Tha Meci Kö La Pun!

Hetrenyi ezine e Ierusalema la ketre traone ka co, Bethania la ëjen; nge ma 3 kilomet la enanyine la gojenyi qaa Ierusalema a tro cili. (Ioane 11:18) Hetre ewekë ka traqa e cili, ma itre hnepe wiike hi qëmekene tro Iesu a mec. Hna traqa la mec koi Lazaro ketre sinee i Iesu, nge hace pi hë la mec i angeic, ene pe meci ju hi.

Ame hë la Iesu a drei mejen, öni nyidrëti kowe la itretre drei nyidrë ka hape, Lazaro a meköl, nge nyidrëti a tro troa ahlë angeic. (Ioane 11:11) Ngo tha trotrohnine kö angatr la aliene la ithanata i Iesu, ene pe nyidrëti a qaja hnyawane ju koi angatr, ka hape: “Meci hë Lazaro.”—Ioane 11:14.

Ame hë la kola ase kelemi Lazaro, ma thupene la foa lao drai, kola traqa hnei Iesu e Bethania troa akeukawanyi Maretha, xa i Lazaro. Öni Maretha koi nyidrë: “Maine hnei cilieti kö la, maine tha meci kö la xang.” (Ioane 11:17, 21) Iesu pë hë a sa ju ka hape: “Ini hi la mele hmaca, memine fe la mel. Ame la ate lapaune koi ni, ngaca ma meci hë, te, tro angeic’ a mel.”—Ioane 11:25.

Iesu pë hë a easenyine jë la hua, matre troa amamane ka hape, tha nyidrëti kö a ewekë menu; nyidrëti a sue jë ka hape: “Lazaro fe löpi!” (Ioane 11:43) Sesëkötre ju hi la iatr la angatr a öhne la kola lö pi la wezipo.

Pi Lazaro pë hë lai, ngo lue hnei Iesu hë hna amelene panën. Ame ngöne la ketre ijin, ketre nekö jajinyi la hnei nyidrëti hna amelene hmaca; kolo nekö i Iairo. Ngo qëmekene tro Iesu a amele nyën, hnei nyidrëti mina fe hna qaja ka hape, nyën a meköl.—Luka 8:52.

Ame la kola meci hnei Lazaro memine lo nekö i Iairo, hnei Iesu pala hi hna qaja ka hape, nyidroti a meköl. Nge meköti hi troa qaja tune lai. Pine nemen? Pine laka, ame la easa meköl, tre easa meköle thatre, nge pë pi kö hleuhleu maine akötre hna dreng. (Ate Cainöj 9:5; wange ju lai itre mekune hna eköhagen, hna hape, “Kösë Kola Hmuli Zië.”) Trotrohnine hnyawa ha ekö hnene la itretre pane drei Iesu la pengöne la itre ka mec. Kola qaja hnene la ketre itus qene papale (Encyclopedia of Religion and Ethics), ka hape, ame kowe la itretre drei Iesu, ceitune la mec memine la kola meköl, nge ame la hua, tre hnë mano kowe la itretre lapaune ka mec.a

Easa madrine la easa atre ka hape, kola meköle hnene la itre ka mec hnine la itre hua, nge pëkö akötre hnei angatr hna hane dreng. Tha ewekë ka sihngödri hmaca kö la mec, nge tha nyine tro hmaca kö së a xouen.

“MAINE MECI HË LA AT, HAPE U, TRO ANGEIC’ A MELE HMACA?”

Maine nyipici laka, madrine së troa meköle hnyawa e jidr, ngo ame pe, pë pi kö ala casi e easë ka ajane troa meköle palua. Ngo nemene la ka troa hamë mejiune koi së laka, troa mele hmaca hnene la itre ka meköle e hnine la hua, tui Lazaro ekö, memine la nekö i Iairo jajiny?

Hetre ewekë hnei Iobu hna hnyingëne ekö lo qatre hë nyidrë, nge nyidrëti a drenge ka hape, easenyi hë tro nyidrëti a mec. Öni nyidrë: “Maine meci hë la at, hape u, tro angeic’ a mele hmaca?”—Iobu 14:14.

Ngo öni Iobu hmaca jë kö e sa, me qaja koi Akötresie ka hape, tro Nyidrëti a hë, nge tro Iobu a sa. Ke tru la hnei Nyidrëti hna mekune la huliwa ne la lue ime i Nyidrë. (Iobu 14:15) Ka xeci hnyawa e kuhu hni Iobu ka hape, Iehova a treqene la drai ne tro Nyidrëti a amelene hmaca la hlue i Nyidrë ka mele nyipici. Ngo hapeu, tha sipu mekuna i Iobu jë kö lai? Ohea.

Ame la itre atr hna amelene hnei Iesu ekö, tre celë hi sipu hatrene lai ka hape, hnei Akötresieti hna hamëne koi Iesu la mene ka ijij göi troa ngaane la mec. Tusi Hmitrötr a qaja ka hape, thei Iesu enehila la “ite ki ne mec.” (Hna Amamane 1:18) Tro Iesu elany a aukene la loka ne la qanahage ne la mec, tune lo aqane upe nyidrëti ekö lo atr troa ukune lo etë ka thinge la hua i Lazaro.

A nyimu a amexeje hnei Tusi Hmitrötr la hna thingehnaeane cili, laka troa hetre mele hmaca. Önine la ketre angela koi Daniela perofeta ka hape: “Tro eö a mano, me cile ngöne la edö i ’ö e tixenuë hë la ite drai.” (Daniela 12:13) Hetre ithanata fe hnei Iesu hna qaja kowe la angetre Sadukaio ekö, lo itre hene ne hmi angetre Iudra ka tha mejiune kö kowe la mele hmaca; öni nyidrë: “Menu hë nyipunie, tha ’te kö nyipunie la hna cinyihan, memine la mene i Akötesie.” (Mataio 22:23, 29) Ame pena Paulo aposetolo, öni nyidrë ka hape: “Ini a mejiune koi Akötesie . . . laka, tro ha mele hmaca la nöjei ka meköt, me ka tha meköti kö.”—Ite Huliwa 24:15.

EUE LA TROA MELE HMACA LA ITRE KA MEC?

Eue la troa amelene hmaca la itre atr ka meköti me itre ka tha meköti kö? Hnene lo angela hna qaja koi Daniela ka hape, tro angeic a mele hmaca “e tixenuë hë la ite drai.” Ka mejiune fe Maretha laka tro Lazaro a “mele hmaca ngöne la ijine mele hmaca, ngöne la drai hnapin.”—Ioane 11:24.

Ame lai “drai hnapine” cili hna qaja e hnine la Tusi Hmitrötr, tre kola qaja la ijine tro ha musi la Baselaia i Keriso. Pine laka, öni Paulo ngöne la tus i angeic ka hape: “Ke ijiji nyidëti troa musi uti hë e ase hë amë fene la lue ca i nyidë la nöjei ithupëjia asëjëihë. Meci la ithupëjia hnapine hna troa apaten.” (1 Korinito 15:25, 26) Celë hi sipu kepine matre loi e tro sa thith göi troa sipone matre, traqa pi la Baselaia i Akötresie, me eatr la aja i Nyidrë kowe la fene hnengödrai asë.b

Tune lo aqane qaja i Iobu, aja i Akötresie troa amelene hmaca la itre ka mec. Ame hë ngöne la ijine tro Nyidrëti a amele angatre hmaca, tro fe hi lai a hane apatrene trije la mec. Nge tha tro hmaca kö ketre a hnyinge ka hape, ‘E meci hë së, ke ejei hë lai?’