Koi 9 Nofeba Me Wiike Cili
Kola Uku Së Hnene La Ihnimi Keriso Troa Ihnim
“Hnei [Iesu] hna hnime la ite sine i nyidëti e celë fen, nge nyidëti a hnimi angate uti hë la pun.”—IOANE 13:1.
1, 2. (a) Nemene la ewekë nyine haine ngöne la aqane hnimi Iesu la itre atr? (b) Nemene la itre götranene la ihnim, hne së hna troa ce ithanatane ngöne la hna cinyihane celë?
HNEI Iesu hna amë la ketre tulu ne ihnim ka pexej. Hnei nyidrëti hna amamane la ihnimi nyidrë ngöne la aqane ithanata, me aqane ujë i nyidrë, me jëne la itre ini hnei nyidrëti hna hamën, me jëne mina fe la mele hnei nyidrëti hna huujën. Uti hnyawa la pun la mele i nyidrë, tre, hnei Iesu hna hnime catrëne hi lo itretre drei nyidrë, ngo hnei nyidrëti mina fe hna hnime lo itre atr hnei nyidrë hna ithanata memin.
2 Ame la tulu ka sisitria ne ihnim hnei Iesu hna amë, tre, celë hi ketre hna amekötine ka draië hna troa trongëne hnene la itre hlue i nyidrë. Celë hi tulu lai ka uku së troa hane hnime la itre trejine me easë ngöne la ua, memine fe la nöjei atr asë, tune lo aqane ujë i Iesu. Celë hi matre tro sa ce wange ngöne la hna cinyihane celë la aqane tro la itre qatre thup ne la ketre ekalesia, a xomi ini qa ngöne la aqane hnime Iesu la itre atr ka tria, memine fe lo itre ka kuca la ngazo. Tro mina fe sa ce ithanatane la aqane tro la aqane hnime Iesu lo itre atr, a ukune la itre Keresiano troa xatuane la itre trejine me angatr me itre xane fe ka melëne la itre ijine kola elë la thupene mo, me akötr me wezipo mina fe.
3. Ngacama ka tria catr la ewekë hna kuca hnei Peteru, ngo hnei Iesu hna ujë tune kaa koi angeic?
3 Ame lo jidri qëmeken tro Iesu a mec, tre, hnei Peteru lo sipu aposetolo i nyidrë, hna akönia kelikelë nyidrë. (Mar. 14:66-72) Ngo tune lo hnei Iesu hna thingehnaeane hë, hnei nyidrëti hna nue la ngazo i Peteru, ke, hnei angeice hna ietra. Thupene lai, hnei Iesu hna ahnithe koi Peteru la itre hnëqa ka tru nyine tro angeic a xom. (Luka 22:32; Ite hu. 2:14; 8:14-17; 10:44, 45) Haawe, nemene la ini hne së hna kapa qa ngöne la aqane ujë i Iesu kowe la itre ka kuca la ketre ewekë ka tria catr?
Loi e Tro Sa Nyitipune La Aqane Ujë i Iesu Kowe La Itre Atr Ka Kuca La Ngazo
4. Nemene la ketre ijine ngöne laka nyipi ewekë troa xome la aqane ujë i Keriso?
4 Ame la troa upetrön eë la ketre atrene la hnepe lapa së maine ketre trejine me easë ngöne la ua qa hnine la ekalesia, tre, celë hi ketre ewekë lai ka akötr koi së troa melën; nge e cili hi la kola hace koi së troa xom la aqane ujë i Iesu Keriso. Akötre koi së troa goeëne laka, easenyi hë la pun ne la fene i Satana, nge ketre kola elë trootro la etrune la itre atr hna löthe hnene la ua ne la fen cili. Ijije hi tro la itre thiina me itre aqane ujë ka ngazo ne la fen cili, a ajojezine la aja ka eje thene la itre thöthi me itre qatr, troa trongëne la aqane ujë ka meköt. Ame ngöne lo hneijine i Iesu, hetrenyi la itre xaa Keresiano hna upetrön eë qa hnine la ekalesia, nge hetre itre xan hna hajin. Nge eje mina fe lai ngöne la hneijine së. (1 Kor. 5:11-13; 1 Tim. 5:20) Ngo maine tro la itre qatre thup a nyitipune la aqane ihnimi Iesu ngöne la angatr a ithanatane la itre jole cili, haawe, tro hë la aqane ujë i angatr a ketr hnyawa la hni ne la atre kuca la ngazo.
5. Tro la itre qatre thup a nyitipu Iesu tune kaa ngöne la aqane troa ujë kowe la atr ka kuca la ngazo?
5 Kola nyitipu Iesu hnene la itre qatre thup, ngöne la aqane wanga atrune pala hi hnei angatr la itre trepene meköti Iehova. Maine angatr a ujë tune lai, haawe, aqane tro hi angatre lai a amamane la hni ka menyik me thiina ka loi, me ihnim ka eje thei Nyidrë. Maine ka nyipi ietra la ketre atr, me “thë fë hni,” me “aköte [“mekun” MN]” pine la ngazo hnei angeice hna kuca, haawe, thaa tro kö lai a jole kowe la itre qatre thup troa “kapa hmaca la ate ka tune lai ngöne la hni ka menyik.” (Sal. 34:18; Gal. 6:1) Ngo tune kaa la aqane tro angatr a ujë, e catreqë la ketre atr maine thaa ietra pena kö?
6. Nemene la nyine tro la itre qatre thup a neën ngöne la angatr a ce ithanata memine la itre ka kuca la ngazo, nge pine nemene lai?
6 Maine troa thipetrije hnene la ketre atr la itre eamo hna amamane qa hnine la Tusi Hmitrötr, maine upe pena ha la zöne kowe la itre xan, tre, maine jë tro lai la aqane ujë cili a aelëhnine la itre qatre thup me itre xane fe. Ketre, maine atre hë la itre qatre thup la thangane ka ngazo ka xulu qa ngöne la ewekë ka akötr hnei angeic hna kuca, tre, maine jë tro hë angatr a ajane troa ketre sipu qaja la hnei angatre hna mekun, göne la itre aqane ujë i angeic memine la thiina i angeice mina fe. Ngo ame pe, tre, ngazo e troa elëhni, ke, thaa kolo kö lai a xome “la mekuana i Keriso.” (1 Kor. 2:16; E jë la Iakobo 1:19, 20.) Ame ngöne lo hneijine i Iesu ekö, tre, canga trotrohnine hi la itre atr laka, nyidrëti a haji angatr; ngo goi thaa hnei nyidrëti fe hna qaja la ketre ewekë ka catr, maine ka troa akötrë angatr pena. (1 Pet. 2:23) Hnei nyidrëti pe hna amamane koi angatr laka, nyidrëti a nue kowe la itre atr ka kuca la ngazo troa ketre ietra me bëeke hmaca koi Iehova. Nyipici, ame lo ketre kepine ka tru matre Iesu a traqa e celë fen, tre, ene la troa “amelene la nöjei ate ka ngazo.”—1 Tim. 1:15.
7, 8. Nemene la ka troa xatuane la itre qatre thup ngöne la kola iameköti?
7 Tro la tulu hnei Iesu hna amë ngöne la götrane cili, a hetre thangane tune kaa ngöne la aqane tro sa ujë kowe la itre atr hna troa hajine ngöne la ekalesia? Loi e tro sa mekune hnyawa laka, ame la itre hna amekötine ngöne la Tusi Hmitrötr göne la aqane troa iameköti e hnine la ekalesia, tre, nyine tro lai a thupëne la itre mamoe, nge nyine tro mina fe a upe la atre kuca la ngazo troa ietra. (2 Kor. 2:6-8) Drei la easa akötr troa öhn la atr hna upetrön eë qa hnine la ekalesia, pine la hnei angeic hna thaa ietra; ngo loi pe, madrine kö së troa troa atre, ka hape, nyimutre la itre atr ka bëeke hmaca e thupen koi Iehova memine la ekalesia i Nyidrë. Maine tro la itre qatre thup a xome la aqane ujë i Iesu, haawe, tro hë lai a xatuane la itretre kuca la ngazo troa ujëne la hni angatr me mekune hmaca troa bëeke hmaca. Ngacama tro la itre xaa atr ka kuca la ngazo elany, a thëthëhmine la itre xaa eamo hna hamëne hnene la itre qatre thup jëne la Tusi Hmitrötr, ngo ame pe, tre, tro pala kö angatr a mekun ka hape, hnene la itre qatre thup hna metrötrë angatr me ujë koi angatr cememine la ihnim.
8 Qa ngöne lai nyipi ewekë tro la itre qatre thup a eëne “la wene la ua,” tune la aqane ihnimi Keriso, ngacama jole ju hë e itre xaa ijin. (Gal. 5:22, 23) Loi e thaa tro kö angatr a saqe troa upetröne eë la ketre trejine ka kuca la ngazo. Ngo nyipi ewekë pe tro angatr a amaman, laka, eje e kuhu hni angatr la aja tro la itre trejine cili a bëeke hmaca koi Iehova. Haawe, maine ietra hi la ketre atre kuca la ngazo, tune la aqane ujë ne la ka ala nyim, tre, ma tro hë a tru la hni ne ole i angeic koi Iehova me kowe la “ite ahnahna kowe la nöjei ate,” ene lo itre ka xatua angeic troa bëeke hmaca kowe la ekalesia.—Efe. 4:8, 11, 12.
Loi e Tro Sa Nyitipune La Aqane Ihnimi Keriso Ngöne La Hneijine Ne La Pun
9. Pane qaja jë la aqane amamane Iesu ekö la ihnimi nyidrë kowe la itretre drei nyidrë.
9 Hnei Luka hna edromën ngöne la tusi angeic la ketre aqane amamane hnyawa Iesu la ihnimi nyidrë. Atrehmekune hi nyidrë, laka, tro ha traqa la ijine tro la itre sooce i angetre Roma a lapa xötreithi Ierusalema matre troa thingijëne kowe la itre atrene ej troa kötr. Ame hnei Iesu hna hmekëne la itretre drei nyidrë cememine la ihnim, me hape: “E öhnë hë hnei nyipunie Ierusalema hna isiline hnei ishi, wangate hmekune ju nyipunie, eashenyi hë troa drum’ ej.” Haawe, nemene hë la nyine tro angatr a kuca? Hanawange la itre hna amekötine celë ka nualai hnyawa hnei Iesu hna hamën. Öni nyidrëti, ka hape: “Ngöne la ijine cili, loi e tro angete Iuda a köte kowe la ite wet; nge loi e löpi angete lapa e kuhu hnine la lapa cili; nge the lö kö angete qa kuhu; ke celë hi ijine nyi thupen, mate eat’ asë la nöjei ewekë hna cinyihan.” (Luka 21:20-22) Thupene lo kola mejë hmaca hnene la trongene isi angetre Roma qa ngöne la hna lapa xötreithi Ierusalema ngöne lo macatre 66 M.K., hnene la itre atr ka idrengethenge hna trongëne la itre hna amekötine cili.
10, 11. Kola hnëkë së tune kaa kowe la “aköte atraqate” hnene la aqane ujë ne la itre pane Keresiano ka kötr ekö qaa Ierusalema?
10 Ame lo ijine angatr a kötre qaa Ierusalema, tre, nyipi ewekë tro lo itre Keresiano a itö ihnim, tune lo aqane hnimi angatr ekö hnei Iesu. Maine jë hnei angatre hna ce thawa la itre ewekë hnei angatre hna hetreny. Ngo atraqatre catre kö elanyi la aqane troa eatr la hna perofetane celë hnei Iesu, hune lo aqane lepe apaatrene ekö la traone e Ierusalema. Öni nyidrëti e ahnithe amë, ka hape: “Tro ha aköte atraqate, pëkö hna tune kö qa ngöne la qane la fene hnengödrai uti hë enehila, nge kete pëkö troa tun.” (Mat. 24:17, 18, 21) Qëmekene la “aköte atraqate” uti hë la troa traqa la hneijine cili, tre, maine jë tro mina fe sa qëmeke kowe la itre jol me melëne la itre ijine easa pë ewekë. Ngo maine eje the së la aqane mekune i Keriso, haawe, tro hë lai a xatua së troa cile kowe la itre ewekë cili.
11 Ame ngöne la itre ijine cili, tre, nyipi ewekë tro sa xötrethenge la tulu hna amë hnei Iesu, ene la troa hetrenyi la ihnimi ka pë thoi ngön. Celë hi kepine matre hnei Paulo hna hamëne la eamo celë, kola hape: “Tro asë sha isa amadinëne la ate easheny, mate loi angeic, me keukawa. Ke ame Keriso, te, tha hna amadi nyidëti kö . . . Loi e hamë nyipunie hnei Akötesie, ine la xomi hni me ate akeukawan, la tro nyipunie a ce hni thenge Keriso Iesu.”—Rom. 15:2, 3, 5.
12. Nemene pengöne ihnim la hne së hna troa akökötren enehila, nge pine nemen?
12 Hnei Peteru, ketre atr ka hane xötrethenge la tulu ne ihnimi Iesu, hna hamë ithuecatre kowe la itre Keresiano troa eëne “la ihnimi ka pë thoi ngöne koi ange tejin” me “denge thenge la nyipici.” Nyipi ewekë fe tro angatr a “isa ihnimi ate . . hnene la hni ka pë ethan.” (1 Pet. 1:22) Enehila hi la ijine tro sa catr eëne la itre thiina ka eje thei Iesu, ke, elë catre hë la itre jol ka ajojezine la mele ne la itre hlue i Akötresie. Thaa tro pi kö sa mejiune kowe la ketre ewekë ne la fene celë, ke, easa öhne hnyawa laka, jole catre enehila troa nyinyin la itre ejolene la mani. (E jë la 1 Ioane 2:15-17.) Ngo pine laka calemi catre hë la pune la fene celë, haawe, nyipi ewekë pe tro sa easenyi catre koi Iehova memine la itre trejine me easë, me thele troa eköthe hnyawa la aqane imelekeu së me angatr e hnine la ekalesia. Ketre, hnei Paulo hna hamëne la eamo celë, ka hape: “Ihnimikeuneju tune la aqane ihnimi tejin. Pi pa troa atrune la kete.” (Rom. 12:10) Nge öni Peteru e wanga atrune la mekune cili, ka hape: “Nge hune la nöjei ewekë asëjëihë la tro nyipunie a ihnimikeu cat; ke tro ha he la ite ngazo ka nyimute hnene la ihnim.”—1 Pet. 4:8.
13-15. Hnene la itre xaa trejine hna xötrethenge tune kaa la ihnimi Keriso, thupene la hna traqa la itre hulö?
13 Kola hlemu la Itretre Anyipicine i Iehova e cailo fen asë hnene la hnei angatre hna catre xötrethenge la tulu ne ihnimi Iesu. Maine mekune hi së lo aqane ujë ne la Itretre Anyipicine i Iehova ngöne lo macatre 2005, thupene la hna pane traqa la itre iudreli me itre janacas, ngöne la götrane ailojë e Etazini; nyipici laka, thaa hnei angatre kö hna cile troa xatuane lo itre atr hna ketr hnene lo lai itre ewekë cili. Hnene la tulu i Iesu hna ukune la ala 20 000 lao trejin, troa nue la itre hnalapa i angatr me itre huliwa i angatr matre troa xatuane la itre trejine me angatr ka aja ixatua me ka akötr.
14 Ame ngöne la ketre götran, tre, hna traqa la ketre gejë ka tru, 10 m la edraiëne ej; nge hnene eje hna kaca a tro e koho hune la ihnapet, a 80 kilomet jë kö qa kuhu hnagejë la ehoeane la götrane hnene eje hna ketr. Ame ju hi la kola hmejekötr hmaca la gejë, tre, mama pi hi laka, nyimutre la itre hnalapa me itre batima hna thë hnyawa hnene la gejë cili. Nyimutre la Itretre Anyipicine i Iehova ka traqa fë qa ngöne la itre xaa nöj la itre hnei angatre hna atrein, me itre ewekë i angatr me itre jia ne huliwa i angatr, matre troa xatuane la itre atrene la nöje cili; nge eje thei angatr la aja troa kuca la nöjei pengöne huliwa ka nyipi ewekë. Hnene la lue trejine föe ka meci föen, hna qatrenge asë la itre ewekë i nyidro me ati itre eje ngöne la ketre loto ka tru, me nyinyapëne la 3 000 lao kilomet matre troa hamë ixatua ngöne la nöje cili. Lapa pëhë la ketre e nyidro ngöne lai götrane cili, matre troa xatuane la komite ne la nöj, me hane xome la huliwa ne pionie lapa.
15 Traqa koi 5 600 jë kö la etrune la itre hnalapa ne la Itretre Anyipicine i Iehova me itre xaa atrene la nöje fe, hna xupe hmaca maine pena hna nyidrawane hmaca. Nemene la hna mekune hnene la Itretre Anyipicine i Iehova ne la nöje cili, ngöne la angatr a goeëne la aqane hnimi angatre hnyawa hnene la itre trejine me angatr? Ame la ketre trejine föe, laka hna thë mina la hnalapa i nyiidro, tre, hnei nyiidro hna tro pi troa mele ngöne la ketre neköi karavan ka co, nge ka thia tim; nge ketre ame la hnepe hnë tro nyiidroti a athi eë me ole xen, tre, ka kaqa. Celë hi matre hnene la itre trejine trahmanyi hna xupe la ketre uma ka lolo nge ka keukawa koi nyiidro. Ame la nyiidro a goeëne la hnei nyiidro hna hetrenyi enehila, tune la uma ka hnyipixe, tre, nyiidro a treij ke atraqatre la hni ne ole i nyiidro koi Iehova me kowe la itre trejine me nyiidro. Hetrenyi la itre xaa trejin ne la nöje cili laka, ngacama ase hë xupe la itre uma i angatr, ngo hnei angatr hna nango lapalapa uti koi caa macatre, maine caa macatre nge sin ngöne la itre uma hna hamë angatr. Pine nemene lai? Pine laka angatr a ajane troa pane lapaane la itre uma i angatr ka hnyipixe hnene la itre trejine ka traqa troa ixatua. Drei la ketre tulu ka lolo ka amamane la aqane xötrethenge hnei itre xan la aqane ujë i Keriso!
Loi e Tro Sa Nyitipune La Aqane Goeëne Iesu La Itre Ka Wezipo
16, 17. Tune kaa la aqane tro sa nyitipune la aqane goeëne Keriso la itre atr ka wezipo?
16 Nyipici laka, xalaithe hi the së la itre ka melëne la ketre hulö ka tru. Ngo ame pe, tre, hne së asë hi hna hane wezipo, ketre tune la itre atrene la hnepe lapa së. Celë hi matre ketre tulu ka lolo koi së, la aqane goeëne Iesu la itre ka wezipo. Hnene la ihnim ka eje thei nyidrë hna upi nyidrë troa utipine la itre atr cili. Ame la kola traqa fë hnene la ka ala nyim la itre sinee i angatr ka trene meci koi Iesu, tre, hnei “nyidëti [hna] aloine la ite meci asë.”—Mat. 8:16; 14:14.
17 Ame enehila, pëkö thene la itre Keresiano la mene i Iesu, ene la troa aloine la itre mec, ngo ame pe angatr a nyitipune la aqane utipine nyidrë la itre atr ka wezipo. Hna mama tune kaa la utipine cili thei angatr? Kola amamane hnene la itre qatre thup, laka, eje thei angatr la aqane mekune i Keriso, hnene la aqane eköthe angatr la huliwa ne troa xatuane la itre atrene la ekalesia ka wezipo, me wange laka, ase hnyawa ha hamën la ixatua ka ijij kowe la itre ka wezipo asë; ke celë hi aqane tro angatr a trongëne la itre trenge ewekë hna cinyihane ngöne Mataio 25:39, 40.a (E jë.)
18. Hnene la lue trejine föe hna amamane tune kaa la ihnimi nyidro kowe la ketre trejine fö, nge nemene la itre thangane lai?
18 Nyipici laka, thaa hnëqa i qatre thup hmekuje kö la troa kuca la loi kowe la itre xan. Tro sa pane ce wange la pengö i Charleene, laka, 44 lao macatre i eahlo; hna ketri eahlo hnene lo meci hna hape, iutr, nge ketre ase hë thuemacanyi eahlo, ka hape, treene pe hi lao drai ne tro eahlo a mel. Pine laka hnene la lue trejine föe ne la ekalesia ene Sharon me Nicolette hna öhn, laka, eahlo a aja ixatua nge ketre hace kowe la föi eahlo troa xome caasine la hnëqa cili, ene pe hnei nyidroti hna nue la itre drai ka pexeje i nyidro matre troa xatua eahlo ngöne la itre drai tixenuë i eahlo. Tro pi hë la itre drai a koi sikisi lao wiik ne mele pala kö Charleene; ngo ame pe, tre, hnei Sharon me Nicolette hna amamane la ihnimi nyidro uti hnyawa ha la kola meci hnei Charleene. Kola qaja hnei Sharon, ka hape: “Thaa ewekë ka hmaloi kö, e atrehmekune hi epun laka, pë hnyawa ha nyin la meci ne la atr hnei epun hna iatre memin. Ngo ame pe, tre, hnei Iehova hna hamë trenge catre koi hun. Ketre, hnene la ewekë celë hna aeasenyi huni catr, me aeasenyi huni mina fe me Nyidrë.” Önine la föi Charleene, ka hape: “Thaa tro pi kö ni a thëthëhmine la ixatua ka lolo hna hamë nyiho hnene la lue trejine föe cili. Hnene la itre aliene hni nyidro ka wië memine la aqane goeëne aloine nyidro la itre ewekë, hna ahmaloeëne la mele i Charleene uti hë la angeic a mec, nge ketre, hnene mina fe lai hna ahmaloeë ni me akeukawane la hning. Tro pala kö ni a olene koi nyidro uti hë la pun. Eje hi, hnene la mele ne huuje i nyidro hna acatrene la lapauneng koi Iehova, memine la ihniming kowe la lapa ne la itre trejine e cailo fen asë.”
19, 20. (a) Hne së hna ce wange la faifi lao götran ne la aqane mekune i Iesu, nemene la itre götrane cili? (b) Nemene la hnei epuni hna isa mekune troa catre kuca?
19 Ame ngöne la köni hna cinyihane celë, hne së hna ce wange la faifi lao götran ne la aqane waiewekë i Iesu, memine la aqane tro sa xötrethenge la tulu i nyidrë memine la aqane ujë i nyidrë. Epi tro sa nyitipu Iesu, ene la troa “menike . . me ipië la hni.” (Mat. 11:29) Ngacama mama hi la itre hnepe ngazo me itre hnepe kucakuca ne la itre xan, ngo epi tro sa catre troa ujë koi angatr cememine la thiina ka loi. Loi e tro mina fe sa catre troa drengethenge la nöjei hna amekötine hnei Iehova ngöne la easa cile kowe la itre itupath.
20 Nge ketre, loi e tro sa xötrethenge la aqane hnime Keriso la nöjei trejine me easë “uti hë la pun.” Ihnimi cili la hatren, laka, itre nyipi hlue i Iesu së. (Ioane 13:1, 34, 35) Eje hi, “loi e cile huti la ihnimi tejin.” (Heb. 13:1) Thaa tro pi kö sa hmacahmaca! Catre jë pe së troa atrunyi Iehova ngöne la nöjei götrane la mele së me hane xatuane mina fe la itre xan, ke, eje hi laka tro hë Iehova a amanathithine la itre trenge catre së.
[Ithueamacany]
a Wange ju la hna cinyihan, hna hape “Ne vous contentez pas de dire: ‘Tenez-vous au chaud et continuez à bien vous nourrir’ ” ngöne la La Tour de Garde ne 15 Okotropa 1986.
Ijije Kö Tro Nyipunieti a Qeje Pengön?
• Tune kaa la aqane tro la itre qatre thup a nyitipune la aqane ujë i Keriso kowe la itre atr ka kuca la ngazo?
• Pine nemene matre ka nyipi ewekë catre troa nyitipune la ihnimi Keriso ngöne la hneijin ne la pun?
• Tro sa amamane tune kaa la aqane goeëne Keriso la itre ka wezipo?