3 Ixatua Matre Troa Xomihnine La Itre Jol

Hetre itre jol hne së hna thatreine neën maine apatren. Ceitu memine la kola meci la ketre sinee së hna hnim, maine pena kola tithi së hnei meci ka pë nyin. Celë hi matre, easa thel la aqane troa xomihnine la itre akötr cili. Hapeu, ijiji Tusi Hmitrötre kö troa xatua së?

HNA TITHI HNEI MEC KA PË NYIN

Öni Rose, ketre jajinyi thöth ka 20 lao macatre, “Hna tithi ni hnene la ketre meci ka pë nyin, nge ka traqa lapa me akötr. Kösë tha loi hmaca kö la meleng.” Ngo ame la hnei Rose hna hnehengazon catrën, tre, ene la troa sewe angeic hnene lai mec troa hnehene la itre ini qa hnine la Tusi Hmitrötr, me xome la itre mekun ka sisitria. Ngo hna xatua angeic hnene la hna qaja hnei Iesu, ngöne Mataio 19:26: “Ateine Akötesie la nöjei ewekë asë.” Hnene laka akötre catre angeic, matre thatreine hë angeic e hnyawa la Tusi Hmitrötr. Celë hi matre hnei angeic hna nyiqaane drenge la kola e la Tusi Hmitrötr, me itre xa itusi ngöne ëternet.a Öni angeic, “Maine paatre ju la itre nyine dreng ke, thatreine jë kö ni troa acatrene la aqane imelekeung me Iehova.”

Tru la akötre thei Rose ngöne la angeic a mekune hmaca lo itre hnei angeice hna atreine kuca ekö, nge thatreine pë hë enehila. Ngo ame pe, kola akeukawane la hni angeic hnene la itre trengewekë ngöne 2 Korinito 8:12 hna hape, “Maine hna pane hetenyi la canga ajan, ame hna kapa thenge la hna heteny, ngo tha thenge kö la ka tha hetenyi kö.” Jëne la xötr, trotrohnine hë Rose laka, ka tru koi Akötresieti la itre ewekë hnei angeic hna kuca. Tha hnei angeice kö hna nue la meci angeic troa sewe angeic troa kuca la huliwa i Akötresie, ngo hnei angeice pe hna kuca la hna atrein.

AKÖTR

Öni Delphine, lo föe hne së hna ce ithanatane hë, “Hleuhleu catre ni thupene la kola meci la nekönge jajinyi ka 18 lao macatre. Matre eni a qaja ka hape, nyine u la tro na mel? Pëhë aliene la meleng enehila.” Hna akeukawane la hni Delphine la hna qaja ngöne Salamo 94:19, lo atre cinyihane la Salamo a ithanata koi Akötresie me hape, “Ngöne la nyimu mekun’ e kuhu hning, kola akeukawane la hninge hnene la ite nyine aupune qa thei cilie.” Matre öni eahlo, “Hnenge hna thithi koi Iehova me sipo Nyidrëti troa xatua ni, me aupune la hning ka akötr.”

Hnei Delphine hna catre huliwa ngöne la itre asosiasio. Ame koi eahlo, ceitui eahlo memine la ketre pen nyine colorier laka, ngacama xecie hë, ngo ijije palakö troa huliwan. Ketre tune mina fe, ngacama hleuhleu catr eahlo, ngo ijiji eahlo palakö troa xatua itre xan. Öni Delphine hmaca jë hi, “Trotrohnine hë ni laka, ame la eni a xom la itre trepene meköti ne la Tusi Hmitrötr, matre troa xatuane la itre hnainin ke, kösë Iehova a xatua angatr me eni mina fe.” Ketre, hnei eahlo hna amë ngöne la ketre liste, la ëjene la itre atr ka hane akötr e hnine la Tusi Hmitrötr. Öni Delphine, “Itre atr ka catre thithi angatr.” Hetre ini mina fe hnei eahlo hna xom, matre öni eahlo, “Troa sa la itre thithi së e hne së hna catre e la Tusi Hmitrötr.”

Hetre ketre ixatua hnei Delphine hna kapa. Ame la eahlo a catre inine la Tusi Hmitrötr, casi hi la hnei eahlo hna lapa mekun, ene la mel elany. Hna akeukawane la hni eahlo hnene la mejiun hna qaja ngöne la tusi Ite Huliwa 24:15 lo kola hape, “Tro ha mele hmaca la nöjei ka meköt, me ka tha meköti kö .” Pine nemene matre xecie koi eahlo laka, tro kö Iehova a amelene hmaca la neköi eahlo jajiny? Öni Delphine e sa ka hape, “Tro kö ni a öhne la neköng elany, ngöne la drai hna sa hnei Iehova. Kösë eni ha goeë nyio ngöne la götrane ka mingöming. Ame koi ni, ka mele nyën, nge qane lo nyën a mala, ka eje palahi la ihniming koi nyën.”

a Hetrenyi la itre nyine dreng ngöne la sit jw.org.

Tusi Hmitrötr a akeukawane la itre hni së ngöne ijine akötr

IXATUA QAATHEI AKÖTRESIE

Ka lualai la aqane sa hnei Tusi Hmitrötr la hnyinge celë, kola hape, “Eashenyi Iehova koi angat’ asë angete hë nyidë, angete hë nyidë ngöne la nyipici. Tro nyidëti a kuca la aja i angete qoue nyidë ; tro nyidëti a [goeëne] la hnei angate hna teij, me amele angat.” (Salamo 145:18, 19) Hapeu kolo kö a akeukawanyi së hnene lai xötr? Nemene la aqane tro Akötresieti a sa la thithi ne la itre atr ka mele nyipici koi Nyidrë?

KOLA AEGÖCATRENYI SË:

Ame itre xa ijin, hnene la itre jol matre easa kucakuca, nge kolo fe a nanazije la lapaune së. (Ite Edomë 24:10) Ngo Iehova “a thue egöcatene la ka kucakuca, me hamën’ atrune la cate kowe la ka pë men.” (Isaia 40:29) Hnei Paulo aposetolo fe hna cile kowe la itre jole ka tru, ngo öni nyidrë, “Ateine ni troa kuca la nöjei ewekë asëjëihë hnei nyidëti ate aegöcatenyi ni.” (Filipi 4:13) Hna aegöcatrenyi Paulo hnene la uati hmitrötre i Akötresie. Ijiji epuni mina fe troa hane sipone koi Akötresie la uati hmitrötre i Nyidrë.—Luka 11:13.

KOLA HAMË INAMACAN:

Nemene la nyine troa kuca, e aja së troa trotrohnin me trongëne la ketre eamo qa hnine la Tusi Hmitrötr? Hnei Iakobo hna cinyihan, ka hape, “Maine kete e nyipunie ka pë inamacan, tro angeic’ a sipo Akötesie, ate hamëne atrune kowe la nöjei ate asëjëihë, nge tha wesite kö, nge tro ha hamëne koi angeic.” (Iakobo 1:5) Loi e tro sa ujë thenge la itre thithi së, me e la Tusi Hmitrötr me trongëne la itre ini hna xom qa ngön. (Iakobo 1:23-25) E cili, tro hë sa kepe thangan me anyipicine ka hape, ka inamacane la eamo.

KOLA HAMË TINGETING:

Ngacama hetre hnei epuni hna hnehengazon, ngo ijije hi tro Iehova a akeukawane la hni me mekuna i epun. Öni Nyidrë, “The kuke hnine kö la kete ewekë ; ngo loi e cengöne amamane koi Akötesie la ite aja i nyipunie hnene la thith, me sipo, me ole; nge tro ha thupëne la ite hni nyipunie me ite mekune i nyipunie göi Keriso Iesu, hnene la tingetinge ka sisitia qa thei Akötesie hune la nöjei mekun’ asë.” (Filipi 4:6, 7) Haawe, sipo Iehova jë troa hamë epuni la tingeting.

Nemene la nyine troa kuca, e tha canga paatre kö la itre jole së? Tha tro pi kö sa mekune ka hape, hna nuetriji së hnei Akötresie. Ngacama hetrenyi palahi së la itre jol, ngo tro kö Akötresieti a hamëne la trengecatr, matre atreine xomihnine itre ej. (1 Korinito 10:13) Ketre, ase hë thingehnaean e hnine la Tusi Hmitrötr ka hape, calemi hë la ijine troa paatre la nöjei jol ka tru me ka hut!