Kola Sa Hnei Tusi Hmitrötr
Tro kö a mele hmaca la ka mec?
Tro la atre xup a hamëne hmaca la mele ka loi
Iehova Akötresieti hi la Qeqe ne mel. (Salamo 36:9) Haawe, ijije kö tro sa hane mekune laka tro Akötresieti a amelene hmaca la itre ka mec? Tusi Hmitrötr a ithuecatre koi së laka, tro Nyidrëti a eatrëne elany la hnei Nyidrëti hna qaja. (E jë la Ite Huliwa 24:15) Ngo pine nemene matre Nyidrëti a troa eatrëne lai?
Ame ngöne la qaan, ame la aja ne la Atre Xupi së, tre, tro la atr a mele epine palua ngöne la ihnadro. (Genese 1:31; 2:15-17) Caasi pala hi la aja i Nyidrë kowe la nöjei atr asë. Kola akötrë Nyidrë, ke, Nyidrëti a öhne la hace ka ej the së enehila, tune la itre nöjei akötr së ka troa canga patr.—E jë la Iobu 14:1, 14, 15.
Troa mele e kaa la atr hna troa amelene hmaca?
Hapeu, hnei Akötresieti kö hna xupe la atr troa mele ekoho hnengödrai? Ohea. Hnei Akötresie hna xup la itre angela matre troa mele e koho hnengödrai. Nge ame itre atr, tre, hna xupi angatr troa mel e celë fen. (Genese 1:28; Iobu 38:4, 7) Haawe, tro sa pane ce wang la itre hnei Iesu hna kuca, ngöne lo nyidrëti a amelene hmaca la itre atr. Hnei nyidrëti hna aloine la mele ne la itre atr ekö e celë fen. Tune mina fe elany, tro nyidrëti a amelene hmaca la itre ka mec matre mele e celë fen.—E jë la Ioane 5:28, 29; 11:44.
Ngo, xalaithe hi la itre atr hnei Akötresie hna iën matre troa mele hmaca e koho hnengödrai, nge e cili tro angatr a itre u. (Luka 12:32; 1 Korinito 15:49, 50) Angatre hi lai itre ka troa joxu me musi me Iesu kowe la fen.—E jë la Hna Amamane 5:9, 10.