Thith Thangane La Thith Koi Nyipunie

Qëmekene tro epuni a kuca la ketre ewekë, maine jë tro epuni a pane hnying ka hape, ‘Ka loi kö la koi ni?’ Hapeu, easa pi tru la easa hnyinge tune la, e traqa jë së thith? Waea. Meköti e troa pane hnyinge tune lai, ke, easa ajane troa atre la ka loi koi së. Hnei Iobu, ketre atr ka loi thiina hna hane hnyinge me hape: ‘Maine tro ni a hë Nyidrë, tro kö Nyidëti a sa koi ni?’—Iobu 9:16.

Ame ngöne la itre pane tane mekun, hne së hë hna ce wange laka ame la thith, tre, ka nyipi ewekë catre kö hune la itre hna majemine kuca e hnine la hmi, maine pena hune la ketre aqane aloine la itre mekun. Nyipici, Akötresieti a dreng la easa thith. Maine ka loi la aqane thithi së, nge easa sipone la itre ewekë ka ihmeku memine la aja i Iehova, haawe, tro hë Nyidrëti lai a kapa la itre thithi së. Eje hi lai laka, Nyidrëti a ithuecatre koi së troa easenyi catre koi Nyidrë. (Iakobo 4:8) Haawe, nemene la thangane koi së e tro sa nyipiewekëne la thith ngöne la ketre götrane la mele së? Tro sa ce wange la itre xa thangane ka loi.

Tingeting la mekun.

Ame la kola traqa itrai la itre jol me itre itupath ngöne la mele së, hapeu, tro kö sa hace me hnehengazo menu? Tusi Hmitrötr a upi së troa catre ‘thith, nge tha tro kö a mano’ ngöne la itre iijine cili. Ketre, ‘qaja jë koi Akötresie la itre sipo së.’ (1 Thesalonika 5:17; Filipi 4:6) Tusi Hmitrötr a qaja hnyawa koi së ka hape, maine tro sa thithi koi Nyidrë, ‘tro ha thupëne la ite hni së me ite mekuna së . . .  hnene la tingetinge ka sisitia qa thei Akötesie hune la nöjei mekun’ asë.’ (Filipi 4:7) Ijiji së hi troa mele tingeting, e hne së hna nue asë la itre hne së hna hnehengazone kowe la Tretretro së ekoho hnengödrai. Nyidrëti hi a ithuecatre koi së troa thithi tune lai. Kola qaja ngöne Salamo 55:22, ka hape: “Nuepi koi Iehova la hnei nyidëti hna hamë eö, nge tro nyidëti a sajuë eö.”

Nyimutre la itre atr e cailo fen, ka öhne hë la tingetinge cili. Hna qaja hnei Hee Ran, ketre föe ne Corée du Sud, ka hape: “Ngacama tru catre hnei jole ka traqa koi ni, ngo ame la eni a thithi thatraqane itre ej, uqa pi hi ni, nge hetrenyi hë ni la trengecatr troa xomihnine itre ej.” Kolo fe a hane qaja hnei Cecilia ketre föe ne Philippines, ka hape: “Eni la ketre thin, nge ka hnehengazone ni la lue nekönge jajiny, me thineng, ke, thatreine hë eahlo wangatrehmekunyi ni. Ngo hnene la thith, matre atreine hë ni melëne la itre akötreng. Atre hi ni ka hape tro kö Iehova a xatua ni matre troa thupë angatr.”

Ithuecatr me trengecatr qëmekene la itre itupath.

Maine jë ase hë epuni hane cile kowe la ketre jole ka tru catr, maine ketre ewekë ka axounyi epun, maine pena ka ahleuhleune la mele i epun? Maine tro sa thithi kowe la “Akötesieti ate akeukawan ’asë”, ijiji Nyidrëti hi troa aegöcatrenyi së. Öni Tusi Hmitrötre ka hape, Nyidrëti a ‘akeukawanyi së ngöne la nöjei akötre së asë.’ (2 Korinito 1:3, 4) Ame lo ijine kola tru la hace koi Iesu, hnei nyidrëti hna “sa watingöneca me thith.” Nemene hë la thangane lai? “Ame hna mama pi koi nyidëti la angela qa hnengödrai kola aegöcatrenyi nyidë.” (Luka 22:41, 43) Nehemia fe la ketre atr ka lapaun, hnei angeic hna akötr ngöne la kola thele hnene la itre atr ka iakötrë troa sewe angeic troa kuca la huliwa i Akötresie. Hnei angeic hna thith, me hape: “Qa ngöne lai, aegöcateneju la lue iwanakoimeng.” Kola amamane e thupene laka, hnei Akötresieti hna xatua angeic troa elë hune la xou i angeic me kuca hnyawa la huliwa i angeic. (Nehemia 6:9-16) Kola qejepengöne hnei Reginald, qa Ghana, la ketre hnei eahlo hna melën ngöne la thith, öni eahlo ka hape: “Ame la eni a thith, ngöne la itre ijine kola traqa itrai la itre jole koi ni, kösë lo eni a ithanatane la itre joleng kowe la ketre atr ka atreine troa xatua ni, me amamane hnyawa koi ni ka hape tha tro kö a sesew.” Nyipici, ijije hi koi Akötresie troa akeukawane la hni së ngöne la easa thithi koi Nyidrë.

Inamacan qaathei Akötresie.

Ame la itre mekune hne së hna axeciën, ke itre ka lapa huti nge ka troa ketri së me itre atr hne së hna hnim. Nemene la aqane tro sa inamacane ngöne la aqane tro sa xomi mekun? Tusi Hmitrötr a qaja ka hape: “Maine kete e nyipunie ka pë inamacan [ngöne itre ijine jol], tro angeic’ a sipo Akötesie, ate hamëne atrune kowe la nöjei ate asëjëihë, nge tha wesite kö, nge tro ha hamëne koi angeic.” (Iakobo 1:5) Maine tro sa sipone la inamacan, tro Akötresieti a hamëne la uati hmitrötre i Nyidrë, matre troa xatua së troa inamacane ngöne la easa xomi mekun. Haawe, ijije tro sa sipone la uati hmitrötr, pine laka Iesu a ithuecatre koi së ka hape, tro kö “Tetetro i nyipunie e koho hnengödrai a hamëne la Uati Hmitöte koi angete sipo anganyidë”—Luka 11:13.

Hnei Iesu fe hna hane sipo ixatua kowe la Tetretro i nyidrë ngöne la nyidrëti a xome la itre mekun ka sisitria. Tusi Hmitrötr a qaja ka hape, qëmekene tro nyidrëti a iën la 12 lao trahmany matre aposetolo i nyidrë, hnei ‘nyidëti hna thithi koi Akötesie ngöne la jidi asë.’—Luka 6:12.

Tui Iesu, nyimutre la itre atr enehila ka hane öhn la aqane kapa hnei Akötresie la itre sipo i angatr, ngöne la aqane troa inamacan troa axecië mekun. Regina, ketre föe ne Philippines a qaja la nöjei jol ka traqa koi eahlo. Tru la hace thei eahlo me hnepe lapa i eahlo, lo kola meci hnei föi eahlo, me pë huliwa, me hetrune casine la itre nekönatr. Nemene la ka xatua eahlo troa axeciëne hnyawa la itre mekune cili? Öni eahlo ka hape, “Hnenge hna mejiune kowe la ixatua i Iehova ngöne la thith.” Hnei Kwabena, qa Ghana, hna qaja la kepine matre angeic a sipo ixatua thei Iehova, öni angeice ka hape, “pë hë huliwang ngöne la hna xupi uma.” Ame la angeic a lapa mekune la itre ewekë ka traqa koi angeic, öni angeic ka hape, “Eni pala hi a thith koi Iehova troa xatua ni troa atreine axecië mekune ka lolo.” Öni angeic mina fe ka hape, “Eni a mejiune catr koi Iehova ke, hnei Nyidrëti hna xatua ni troa iën la ketre metie, ka aijijë ni troa inamacane göne la itre ewekë ngöne la götrane la nyipici me ngöne la ngönetrei.” Ijiji fe tro epuni a hane thith, matre tro Akötresie a eatrongë epun ngöne la itre mekune ka ketr la imelekeu i epun me Nyidrë.

Hne së lo hna ce wange hë la itre hnepe ewekë göne la thith me thangan ej koi epun. (Maine epuni a aja itre xa ceitun, wange ju ngöne la hna eköhagen “Itre Manathithi Ne La Thith.”) Ngo maine epuni a ajane troa hane kapa la itre manathithi cili, nyipiewekë tro epuni a pane atre Akötresie me kuca la aja i Nyidrë. Maine aja i epuni hi lai, eahuni a ithuecatre koi epun troa sipo ixatua kowe la Itretre Anyipici Iehova matre tro epuni a hane inine la Tusi Hmitrötr.a Celë hi lai pane ewekë nyine tro epuni a kuca, matre acatrene la imelekeu i epun memine la ‘Ate shamatine la thith.’—Salamo 65:2.