fe së a hane ujë tune lai. (Mar. 4: 40) Tune kaa la aqane tro sa eëne la nyipi lapaun? Tro hmaca la tulu i Iesu a xatua së. Hnei nyidrëti hna amamane, ka hape, atrehmekune hnyawa nyidrë la Itre Hna Cinyihan, nge pexeje hnyawa la mejiune i nyidrë koi itre ej. Hnei Iesu pala hi hna huliwane hnyawa la taua ne la ua, ene la Wesi Ula i Akötresie, ceitu me ketre jia ne isi. Nyipici hnei nyidrëti pala hi hna anyimua qaja la itre Hna Cinyihan, matre troa sajuëne la itre ini hnei nyidrëti hna hamën. Ame itre xaa ijin, Iesu a nyiqaane la itre trenge ewekë i nyidrë memine la hnëewekë celë, hna hape: “Ase hë cinyihan,” kola hape, e hnine la Wesi Ula i Akötresie.a
16. Tro sa akökötrene tune kaa la lapaune së?
16 Maine easa ajane troa eköthe hnyawa la lapaune së matre ijije tro sa cile kowe la itre itupath ka traqa koi së, nyipi ewekë tro sa e me inine o drai la Tusi Hmitrötr me sine pala hi la itre icasikeu ne la itre Keresiano, me hnehene la itre nyipici, celë hi itre ewekë lai ka troa nyitrepene la lapaune së. (Rom. 10:17) Ketre, nyipi ewekë fe troa sine thel, ene laka troa mekune hnyawa la itre mekune hne së hna e, me nue itre ej troa ketr la hni së. Eje hi lai laka, troa hetre trengecatre së, e ka mele la lapaune së. (Iako. 2:17) Nge nyipi ewekë mina fe tro sa sipone la uati hmitrötr ngöne la thith, ke, lapaun la ketre igötrane ne la wene ne la ua.—Gal. 5:22.
17, 18. Hnene la ketre trejine jajinyi hna amamane tune kaa la aqane catre i angeic ngöne la uma ne ini?
17 Hnei Kitty ketre trejine jajinyi hna öhne hnyawa la eloin la nyipi lapaun, laka ej a hamë trenge catre koi angeic. Qaane lo angeic a co, hnei angeic hna atre laka, loi e thaa tro kö a “hmahma[ne] . . la maca ka loi” ngöne la uma ne ini angeic, ketre, eje thei angeic la ajane troa cainöje kowe la itre sine ce ini angeic. (Rom. 1:16) Ame ngöne la nöjei macatre, hnei angeic hna thele troa cainöjëne la maca ka loi kowe la itre xan, ngo angeic pala hi a luelu troa cainöj, ke, pëkö trenge catre i angeic. Ame la angeic a thöth, tre, hnei angeic hna saze uma ne ini. Öni angeice jë hi, ka hape, “Ame enehila, tro hë ni a të lo itre ijin ne thaa cainöje ni.” Celë hi matre, hnei Kitty hna thithi me sipone la trenge catr me atreine waiewekë, me ijine ka sisitria matre troa hane cainöj.
18 Ame ngöne la kola xötrei lö koi uma ne ini la itre nekönatr, tre, angatr a isa qaja la itre pengö i angatr matre troa hane atre hnene la itre xan. Nyimutre la itre ka qaja la itre hmi hnei angatr hna tru ngön, me hape, thaa nyipi sine kö angatr la itre hmi angatr. Kitty hi a atrehmekune e cili, laka, kolo hi lo ijine la hnei angeic hna lapaa thithi fë. Ame pena ha la kola nue angeic troa hane ithanata, öni nyëne jë hi, ka hape, “Ketre Atre Anyipicine i Iehova ni, nge ame la ka xatua ni ngöne la götrane la ua me ngöne la aqane tro ni a ujë, tre, Tusi Hmitrötr.” Kolo pala hi a ithanata hnei Kitty nge itre xaa sine ce ini angeic a goeë amenyi angeic. Ngo ame la itre xan, tre, angatr a drenge hnyawa me hnying koi angeic e thupen. Ketre, ame kowe la atre hamë ini, Kitty la ketre tulu ka lolo ne aqane cilëgöline la itre ini hnei angeice hna mejiune kow. Kola elitrauje la madrine i Kitty hnene la hnei angeice hna xomi ini qa ngöne la aqane catre i Iesu.
Loi e Tro Sa Nyitipune La Lapaune Me Aqane Catre i Iesu
19. (a) Nemene la nyine tro sa kuca matre troa nyipici la lapaune së? (b) Tune kaa la aqane tro sa amadrinëne la hni Iehova?
19 Hnene mina fe la itre aposetolo hna atrehmekun, laka, nyipi ewekë troa nyitrepene la aqane catre i angatr hnene la lapaun. Hnei angatre hna sipone iele Iesu, ka hape: “Nyi xane ju la lapaune hun.” (E jë la Luka 17:5, 6.) Maine easa ajane troa nyipici la lapaune së, thaa tro hmekuje kö a mejiune laka, ka mele Akötresie. Nyipi ewekë fe tro sa thele troa acatrene hnyawa la aqane imelekeu së me Iehova, tune la aqane imelekeu ne la nekönatre memine la keme i nyën ka tru ihnimin. Hnei Solomona hna cinyihan jëne la uati hmitrötr, ka hape: “Neköng, maine inamacanë hë la hni ’ö, troa madine la hning. Nge tro la hning’ a aciacin’ e qaja la ite ewekë ka meköti hnene la ukeineqe i ’ö.” (Ite edomë 23:15, 16) Maine tro sa cilëgöline la itre trepene meköti Akötresie, tro hë lai a amadrinëne la hni Iehova, nge tro fe hë lai a akökötrene la aqane catre së. Qa ngöne lai, epi tro pala hi sa xötrethenge la tulu i Iesu, me catre troa cilëgöline la ewekë ka meköt!
[Ithueamacany]
a Hetre itre xaa ceitun ngöne Mataio 4:4, 7, 10; 11:10; 21:13; 26:31; Mareko 9:13; 14:27; Luka 24:46; Ioane 6:45; 8:17.
Ijije Kö Tro Nyipunieti a Qeje Pengön?
• Ngacama itre atr ka thaa pexeje kö së, ngo nemene la ka troa xatua së troa catre drengethenge?
• Nemene la ka nyitrepene la nyipi lapaun, nge tune kaa la aqane tro ej a xatua së troa catr?
• Nemene la thangane ka loi hna troa kapa qa ngöne la hna drengethenge me nyitipune la aqane catre i Iesu?