Troa Xome La Ita Ne Thup Celë e 03 Januare Me Wiike Cili

Nyima 24 Me 52

Itre Thöthi Fe—Cile Catre Jë Kowe La Itre Iajojezi Ne La Itre Sinee Ini Epun

“Loi e ewekë pala hi nyipunie. . . hna aloine hnei alase, mate atejë nyipunie la aqane troa isa sa kowe la nöjei ate.”—KOL. 4:6.

1, 2. Kola goeëne tune kaa hnene la itre thöth ka nyimutre la aja celë, ene la troa thel troa isapengön memine la itre sine ini angatr, nge pine nemene lai?

EJEHI laka, thaa epuni kö a drenge hmekuje hi la kola qaja la aqane “iajojezi ne la itre enehmu” ngo hnei epuni fe hna sipu melëne la itre iajojezi cili. Maine jë hna upe iele epuni hnene la ketre sinee ini epun troa kuca la ketre ewekë ka ngazo. Nemene la mekuna i epun ngöne la ijine cili? Kola qaja hnei Christopher ketre thöth ka footriin lao macatre, ka hape: “Ame e itre xaa ijin, tre, eni a pi tro trij, nge ame e itre xaa ijin, tre, eni a hane pi tune la itre xaa sine ining.”

² Hapeu, hane fe kö ajojezine la mekuna i epun hnene la itre sine ini epun? Pine nemene la angatr a ajojezi epun? Maine jë hnene laka, epuni a ajane troa hane kepe epuni hnei angatr. Nyipici, pëkö engazone lai, pine laka, ame mina fe itre ka tru, tre, ajai angatre fe troa hane kepe angatr hnene la itre xan. Ngacama thöthi ju hë maine qatre pena, pëkö ka ajane e angatr troa thipetriji angatr hnene la ketre atr. Ngo eje hi laka, hetre itre xaa atr ka troa xele ma wai epun, pine la aqane cilëgöline epuni la ewekë ka meköt. Hnei Iesu hna hane melëne ekö la ewekë cili. Ngacama jole ju hë, ngo hnei nyidrëti pala hi hna kuca la ewekë ka meköt. Maine nyipici laka hetrenyi la itre xaa atr ka xötrethenge Iesu me hane drei nyidrë, ngo hetrenyi kö la itre xane ka imethinë me “tha . . . nyipin” la Hupuna i Akötresie.—Is. 53:3.

Nemene La Emenene La Ixomi Thiina?

3. Pine nemene matre thaa ka loi kö troa xome la aqane mele ne la itre sine ini epun?

³ Ame ngöne la itre xaa ijin, maine jë epuni a hane xome la thiina ne la itre sine ini epun, ke, epuni a xouen troa thipetriji epuni hnei angatr. Thaa ka loi kö troa ujë tune lai. Ame la itre Keresiano, tre “tha ite medenge hmaca kö hna iufekeun.” (Efe. 4:14) Atre hi së la pengöne la itre nekönatr, laka, ka canga ixomithiina nyudren. Ngo thaa itre nekönatre hmaca kö epun, itre thöthi hë epuni enehila, nge epuni ha tru trootro. Qa ngöne lai, maine epuni a mejiune laka, nyine loi koi epun la itre trepene meköti Iehova, haawe, tro hë epuni a kepe thangane ka loi qa ngöne la hna mele thenge la mejiune cili. (Deu. 10:12, 13) Ngo maine thaa tro kö epuni a ujë tune lai, tro ha jole catre koi epuni troa wenëiujine hnyawa la mele i epun. Maine tro epuni a nue la itre sine ini epuni troa ajojezine la mele i epun, tre, kösë ceitui epuni me nyimo i angatr.—E jë la 2 Peteru 2:19.

4, 5. (a) Hna ajojezi Arona tune kaa, nge nemene la itre ini hne së hna xome qa ngöne lai? (b) Tune kaa la aqane troa ajojezi epun hnene la itre sine ini epun?

⁴ Ame ngöne la ketre ijin, hna ajojezi Arona trejine me Mose, hnene la itre atr ka nyimutre. Hnei angeice hna drei angetre Isaraela e upi angeice troa kuca la ketre haze thatraqai angatr. Thaa atr ka pujehnine kö Arona e kola upe troa kuca la ketre huliwa; angeice hi lo ka xatua Mose troa cile koi Farao, lo atre musi e Aigupito. Hnei Arona hna catre tro fë la maca i Akötresie koi Farao. Ngo ame ju hi la kola ajojezi angeice hnei angetre Isaraela, Arona hi a kei thenge ju la mekuna i angatr. Drei la emenene la iajojezi ne la itre atr ka nyimutre! Kola mama laka, ka hmaloi catre koi Arona troa cile kowe la joxu ne Aigupito, ngo jole pë hë koi angeic troa qëmeke kowe la iajojezi ne la itre sine tronge i angeic.—Eso. 7:1, 2; 32:1-4.

⁵ Tune la hna amamane hnene la tulu i Arona, thaa itre thöthi hmekuje kö la ka iajojezi; nge ketre, thaa kolo hmekuje kö a cile kowe la jole cili hnene la itre atr ka ajane troa kuca la ngazo. Ijije mina fe troa ajojezine la itre atr ka nyimutre ka hetre hni ne ajan troa kuca la ewekë ka meköt, tui epun. Maine jë troa upe iele epuni hnene la itre sine ini epuni troa kuca la ewekë ka ngazo, me iaö epuni troa kuca la ketre ewekë hnamecin, maine qaja angazo epun, maine qaqa epuni pena. Ngacama isapengöne kö la itre aqane iajojezi ne la atr, ngo ame pe ceitun asë hi itre ej, laka jole catr e troa cile kow. Tro epuni a atreine cile kowe la itre iajojezi, e hnei epuni hna acatrene la lapaune i epun kowe la itre ini hnei epuni hna mejiune kow.

“Tupathi Nyipunieti Ju Kö”

6, 7. (a) Pine nemene matre nyipi ewekë troa eje thei epuni la mejiune kowe la itre ini hnei epuni hna kapa, nge tro epuni a acatrene tune kaa la mejiune cili? (b) Nemene la itre hnying nyine tro epuni a isa thele troa sa, matre troa acatrene hnyawa la mejiune i epun?

⁶ Tro hë epuni a atreine cile kowe la iajojezi ne la itre sine ini epun, e ka xecie hnyawa e kuhu hni epuni laka, ka meköti la itre ini me itre trepene meköti hnei epuni hna mejiune kow. (E jë la 2 Korinito 13:5.) Maine xecie hnyawa ha koi epuni la ewekë cili, ka meije ju hë epuni ngo tro hë epuni lai a catr. (2 Tim. 1:7, 8) Ngacama ka catre ju hë la ketre atr, ngo maine jë thaa tro kö angeic a hmalahnine troa kuca la ketre ewekë, ke, ka tëtë hi la mejiune i angeic kowe la itre ini cili. Haawe, nyipi ewekë tro epuni a isa anyipicin me amamane, ka hape, ame la itre ini hnei epuni hna kapa qa hnine la Tusi Hmitrötr, tre, celë hi nyipici lai. Nyiqaane wange jë lo itre ini hnei epuni hna kapa panëne hë. Drei la ketre ceitun, ka mejiune epuni koi Akötresie, nge epuni a drenge la itre xan e qaja la kepin matre angatr a mejiune koi Nyidrë. Haawe, ijije hi tro epuni a hane thel, ka hape, ‘Nemene la itre ewekë ka anyipicine koi ni laka, hetre Akötresie?’ Ame la kola hnyinge tune la, tre, thaa göi tro kö a aciane la luelue thei epun, ngo kolo hi matre troa acatrene hnyawa la lapaune i epun. Ketre tune mina fe, isa hnyinge jë, ka hape, ‘hnenge hna atre tune kaa, ka hape, qaathene la ua i Akötresie la itre Hna Cinyihane asë?’ (2 Tim. 3:16) ‘Pine nemene matre xecie hnyawa e kuhu hning, laka, easa melëne la “ite drai hnapin”?’ (2 Tim. 3:1-5) ‘Nemene la ka upi ni troa mejiune laka, nyine loi koi ni la itre trepene meköti qathei Iehova?’—Is. 48:17, 18.

7 Maine jë epuni a cile troa isa sipu xome la itre hnyinge cili, wanga thatreine ju epuni sa itre ej. Ngo kösë ceitune hi lai memine la epuni a cile hnö troa goeëne la etrune la saasi ne la loto i epun, wanga öhne jë epuni laka “pëhë aliene la trengene saas”. Eje hi lai laka, maine öhne hë epuni laka pëhë saas, thaa tro kö epuni lai a lapa menu ngo tro pe epuni a canga thele troa nyi nyin la jole ka eje thei epun. Ketre tune mina fe, loi e tro epuni a atrehmekune hnyawa la itre ini hnei epuni hna kapa ngo ka tëtë hi, nge thupene lai, troa acatrene la mejiune i epuni kowe itre ej.—Ite hu. 17:11.

8. Qaja jë la aqane tro epuni a acatrene la mejiune i epuni kowe la eloine la troa trongëne la wathebo i Akötresie matre troa ananyine la kuci ngazo.

⁸ Tro sa pane ce wange la ketre ceitun. Kola upi së hnei Tusi Hmitrötr troa “kötene la kuci ngazo.” Isa hnyinge jë së, ka hape, ‘Pine nemene matre ketre wathebo lai ka inamacan?’ Pane mekune jë epuni la nöjei kepin ka upe la itre sine ini epuni troa xome la aqane ujë cili. Ketre, thele jë fe la itre kepin ka nyimutre ka amamane, ka hape, ame la atr ka kuci ngazo, tre, angeic a “nyipi angazone la ngönetei angeic.” (1 Kor. 6:18) Thupene la hnei epuni hna wai pengöne la itre mekune ka sa la itre hnyinge cili, isa thele jë, ka hape: ‘Nemene la aqane mele ka lolo nyine tro ni a xom? Hapeu, eni kö a nyipi ewekëne la meleng, la eni a kuci ngazo?’ Mekune hnyawa jë fe, ka hape, ‘Tro ha tune kaa la mekunang, thupene la hnenge hna kuci ngazo?’ Maine nyipici laka canga tro hi a kepe epuni hnene la itre xaa sine ini epun, ngo tune kaa e thupen ngöne la epuni hë memine la keme me thine i epun, maine pena, ngöne la epuni memine la itre Keresiano hnine la Uma Ne Baselaia? Tune kaa jë elanyi la itre aliene hni epun, ngöne la epuni a thele troa thithi koi Akötresie? Hapeu, aja i epuni kö troa apuingazone la mele i epun matre nyi ethanyine ej xajawa i Akötresie göi tro hi a amadrinëne la itre sine ini epun?

9, 10. Maine ka xecie hnyawa e kuhu hni epun la itre ini hnei epuni hna mejiune kow, haawe, tro hë lai a xatua epuni tune kaa troa atreine cile kowe la itre sine ini epun?

⁹ Maine ketre thöthi epun, haawe, ketre ijine lai ka lolo catr, ke, kola kökötre hnyawa thei epuni la atreine wai emekötine la itre ewekë. (E jë la Roma 12:1, 2.) Ijine tro hi lai a sipu thele la aliene la troa ketre Atre Anyipicine i Iehova. Tro hë la aqane sine thele epun la ewekë cili, a xatua epuni troa acatrene hnyawa la lapaune i epun kowe la itre ini hnei epuni hna mejiune kow. Haawe, ame la epuni a cile kowe la itre iajojezi ne la itre sine ini epun, tro hë epuni lai a atreine canga sa, me ithanatane la itre mekune cememine la hni ka xeci. Tro hë epuni a melëne la hna qaja hnene la ketre thöthi Keresiano jajiny, ka hape: “Ame la eni a cile catre kowe la itre iajojezi ne la itre sine ining, tre, eni hi lai a aijijëne kowe la itre xan troa atre la pengöi eni, ene la itre ini hnenge hna mejiune kow, jëne la nöjei ewekë hnenge hna kuca. Thaa ceitune kö la hming memine la itre xaa hmi. Ej a löthe la nöjei götrane la meleng, ene la aqane waiewekëng, me itre ajang hnenge hna thele troa eatrën, me itre trepene meköti göi thiina hnenge hna catre fë.”

¹⁰ Eje hi laka, nyipi ewekë tro epuni a catre cilëgöline la ewekë hnei epuni hna atre ka hape, ka meköt. (Luka 13:24) Maine jë epuni a isa hnying, ka hape, nyipi ewekë jë kö tro ni a ujë tune la. Ngo the thëthëhmine kö epuni la mekune celë: Maine epuni a hmahma troa catre kuca la ewekë ka meköt, eje hi laka, canga tro hi lai a mama kowe la itre xaa sine ini epun, nge tro hë angatr a nyisi epuni catr. Ngo maine tro epuni a ithanata cememine la hni ka xeci, tro hë epuni a sesëkötr la tro angatr a hmaca me nue epun.—Aceitunëne jë me Luka 4:12, 13.

‘Pane Mekune Jë La Aqane Troa Sa’

11. Nemene la manathithi hnei epuni hna kapa qa ngöne la hna canga hnëkë troa cile kowe la itre iajojezi ne la itre sine ini epun?

¹¹ Ame la ketre aqane troa cile catre kowe la iajojezi ne la itre sine ini epun, tre, ene la troa hnëkë hnyawa. (E jë la Ite Edomë 15:28.) Ame la atre hnëkë hnyawa, tre, angeic a pane mekun la nöjei pengöne jol hnei angeice hna troa cile kow. Ame itre xaa ijin, ame la epuni a hnëkën amë la itre jole cili, tre, tro lai a xatua epuni troa cile kowe la itre itupathi ka tru. Drei la ketre ceitun, maine jë epuni a öhne qëmeke i epun la kola ufi sixa hnene la itre sine ini epun. Hapeu tro jë kö angatr a hane thue sixa i epun? Canga thele jë la aqane tro epuni a cile kowe la jole cili? Kola qaja ngöne Ite Edomë 22:3, ka hape: “Ame la ate maca meke, te, kola goeëne la ngazo, me za; ngo ite wangadrapa kö a tro, nge hete thupenë hë.” Thatreine kö troa ixelë la lue atr maine isa gojenyi kö hnei nyidröti hna xom. Celë hi matre, maine ketre gojenyi kö hnei epuni hna xom, tre, thaa kolo kö lai a amamane, ka hape, ka xou epun, ngo aqane ujë ka inamacane hi lai.

12. Tune kaa la aqane tro epuni a ithanata kowe la ketre sine ini epun ka thele troa tupathi epun?

¹² Maine thatreine kö epuni troa neëne lai jole cili, nemene la nyine tro epuni a kuca? E hnyinge jë koi epun hnene la ketre sine ini epun, ka hape, “Thaa ka ce meköle pala kö eö me trahmany?” Sisitria e troa trongëne la eamo ka eje ngöne Kolose 4:6, kola hape: “Loi e ewekë pala hi nyipunie memine la ihnim, hna aloine hnei alase, mate atejë nyipunie la aqane troa isa sa kowe la nöjei ate.” Tune la hna amamane hnene la xötre celë, isapengöne kö la itre aqane tro epuni a sa, ke, epuni a troa sa thenge la hnei epuni hna atrein. Maine jë thaa nyipi ewekë kö tro epuni a xome la ketre xötr me e koi angeic. Maine jë, loi hi la troa sa mekötine koi angeic. Drei la ketre ceitun, maine kola pi atre, ka hape, ka nyipi jajinyi pala hi epun, sa ju hi, ka hape, “Ö” maine pena, “Ame ngöne la götrane cili, tre, isa wai melen.”

13. Pine nemene matre nyipi ewekë tro epuni a atreine waiewekë ngöne la epuni a troa sa kowe la ketre sine ini epun?

¹³ Hetre ijin kola mama koi Iesu laka, ka loi hi troa sa mekötine la ketre hnying ngo thaa tro kö a sa menune pala ha. Eje hi, ame lo kola kootrë Iesu hnei Heroda, tre, pëkö hnei nyidrëti hna qaja. (Luka 23:8, 9) Ame la ketre jëne troa sa kowe la itre hnyinge ka iajolë, tre, ene la troa lapa thaup. (Ite edomë 26:4; Ate cai. 3:1, 7) Ame ngöne la ketre götran, maine jë tro epuni a öhn, laka, kola hnyingë pengöne la mele i epun hnene la ketre atr ka hni ne ajan; maine jë angeice a pi atre la itre trepene meköti hnei epuni hna trongën göi kuci ngazo, ngacama ame ngöne la xötrei, angeic a jele ngazo epun. (1 Pet. 4:4) Ame e cili, maine jë ka loi e tro epuni a xome la Tusi Hmitrötr matre troa qeje pengöne hnyawa la aqane cilëgöline epuni la itre trepene meköti cili. The cile hnö kö hnei xou. Catre jë pe troa “hnëkë pala hi troa sa” kowe la itre sine ini epun.—1 Pet. 3:15.

14. Ame ngöne la itre xaa ijin, tro epuni a sa hnyawa tune kaa kowe la itre sine ini epun thenge la aqane inyisi angat?

¹⁴ Ame ngöne la itre xaa ijin, e öhne hi epuni laka kola inyisi, maine jë tro pena epuni a sa hmekune lai aqane inyisi. Ngo nyipi ewekë pala hi troa a ujë cememine la hni ka menyik. Drei la ketre ceitun, maine kola tupathi epun hnene la ketre sine ini epun troa ufi sixa, maine jë tro epuni a sa, ka hape, “Ase hë ni olen” nge sisedrëne jë, ka hape, “Öninge pala kö, ka hape, ka inamacane eö matre troa ufi sixa!” Öhne hi epun lai aqane troa sa thenge la inyisi angatr? Ame e celë, thaa hnei epuni kö hna qaja la kepin matre thaa epuni kö a ufi sixa, ngo epuni pe a upe la sine ini epun troa pane thele la kepin matre angeic a ujë tune lai.a

15. Eue la tro epuni a nuetrije la itre sine ini epun ka thele troa ajojezi epun, nge pine nemen?

¹⁵ Ngo nemene la nyine tro epuni a kuca, e kolo pala hi a ajojezi epun hnene la itre sine ini epun? Loi e troa tro triji angatr. Maine tro pala hi epuni a ce lapa me angatr, eje hi lai laka, tro ha ajojezi epun. Haawe, nuetriji angatre pi. Thaa tro pi kö epuni a mekune laka, ase hë ngaa epun. Ohea, kolo pe a amamane laka, hnei epuni hna xomehnöthe la itre aja i epun. Thaa itre nyimo i angatre kö epun, nge ketre, hnei epuni mina fe hna amadrinëne la hni Iehova.—Ite edomë 27:11.

Eköthe Jë La ‘Itre Mekun Ka Troa Atrenamon’

16. Tune kaa la aqane tro la itre xaa thöthi ka uune fë, ka hape, itre Keresiano angatr, a ajojezi epun?

¹⁶ Ame itre xaa ijin, kolo lo hmaca hi lo itre xaa thöthi ka uune fë, ka hape, itre nyihlue i Iehova angatr, la itre ka uku epuni troa kuca la itre xaa huliwa ka ngazo. Drei la ketre ceitun, nemene la nyine tro epuni a kuca ngöne la epuni a traqa kowe la ketre hna ithikeu göi troa feet, a hna hnëkëne hnene la ketre atr, nge epuni a öhne laka, pëkö caa ka tru ka elemeken? Maine pena nemene la nyine tro epuni a kuca e traqa fë kahaitre jë hnene la ketre thöthi Keresiano, nge nyimutre thei epuni la itre ka thaa ene kahaitre petre kö? Tru catre hnei ewekë ka troa upi epuni troa drengethenge la mekuthethewe i epun hna inine hnei Tusi Hmitrötr. Kola qaja hnene la ketre Keresiano jajiny, Kiristiane la ëjen, ka hape: “Hnenge hna lö trije la sinema memine la jininge jajiny, ke, nyimu trenge ka sis pala ha hna qaja. Ngo hna lapa pe kö hnene la itre xaa sine hmi nyio. Kola qaja aloinyi nyio hnei kaka me nenë, hnene la aqane ujë i nyio. Ngo ame pë hë lo itre xan, tre, angatr a elëhni koi nyio pine kötre triji angatr.”

17. Maine epuni a troa itronyi me itre xan troa ce madrin, nemene la nyine tro epuni a hnëkën amë, matre troa sajuëne pala hi la itre trepene meköti Akötresie?

¹⁷ Ngacama tro epuni drenge hnyawa la mekuthethewe i epuni hna inine hnei Tusi Hmitrötr, ngo kola mama jëne la aqane ujë ne la lue tremun, laka, hetre jole mina fe hnei epuni hna troa cile kow. Haawe, catre pi epuni troa kuca la ewekë ka mama koi epuni laka aqane ujë ka loi me ka meköt. Nge hnëkë hnyawa jë. Maine epuni a troa ce madrin memine la itre xan, canga mekune jë me hnëkën amë la aqane tro epuni a tro trije la feet cili, e traqa ju öhne hnei epuni la ketre ewekë ka ngazo e cili. Hnene la itre xaa thöthi hna ce ithanatan memine la itre keme me thine i nyudren, laka, tro hi nyudren a hë angatr jëne telefon, matre canga kötre qaa lai, me bëeke hmaca kowe la hnalapa. (Sal. 26:4, 5) Ame la ‘itre mekune cili, tre, ka atrenamon.’—Ite edomë 21:5.

‘Madrine Jë Ngöne La Epuni a Thöth’

18, 19. (a) Pine nemene matre loi e troa xecie e kuhu hni epun, laka, Iehova a ajane tro epuni a mele madrin? (b) Tune kaa la aqane goeëne Iehova la itre thöthi ka cile catre kowe la itre iajojezi ne la itre sine ini angatr?

¹⁸ Hnei Iehova hna xupi epun, matre tro epuni a mele madrin, nge aja i Nyidrë tro epuni a madrin. (E jë la Ate Cainöj 11:9.) The thëthëhmine kö laka ame la itre sine ini epun, tre, angatr a “madine fë la ngazo ka canga pat.” (Heb. 11:25) Ame la nyipi Akötresie, tre, Nyidrëti a ajane tro epuni a melëne la ketre ewekë ka sisitria catre kö hune lai. Nyidrëti a ajane troa eje thei epun la madrine ka epine palua. Qa ngöne lai, maine kola iaö epuni troa kuca la ketre ewekë ka ngazo xajawa i Akötresie, thaa tro pi kö a thëthëhmine laka ame la hnei Iehova hna upi epuni troa kuca, tre, nyine loi pala hi kowe la mele i epuni elany.

¹⁹ Nyipi ewekë tro epun, itre thöth, a atrehmekune laka, thele ju hë epuni enehila troa kepe epuni hnene la itre sine ini epun, ngo thupene la itre macatre, alanyimu la itre ka troa thëthëhmine la ëje i epun. Thaa ka tui Iehova kö, laka, öhne hi Nyidrë la epuni a cile catre kowe la itre iajojezi ne la itre sine ini epun, nge thaa tro pi kö Nyidrëti a thëthëhmine la aqane mele nyipici epun. Tro hë Nyidrëti a “fepi koi [epun] la ite thingene la hnengödrai, me nenge hui [epun] la manathithi uti hë atraqate cat.” (Mal. 3:10) Ketre, Nyidrëti mina fe a hamëne gufane la uati hmitrötre i Nyidrë, matre troa sajuëne la itre ewekë ka pë thei epun. Nyipici, ijije hi tro Iehova a xatua epuni troa cile catre kowe la itre iajojezi ne la itre sine ini epun!

[Ithueamacany]

Mekune Pala Kö Nyipunie?

• Nemene la emenen la itre iajojezi ne la itre sine ini epun?

• Nemene hë la thangan e troa xecie hnyawa e kuhu hni epun la itre ini hnei epuni hna mejiune kow, ngöne la kola cile catre kowe la itre iajojezi ne la itre sine ini epun?

• Tro epuni a hnëkë tune kaa troa cile kowe la itre iajojezi ne la itre sine ini epun?

• Epuni a atre tune kaa laka, Iehova a wanga atrune la aqane mele nyipici epun?