Itre Atr Hnei Nyipunie Hna Atre Me Hnëqa Ne Cainöje i Nyipunie
1 Tru la thangane ka loi maine ka ngazo pena kowe la mele së, qa ngöne la aqane ujë ne la itre atr hne së hna atre. Lolo catre la thangane hne së hna kapa qaathene la itre sine hmi së ka nyihluei Iehova, angatre a xatua së troa kuca la itre huliwa ka loi. (Heb. 10:24) Ngo, ame la itre fami së ka thaa ce hmi kö me easë, me itre sine huliwa së, me itre sine ini së, me itre ka lapa ezi së, me itre xane ju kö hne së hna atre, atreine hi tro angatre a ajojezine la mele së, matre tro sa xome la gojenyi ka thaa ihmeku kö memine la itre trepene meköti ne la itre keresiano. Tro fe angatre a “jele ngazone la thina [së] ka loi thei Keriso.” (1 Pet. 3:16) Tune kaa la aqane tro sa lapa xome la huliwa ne cainöj, ngöne la easë a mele memine la itre atr ka xele ma wange la hmi së?
2 Itre Atrene La Fami: Ame itre xaa ijin, ke, ma tro jë la trahmany, maine keme ka thaa hmi kö a wathebone la föe i angeic, me itre nekö i angeice troa cainöje trootro. Hna melëne lai hnene la ketre fami e Mexico. Hna nyiqaane hmi hnene föe me haa nekö i nyidro ka ala seven. Ngo ngöne la xötrei, ke, hna icilekeu la kem, pine laka thaa ajane kö nyidrë tro la fami nyidrë a cainöj, me hamë itusi trootro. Hnei nyidrë hna mekune ka hape, kola wajahuje la mele i angatre hnene la huliwa cili. Ngo hnene la ifënekö i nyidrë me haa nekö i nyidrë hna cile catre fë la mekuna i angatre troa nyihlue i Iehova, me catre cainöje lapaa. Thupene lai, hnene la trahmanyi hna trotrohnine la enyipi ewekëne la hna amekötine hnei Akötresie, ene la troa xome la huliwa ne cainöj, ene pe nyidrëti a hane ketre sipu nyihlue i Iehova jë. Thupene la 15 lao macatre, nyidrëti a hane kapa ju fe la nyipici; haawe, maine thaa catre ju la fami nyidrë ngöne la huliwa ne cainöj, hapeu, tro kö nyidrë a traqa kowe la pune cili?—Luka 1:74; 1 Kor. 7:16.
3 Itre Sine Huliwa: Eje hi laka, thaa tro kö a madrine hnene la itre xaa atr la aqane catre i nyipunie troa cainöje kowe la itre sine huliwa i nyipunie. Hnene la ketre söre hna qejepengöne laka, ame la ketre ijine kola ithahnatane la pune la fene ngöne la hna huliwa, ke, kola hnyimasai nyiidro la nyiidro a sipone troa e la Mataio mekene 24 koi angatr. Ngo, thaa nyimu drai kö thupene lai, nge kola qaja hnene la ketre sine huliwa koi nyiidro, ka hape, hnei angeice hna e lo mekene tus, ene pe angeice a haine la aliene ej. Haawe, hamë itusi ju fe kö koi angeic, me ce wange la ijine troa nyiqaane la etidi angeice me fö i angeic. Ame la pane etidi angatr, ke, uti hë e 2 h e hmahmakany. Thupene la hnaakönine etid, ke, kolo fe hë a sine la itre icasikeu, nge thaa qea ju kö, nge kola nue la sixa, me nyiqaane cainöje trootro. Maine thaa catre ju lai söre cainöjëne la mejiune i nyiidro koi itre xan, hapeu, tro kö a traqa kowe la pune cili?
4 Itre Sine Ini: Thaa sesëkötre kö së la itre tupathi ka traqa kowe la itre Temoë thöthi ngöne la hna ini, memine fe la xou ka eje thei angatr, pine laka, kola wange angazo angatre pine la huliwa ne cainöj. Hnene la ketre thöthi keresiano ne Amerika hna qaja ka hape: “Tru la xounge troa cainöje kowe la itre xaa thöth, wanga tro jë angatre a hnyima sai ni.” Watripëhë la itre ijine ka ijije koi angeice troa cainöje kowe la itre sine ini angeice ngöne la uma ne ini, me ngöne fe la teritoar. Tune kaa la aqane tro nyipunie a cile catre kowe la iajojezi ne la itre sine ini nyipunie? Mejiune ju koi Iehova, me thele ixatua thei Nyidrë matre kepe nyipunie hnei Nyidrë. (Ite edomë 29:25) Madrine jë laka, atreine nyipunie troa huliwane la Wesi Ula i Akötresie ngöne la huliwa ne cainöj. (2 Tim. 2:15) Hna nyiqaane atrunyi Iehova jë hnene lo thöthi hna qaja e caha hun, me sipo Nyidrë troa xatua angeice troa akökötrene la aja thei angeic, troa ithahnata kowe la itre sine ini angeic. Angeice ha cainöje ngöne la nöjei ijine ka ijije ngöne la hna ini, nge hetre thangane mina fe ka loi hnei angeice hna kapa qa ngön, ketre angeice fe hë a ithahnata kowe la nöjei atr hnei angeice hna atre. Angeice a nyipune ju ka hape: “Ame la Itre thöthi celë, ke angatre a ajane me thele mele ka loi kowe la itre drai elany, nge Iehova a nyijë së matre troa hane xatua angatr.”
5 Itre Atr Ka Lapa Ezi Së: Ma hetre atr ka lapa ezi së maine itre hne së hna atre ka xele ma wai së pine laka, itre Temoë i Iehova së, nge easë a catre fë la itre mekune së hna hneatrepene hnei Tusi Hmitrötr. Maine nyipunie a xouene la hnei angatre hna mekun, ke, isa hnyinge ju nyipunie ka hape: ‘Hapeu, atre kö angatre la yipici ka tro xomi së kowe la mele ka pë pun? Nemene la nyine tro ni a kuca matre troa ketr la hni angatr?’ Hna öhne hnene la ketre atre thupëne la sirkoskripsio laka, hetre thangane ka loi hna kapa hnene la hna nango cainöje lapaa. Xëwe jë koi Iehova matre tro Nyidrë a hamëne la trenge catre ka ijij, me inamacane göi troa catre thele la itre atr ka hni ka meköt.—Fil. 4:13.
6 Maine thaa catre fë kö së la mekuna së qëmekene la itre iajojezi ne la itre atr hne së hna atre, ke, easë lai a amadrinëne la itre ka icilekeu me easë, ngo hapeu, maine aqane ujë së hi la, ke, drei la ka troa öhnyi loi elany, angatre maine easë? Hna icilekeu me Iesu hnene la itre atrene la sipu nöje i nyidrë. Hnei nyidrëti mina fe hna xomihnine la itre trenge ithahnata ka akötre ne la itre trejine me nyidrë. Ngo, atre hi nyidrë laka, caasi hi la aqane tro nyidrë a xatua angatr, ene la tro nyidrë a catre ngöne la gojenyi hnei Akötresie hna amekötine koi nyidrë. Qa ngöne lai, hnei Iesu hna “xomi hnine la hna ikelikelë cate me nyidë hnene la nöjei ate ka ngazo.” (Heb. 12:2, 3) Nyipi ewekë tro sa xome la tulu i nyidrë. Catre jë troa wange atrune la hnëqa thei nyipunie, ene la troa cainöjëne la maca ne la Baselaia. Maine tro nyipunieti a kuca la ewekë cili, haawe, “tro [nyipunie] a amele [nyipunie] kö, me angate fe hna dei [nyipunie].”—1 Tim. 4:16.