Ita Ne Thup Koi 4 Januare Me Wiike Cili
Amacane Jë La Itre Thithi Nyipunie Hnene La Hna Inine La Tusi Hmitrötr
“Iehova fe, epi shamatineju la lue hnashama i enëtilai kowe la thithi ne la hlue i enëtilai.”—NEH. 1:11.
1, 2. Pine nemen matre ka hetre thangan e troa wange hnyawa la itre xaa thithi ka eje e hnine la Tusi Hmitrötr?
KA nyipi ewekë catr la thithi me ini Tusi Hmitrötr ngöne la nyipi hmi. (1 Thes. 5:17; 2 Tim. 3:16, 17) Nyipici laka, ame la Tusi Hmitrötr, tre, thaa ketre itusi kö ne thith. Ngo hetrenyi e hnine ej la itre thithi ka nyimutre, tune la itre hna cinyihane ngöne la tusi Salamo.
2 Maine tro sa e me inine la Tusi Hmitrötr, tro hë sa öhne la itre thithi ka ihmeku memine la itre jole hne së hna cile kow. Eje hi laka, maine tro sa xome la itre mekune ne la itre thithi ka eje e hnine la itre Hna Cinyihan, tre, tro hë itre ej a amacane la itre thithi së. Nemene la ini hne së hna kapa qa ngöne la aqane hamëne Iehova la ixatua kowe la itre atr ka sipon jëne la thith, memine la aliene la itre thith i angatr?
Thele Jë Nge Trongëne Jë La Itre Hna Amekötine Hnei Akötresie
3, 4. Nemene lo hnëqa ne la hlue i Aberahama, nge tro sa xomi ini tune kaa qa ngöne la aqane amanathithine Iehova?
3 Kola mama ngöne la easa inine la Tusi Hmitrötr, laka, loi e tro pala hi sa sipone la ixatua qaathei Akötresie, jëne la thith. Tro sa pane ce wange la ewekë ka traqa ngöne la kola upe hnei Aberahama la hlue i nyidrë ka tru, ene Eliezera, troa tro Mesopotamia matre troa thele föi Isaaka ka xoue Akötresie. Ame la kola traqa hnene la itre föe troa tha tim, ene pe hnene la hlue hna thith, ka hape: “Iehova fe, . . . loi e tune laka, ame la jajinyi hnenge hna troa qaja kow, ka hape, ‘Ma awejë la ge i ’ö mate tro ni a ij;’ nge öni angeic, ka hape, ‘Ijijë, nge tro fe ni a thue ime ne la ite kamela i ’ö;’ loi e angeice la hnei cilieti hna ujëne thatraqai Isaaka hluewa i cilie; nge hnene lai tro ni a ate hmekune laka ase hë cilieti hnime la tixeng.”—Gen. 24:12-14.
4 Hna sa la thithi ne la hlue i Aberahama ngöne la Rebeka a thue imene la itre kamela i angeic. Thupene lai, hnei nyiidro hna ce tro me angeic a tro Kanaana, me nyi föi Isaaka. Nyipici laka, thaa tro pi kö sa treqene tro Akötresieti a hamë së la ketre hatren. Ngo tro hë Nyidrëti a eatrongë së ngöne la nöjei götrane la mele së, e hne së pala hi hna thithi me catre troa nue la ua i Nyidrë troa ee së.—Gal. 5:18.
Kola Xatua Së Hnene La Thithi Troa Cokötr La Xou Së
5, 6. Nemene la ewekë ka sisitria ngöne la thithi Iakobo qëmekene tro angeic a itronyi me Esau?
5 Ijije troa cokötre la xou së hnene la thith. Pine laka Iakobo a xouene la fini angeic ene Esau, ene pe hnei angeice hna thith, ka hape: “Iehova, . . . Tha ijiji ni kö la tenge ihnimi asë me nyipici asë hnei cilieti hna aleuleunyinëti kowe la hluewa i cilie . . . Ini a xëwe koi cilie, amele ni ene la ime ne la mamange Esau; ke ini a qoue angeic, wanga traqapi angeic’ a ce lepi ni me angete me nekön. Nge hnei cilieti hna ulatin, ka hape, Tro ni a kuca la loi koi ’ö, nge tro ni a amanane la ite matra i ’ö mate tune la ngöni ne hnagejë lo tha nune e ke mana.”—Gen. 32:9-12.
6 Ngacama hnei Iakobo hna thele troa neëne la ketre isi, ngo hna sa la thithi angeic ngöne la kola iloi hmaca hnei angeic me Esau. (Gen. 33:1-4) Maine tro sa e hnyawa la aliene la thithi cili, tro hë sa öhne laka, thaa hnei Iakobo hmekuje kö hna sipo ixatua. Hnei angeice mina fe hna amamane la lapaune i angeic kowe la Matrane hna thingehnaeane hë ekö me hni ne ole kowe la trenge ihnimi Akötresie. Hapeu, hetre itre xaa “qou e kuhu hni” së? (2 Kor. 7:5) Maine eje hi, haawe, tro hë la thithi Iakobo a amekunë së, ka hape, ijije troa cokötr la xoue së jëne la itre thithi së. Ngo loi e thaa tro hmekuje kö a sipo ngöne la itre thithi së, ngo loi e tro mina fe a mama la lapaune së.
Sipone Jë La Inamacan Jëne La Thith
7. Pine nemen matre hnei Mose hna sipone jëne la thith, troa atrehmekune hnyawa la itre jë i Iehova?
7 Loi e tro la aja troa amadrinë Iehova a upi së troa sipone la inamacan jëne la thith. Jëne la thith, hnei Mose hna sipone koi Akötresie troa atrehmekune la itre jë i Nyidrë. Öni angeic, ka hape: “Hana xajawatin, cilieti [Iehova] a ulatine koi ni, ka hape, Troja thenge la nöje ce [qaa Aigupito] . . . Qa ngöne lai, maine e hnimi ni hnei enëtilai, ma amamai ni la kala i enëtilai, . . . mate hnimi ni hnei enëtilai.” (Eso. 33:12, 13) Hnei Akötresie hna sa la thithi Mose hnene la hna aijijë angeic troa atre hnyawa la itre jë i Nyidrë; ketre ewekë ka sisitria catre lai koi angeic, göi troa elemekene la nöje i Iehova.
8. Tro sa kepe thangane tune kaa la hna sine thele la tusi 1 Ite Joxu 3:7-14?
8 Hnei Davita mina fe hna thith, ka hape: “Iehova fe, amamai ni jë la ite kala i cilie.” (Sal. 25:4) Hnei Solomona neköi Davita hna sipo Akötresie la inamacan matre tro angeic a atreine troa xome hnyawa la itre hnëqa ne joxu e Isaraela. Hnene laka hna amadrinë Iehova hnene la thithi Solomona, ene pe thaa hnei Nyidrë hmekuje kö hna hamëne la itre ewekë hna sipon, ngo ene mina fe la trenga mo me nyine iatruny. (E jë la 1 Ite Joxu 3:7-14.) Maine hace koi epuni troa xome la itre xaa hnëqa e hnine la ekalesia, loi e tro epuni a sipone la inamacan jëne la thith, me hetre hni ka ipië. Eje hi lai laka, tro Akötresieti a xatua epuni troa kapa la atrehmekune me inamacan, matre troa xome hnyawa la itre hnëqa cememine la ihnim.
Thithi Jë Qa Kuhu Hni
9, 10. Nemene la ka mama hnyawa, ngöne la kola anyimua qeje hni hnei Solomona, ngöne lo thith i angeic hmekune la kola xötrei löthe la ēnē?
9 Tro ha drenge la thithi së, e hne së hna thithi qa kuhu hni. Kola mama ngöne 1 Ite Joxu mekene 8 la thith hnei Solomona hna qaja cememine la hni ka pexej qëmekene la nöjei atr asë ka icasikeu e Ierusalema, ngöne lo kola xötrei löthe la ēnē i Iehova ngöne lo macatre 1026 M.P.K. Thupene la hna amë la pua ne isisinyikeu ngöne la Gaa Nyipi Hmitrötr me atiqane la ēnē hnene la iawe, ene la lolo i Iehova, ene pe hnei Solomona hna atrunyi Akötresie.
10 Maine tro sa inine hnyawa la thithi Solomona, easa öhne laka anyimua qeje hni hnei angeic. Solomona a atrehmekune laka, Iehova hmekuje hi la ka atre la hni ne la ketre atr. (1 Ite jo. 8:38, 39) Kola mama mina fe ngöne la thithi cili, laka, hetre mejiune kowe la atre kuca la ngazo troa ‘hmaca koi Akötresie hnene la hni angeic ka pexej.’ Maine kola apone la nöje i Akötresie hnene la ketre ithupëjia, tro ha drenge la hë treije i angatr hnei Iehova, e ka qa kuhu hni. (1 Ite jo. 8:48, 58, 61) Eje hi laka, loi e ka qa kuhu hni la itre thithi së.
Troa Amacane Tune Kaa La Itre Thithi Epun Hnene La Tusi Salamo
11, 12. Nemene la ini hnei epuni hna xom qa ngöne la thithi ne la ketre atre Levi ka thatreine kö troa huliwa hnine la ēnē i Akötresie?
11 Maine tro epuni a inine hnyawa la tusi Salamo, tro hë lai a amacane la itre thithi epun, me xatua epuni troa treqene hnyawa la ijine tro Akötresieti a sa la itre thithi epun. Tro sa pane ce wange la aqane xomihni ahoeane la ketre atre Levi hna apon ekö. Ngacama thaa ijiji angeice kö troa huliwa hnine la ēnē i Iehova, ke, hna akalabusi angeic, ngo angeice pe a nyima me hape: “Unge fe, hna uëne laka iëzi hë eö? nge hna uëne laka hnehe ngazo hë eö e kuhu hning? Teqe Akötesieti ju eö, ke tro ni a ole nyidë la mele ne la qëmekeng, nge Akötesingö.”—Sal. 42:5, 11; 43:5.
12 Nemene la ini hnei epuni hna xom qaathene la atre Levi? Maine hnene laka hna akalabusi epuni pine la meköt, nge thaa ijiji epuni kö troa ce hmi memine la itre trejine me epun, tre, loi e tro epuni a xomihni me treqene hnyawa la ijine tro Akötresieti a thepe epuni qa ngöne lai jol. (Sal. 37:5) Sine thele jë la itre madrine hnei epuni hna kapa ha ngöne la huliwa i Akötresie, nge sipone jë la xomihni ahoean ngöne la epuni a “teqe Akötesie” matre troa aijijë epuni hmaca troa ce memine la nöje i Nyidrë.
Thithi Jë Cememine La Lapaun
13. Thenge la hna qaja ngöne Iakobo 1:5-8, pine nemen matre loi e tro epuni a thithi cememine la lapaun?
13 Ngacama nyimutre ju hë la itre jol hna cile kow, ngo loi e tro pala hi epuni a thithi cememine la lapaun. Maine kola tupathe la mele i epun ka pë ethan, xötrethengene jë la eamo hna hamëne hnei Iakobo ketre atre drei Iesu. Thithi jë koi Iehova, nge the luelue kö laka tro Nyidrëti a hamë epuni la inamacane ka ijij troa cile kowe la itupathi cili. (E jë la Iakobo 1:5-8.) Atrehmekune hnyawa hi Akötresie la itre mekune ka ahleuhleunyi epun, nge ijije tro Nyidrëti a eatrongë epuni me akeukawane la hni epun jëne la ua i Nyidrë. Loi e tro epuni a fe koi Nyidrë la aliene hni epun cememine la lapaun nge “pë luelue” ngön, me kapa la ixatua qaathene la ua i Nyidrë me itre eamo qa hnine la Wesi Ula.
14, 15. Pine nemen matre ijije troa qaja, ka hape, hnei Hana hna thithi me ujë thenge la hna sipo, me lapaun?
14 Hana la ketre föi Elekana Atre Levi, ka thithi me ujë cememine la lapaun. Pine laka pëkö neköi Hana, ene pe kolo pala hi a akötrë nyiidro hnei Penina ketre föi Elekana ka nyimu nekön. Ame hnine la ēnē, hnei Hana hna sa xepu, ka hape, maine tro nyiidro a hnahone la ketre nekö trahmany, tro hë nyiidro a hamëne koi Iehova. Pine laka hnei Hana hna enienijëne la ukeineqë i nyiidro ngöne la nyiidro a thith, ene pe hnei Eli lo Atre Huuje Ka Sisitria hna mekune, ka hape, ka hmo nyiidro hnei kahaitr. Ame la nyidrëti a atre laka, thaa eje kö lai hnei nyidrëti hna mekun, tre, öni nyidrë, ka hape: “Tro Akötesi angete Isaraela a hamëne la ewekë hnei ’ö hna sipone thei nyidë.” Ngacama thatre hnyawa kö Hana la ewekë ka troa traqa elany, ngo eahlo a lapaune hnyawa laka tro ha sa la thithi eahlo. Qa ngöne lai, “ame la qëmeke i [eahlo], te, tha iëzi hmaca kö.” Pë ju kö hnei eahlo hna luelu me thë fë hni—1 Sam. 1:9-18.
15 Thupene la hna hnaho Samuela me thepe thi nyën, tre, hnei Hana hna nue nyën koi Iehova matre troa nyihlu hnine la ēnē. (1 Sam. 1:19-28) Maine tro sa xomi ijin troa sine thele la thith i eahlo ngöne la ijine cili, haawe, tro lai a amacane la itre thithi së, me xatua së troa atrehmekun, ka hape, ijije tro sa cile kowe la ketre jol e hne së hna thithi me lapaun, laka, tro Iehova a sa la thithi së.—1 Sam. 2:1-10.
16, 17. Nemene la thangane la hnei Nehemia hna thithi me ujë cememine la lapaun?
16 Ame ngöne lo itre macatre 400 M.P.K., hnei Nehemia ketre atr ka meköt, hna hane thithi me ujë cememine la lapaun. Öni angeic e sipo, ka hape: “Iehova fe, epi shamatineju la lue hnashama i enëtilai kowe la thithi ne la hlue i enëtilai memine la thithi ne la ite hlue i enëtilai, itete ajane troa qouene la atesiwa i enëtilai; nge epi amanathithine la hlue i enëtilai ngöne la drai ce, me hamë angeice mate hnimi angeice hnene la ate ce.” Drei lai “ate” cili? Kolo Joxu ne Peresi, ene Aretaseta, lo hnei Nehemia hna kepe trepe imen.—Neh. 1:11.
17 Nyimutre la itre drai ne thithi Nehemia thupene la angeic a atre, ka hape, ame lo angetre Iudra hna nue amacane qa hna po e Babulona, tre, “atraqate la aköte me hna jele ngazo angat; nge ase hë kenithe la hna xupi hage ne Ierusalema.” (Neh. 1:3, 4) Thaa mekune kö Nehemia, ka hape, troa kapa hnyawa la thithi angeic, ngöne la kola nue angeice hnei Aretaseta Joxu troa tro Ierusalema matre troa xupe hmaca la itre hage ne ej. (Neh. 2:1-8) Qaane ekö, kolo petre hi a afenesine la hna xupi hag. Hna kapa la itre thith i Nehemia pine laka itre ej a wanga atrune la nyipi hmi, nge hna tro fë itre ej cememine la lapaun. Hapeu, ka eje fe kö lai ngöne la itre thithi epun?
The Thëthëhmine Kö Atrunyi Iehova Me Olen Koi Nyidrë
18, 19. Nemene la itre kepin matre loi e tro la itre hlue i Iehova a atrune me olen koi Nyidrë?
18 Thaa tro pi kö sa thëthëhmine troa atrunyi Iehova me ole Nyidrë ngöne la thith. Nyimutre la itre kepine ka uku së troa ujë tune lai! Drei la ketre ceitun, eje thei Davita la aja ka catr troa atrune la baselaia i Iehova. (E jë la Salamo 145:10-13.) Hapeu, easë kö a amamane ngöne la itre thithi së, laka, hetre hni ne ole së kowe la manathithi ka tru hna hamë së, ene la troa cainöjëne la Baselaia i Iehova? Maine jë troa xatua së fe hnene la itre trenge ewekë ne la atre cinyihane la salamo, troa thithi koi Akötresie cememine la hni ka pexej, me qaja koi Nyidrë la hni ne ole së kowe la itre icasikeu ne Keresiano, me itre asabele me itre kovasio.—Sal. 27:4; 122:1.
19 Maine hetre hni ne ole së kowe la etrune la aqane imelekeu së me Akötresie, tro lai a uku së troa thithi koi Nyidrë cememine la hni ka pexej, me hane qaja la itre mekune celë, kola hape: “Iehova fe, tro ni a ole koi cilie nyipine la nöjei nöj; tro ni a atrunyi cilie nyipine la nöjei ate. Ke atraqate la ihnimi cilie uti hë e hnengödrai, memine la nyipici cilie uti hë ngöne la ite iaw. Akötesieti fe, loi e tro cilieti a draië hune la ite hnengödrai, memine la lolo i cilie hune la fene hnengödrai asë.” (Sal. 57:9-11) Drei la itre mekune ka hamë ithuecatr! Hapeu, nyipici kö laka tro la itre trene ewekë ne la tusi Salamo a hetre thangane me amacane la itre thithi së?
Loi e Tro Sa Sipo Akötresie Cememine La Metrötr
20. Hnei Maria hna amamane tune kaa laka, eahlo a metrötrë Akötresie?
20 Loi e troa mama ngöne la itre thithi së, laka, hetre metrötre së koi Akötresie. Kola mama la hni ne metrötr ngöne la itre trenge ewekë i Maria, ngöne la eahlo a atre, ka hape, eahlo a troa thine ne la Mesia; ketre tui Hana mina fe ngöne lo eahlo a traqa sai Samuela troa huliwa hnine la ēnē. Kola mama hnyawa la aqane metrötrë Akötresie hnei Maria, ngöne la eahlo a qaja, ka hape: “Kola atrunyi Iehova hnene la hning, nge ame la unge, te, kola aciacine koi Akötesie ate amele ni.” (Luka 1:46, 47) Ijije kö tro sa amacane la itre thithi së hnene la hna qaja amamane la itre mekune ka tune la? Thaa sesëkötre kö së laka, hna ië Maria hnei Akötresie troa nyi thine i Iesu, ene la Mesia!
21. Kola mama tune kaa la aqane metrötre me lapaune i Iesu ngöne la itre thithi nyidrë?
21 Hnei Iesu hna thithi cememine la metrötr, me catre lapaun. Drei la ketre ceitun, qëmekene tro nyidrëti a amele Lazaro, hnei “Iesu [hna] galajë draië, me ulatin, ka hape, Kakati fe, ini a olene koi cilie, ke hnei cilie hna shama nie. Nge ötetëtinë hë ni, laka cilieti a pune shama nie.” (Ioane 11:41, 42) Hapeu, kolo kö a mama ngöne la itre thithi së, laka, hetre metrötre së me lapaun? Maine tro sa inine la aqane metrötre i Iesu ngöne la tulu ne thith hnei nyidrëti hna hamën, tro hë sa öhne laka, ame la itre mekun hnei nyidrë hna wanga atrun, tre, ene la troa ahmitrötrëne la atresiwa i Iehova, memine la kola troa traqa la Baselaia i Nyidrë, nge tune mina fe la kola troa aejëne la aja i Nyidrë. (Mat. 6:9, 10) Loi e tro sa pane mekune hnyawa la itre thithi së. Hapeu, itre eje kö a amamane la nyipi aja së troa sajuëne la Baselaia i Iehova, me kuca la aja i Nyidrë, me ahmitrötrëne mina fe la atresiwa i Nyidrë? Loi e troa eje lai.
22. Pine nemen matre xecie koi së, laka, tro Iehova a hamë trenge catre koi së troa cainöjëne la maca ka loi?
22 Pine laka ame itre xaa ijin, easa cile kowe la iaxösisi me itre xaa itupath, haawe easa sipo ixatua koi Iehova jëne la thith matre troa hetre trenge catr troa nyihlue i Nyidrë. Ame ngöne lo kola iele Peteru me Ioane hnene la itre atrene la hnaakootr matre thaa tro hmaca kö a “inine ngöne la ëje i Iesu,” tre, thaa hnei nyidroti kö hna dreng, ngo hnei nyidroti pe hna catre xome pala hi la huliwa cili. (Ite Hu. 4:18-20) Thupene la hna thepe nyidro qa hnine la kalabus, hnei nyidro hna qaja kowe la itre trejine me nyidro, la itre ewekë ka traqa. Thupene lai, hna ce thithi hnene lo nöjei atrene lai icasikeu koi Akötresie, matre hetrenyi thei angatre la trenge catre troa cainöjëne la Wesi Ula i Nyidrë. Drei la kola elitrauje la madrine i angatr, ngöne la kola kapa la thithi angatr, ke, “hna tiqa angat’ asë hnei Uati Hmitöt, ame hnei angate hna qaja la Wesi Ula i Akötesie hnene la cat”! (E jë la Ite Huliwa 4:24-31.) Ame la thangane lai, tre, nyimutre la itre atr ka nyihlue i Iehova. Eje hi laka, ijije mina fe tro la thith a acatrene la lapaune së, matre tro sa catre troa cainöjëne la maca ka loi.
Catre Pi Së Troa Amacane La Itre Thithi Së
23, 24. (a) Qaja jë la itre xaa tulu ka amamane la aqane troa amacane la itre thithi së hnene la hna inine la Tusi Hmitrötr. (b) Nemene la nyine tro sa kuca matre troa amacane la itre thithi së?
23 Nyimutre pala kö la itre xaa tulu ka amamane, ka hape, ijije tro sa amacane la itre thithi së hnene la hna e me inine la Tusi Hmitrötr. Drei la ketre ceitun, tui Iona, ijije tro sa atrehmekune ngöne la thith, ka hape, “qa thei Iehova la iamele.” (Iona 2:1-10) Maine thaa lapa hnyawa kö la mekune së hnene la ketre ngazo hna kuca, nge easa thele ixatua thene la itre qatre thup, tro la itre mekune ne la hni Davita ngöne la thith i angeic, a xatua së troa qaja la hni ne ietra së ngöne la easa thithi caas. (Sal. 51:1-12) Ijije mina fe tro sa atrunyi Iehova ngöne la itre xaa thithi së, tune la hna kuca hnei Ieremia. (Iere. 32:16-19) Maine easa ajane troa faipoipo, tro la thithi ka eje ngöne Ezera mekene 9 me aqane thithi iele së, a acatrene la hni ne aja së troa drengethenge la hna amekötine hnei Akötresie, ene la troa faipoipo “göi Joxu hmekuje hi.”—1 Kor. 7:39; Ezera 9:6, 10-15.
24 Catre pi së troa e me inine me sine thele la Tusi Hmitrötr. Thele jë së la itre mekun hne së hna troa qaja ngöne la itre thithi së. Ijije mina fe tro sa xome la itre mekune cili ngöne la easa thithi iele Akötresie, me olene me atrunyi Nyidrë. Maine tro sa amacane la itre thithi së jëne la Tusi Hmitrötr, eje hi laka tro ha lolo la aqane imelekeu së me Iehova.
Tro Nyipunieti a Sa Tune Kaa?
• Pine nemen matre loi e tro sa thele me trongëne la itre hna amekötine hnei Akötresie?
• Nemene la ka troa uku së troa sipone la inamacan jëne la thith?
• Tune kaa la aqane tro la tusi Salamo a amacane la itre thithi së?
• Pine nemen matre loi e tro sa thithi cememine la lapaun me metrötr?