Koi 26 Okotropa Me Wiike Cili
Loi e Eje Pala hi The Së La Aqane Mekune i Keriso
“Loi e . . . tro nyipunie a ce hni thenge Keriso Iesu.”—ROM. 15:5.
1. Pine nemen matre loi e tro sa thele troa xome la aqane mekune i Keriso?
ÖNI Iesu Keriso, ka hape, “Trohemi koi ni. . . me inine theng; ke menyike ni, nge ipië la hning; nge tro nyipunieti a öhne la hna mano thatraqane la ite u i nyipunie.” (Mat. 11:28, 29) Kola mama hnyawa la aqane mekune i Iesu, jëne la ekeukawane la ihë i nyidrë. Pëkö ketre atr ka tui nyidrë ka atreine hamë tulu ka lolo. Ngacama Iesu la Hupuna i Akötresie ka trene men, ngo hnei nyidrëti hna hnime me thele troa trotrohnine la itre atr ka aja ixatua.
2. Nemene la itre pengöne la thiina i Iesu hne së hna troa ce wang?
2 Easë a troa ce wange ngöne la hna cinyihane celë memine la lue xan ka troa xulu, la aqane tro sa akökötrene me xome pala hi la aqane mekune i Iesu, me melëne mina fe “la mekuana i Keriso” ngöne la mele së. (1 Kor. 2:16) Tro sa pane ce wange la faifi lao pengöne la thiina i Iesu: hni ka menyike me ka ipië, me thiina ka loi, me ka drengethenge Akötresie, memine fe aqane catr, me ihnimi nyidrë.
Xomi Ini Jë Qa Ngöne La Aqane Menyike i Iesu
3. (a) Nemene la ini hnei Iesu hna hamëne kowe la itretre dreng, göne la troa hetre hni ka ipië? (b) Hnei Iesu hna ujë tune kaa ngöne la kola kucakuca hnene la itretre drei nyidrë?
3 Eje thei Iesu, Hupuna i Akötresieti ka pexej, la ajane troa traqa e celë fen matre troa huliwa e nyipine la itre atr ka thaa pexeje kö nge ka ngazo. Ngacama tro la itre xan e angatr a humuthi nyidrë e thupen, ngo thaa paatre pi kö thei nyidrë la madrin me xomi hni. (1 Pet. 2:21-23) Maine tro sa ‘goeëne’ hnyawa la tulu i Iesu, tro hë lai a xatua së troa hane ujë tui nyidrë ngöne la kola akötrë së hnene la itre ewekë ka ngazo hna kuca hnene la itre xan. (Heb. 12:2) Hnei Iesu hna könëne la itretre drei nyidrë troa ‘xome la nyine isilekeu i nyidrë” me xomi ini qaathei nyidrë. (Mat. 11:29.) Nemene la hnei angatre hna troa inin? Ame la ewekë hnapan, tre, ene la aqane menyike i Iesu; ketre, ngacama hetrenyi la itre ngazo thene la itretre drei nyidrë, ngo hnei nyidrëti pala hi hna xomihni ahoean. Ame ngöne la jidri qëmekene tro nyidrëti a mec, hnei Iesu hna hnea la itre waca i angatr me hamë angatr la ketre ini, nyine tro angatr a mekune pala hi, ene la troa “ipië la hni.” (E jë la Ioane 13:14-17.) Thupene lai, ame ngöne la kola meköle hnei Peteru me Iakobo me Ioane, nge thaa “hmeke” kö angatr, tre, canga atrehmekune hi Iesu, laka, itre atr ka ngazo angatr. Öni nyidrëti e hnying, ka hape: “Simona fe, eö lai a meköl? Hmekënejë nyipunie me thith, mate tha lö kö kowe la itupath. Kola ajane la hni, ngo kucakuca la ngönetei.”—Mar. 14:32-38.
4, 5. Tro la tulu i Iesu a xatua së tune kaa troa qëmeke kowe la itre ngazo hna kuca koi së hnene la itre xan?
4 Tro sa ujë tune kaa e kola pi hune fë mekun hnene la ketre trejine me easë, maine ka canga elëhni, maine pena ka hmitr troa trongëne la eamo hna hamën hnene la itre qatre thup, maine hnene la “hlue ka nyipi me ka inamacan”? (Mat. 24:45-47) Nyipici laka, canga tro hi sa nue la ngazo hna kuca koi së hnene la itre atre ne fen, ngo maine ketre ngazo hna kuca hnene la ketre trejine me easë, tre, nango jole koi së troa nue la ngazo cili. Maine ka canga wesitre së hnene la itre ngazo ne la itre xan, nyipi ewekë tro së a isa hnying, ka hape, ‘Tune kaa la aqane tro ni a xome hnyawa la “mekuana i Keriso”?’ Haawe, loi e tro pala hi sa hnehen, laka, thaa hnei Iesu kö hna wesitre kowe la itretre drei nyidrë, ngöne lo kola mama thei angatr la itre hnepe kucakuca ngöne la götrane la ua.
5 Tro sa pane ce wange la tulu i Peteru aposetolo. Ame lo Iesu a hë Peteru troa uti qa hune la he me tro koi nyidrë hune la hnagejë, tre, hnei angeice hna drei nyidrë. Ngo thaa qea ju kö nge angeic a goeëne la ecatrenyi ne la enyi, ene pe angeice qaane troa lö. Hapeu, hnei Iesu kö hna wesitre koi angeic, me qaja, ka hape: “Loi kö! Hnei eö kö lai hna thel”? Ohea! “Iesu a canga li ime pi, me xölehuji angeic, me ulatine koi angeic, ka hape, ‘Ate lapaune acone fe, ue la eö a luelu?’ ” (Mat. 14:28-31) Tui Iesu a li ime koi Peteru troa xatua angeic, ijije kö tro sa xatuane la ketre trejine me easë ka ajane troa akökötrene la lapaune i angeic? Celë hi aqane tro së lai a thiina ka menyik, tune la aqane ujë i Iesu koi Peteru.
6. Nemene la ini hnei Iesu hna hamëne kowe la itretre drei nyidrë, göi troa pi mama?
6 Ketre, Peteru mina fe lo ketre aposetolo ka lapaa hane ikelikelë, ke, kola pi atre la ka tru e angatr itretre dreng. Hnei Iakobo me Ioane hna ajane troa lapa ngöne la Baselaia i Iesu, ketre, ngöne la götrane maca i nyidrë nge ketre, ngöne la götrane mi. Ame ju hi la kola atre la ewekë cili hnei Peteru memine la itre xan, ene pe angatr a elëhni koi nyidro. Atrehmekune hi Iesu laka, celë hi aqane ujë ne la itre atr ekö hnei angatre hna ce tru memin. Celë hi matre, hnei Iesu hna hë angatr me qaja, ka hape: “Ate hë nyipunie laka, thina i angete musinë angete etheni troa qene joxu hui angat, nge hna musinë angate hnei ite ka tru. Tha tro kö a tune lai thei nyipunie; ngo ame la ate ajane troa tru thei nyipunie, te, tro angeic’ a huliwa i nyipunie; nge ame la ate ajane troa pa thei nyipunie, te, tro angeic’ a nyi hlue i nyipunie.” Thupene lai, hnei Iesu hna amamane hnyawa la tulu i nyidrë, me hape: “Kete tune la Nekö i ate tha traqa kö troa hete hlue i angeic, ngo tro pe a hlue, me hamëne la mele i angeice nyine thupene mele ne la nöjei ate ka kösau.”—Mat. 20:20-28.
7. Tune kaa la aqane tro së isa ala caasi a sajuëne la caas e hnine la ekalesia?
7 Maine tro sa mekune hnyawa la aqane ipië i Iesu, tro hë lai a xatua së troa ‘acoconyi së’ e nyipine la itre trejine me easë. (Luka 9:46-48) Maine tro sa ujë tune lai, tro fe ha acatrene la caasi the së. Tune la ketre keme ne la ketre lapa ka tru, Iehova a ajane tro la itre nekö i Nyidrëti e celë fen, a “ce lapa” me ce mel. (Sal. 133:1) Hnei Iesu hna sipone kowe la Tretretro i nyidrë, ka hape, loi e tro pala hi la nöjei Keresiano asë a caas, matre “atejë la fene laka hnei cilieti hna upi ni, me hnimi angat, tune lo hna hnimi ni hnei cilie.” (Ioane 17:23) Qa ngöne lai, easa amamane laka itretre drei Keriso së hnene la hne së hna caas. Maine easa ajane troa kapa madrine la aqane caasi cili, haawe, nyipi ewekë troa eje the së la aqane waiewekë i Keriso göne la itre ngazo ne la itre xan. Hnei Iesu hna nue la itre ngazo, me inine la itre atr, laka, tro ha nue la itre ngazo së, e hne së hna nue pala hi la itre ngazo ne la itre xan.—E jë la Mataio 6:14, 15.
8. Nemene la ini hne së hna xom qa ngöne la tulu hna amë hnene la itre trejine ka nyihlue i Akötresie itre macatre hë enehila?
8 Ketre, atraqatre la itre manathithi hne së hna troa kapa, e hne së hna nyitipune la lapaunene la itre trejin ka nyitipu Keriso laka itre macatre hë enehila. Ceitune la aqane ujë i angatr me Iesu, laka, angatre mina fe a thele troa trotrohnine la itre ngazo ka eje thene la itre xan. Hnei angatre hna inine, ka hape, maine tro sa nyitipune la aqane utipine i Iesu, tro hë lai a aijijë së troa “xatuane la ite ka kucakuca me tha ’tein” me hane acatrene mina fe la caasi the së. Ketre, kolo lai a ithuecatre kowe la itre atrene la ekalesia asë troa xome hnyawa la aqane mekune i Keriso. Caasi hi la hnei angatre hna thele thene la itre trejine me angatr, memine la hnei Paulo hna thele thene la itre Keresiano ne Roma, kola hape: “Loi e hamë nyipunie hnei Akötesie, ine la xomi hni me ate akeukawan, la tro nyipunie a ce hni thenge Keriso Iesu; mate tro nyipunie a ce atrunyi Akötesie la Tetetro ne la Joxu shë Iesu Keriso hnene la hni ka cas, me ineqe ka cas.” (Rom. 15:1, 5, 6) Nyipici, kola atrunyi Iehova hnene la aqane caasi së troa thili koi Nyidrë.
9. Pine nemen matre nyipi ewekë tro sa hetrenyi la uati hmitrötr, matre troa xötrethenge Iesu?
9 Hnei Iesu hna ce amexeje la troa “ipië la hni” memine la troa thiina ka menyik, ene la ketre igötranene la wene ne la uati hmitrötre i Akötresie. Haawe, maine easa ajane troa trongëne la tulu hna amë hnei Iesu, nyipi ewekë tro sa hetrenyi la uati hmitrötre i Iehova matre ijiji së troa xötrethenge hnyawa la tulu cili. Loi e tro sa sipone ej jëne la thith, me catre troa eëne la itre igötranene la wene ne ej, ene la “ihnim, me madin, me tingeting, me xomi hni ahoeany, me metöt, me thina ka loi, me nyipici, me thina ka menyik, me xome hnöth.” (Gal. 5:22, 23) Qa ngöne lai, maine tro sa xötrethenge la tulu hnei Iesu hna amë ene la thiina ka ipië me ka menyik, tro hë së lai a amadrinë Iehova, Tretretro së e koho hnengödrai.
Hnei Iesu Hna Ujë Kowe La Itre Xan Cememine La Thiina Ka Loi
10. Hnei Iesu hna amamane tune kaa la thiina ka loi?
10 Ame la thiina ka loi, tre, celë fe ketre igötranene la wene ne la uati hmitrötr. Hnei Iesu pala hi hna ujë kowe la itre xan cememine la thiina ka loi. Hnene la itre atr ka thele Iesu hnyawa hna qaja, ka hape, hnei “nyidëti [hna] kepe angat.” (E jë la Luka 9:11.) Nemene la ini hne së hna troa xom qa ngöne la aqane thiina ka loi i Iesu? Ame la atr ka thiina ka loi, tre, ka madrine angeic, nge ka utipine me hni ka menyik. Ka tune hi la pengö i Iesu. Hnei nyidrëti hna utipine la itre atr “ke kucakuca ha angat, me isa ije hë, tune la nöjei mamoe ka pa ate thupën.”—Mat. 9:35, 36.
11, 12. (a) Qaja jë la ketre ceitun ka amamane la aqane utipine i Iesu. (b) Tro nyipunieti a xomi ini tune kaa qa ngöne la ceitune celë?
11 Thaa hnei Iesu hmekuje kö hna utipine la itre atr, ngo hnei nyidrëti mina fe hna thele troa xatua angatr. Tro sa pane ce wange la ketre ceitun. Traqa ha koi truelof lao macatre ne neni la hni ne la ketre föe. Atre hi nyiidro, ka hape, fene la Wathebo i Mose, tre, ka pui ngazo nyiidro, nge tro mina fe a tune la atr ka troa ketri nyiidro. (Lev. 15:25-27) Ngo xecie koi eahlo laka tro Iesu a aloinyi nyiidro, pine la pengö i nyidrë me aqane ujë i nyidrë. Anyimua qaja nyiidro, ka hape: “Maine tro ni a kete hi la ixete nyidë, tro ni a mel.” Ene pe hnei nyiidro hna isine troa ketr la ixetre i Iesu, nge drenge ju hi nyiidro, laka, loi hë la meci nyiidro.
12 Hnei Iesu hna drenge laka, hetre atr ka ketri nyidrë, ene pe xei jë hi nyidrë me thele lai atr. Ame hna xou la föe, ke, ase hë nyiidro ena la Wathebo; nyiidro a hmengöhmengöne me canga iamamany koi Iesu me qaja la trenge nyipici. Hapeu, hnei Iesu kö hna wesitr kowe la föe cili ka akötr? Ohea! Öni nyidrë e ithanata amenyikenyi koi nyiidro, ka hape: “Nekönge fe, melë hë nyipo hnene la lapaune i nyipo. Trojë memine la manathith.” (Mar. 5:25-34) Drei kö la kola keukawa la hni nyiidro troa drenge la itre trenge ewekë celë ka menyik!
13. (a) Nemene la eisapengönene la aqane ujë i Iesu memine la aqane ujë ne la itre Faresaio? (b) Tune kaa la aqane ujë i Iesu kowe la itre nekönatr?
13 Ka xeti la hni ne la itre Faresaio, ke, hnei angatre hna musi me thue ehnefëne la itre xan. (Mat. 23:4) Ngo isapengöne kö la aqane musi angatr me Iesu, ke, nyidrëti a ini angatr la itre jë i Iehova cememine la thiina ka lai me xomihni ahoeany. Ame kowe la itretre drei nyidrë, tre, ketre atr ka tru ihnimin, me thiina ka lolo me nyipi enehmu lae Iesu. (Ite edomë 17:17; Ioane 15:11-15) Thaa jole kö kowe la itre nekönatr troa tro koi Iesu, nge ketre tui Iesu mina fe. Ngacama tru catre hnei jole i Iesu, ngo ame pe, hnei nyidrëti hna xomi ijin matre troa ce memine la itre nekönatr. Ame ngöne la ketre ijin, hnene hmaca la itretre drenge hna ketre sipu meku angatre kö, me thele troa sawa la itre atr troa traqa fë koi Iesu la itre nekö i angatr. Ngo thaa madrine kö Iesu kowe la aqane ujë i angatr. Öni nyidrëti koi angatr, ka hape: “Nuepi la ite nekönat’ e troa tro koi ni, nge the shewe nyudeni kö; ke ite ka tune lai la baselaia i Akötesie.” Thupene lai, hnei nyidrëti hna xome la ketre nekönatr me hamëne koi angatr la ketre ini ka sisitria, me hape: “Nyipici ini a qaja koi nyipunie, ame la ate tha kapa kö la baselaia i Akötesie tune la nekönate, te, tha tro kö angeic’ a lö kowe lai.”—Mar. 10:13-15.
14. Nemene la itre thangane ka loi hna troa kapa hnene la itre nekönatr hna wanga atrune hnyawa?
14 Pane mekune jë së la aliene hni ne la itre nekönatre cili, laka, itre trahmanyi me föe hë enehila, nge angatr a mekune hmaca lo Iesu Keriso a ‘xepi angatr me ati ime hui angatr, me amanathithi angatr.’ (Mar. 10:16) Ketre tune mina fe enehila, laka, thaa tro kö la itre nekönatr elanyi a thëthëhmine la aqane wanga atrunyi angatr me hnimi angatr hnene la itre qatre thup memine la itre xan. Ame la itre nekönatr hna wanga atrune qaane lo co petre kö angatr e hnine la ekalesia, tre, angatr a atrehmekune laka eje thene la nöje i Iehova la ua i Nyidrë; nge celë hi la ewekë ka sisitria catr.
Loi e Tro Sa Thiina Ka Loi Ngöne La Ketre Fen Ka Ngazo
15. Pine nemene matre thaa tro pi kö sa sesëkötre, ka hape, kola paatre trootro la thiina ka loi ngöne la hnedrai së?
15 Nyimutre la itre atr enehila ka mekun, ka hape, pëkö ijine i angatr troa kuca la loi kowe la itre xan. Qa ngöne lai, nyipi ewekë troa cile kowe la ua ne la fene celë hnene la nöje i Iehova, ngöne la hna ini, me hna huliwa i maseta, me hna ngenu me ngöne mina fe la hna cainöj. Maine jë kola ahleuhleunyi së hnene la itre aqane ujë ka ngazo, ngo thaa tro pi kö sa sesëkötr. Nyipici, hnei Iehova hna upi Paulo jëne la uati hmitrötr, troa hmekë së laka, ame ngöne la itre “drai hnapin,” tro hë la itre nyipi Keresiano a mele e nyipine la itre atr ka “hnimi angate kö, . . . me angete tha hnimi sinen.”—2 Tim. 3:1-3.
16. Tune kaa la aqane tro sa nyitipu Iesu, ene la troa akökötrene la thiina ka loi e hnine la ekalesia?
16 Ame ngöne la ketre götran, tre, isapengöne catr la ekeukawane la aqane imelekeu ne la itre nyipi Keresiano, memine la aqane mele ne la fene celë ka ngazo. Maine tro sa nyitipu Iesu, tro hë së isa ala caasi a akökötrene la aqane imelekeu ka lolo. Tune kaa la aqane tro sa ujë tune lai? Nyipici laka ame ngöne la ekalesia, nyimutre la itre ka aja ixatua me ithuecatr, ke, hetre meci angatr maine pena angatr a qëmeke kowe la itre ejolene la mel. Maine pena kola kökötre catr la itre jole cili ngöne la “ite drai hnapin,” ngo pëkö ixatua i angatr. Ame ngöne lo hneijine ekö, hnene mina fe la itre jole cili hna akötrëne la mele ne la itre Keresiano. Haawe, nyipi ewekë troa hamë ixatua tune lo hna kuca hnene lo itre Keresiano ekö. Drei la ketre ceitun, hnei Paulo hna ithuecatre kowe la itre Keresiano troa “xatuane la ite ka kucakuca, [me] xomi hnine ahoeane la nöjei ate asëjëihë.” (1 Thes. 5: 14) Kolo lai a hape, loi e tro pala hi sa kuca la loi.
17, 18. Nemene la itre xaa aqane tro sa nyitipune la thiina ka loi Iesu?
17 Hnëqa ne la itre Keresiano troa ‘kapa hnyawa la itre trejine me angatr,’ me nyitipu Iesu ngöne la aqane troa ujë koi angatr, ene la troa wanga atrune la itre trejine hne së hna atre hë, memine lo itre hne së hna thatre . (3 Ioane 5-8) Hnei Iesu hna ketre sipu amamane la aqane utipine nyidrë la itre xan, haawe, loi e tro mina fe sa sipu tro troa akeukawane pala hi la hni ne la itre xan.—Is. 32:2; Mat. 11:28-30.
18 Ijije tro së isa ala caasi a kuca la loi hnene la hna hnehengazone la itre aja ka eje thene la itre atr. Thele jë la itre aqane me itre ijine troa ujë tune lai. Catre pi së troa ixatua! Öni Paulo e ithuecatr, ka hape: “Ihnimikeuneju tune la aqane ihnimi tejin; pi pa troa atrunela kete.” (Rom. 12:10) Kolo lai a hape, ame la troa xötrethenge la tulu i Iesu, tre, ene la troa kuca la loi me hni ka keukawa kowe la itre xan, me inine troa amamane la “ihnimi ka pë thoi ngön.” (2 Kor. 6:6) Hanawange la aqane qeje pengöne Paulo la ihnimi cili ka eje thene la itre Keresiano, kola hape: “Ihnimi la ate xome ahoeane me la menyik. Tha ate ikucanyi kö la ihnim; tha ate selëne kö la ihnim, nge tha ate pi tru kö.” (1 Kor. 13:4) Thaa tro pi kö sa lapa fë elëhni kowe la itre trejine me easë, trahmanyi me föe, ngo loi pe tro sa catre trongëne la eamo celë, kola hape: “Ihnimi ipitö ju nyipunie, nge iutipinekeuneju, kola inu’ aloinekeun, tune la hnei Akötesie hna nu’ aloinyi nyipunie göi Keriso.”—Efe. 4:32.
19. Nemene la itre thangane ka loi hna kapa qa ngöne la hna nyitipune la thiina ka loi Iesu?
19 Maine tro sa catre troa eëne me amamane la thiina ka loi Iesu ngöne la nöjei drai me ngöne la nöjei ijin, haawe, tro hë sa kapa la itre manathithi ka nyimutre. Tro hë la ua i Iehova a xatua së troa eëne la itre igötranene la wene ne la ua e hnine la ekalesia. Ketre, pine laka easa madrine me caasi troa hmi me xötrethenge la tulu hna amë hnei Iesu me xatuane fe la itre xan troa hane ujë tune lai, haawe, tro hë lai a amadrinëne la hni Akötresie. Qa ngöne lai, loi e tro pala hi sa catre troa nyitipune la aqane menyike i Iesu me thiina ka loi nyidrë, ngöne la aqane ujë së kowe la itre xan.
Tro Nyipunieti a Qeje Pengön Tune Kaa?
• Hnei Iesu hna amamane tune kaa, laka, ka “menyike me ipië la hni” nyidrë?
• Tune kaa la aqane amamane Iesu la thiina ka loi i nyidrë?
• Nemene la itre aqane tro sa nyitipu Iesu, ene la troa menyike me kuca la loi ngöne fene celë hna lapaane hnene la itre atr ka thaa pexeje kö?