Kola Nyixetë Triji Së

“Eni a troa mec ngöne la kola qaja koi ni hnene la föeng ka hape, nyidrëti ha troa trotriji ni kowe la ketre nekö jajiny. Tha madrine kö ni koi nyidrë. Tha mekune kö nyidrëti la itre ewekë hnenge hna kuca koi nyidrë.” —Maria, Espagne.

“Ame la kola triji ni hnene la föeng, kösë kola genyi la ketre igötranene la ngönetreing. Luzi asë hë la itre hnei nyio hna ajan, me itre hna mekun troa kuca. Hetre itre drai eni a mekune ka hape, lolo hë la meleng, ngo saqe hi canga traqa hmaca koi ni la hace.”—Bill, Espagne.

HACE ka tru la kola nyixetë triji së. Nyipici laka, hetre itre trefën ka iqejemenukeu, me thel troa iloi.a Ngo, maine cile huti ju hë maine ethitre pena la faipoipo, ngo ka akötre pala hi la atr hna nyixetë trij. Nemene la aqane troa xomihnine la akötre cili?

ITRE XÖTR KA IXATUA

Ngacama kola akötr hnene la atr hna nyixetë trij, ngo hetre ixatua hna kapa qa hnine la Tusi Hmitrötr. Tha sihngödri kö koi Akötresie la hace ka ej thei angatr, nge Nyidrëti a ce akötr me angatr.—Malaki 2:13-16.

“Ngöne la nyimu mekun’ e kuhu hning, kola akeukawane la hninge hnene la ite nyine aupune qa thei cilie.”—Salamo 94:19.

Öni Bill, “Ame la eni a e la xötre celë, kösë Iehova a aupune la treijeng, tune la ketre kem kowe la kuku.”

‘Tro cilieti a nyipici kowe la atre mele nyipici.’—Salamo 18:25.

Itre treu ne nyixetë la föi Carmen. Öni Carmen, “Hnene la föeng hna mele hnihni ni. Ngo, eni a mejiune koi Iehova laka, tro Nyidrëti a mele nyipici koi ni. Tha tro jë kö Nyidrëti a nuetriji ni.”

“The hnehengazo kö, ngo ngöne la nöjei ewekë asë, jëne la itre thith, me xëwe, me thithi ne ole, qaja jë la itre sipo i nyipunie . . . tro ha thupëne la itre hni me mekuna i nyipunie hnene la tingetinge qaathei Akötresie, tingetinge hna thatreine trotrohnine hnei atr.”—Filipi 4:6, 7.

Öni Sasha, “Anyimua e ni la xötre celë. Tha mano kö ni thith. Hnei Akötresieti a hamë ni la tingeting ngöne la meleng.”

Ame kow asë hi la itre atr e caha, pëkö eloine troa xomihnine la akötr. Ngo, hnei angatr hna mejiune koi Iehova Akötresie, me xomi trengecatr qa hnine la Wesi Ula i Nyidrë. Öni Bill: “Ame koi ni, luuzi hë ni, ngo hnene la lapauneng hna xatua ni matre hetre aliene hmaca jë la meleng. Ame itre xaa ijin, kösë eni a tro nyipine “la hnathupe ne la ahnuene la mec,” ngo ce Akötresieti me ni.”—Salamo 23:4.

a Maine epuni a aja itre xaa ithuemacanyi göi troa iqejemenukeu, wange ju la zonal Hmeke Jë! ne 22 Eiperem 1999, “L’infidélité: des conséquences tragiques” “La réconciliation est-elle possible?” “Quand on opte pour le divorce”

Aqane Kuca Itre Xan

Lapa mekune jë la itre xötr ka iakeukawany.

Öni Bill, “Ame la eni a e la tusi Iobu me Salamo, tre, eni a ami hatrene la itre xötr ka ihmeku memine la hnenge hna melën. Eni a trotrohnin e cili ka hape, hna hane fe traqa kowe la itre ka cinyianyine la Tusi Hmitrötr la itre akötr, me xou tui eni.”

Hetre eloine la miuzik kowe la mele së.

Öni Carmen, “Ame la itre ijine tha meköle kö ni e jidr, eni a drei miuzik. Nge, kola axapone la hning.” Öni Daniel: “Hnenge hna inine lepe guitare, nge tingetinge la meleng ngöne la eni a drei miuzik.”

Fe pi la hni së.

Öni Daniel, “Tha majemine kö ni troa fe la hning koi itre xan. Eloine pe, alanyimu la itre enehmung, matre eni a ithanata e nöjei drai koi angatr. Hnenge hna qaja maine cinyianyi koi angatr matre troa fe la aliene hning. Tru catre la ixatua hnenge hna kapa.” Öni Sasha: “Tru catr la ixatua hnenge hna kapa qaathene la faming. Hnei nenë pala hi hna xatua ni. Ame la eni a pi ithanata, eahlo a xomi ijine troa drei ni. Hnei kaka hna xatua ni, me hnimi ni, me kuca hnyawa ni. Hnei nyidrëti hna xatua ni matre troa lolo trootro la meleng.”

The mano kö thith.

Öni Carmen, “Eni pala hi a thith. Drenge hi ni laka, tha nanyi kö Akötresie qaatheng, nge Nyidrëti a drei ni, me xatua ni. Ame ngöne la itre ijine jol, eni a easenyi catr koi Nyidrë.”