Kola Tithi Së Hnene La Itre Mec Ka Pë Nyin

“Ame la kola thuemacanyi ni ka hape, kaser hë ni ngöne idrefitr me xel, ame koi ni, ka tro hë ni a mec. Ngo, ame hë la kola upi ni kowe la hnalapang hnei droketre, eni a trotrohnine ka hape, ‘HÖ, tha eje kö lo mekunang. Eni pë hë a troa xomihnine la mecing.’ ”—Linda, ka 71 lao macatre.

“Hetrenyi ni la ketre meci ka akötre catr. Kola ketr la itre none heng matre akötre catre la iqëmekeng ngöne la götrane mi. Ame ngöne la ketre drai, ke, akötre catre pala ha ni, matre hna tithi ni hnene la mec hna hape, meci fë mekun (dépression). Anyimua mekune ni troa hnöjua, ke, ame koi ni, pëkö ka trotrohni ni.”—Elise, ka 49 lao macatre.

Ketre trahmany ka wezipo hune ikaatr cememine la fami nyidrë

MAINE troa tithi epun maine ketre sinee i epuni pena hnene la ketre mec ka pë nyin, tro hi epuni a trotrohnine la hleuhleu ka ej thei nyidro. Ketre, epuni fe a cil kowe la itre mekun ka ajolë epun. Maine jë, tro epuni a xou, ke, thatre kö epuni la hna troa qaja hnei droketre, memine la ejolene troa thele drösinöe, maine ethane pena la drösinöe. Tha ka hmaloi kö la kola tithi së hnene la ketre mec ka tru. Ame ngöne la ijine cili, kola traqa koi së la xou.

Tro sa thele ixatua ekaa? Alanyimu la itre ka qaja ka hape, hna akeukawane la hni angatr hnene la thith, memine la hna e la itre xötre ne la Tusi Hmitrötr. Hna xatua angatre fe hnene la fami me itre enehmu i angatr.

AQANE KUCA ITRE XAN

Öni Robert, ka 58 lao macatre ka hape, “Maine tro sa lapaune koi Akötresie, tro Nyidrëti lai a xatua së ngöne la easa akötre fë la meci së. Thithi jë koi Iehova. Qaja jë koi Nyidrë la aliene hni së. Sipone jë la uati hmitrötr, me trengecatr ka ijij matre tro sa atreine xomihnine la mec, me hamë ithuecatre kowe la hnepe lapa së.”

“Hetre ixatua ka tru hna hamëne hnene la hnepe lapa së. Itre xan e angatr a hë ni e nöjei drai, me hnying ka hape, ‘Tune kaa Roro?’ Kola ithuecatre koi ni hnene la itre enehmung ka lapa ngöne la itre götrane gaa nany. Hnei angatr hna catre xatua ni, matre lolo hmaca ha la meleng.”

Maine epuni a mekun troa tuëne la ketre atr ka wezipo, hanawang la hna qaja hnei Linda. Öni angeic: “Ame la atr ka wezipo, tha ajane kö angeic troa ithanatane la meci angeic, ke, angeic a ajan troa tune la itre xan. Ngo, loi e tro pe a ithanatane la itre xaa ewekë.”

Hetre trengecatre hne së hna kapa qaathei Akötresie, me ixatua qa hnine la Tusi Hmitrötr, me qaathene la fami së me itre enehmu së. Celë hi ka xatua së lai troa trotrohnine laka, hetre eloine la troa xomihnine la akötr, ngacama hna tithi së hnene la ketre mec ka pë nyin.

Itre Xötr Ne La Tusi Hmitrötr Ka Ixatua

Mejiune jë koi Akötresie.

“Hnenge hna thele Iehova, ame hnei nyidëti hna [drei] nie, me amele ni qa ngöne la ite qoung’ asë. Hna hëjë hnene la ate ka aköte celë, nge [drenge] hë Iehova.”—Salamo 34:4, 6.

Öni Linda, hna qaja ha e caha: “Tha hnenge kö hna thith me hape, ‘Aloine jë la mecing.’ Öninge pe, ‘Epi xatua ni jë troa catr, me xomihnine la mecing.’ ”

E Tusi Hmitrötr jë matre troa catr.

“Tha tro kö a qaja hnene la ate lapan’ eje, ka hape, Ini a mec”—Isaia 33:24.

Lapa mekune jë la itre hna thingehnaeane hnei Akötresie. Celë hi ka troa hamë mejiun, me trengecatre matre troa xomihnine la jol.

Sipo ixatua jë kowe la fami me itre enehmu i epun.

“Ate ihnimi la enehmu o ijin’ asë, ngo ngöne la aköte jini angeicë hë.”—Ite Edomë 17:17.

Öni Elise, lo föe hna qaja e caha, “The lapa casi kö, sipo ixatua jë kowe la itre enehmu. Ame itre xaa ijin, tro epuni a mekune ka hape, epuni caas, pëkö ka trotrohni epun, nge tha Akötresieti kö a semesine epun. Ngo, thele jë pe troa ce mele me itre xan!”