Aqane Troa Apatrene La Mec
HNENE la tha idrei Adramu me Eva, matre traqa pi la ngazo me mec kowe la nöjei atr asë. Ngo ame pe, tha saze kö la aja i Akötresie. Hna amexeje pala hi e hnine la Tusi Hmitrötr laka, tha saze kö la aja i Nyidrë kowe la itre atr.
“Tro ha la ange ka meköti a hetenyi la nöj, me lapa palua kö ngön’ ej.”—Salamo 37:29.
“Tro nyidëti a cengöne apatene la mec, nge tro Joxu Iehova a köle tije la ite tenge timida qa ngöne la nöjei qëmek’ asëjëihë.”—Isaia 25:8.
“Tro ha apatrene la mec, lo ithupëjia tixenuë.”—1 Korinito 15:26.
“Pë hmaca kö mec, me hleuhleu, me treij, me akötr.”—Hna Amaman 21:4.
Nemene la aqane tro Akötresieti a ‘apatrene’ la mec? Öni Tusi Hmitrötr, “Tro ha la ange ka meköti a . . . lapa palua kö ngön’ ej [ihnadro].” Ngo, kolo fe a qaja ka hape, “pëkö ate ka meköti e celë fen, ate kuca la loi nge pë fe kö ngazo.” (Ate Cainöj 7:20) Hapeu, kolo kö lai a qaja ka hape, tha nyipiewekë hmaca kö troa trongëne la itre trepene meköti Akötresie matre troa hetrenyi la mele ka pë pun? Ohea! Thatreine kö Nyidrë troa ujë tun, ke, ame “Akötresie ka thatreine thoi.” (Tito 1:2) Haawe, nemene la aqane tro Akötresie a eatrëne la aja i Nyidrë kowe la itre atr?
TRO AKÖTRESIE A “CENGÖNE APATENE LA MEC.”—ISAIA 25:8
THUPENE MEL LA KA TROA THEPE SË QA NGÖNE LA MEC
Hetre hnei Iehova Akötresie hna hnëkën matre troa thapa la itre atr qa ngöne la mec. Hnei Nyidrëti hna hamëne la thupene mel. Ame la thupene mel, tre, ketre manie hna hamën, nge ka ihmeku memine la ngazo hna kuca, maine manie hna amekötine troa hamëne hnene la hnakootr.[1] Pine laka, itre ka ngazo asë hi la itre atr, nge edrö i angatr la mec, Tusi Hmitrötr a qaja ka hape: “Tha ’teine kö troa amelene la kete tejin ; nge tha ’teine kö la ate troa hamë Akötesie la thupe i angeic, (sisitria catr la mele ne la atr, nge kösë tru pala ha la thupen, matre thatreine kö ketre troa të).”—Salamo 49:7, 8.
Ame la kola mec la atr ka tha pexeje kö, angeice hi a nyithupene la itre sipu ngazo i angeic. Ngo tha ijiji angeice kö troa nyi thupene mel koi angeice kö, me itre xan, ke, tha ka ihmeku kö. (Roma 6:7) Nyipiewekë tro la atr ka pexej, me ka pë engazon, a nue la mele i angeic, tha thatraqai angeice kö, ngo thatraqai së.—Heberu 10:1-4.
Celë hi hnei Akötresie hna hnëkën. Hnei Nyidrëti hna upe la nekö i Nyidrë, ene Iesu, troa uti kowe la fen, me xom la pengöi atr. Ame la kola hnaho Iesu, atr ka pexeje nyidrë. (1 Peteru 2:22) Öni Iesu, hnei nyidrëti hna uti kowe la fen troa ‘hamëne la mele i nyidrë nyine nyi thupene mel kowe la ka ala nyim.’ (Mareko 10:45) Hnei nyidrëti hna mec, matre troa të la itre ngazo së, me thepe së qa ngöne la mec. Celë hi ka aijiji së troa hane kapa la mel ka pë pun.—Ioane 3:16.
EUE LA TROA APATRENE LA MEC?
Ame enehila, kola eatr la itre hna perofetane hnei Tusi Hmitrötr. Kola “traqa la itre ijin akötr hna thatreine xomihnin,” nge kola amamane laka, easa melëne la “itre drai ne la pun” ne la fene i Satana. (2 Timoteo 3:1) Troa nyipune la itre drai ne la pun hnene “la drai ne iameköti, me drai ne apatrene la itre atr ka ngazo.” (2 Peteru 3:3, 7) Ngo, troa amelene la itre ka hnimi Akötresie qa ngöne la isi, me amanathithi angatr, me hamëne “la mele ka pë pun.”—Mataio 25:46.
Hnei Iesu hna traqa troa ‘hamëne la mele i nyidrë nyine nyi thupene mel kowe la ka ala nyim.’—Mareko 10:45
Nge, itre milio lao atr ka troa kapa la mele ka pë pun ngöne la kola amele angatr hmaca. Ame lo Iesu a traqa e Naina, hnei nyidrëti hna amelene hmaca la ketre atr. Ame e cili, hna mec la neköne ka cas ne la ketre sine föe, ame hnei Iesu hna “utipi eahlo” me amelene la nekönatr. (Luka 7:11-15) Öni Paulo aposetolo: “Eni fe a mejiune koi Akötresie laka, tro kö nyidrëti a amelene la itre atre ka meköt, me ka tha meköti kö.” Ketre mejiune lai ka amamane la ejuine la ihnimi Akötresie kowe la itre atr.—Itre Huliwa 24:15.
Itre miliar lao atr ka troa mele palua. Öni Tusi Hmitrötr: “Tro ha la ange ka meköti a hetenyi la nöj, me lapa palua kö ngön’ ej.” (Salamo 37:29) Ame ngöne la ijine cili, tro hë angatr a egöcatr, me madrin. Tro angatr a öhne la kola eatr lo itre trengewekë i Paulo, lo hna cinyihan a 2 000 hë lao macatre enehila, kola hape: “Mec, ekaa ha lo hnei eö hna ngaan? Mec, ekaa ha la mene i eö?” (1 Korinito 15:55) Tro ha apatrene palua la ithupëjia me easë, ene la mec!