Aqane Xatua Së Hnene La Thith

Pine laka, ka ngazo catre la meci Pamela, hnei angeic hna canga tro troa wai droketre. Tha mano kö angeice thith koi Akötresie matre xatua angeic. Hna xatua angeic kö hnene la thith?

Öni angeic, “Tru la xoung la eni a lapa fë la mecing. Ngo hneng hna thith koi Iehova, ene pe trotro lapa ju hi la xoung. Nge tingetinge hë la hning. Tha patre pi kö la itre sinetrongene la mecing, ngo hnene la thith hna xatua ni. Matre, ame la itre xan a hnyingë ni ka hape, tune kaa ni, öning, ‘Kucakuca catre ni, ngo ka madrine ni!’ ”

Eje hi, tha tro kö sa treqene troa traqa koi së la itre jol, matre troa thith. Ka cile asë hi së kowe la itre jol, matre easa aja ixatua. Ijije kö tro la thith a xatua së?

Öni Tusi Hmitrötr: “Nue pi koi Iehova la ehnefe i eö, nge tro nyidrëti a sajuë eö. Tha tro pi kö nyidrëti a nue la ka meköti troa kei.” (Salamo 55:22, MN) Hane hi la ketre mekun ka lolo! Nemene la aqane xatua së hnene la thith? E tro sa thith thenge la aja i Akötresie, tro Nyidrëti a xatua së troa cile kowe la itre jol.—Wange ju la hna eköhagen “Aqane Xatua Së Hnene La Thith.”

Aqane Xatua Së Hnene La Thith

Tingeting

“Qaja jë la itre sipo i nyipunie koi Akötresie. Nge jëne Iesu Keriso, tro ha thupëne la itre hni me mekuna i nyipunie hnene la tingetinge qaathei Akötresie, tingetinge hna thatreine trotrohnine hnei atr.” (Filipi 4:6, 7) E tro sa fe la itre aliene hni së koi Akötresie, tro Nyidrëti a xatua së troa xomihni me inamacan ngöne la itre ijine jol.

Inamacan ka qaathei Akötresie

“Haawe, maine ketre thei nyipunie a aja inamacan, loi e tro pala hi angeic a sipo Akötresie, ke nyidrëti a hamën atrun koi nöjei atr, nge tha ka thele gele së kö. Ame hna troa hamë angeic.” (Iakobo 1:5) Thatreine kö tro sa axecië mekun hnyawa e kola traqa itrai koi së la itre jol. E tro epuni a sipon la inamacan qaathei Akötresie, tro hë Nyidrëti a amekunë epun la itre trepene meköt ka ej e hnine la Trengewekë i Nyidrë, ene la Tusi Hmitrötr.

Trengecatre me iakeukawany

“Ke ngöne la nöjei ewekë asë, hetre trengecatreng qaathene la atre hamë men koi ni.” (Filipi 4:13) Pine laka, Akötresie Ka Tru Trenge Men Iehova, ijiji Nyidrë troa hamë së la trengecatre matre tro sa cile kowe la itre jol. (Isaia 40:29) Öni Tusi Hmitrötr, Iehova la “Akötresie ne iakeukawany.” Haawe, ijiji Nyidrëti hi troa akeukawanyi së “ngöne la nöjei pengöne akötr.”—2 Korinito 1:3, 4.